Exodus 13:1-22
13 Áko Bóhólníihii éí Mózes yichʼįʼ haadzíiʼgo kóní,
2 Ízrel dineʼé bitahgi alą́ąjįʼ yizhchíinii tʼáá átʼé diyingo shá nihidíʼaah; jó, diné áádóó alı̨́ı̨́ʼ éí daashí.
Dííkʼǫsh tʼáágééd bááh ályaii bee ádaʼazįįd
3 Áko Mózes éí dineʼé áyidííniid, Díí jínígíí béédaałniih: éí Ííjip kéyahdę́ę́ʼ naalteʼ danohłı̨́ yę́ędóó chʼínoonáa niʼ, háálá Bóhólníihii éí díí kéyahdóó bibee adziilii yee chʼéénihíʼnil, áko dííkʼǫsh bił bááh ályaii tʼáadoo nídaohdı̨́hí.
4 Éíbib* yiziłígíí binih díí jı̨́ı̨́ góneʼ chʼínoonáa niʼ.
5 Áko Bóhólníihii éí Kéínan dineʼé áádóó Het dineʼé áádóó Ámor dineʼé áádóó Háíva dineʼé índa Jííbas dineʼé bikéyahígíí; éí danihizhéʼé yę́ę yichʼįʼ yee ádee hadoodzíiʼgo kéyah nihaididooʼáłígíí, éí kéyah yáʼáhootʼéehgi abeʼ índa tsésʼná bitłʼizh bee ádaʼazįįdgo hazʼą́ąjįʼ anihííʼeezhgo, áadi díí yiziłígíí binih díí nahadlá nídaołʼaah doo.
6 Tsostsʼid jı̨́ éí dííkʼǫsh tʼáágééd bááh ályaii nídaohdı̨́įh doo, áádóó tsostsʼid jı̨́ aleeh góneʼ Bóhólníihii bichʼįʼgo dahodíínóhsingo áłah náhdleeh doo.
7 Tsostsʼid jı̨́ dííkʼǫsh tʼáágééd bááh ályaii nídaohdı̨́įh doo; dííkʼǫsh bił bááh ályaii danihighandi nidi doo łaʼ siʼą́ą da doo; tʼáá nihił nahazʼánígóó nidi doo łaʼ dííkʼǫsh siʼą́ą da doo.
8 Áko éí bijı̨́ niyeʼ bee bił hólneʼ doo; Ííjip kéyahdę́ę́ʼ chʼéénísdzáago Bóhólníihii shá kódzaaígíí bąą díí kódeiitʼı̨́.
9 Áko díí bee ééhózinii nílaʼ bikáaʼ doo, áádóó bee ééhániihii nítáaʼgi bikáaʼ doo, áko Bóhólníihii bibee hazʼáanii baa yáníłtiʼ doo, háálá Bóhólníihii bibee adziilii yee Ííjip kéyahdę́ę́ʼ háánihííʼeezh.
10 Éí bąą díí bikʼeh hoogáałii bikʼeh dahonołʼı̨́įgo tʼáá nináháhááh bikʼeh nahadlá nídaołʼaah doo.
Alą́ąjįʼ nidahachíhígíí
11 Áko Bóhólníihii éí Kéínan dineʼé bikéyah yiih nihííʼeezhgo éí nihichʼįʼ áádóó danihizhéʼé yę́ę yichʼįʼ yee ádee hadoodzíʼígíí bikʼehgo, áádóó éí kéyah nihaidiníʼą́ągo
12 alą́ąjįʼ nidahachíhígíí tʼáá ałtso Bóhólníihii bá atsʼádahidohʼaah doo, índa alı̨́ı̨́ʼ nihee dahólóonii alą́ąjįʼ deishchíinii ałdóʼ dabikąʼígíí tʼáá ałtso Bóhólníihii bí doo.
13 Áko télii alą́ąjįʼ nidahachíhígíí tʼáá ałtso bitsáskʼehgi dibé yázhígo bee tʼą́ą́ʼ nááhidííłnih, doodaiiʼ, Doo tʼą́ą́ʼ nááhideeshnih da, nínízingo éí tʼóó bikʼos kʼídíítih, áádóó Ízrel dineʼé alą́ąjįʼ hayeʼké há nidahaazhchíinii tʼáá ałtso éí dibé yázhí bee tʼą́ą́ʼ náádahojiiłniih doo.
14 Áko ííshją́ą́ háadida léiʼ niyeʼ nanídééłkidgo kóníigo, Díishąʼ haʼátʼíí biniyé kódaahtʼı̨́? Áko kótʼéego bichʼįʼ hadíídzih, Bóhólníihii bibee adziilii yee Ííjip kéyahdi naalteʼ daniidlı̨́ yę́ędóó háánihííʼeezh.
15 Ákódzaago Féro yisteeʼgo kʼasdą́ą́ʼ tʼáadoo nihééʼníłniiʼ da, áko Ííjip kéyahgi Bóhólníihii éí alą́ąjįʼ daazhchíinii ałtso íísdįįd; diné alą́ąjįʼ bá daazhchíinii índa alı̨́ı̨́ʼ alą́ąjįʼ deishchíinii ałtso íísdįįd; éí bąą alą́ąjįʼ nidahachíihii dabikąʼii tʼáá ałtso Bóhólníihii bichʼįʼgo náádahashniih, nidi shiyeʼké alą́ąjįʼ nidahachíihii tʼáá ałtso tʼą́ą́ʼ náádahashniih.
16 Áko díí bee ééhózinii nílaʼ bikáaʼ doo, áádóó bee ééhániihii nítáaʼgi bikáaʼ doo, háálá Bóhólníihii bibee adziilii yee Ííjip kéyahdę́ę́ʼ háánihííʼeezh.
Kʼos níyizígíí áádóó kǫʼ níyizígíí
17 Ákódzaago Féro éí Ízrel dineʼé yééʼníłniiʼgo Diyin God éí Filístiya dineʼé bikéyah góneʼ doo dahodiiʼeezh da, azhą́ áájí áhání nidi, háálá Diyin God ání, Éí doodaléiʼ anaaʼ hodooleeł yaa ákodaniizı̨́įʼgo łahgo átʼéego tsíńdadookosgo Ííjip kéyahgóó tʼą́ą́ʼ nihéédooʼnééł.
18 Nidi Diyin God éí diné yooʼishgo honoojíígóó Tónteel Łichííʼ bichʼįʼgo yiníʼeezh, áko Ízrel dineʼé éí anaaʼ yiniyé hashtʼeʼádadólzingo Ííjip kéyahdę́ę́ʼ chʼíníná.
19 Áko Mózes éí Jóseph yę́ę bitsʼin yoojih, háálá Jóseph éí Ízrel dineʼé hachʼįʼ ádee hadadeesdzíiʼgo ájíní, Diyin God tʼáá aaníí nihaa hodooleeł, índa kodóó dah doohnéehgo shitsʼin deínóhjáah dooleeł.
20 Áko Sákath hoolyéédóó dah náázhdiiʼnáago Íítam hoolyéedi honoojí bibąąhgi nizhníná.
21 Áádóó Bóhólníihii éí jı̨́įgo kʼos níyizgo yee halą́ąjįʼ hoolʼingo hooʼish, índa tłʼéeʼgo kǫʼ níyizgo bee há hoolʼingo hooʼish, áko jı̨́įgo índa tłʼéeʼgo éí bikʼehgo joonééł.
22 Áko jı̨́įgo kʼos níyizígíí índa tłʼéeʼgo kǫʼ níyizígíí tʼáadoo hatsʼáldoh da.
Footnotes
^ Éíbib nídízídígíí Diné kʼehjígo Tʼą́ą́chil jiníigo óolyé.
