Exodus 14:1-31
14 Áko Bóhólníihii éí Mózes yichʼįʼ haadzíiʼgo kóní,
2 Ízrel dineʼé bichʼįʼ handziih, naanáhkáahgo Páí-haháírath bichʼįʼgi nidoohnééł, éí Mígdol hoolyéédóó tónteel bichʼijígo Béíyal-zíífan bíighahgi tónteel bibąąhgóó nidoohnééł.
3 Áko Féro ádidooniił, Ízrel dineʼé éí kéyahgi tsístłʼaaskai lá; honoojí yiniiłtʼaaskai.
4 Áko Féro bijéí náádeestłʼisgo hakééʼ nídidoojahgo hódoołnééł, índa Féro áádóó bisiláo biniinaa shaa hodooʼnih, áko shí, Bóhólníihii nishłı̨́įgo Ííjip dineʼé bił béédahodoozįįł. Áko tʼáá ákódadziidzaa.
5 Áko Ííjip dineʼé aláahgo binanitʼaʼí éí Ízrel dineʼé yóóʼíínánígíí bee hoł hóoneʼ, áko Féro índa há nidaalʼaʼí dabijéí yee diné yikʼijįʼ daazlı̨́įʼgo tsídadeezkéezgo ádadííniid, Díishąʼ haa deiitʼįįd; Ízrel dineʼé nihá nidaalʼaʼ yę́ę béédaʼsiilniiʼ lá.
6 Áko Féro bitsinaabąąs bijáád naakiígíí hashtʼeyiilaago bidineʼé yił dah diiná.
7 Áko tsindaabąąs bijáád naakiígíí hastą́ądi neeznádiingo atah haasdláaʼgo áádóó Ííjip kéyahdi tsindaabąąs bijáád naakiígíí tʼáá ałtso bee índa bikʼehgo nidaʼabaahígíí tʼáá bił dashdiiná.
8 Áko Bóhólníihii éí Féro Ííjip dineʼé aláahgo yinanitʼaʼí yijéí yiyííłtłʼisgo Ízrel dineʼé yikééʼ nídiibaaʼ, jó, Ízrel dineʼé tʼáadoo náhoniyésí dah diiná.
9 Áko Ííjip dineʼé éí Féro bilı̨́ı̨́ʼ índa bitsindaabąąs bijáád naakiígíí áádóó łı̨́ı̨́ʼ yee nidaabaahii índa bisiláo tʼáá ałtso yił hakééʼ níná, áko tónteel bibąąhgi Páí-haháírath bichʼįʼgi Béíyal-zíífan bíighahdi nizhnínáago hóníłná.
10 Áko Féro éí Ízrel dineʼé yitʼáahjįʼ yinéełgo dabiiłtsą́, jó, Ííjip dineʼé hakééʼ yinééł lá. Áko tʼóó báhádzidgo Ízrel dineʼé nídadzisdzíidgo éí Bóhólníihii yichʼįʼ hadadeeshghaazh.
11 Áko Mózes ádayidííniid, Daʼ Ííjip kéyahdiísh łeehwiiʼnííł ádaadingo honoojíidi dadíníiʼnééł biniyé nihííʼish? Haʼátʼéegoshąʼ Ííjip kéyahdóó hanihííníʼeezhgo doodahági ánihiinilaa?
12 Shą́ą́ʼ, Ííjip kéyahdi kódadiiʼníigo nichʼįʼ hadasiidzíiʼ niʼ. Nihíniʼdii nideiikaigo Ííjip dineʼé tʼéí bá nideiilʼaʼ. Jó, honoojíigi tʼóó díníiʼnéłígíí biláahgo Ííjip dineʼé bá nideiilʼaʼjígo nihá yáʼátʼéeh doo nítʼééʼ.
13 Áko Mózes éí dineʼé áyidííniid, Tʼáadoo nídaałdzidí; dziilí bee adahidíínóhsı̨́, áko Bóhólníihii bee yisdáʼiildéehii deidoołtsééł; éí díí jı̨́ nihichʼįʼ ííshjání íidoolííł, jó, Ííjip dineʼé díí jı̨́ daohʼínígíí hoolʼáágóó doo náádeidoołtséeł da.
14 Bóhólníihii nihá naabaah doo; nihí éí tʼóó hashtʼedínóhtʼé.
15 Áko Bóhólníihii éí Mózes áyidííniid, Haʼátʼíísh biniyé náshiinikąąh? Ízrel dineʼé, Bíniʼdii náásgóó wohnééł, bidiní.
16 Áko nigish nídiitįįhgo tónteel bikáaʼjigo bił dah didiilníihgo ałtsʼádoolkʼoł, áádóó Ízrel dineʼé éí tónteel biyiʼ niʼ yíłtseii yikááʼ haʼnaa nidookah.
17 Shí lą́ą, tʼáá shí, Ííjip dineʼé bijéí dadeestłʼisgo nihikééʼ adoonééł, áko Féro áádóó bisiláo áádóó bitsindaabąąs bijáád naakiígíí índa łı̨́ı̨́ʼ yee nidaabaahii bikʼeh díshdlı̨́įʼgo bee shaa hodooʼnih.
18 Ííjip dineʼé éí shí Bóhólníihii nishłı̨́įgo hoł béédahodoozįįł. Féro áádóó bitsindaabąąs bijáád naakiígíí índa łı̨́ı̨́ʼ yee nidaabaahii bikʼeh díshdlı̨́įʼgo bee shaa haʼniihgo ádeeshłííł.
19 Áko Diyin God bidiyingo naalʼaʼí éí Ízrel dineʼé dah yinéełii yooʼishígíí dah diiyáago hakéédę́ęʼgo niníyá, áádóó kʼos níyizígíí hadááhdóó dah diildogo hakéédę́ęʼgo niildo.
20 Áko Ííjip dineʼé dah yinéełii índa Ízrel dineʼé dah yinéełii bitaʼ gónaa niildo, áko Ííjip dineʼé bichʼįʼgo éí kʼos áádóó chahałheeł hazlı̨́ı̨́ʼ, nidi łahjiígíí éí tłʼéeʼgo bá adinídíín, ákohgo tʼáadoo ałtʼáahjįʼ dazdeeskaí yiską́.
21 Áko Mózes éí tónteel yikáaʼjigo dah didiilniiʼgo Bóhólníihii éí haʼaʼaahdę́ęʼgo tłʼééʼ bíighah ayóó átʼéego níyolgo áyiilaa; éí bee tónteel tʼą́ą́ʼ anáálzhiizh; tónteelígíí ałtsʼá yííłkʼolgo niʼ yíłtseigo áyiilaa.
22 Áko Ízrel dineʼé éí tónteel biyiʼ niʼ yíłtseii yikááʼ haʼnaa deezná, áko honishʼnáájí índa honishtłʼají ałtsʼą́ą́hjí tó nihidiiʼá silı̨́ı̨́ʼ.
23 Áko Ííjip dineʼé éí tónteel biyiʼ góneʼ hakééʼ dah diináago Féro bilı̨́ı̨́ʼ áádóó bitsindaabąąs bijáád naakiígíí índa łı̨́ı̨́ʼ yee nidaabaahii tʼáá ałtso yee hakééʼ ííná.
24 Ákódzaago yikáítʼáahjįʼ ayííłką́ągo kǫʼ éí kʼos bił níyizgo yildohígíí biníkáádę́ę́ʼ Bóhólníihii éí Ííjip dineʼé siláo yinééłʼı̨́įʼgo yichʼįʼ hodiisnááʼ.
25 Áko tsindaabąąs bijáád naakiígíí bijáád yitsʼą́ą́ʼ yeidiyiiníiłgo nidahidinikááh silı̨́ı̨́ʼ; éí bąą Ííjip dineʼé ádadííniid, Bíniʼdii Ízrel dineʼé bitsʼą́ąjigo tʼą́ąjįʼ dah didiijah, háálá Bóhólníihii éí Ííjip dineʼé yichʼįʼ anaaʼ ííłʼı̨́.
26 Áádóó Bóhólníihii éí Mózes áyidííniid, Tónteel bikáaʼjigo dah didiilnííh, áko Ííjip dineʼé áádóó bitsindaabąąs bijáád naakiígíí índa łı̨́ı̨́ʼ yee nidaabaahii tó bikʼi diilkǫǫh.
27 Áko Mózes éí tónteel bikáaʼjigo dah didiilniiʼ áádóó hayííłką́ągo tónteel ałchʼįʼ kónádzaago nídiilkǫʼ, áko Ííjip dineʼé éí tónteel biyiʼ tsístłʼaaskai, áádóó Bóhólníihii éí Ííjip dineʼé bikʼijįʼ tó ahinéidiiłkʼolgo íísdįįd.
28 Áko tóhígíí ałchʼįʼ kónádzaago tsindaabąąs bijáád naakiígíí índa łı̨́ı̨́ʼ yee nidaabaahii áádóó Féro bisiláo tʼáá ałtso tónteel biyiʼ góneʼ hakééʼ íínáago tó bikʼi diilkǫʼ; tʼááłáʼí nidi tʼáadoo łaʼ yidzíiʼ da.
29 Nidi Ízrel dineʼé éí tónteel biyiʼ niʼ yíłtseii yikááʼ haʼnaa niníná, jó, honishʼnáájí índa honishtłʼají ałtsʼą́ą́hjí tó nihidiiʼá.
30 Ákódzaago tʼáá éí bijı̨́ı̨́dą́ą́ʼ Bóhólníihii éí Ííjip dineʼé bitsʼą́ąjįʼ Ízrel dineʼé yisdáyíínil, áko Ízrel dineʼé éí Ííjip dineʼé daneeznáago tábąąhgóó nihidílʼáago dayiiłtsą́.
31 Áko Ízrel dineʼé éí Bóhólníihii ayóó átʼéego Ííjip dineʼé áyííłʼįįdígíí dayiiłtsą́ągo Bóhólníihii deidísin silı̨́ı̨́ʼ, áádóó Bóhólníihii índa bá naalʼaʼí Mózes dayoosdląąd.