Exodus 17:1-16
17 Áko Ízrel dineʼé tʼáá ałtso tádínéehgo Bóhólníihii ádííniidii bikʼehgo honoojí Sin hoolyéédóó dah náádiiʼná, áádóó Réfidimgi* niníná, nidi áadi tó dazhdoodlı̨́įłii ádin lá.
2 Éí bąą diné éí Mózes nayíyádaałtiʼgo kódaaní, Tó dadiidlı̨́łígíí nihaa diníʼaah. Áko Mózes áhodííniid, Haʼátʼíí biniinaa nashíyádaałtiʼ? Haʼátʼíí biniyé Bóhólníihii nibídanohtaah?
3 Áko ákwii diné tʼáá íiyisí dibááʼ daazlı̨́įʼgo Mózes yichʼįʼ saad dahółǫ́ǫgo ádaaní, Haʼátʼéegoshąʼ nihí áádóó nihaʼáłchíní índa danihilı̨́ı̨́ʼ dibááʼ bee nihidííghą́ą́ł biniyé Ííjip kéyahdę́ę́ʼ chʼínihííníʼeezh?
4 Áko Mózes éí Bóhólníihii náyookąąhgo kóní, Díí dinéshąʼ daa deeshłííł? Kʼadę́ę tsé yee shił nidadzíłneʼ.
5 Áko Bóhólníihii éí Mózes áyidííniid, Nílááh, diné bilą́ąjįʼ ninínááh áádóó Ízrel dineʼé aląąjįʼ naazíinii bił díkááh, índa nigish bee tooh nídííníłhaalígíí yítı̨́įłgo ákǫ́ǫ́ dínááh.
6 Jó, Hórebdi* tsé siʼánígíí bikáaʼgi nidáahgi honishłǫ́ǫ doo; ákwii tsé nídidííłhałgo biyiʼdę́ę́ʼ tó hadoogohgo diné daʼdoodlı̨́ı̨́ł. Áko Ízrel dineʼé aląąjįʼ naazíinii binááł Mózes tʼáá ákódziidzaa.
7 Áko éí hazʼánígi Másah* índa Méribah* hoosyeʼ, háálá ákweʼé Ízrel dineʼé nidaalteeh nítʼééʼ, áádóó ałdóʼ Bóhólníihii yídaneeztą́ąʼgo ádaaní, Daʼ Bóhólníihiísh nihitahgi hólǫ́, dooda daatsʼí?
Ámalek dineʼé bił daʼahijoogą́ą́ʼ
8 Ákohgo Ámalek* dineʼé Réfidim hoolyéegi yíkaigo Ízrel dineʼé yił daʼahoogą́ą́ʼ.
9 Áko Mózes éí Jáshowa áyidííniid, Diné bitah híláahgo nílááh Ámalek dineʼé bił daʼahohgą́; yiską́ągo shí éí Diyin God bigish dah yishtı̨́įłgo wókʼą́ągi dah sézı̨́į doo.
10 Tʼáá áko Jáshowa tʼáá Mózes áhodííniidígi ádziidzaago Ámalek dineʼé bił daʼahijoogą́ą́ʼ. Áádóó Mózes áádóó Éran índa Her bił wókʼą́ą́góó hadziskai.
11 Ákódzaago Mózes dah doolnihgo Ízrel dineʼé akʼeh dadidlı̨́, nidi bílaʼ yaa ánáyiilʼįįhgo éí Ámalek dineʼé akʼeh dadidlı̨́.
12 Ákohgo Mózes bigaan nanííłnaʼgo tsé łaʼ bá nízhdiiʼą́ągo biyaa ajííʼą́ągo yikʼi dah neezdá, áko Éran áádóó Her ałtsʼą́ą́hjí sizı̨́įgo hagaan dego yótąʼ, áko hashtʼeʼdashdoolnihgo tʼáá ákótʼéego iʼííʼą́.
13 Áko Jáshowa éí Ámalek índa bidineʼé ałdóʼ diltłish bee bikʼeh jideesdlı̨́ı̨́ʼ.
14 Áko Bóhólníihii éí Mózes áyidííniid, Díí bééhániih doo biniyé naaltsoos bikááʼ bee akʼeʼíłchí, áádóó Jáshowa bichʼįʼ bee yádííłtih, háálá Ámalek bééhániih dooígíí tʼáá átʼé nahasdzáán bikáaʼgi nahjįʼ kódeeshłííł.
15 Áko Mózes éí bikááʼ nááʼiiniihí áyiilaago Bóhólníihii éí shidah naʼatʼaʼí nilı̨́,* níigo yee yiyíízhiʼ.
16 Háálá ádííniid, Bóhólníihii ádee hadoodzííʼ, Bóhólníihii éí oochííłdóó náás oochííłgóó Ámalek dineʼé yił anaʼahilʼı̨́į doo.
Footnotes
^ Réfidim jiníigo éí Hííbrew kʼehjígo halgai jiníigo óolyé.
^ Hóreb jiníigo éí Hííbrew kʼehjígo honoojí tʼáadoo biniyéhí da jiníigo óolyé.
^ Másah jiníigo éí Hííbrew kʼ ehjígo bee naʼíhonitaah jiníigo óolyé.
^ Méribah jiníigo éí Hííbrew kʼehjígo ałghaʼditʼááh jiníigo óolyé.
^ Ámalek jiníigo éí Hííbrew kʼehjígo halgaidi kééhatʼíinii jiníigo óolyé.
^ Bóhólníihii éí shidah naʼatʼaʼí nilı̨́ nínígíí éí Hííbrew bizaad kʼehgo Jiihóvah-nísii.
