Exodus 15:1-27
15 Ákohgo Mózes índa Ízrel dineʼé díí sin yee Bóhólníihii yichʼįʼ dahóótáál kódaaníigo,
Bóhólníihii bichʼįʼ hashtaał doo,háálá bí ayóó átʼéego akʼeh deesdlı̨́ı̨́ʼ;łı̨́ı̨́ʼ áádóó bikʼi dah nidzizdáii tónteel yiih hwiistłʼííd.
2 Bóhólníihii éí bee shidziilii áádóó shiyiin nilı̨́, kʼad bee yisdééyáii silı̨́ı̨́ʼ,bí shiDiyin God nilı̨́, áádóó baa hashniih doo;*shizhéʼé yę́ę biDiyin God nilı̨́; éí ayóó átʼéego íínísin doo.
3 Bóhólníihii éí diné anaaʼ yikʼeh didlíinii nilı̨́,Bóhólníihii bee biʼdójí.
4 Féro bitsindaabąąs bijáád naakiígíí áádóó bisiláo éí tónteel yiih yiyiistłʼííd,áádóó bisiláo binanitʼaʼí tsʼídá aláahgo dahayóí yę́ę Tónteel Łichííʼ biiʼ tó bííghą́ą́ʼ.
5 Tó ditáanii bikʼi diilkǫʼgo tségi átʼéego táłtłʼááh níídeeʼ.
6 Bóhólníihii nílíinii, nílaʼ nishʼnáájí bee ayóó ánítʼéego nidziil;Bóhólníihii nílíinii, nílaʼ nishʼnáájí bee anaʼí ahiih néíníghą́ą́ʼ.
7 Áko ayóó átʼéego tsʼídá aláahdi ánítʼéii beego nikʼijįʼ danilíinii bikʼeh dínídlı̨́ı̨́ʼ;bichʼįʼ náhóóchįįdgo tłʼoh behégod nahalingo adíídeez.
8 Nínííʼdę́ę́ʼ bee náhidíyoołii bee tó ahąh íinilaa;tó ałtʼah nehegeehgo nídiidzá;tó ditáanii bitłʼáahjįʼgo tónteel yíníłtłʼis.
9 Anaʼí danilíinii ádaaní,Bikééʼ adiiʼnééł; bídiilnééł; bindaalyeʼé dadiilnéełgo ałtsʼádadiʼdiiʼnił;bídin daniidlíinii bee hwiih dadiidleeł;nihidiltłish bee ádahodiildįįł.
10 Nitsʼą́ą́dę́ę́ʼ hááyolígíí bee tónteel hakʼi dadiilkǫʼ;béésh diłhı̨́hígi átʼéego tó ayóó ábóodziilii bitłʼááshníídeeʼ.
11 Bóhólníihii nílíinii, háishąʼ diyin dabidiʼníinii bitahgóó nigi átʼé?Háishąʼ nigi átʼéego ayóó átʼéego dílzin, tʼóó bikʼeʼíyéeʼgo baa haʼniih; tʼóó bikʼedaʼayóii áyoolííł?
12 Ninishʼnáájí bee dah dinilniiʼgo nahasdzáán adabiisnaʼ.
13 Beeʼaa aʼááh nínízinii bee diné chʼííníʼeezhígíí yisdéínínil;yíʼishígíí nihodiyingo hazʼą́ąjįʼ nidziil bee ííníʼeezh.
14 Ałʼąą dineʼé daʼdiiztsʼą́ąʼgo bitah dahoditłid doo;Filístiya kéyahdi kéédahatʼíinii yínííł yiih dínóodah.
15 Íídam dineʼé binanitʼaʼí tʼóó bił yééʼ dahodooleeł;Móʼab kéyahdóó diné ayóó ádaatʼéii atah hoditłid yiih dínóodah;Kéínan kéyahdi kéédahatʼíinii nisidookah.
16 Yééʼ índa náhádzid bikʼiidooldoh; nigaan ayóó átʼéii bikʼee tsé doohaamáasii nahalingo doo nidajiiʼnáa da doo, Bóhólníihii nílíinii,nidineʼé háíníʼnilígíí tséʼnaa niikaijįʼ ákótʼée doo.
17 Éí yah ahodííʼishgo tʼáá ni nidził dooleełígi kʼidahodidíílééł;Bóhólníihii nílíinii, kééhótʼı̨́į doogo áhwiinilaagi,éí hodiyingo hazʼánígíí, Bóhólníihii nílíinii,tʼáá ni nílaʼ bee hashtʼehwiinilaagi bohoníłdzilgo kʼidahodidíílééł.
18 Bóhólníihii hoolʼáágóó bóhólníihgo ahóyéelʼáa doo.
Míriyam biyiin
19 Jó, Féro bilı̨́ı̨́ʼ áádóó bitsindaabąąs bijáád naakiígíí índa łı̨́ı̨́ʼ yee nidaabaahii éí tónteel yiih yíná áádóó Bóhólníihii éí tónteel hakʼijįʼ anáyííłkʼol, nidi Ízrel dineʼé tʼéiyá tónteel biyiʼ niʼ yíłtseii bikááʼ haʼnaa niníná.
20 Áko Diyin God yá halneʼii Míriyam* éí Éran bilah nilı̨́įgo ásaaʼ yilghaałígíí łaʼ néidiiʼą́ągo asdzání tʼáá ałtso ásaaʼ yilghaałígíí dayíjáahgo hoł daʼílzhíishgo hakééʼ yikah.
21 Áko Míriyam áhodííniidgo ání,
Bóhólníihii bichʼįʼ dahohtaał, háálá ayóó átʼéego akʼeh deesdlı̨́ı̨́ʼ;łı̨́ı̨́ʼ áádóó bikʼi dah nidzizdáii tónteel yiih hwiistłʼííd.
Méírah hoolyéedi tó díchʼíʼígíí
22 Áko Tónteel Łichííʼ hoolyéédóó Mózes éí Ízrel dineʼé dah yidiiʼeezhgo honoojí Shur hoolyéejįʼ niníná, áko honoojíí góneʼ tágí jı̨́ joonéełgo tʼáadoo tó łaʼ bikʼíjíkai da.
23 Áko Méírah* hoolyéegi jinínáago ákwii tó bikʼíjíkaigo chʼééh bidazhʼniidlı̨́ı̨́h, háálá tó díchʼíiʼgo bąą Méírah hoosyeʼ.
24 Áádóó diné éí Mózes yichʼįʼ saad dahasłı̨́įʼgo ádaaní, Haʼátʼíishąʼ dadiidlı̨́ı̨́ł?
25 Áko Mózes éí Bóhólníihii náyooskango Bóhólníihii éí tsin sikaadii łaʼ hachʼįʼ ííshją́ą́ áyiilaago éí tó biih jííłtʼeʼgo tʼáá áko tó łikan ályaa.
Ákweʼé Bóhólníihii yee nihoníʼáanii índa bikʼeh hoogáałii há áyiilaa, áádóó ákweʼé bee hwééhodoozįįłii yee hóneeztą́ą́ʼ,
26 kóníigo, Bóhólníihii nihiDiyin God biinééʼ hazhóʼó deísółtsʼą́ąʼgo áádóó yáʼátʼéehgo binááł ádaahníiłgo, áádóó bibikʼeh óʼooʼníiłii índa yee nihwiizʼáanii tʼáá ałtso deísółtsʼą́ąʼgo bikʼeh dahonołʼı̨́įgo naałniih éí Ííjip dineʼé bikʼijįʼ kóshłaaígíí doo łaʼ nihikʼijįʼ kódeeshłíił da, háálá shí, Bóhólníihii hadaałtʼé ánánihoodlíiłii nishłı̨́.
27 Áko Íílim* kéyahgi jiníná; ákwii naakitsʼáadahgo tó hadaazlı̨́ı̨́ lá; ákwii tsin páam wolyéii tsostsʼidiingo naazkaad lá; ákweʼé tóogi nidajiizná.
Footnotes
^ Hííbrew kʼehjígo, Baa hashniih doo, ni.
^ Míriyam jiníigo éí Hííbrew kʼehjígo bidziil jiníigo óolyé.
^ Méírah jiníigo éí Hííbrew kʼehjígo díchʼííʼ jiníigo óolyé.
^ Íílim jiníigo éí Hííbrew kʼehjígo tsin naazkaadii páam wolyéii jiníigo óolyé.