Exodus 16:1-36
16 Íílim kéyahdóó dah náádiiʼnáago Ízrel dineʼé yinéłígíí tʼáá ałtso honoojí Sin nahósʼaʼgi éí Íílim kéyah áádóó Dził Sáínai bitaʼgi ákwii niníná; Ííjip kéyahdę́ę́ʼ hajíínáádóó bikʼijįʼ naaki nídízííd binih ashdlaʼáadah jı̨́ı̨́ góneʼ dashdiiná.
2 Áko honoojíidi Ízrel dineʼé yinéłígíí tʼáá ałtso Mózes índa Éran yichʼįʼ saad dahasłı̨́ı̨́ʼ.
3 Áko Ízrel dineʼé ádahodííniid, Bíniʼ lá, Ííjip kéyahdi Bóhólníihii bílaʼ yee nanihidoołtsił nítʼééʼ; áadi atsįʼ hadanigáahgo binaháaltą́ą łeh nítʼééʼ áádóó bááh deidą́ągo bee hwiih daniidlı̨́į łeh nítʼééʼ; jó, tʼáá dah yiiʼnééł nítʼééʼ dichin bee nihidííghą́ą́ł biniyé díí honoojíijįʼ anihííníʼeezh.
4 Ákohgo Bóhólníihii éí Mózes áyidííniid, Jó, yáʼąąshdę́ę́ʼ bááh nináłtı̨́įhgo nihá ádeeshłííł, áko diné chʼéédajikahgo tʼáá hwíighahígo tʼáá ákwíí jı̨́ nínádajiidlah doo, áádóó hahasíid doo, áko shibee hazʼáanii daatsʼí bikʼehgo jookah doo, doo daatsʼí bikʼehgo jookah da doo.
5 Áko kótʼée doo, hastą́ą́h jı̨́ı̨́ góneʼ yah anídajiikáhígíí hashtʼéédajiilʼįįh doo, áko tʼáá ákwíí jı̨́ nínádajiidlahígíí naakidi ákónánéeltʼeʼgo nínádajiidlah doo.
6 Mózes índa Éran éí Ízrel dineʼé kwíidííniid, Iʼííʼą́ągo ííshją́ą́ díí nihił béédahodoozįįł; jó, Bóhólníihii éí Ííjip kéyahdę́ę́ʼ chʼéénihiníʼeezhgo átʼé,
7 áko abínígo índa Bóhólníihii yee ayóó átʼéii deidoołtsééł, háálá éí bichʼįʼ saad dahonohłónígíí yidiitsʼaʼ. Nihíshąʼ haʼátʼíí niidlı̨́įgo nihichʼįʼ saad dahonohłǫ́?
8 Áko Mózes ádííniid, Kótʼée dooleeł: Bóhólníihii éí eʼeʼáahgo atsįʼ nihanáʼáltsoʼ doo, índa abínígo éí bááh bee hwiih nídaahdleeh doo, háálá Bóhólníihii tʼáá bí bichʼįʼ saad dahonohłónígíí yidiitsʼaʼ; nihíshąʼ haʼátʼíí niidlı̨́? Doo nihí nihichʼįʼ saad dahonohłǫ́ǫ da, nidi Bóhólníihii bichʼįʼ saad dahonohłǫ́.
9 Mózes éí Éran áyidííniid, Ízrel dineʼé yinéłígíí tʼáá ałtso kóbidiní, Bóhólníihii bitʼáhájįʼ dohkááh, háálá saad dahonohłónígíí yidiiztsʼą́ą́ʼ.
10 Ákódzaago Éran éí Ízrel dineʼé yinéłígíí tʼáá ałtso yichʼįʼ yáłtiʼgo honoojíijigo dadééʼı̨́ı̨́ʼ nítʼééʼ, shoo, Bóhólníihii yee ayóó átʼéii kʼos biyiʼjįʼ yitʼíní silı̨́ı̨́ʼ.
11 Áko Bóhólníihii éí Mózes yichʼįʼ haadzíiʼgo kóní,
12 Ízrel dineʼé saad dahółónígíí disétsʼą́ą́ʼ, áko bichʼįʼ handziihgo kóbidiní, Eʼeʼáahgo atsįʼ nídaahdı̨́įh doo, índa abínígo éí bááh bee hwiih nídaahdleeh doo, áko shí, Bóhólníihii nihiDiyin God nishłı̨́įgo nihił béédahodoozįįł.
13 Ákódzaago iʼííʼą́ągo dahwiiłkaahígi dééłdánii nánísą́, índa abínígo dah oonéłígíí binaagi dahtooʼ hazlı̨́ı̨́ʼ.
14 Áko dahtooʼígíí dah diildogo, shoo, honoojíhígi haʼátʼíí shı̨́ı̨́ áłtsʼíísígo danímazgo shoh łibáhígi áníłtsogo niʼgóó niheelʼá.
15 Áko Ízrel dineʼé éí dayiiłtsą́ągo ádaʼahidiʼní, Haʼátʼíísh átʼé?* Háálá átʼéii doo hoł béédahózin da. Mózes áhodííniid, Eii lá bááh dadoohsı̨́įłgo Bóhólníihii nihaidiníʼánígíí átʼé ni.
16 Díí Bóhólníihii yee haadzííʼ, Diné tʼááłáʼí nítínígo haa néeltʼeʼgo nídajidı̨́hígíí bikʼehgo áłah áńdaałʼįįh; éí ómer bee íʼneelʼąąhí bikʼehgo ádanéeltʼeʼgo łáʼí jinítínígo haníbaal yiiʼ kéédahatʼíinii bá ninádajiidlah doo.
17 Áko Ízrel dineʼé tʼáá ákódaʼiilaa: łaʼ tʼáá atisígo, łaʼ éí tʼáá aʼohígo áłah ádajiilaa.
18 Áko ómer bee bíʼnéélʼąądgo ląʼígo nídajiizláʼígíí doo łaʼ há chʼínííłnaʼ da, índa tʼáá áłchʼı̨́ı̨́dígo nídajiizláʼígíí doo hatsʼą́ą́ʼ biʼoh da; diné tʼááłáʼí jinítínígo ajiyánígíí bikʼehgo nínádajiidlah.
19 Áko Mózes áhodííniid, Tʼááká diné łaʼ abíníjįʼ ádá áádzósįįh lágo.
20 Ákondi łaʼ Mózes doo dayíistsʼą́ą́ʼgóó łaʼ abíníjįʼ ádá áádeisįįd, áádóó chʼosh bitah dahazlı̨́įʼgo daniłchxon daazlı̨́ı̨́ʼ, áko Mózes hachʼįʼ báhóóchįįd.
21 Áádóó tʼáá abíní bikʼeh diné tʼááłáʼí jinítínígo tʼáá daʼjiyánígíí bikʼehgo nínádajiidlah, áko náhoniigahgo biʼoh nínádaʼjiidlahígíí éí nídadiłhįh.
22 Nítʼééʼ ákódzaago hastą́ą́h jı̨́ aleeh góneʼ bááh naakidi ákódanéeltʼeʼgo nídayiizlááʼ: ómer bee íʼneelʼąąhí naakidi ookááł bíighah hódáághah, áko dah oonéłígíí bitahdóó bídahólníihii tʼáá ałtso Mózes yaa yíkaigo yił dahoolneʼ.
23 Áko áyidííniid, Díí Bóhólníihii yee haadzíʼígíí átʼé; yiską́ągo Bóhólníihii bichʼįʼ háʼáyı̨́ı̨́h jı̨́ átʼéego dílzin; łaʼ daałtʼeesígíí éí daałtʼees, índa daałbéézhígíí éí daałbéézh, áádóó yidziihígíí yiską́ągo biniyé ádá áádadoosįįł.
24 Áko Mózes ádííniidígi átʼéego abíníjįʼ łaʼ áádadzisįįd, áko doo niłchxon silı̨́įʼ da; doo nidi łaʼ chʼosh bitah da.
25 Áko Mózes ádííniid, Eii díí jı̨́ daahsą́, háálá díí jı̨́ Bóhólníihii bichʼįʼ hááʼáyı̨́ı̨́h jı̨́ átʼé; díí jı̨́ éí daníláhgóó doo łaʼ bikʼídadoohkah da.
26 Hastą́ą́h jı̨́įjįʼ nínádahohdlah doo, nidi tsostsʼid jínígíí éiyá hááʼáyı̨́ı̨́h jı̨́ átʼé; ákóneʼé éí ádin doo.
27 Nítʼééʼ ákódzaago tsostsʼid jı̨́ azlı̨́ı̨́ʼ góneʼ diné łaʼ mána nídahizhdoolah biniyé chʼíjíkai, nidi tʼáadoo łaʼ bikʼíjíkai da.
28 Áko Bóhólníihii éí Mózes áyidííniid, Haa nízáágóoshąʼ shibikʼeh óʼooʼníiłii índa shibee nahazʼáanii doo bikʼeh dahonołʼı̨́į da doo?
29 Shoo, Bóhólníihii hááʼáyı̨́ı̨́h jı̨́ nihaidiníʼą́; éí bąą hastą́ą́h jı̨́ náʼádleeh bikʼeh bááh naaki jı̨́ bíighahgo nihaa néidiʼááh; nihá hazʼánígi hazhóʼó hashtʼedínóhtʼé; bíniʼdii tsostsʼid jı̨́ı̨́ góneʼ diné doo łaʼ nahgóó chʼídoogáał da.
30 Áko tsostsʼid jı̨́ı̨́ góneʼ diné háádaasyı̨́ı̨́ʼ.
31 Áko Ízrel dineʼé éí mána yee dayíízhiʼ; chʼil kóriyander binááʼ nahalingo łigai, áádóó tsésʼná bitłʼizh bááh dáʼákaʼí nímazí bił ályaaígíí halniih.
32 Áko Mózes ádííniid, Díí Bóhólníihii yee haadzíʼígíí átʼé; ómer bee íʼneelʼąąhí hadeezbingo nihaʼáłchíní náás ahoolchíiłii bá nisoołką́ą doo; éí Ííjip kéyahdę́ę́ʼ chʼínihiníʼeezhgo honoojíidi bááh nihanáʼástsoʼ nítʼééʼ yę́ę deidoołtsééł.
33 Áádóó Mózes éí Éran áyidííniid, Ómer bee íʼneelʼąąhí bee mána ásaaʼ biih nikaah; éí Bóhólníihii binááł nihaʼáłchíní náás ahoolchíiłii bá siką́ą doo.
34 Áko Bóhólníihii éí Mózes yichʼįʼ yee haadzíʼígíí bikʼehgo neeznáago bikʼeh óʼooʼníiłii bee bééhániihii bidáahgi siką́ą dooleełgo Éran hashtʼeʼniiníką́.
35 Áko Ízrel dineʼé éí mána deiyą́ągo dízdiin nááhai; kéyah biyiʼ diné kéédahatʼínígíí yaa nínáajįʼ Kéínan kéyah hoodzo yitis yínáajįʼ mána deiyą́ągo nihoolzhiizh.
36 Ómer bee neeznáadi haʼooką́ągo íífa* biiʼ hadilbı̨́ı̨́h.
Footnotes
^ Haʼátʼíísh átʼé? jiníigo éí Hííbrew kʼehjígo mána jinínígi átʼéego diitsʼaʼ.
^ Íífa bee íʼneelʼąąhí éí bilasáana bee naakáhígíí ałnííʼ bitis áníłtsoígíí óolyé.
