Exodus 18:1-27
18 Áko Mídiyan kéyahdóó nááʼiiłniihii Jéthro nilíinii Mózes yaadaaní nilíní éí Mózes índa Diyin God bidineʼé Ízrel bił Diyin God há yaa naayáhígíí tʼáá ałtso índa Ííjip kéyahdę́ę́ʼ Bóhólníihii chʼíbiníʼeezhgo yaa hodiiztsʼą́ą́ʼ.
2 Mózes éí Jéthro baadaaní jílı̨́įgo hweʼasdzą́ą́ Zipórah tʼą́ą́ʼ béézhʼníłniiʼ yę́ędą́ą́ʼ áádę́ę́ʼ bizhéʼé bił nátʼáázh,
3 índa biyáázhké nidiltʼéego ałdóʼ yił dah diikai; éí łaʼ Gérsham wolyé, háálá łah ájíní, Déʼéyóní nishłı̨́įgo kéyah doo ééhonisindi naashá;
4 łaʼígíí éí Eliyíízer wolyé, háálá ájíní, Shizhéʼé biDiyin God shíká análwoʼgo Féro bidiltłish yitsʼą́ą́dóó yisdáshííłtı̨́.
5 Jéthro éí Mózes haadaaní nilı̨́įgo biyeʼké áádóó beʼasdzą́ą́ bił honoojíigi Diyin God bidziłdi dah oonéełgo áadi Mózes baa jíkai.
6 Áko Mózes ábiʼdooʼniid, Shí, baadaaní nílíní áádóó neʼasdzą́ą́ índa biyáázhké bił naa nishkai.
7 Áko Mózes yaadaaní nilíní yidáahjįʼ chʼíníyáago yichʼįʼ yaa ádzaa áádóó yiztsʼǫs, áádóó haash yitʼéego kééhojitʼínígíí bínaʼahízhdéélkid, índa níbaal góneʼ yah ajookai.
8 Áko Mózes éí baadaaní jílíní bił ahozhniilneʼgo Ízrel dineʼé biniinaa Bóhólníihii éí Féro índa Ííjip dineʼé áyííłʼįįdígíí áádóó joonééłdę́ę́ʼ hachʼįʼ nidahwiisnáaʼgi índa Bóhólníihii chʼééhoníʼeezhgi tʼáá ałtso bee bił nahodzisneʼ.
9 Áko Bóhólníihii éí yáʼádaatʼéehii tʼáá ałtso Ízrel dineʼé yá yaa naayáhígíí, jó, éí Ííjip dineʼé yitsʼą́ąjįʼ yisdáyíínilígíí éí Jéthro baa bił hóózhǫǫd.
10 Áko Jéthro ádííniid, Bóhólníihii baa haʼniih leʼ; éí Ííjip dineʼé índa Féro bitsʼą́ąjįʼ yisdánihíínilígíí índa bidineʼé éí Ííjip dineʼé yiyaa sinildę́ę́ʼ yisdábíínil lá.
11 Kʼad díí shił bééhoozin: Bóhólníihii éí diyin dabidiʼníinii tʼáá ałtso yiláahgo átʼéé lá; jó, haʼátʼíhída bee ádaa dahojiʼniihii yiláahgo átʼé.
12 Áko Mózes baadaaní jílíní Jéthro éí Diyin God bichʼįʼ didlidgo nááhániihii índa náádahaniihii náájiisniiʼ, áádóó Éran éí Ízrel dineʼé aląąjįʼ naazíinii tʼáá ałtso yił yíkai, áko Diyin God binááł Mózes yaadaaní nilíní bił bááh bidazhʼniiyą́ą́ʼ.
Ándahwiiʼaahii nidahaasʼnil (Deut. 1:9-18)
13 Ákódzaago biiskání Mózes éí diné yaa nídóotʼįįł biniyé dah neezdá, áko abínídóó iʼííʼą́ąjįʼ Mózes éí diné haa áłah nilı̨́ı̨́ nítʼééʼ.
14 Áko Mózes yaadaaní nilíní diné baa hwiinítʼínígíí tʼáá ałtso yiyiiłtsą́ągo ádííniid, Díishąʼ haʼátʼíí diné bá baa naniná? Haʼátʼéegoshąʼ tʼáá ni tʼéí sínídáago abínídóó iʼííʼą́ąjįʼ diné naazı̨́įgo ninásʼá.
15 Áko Mózes éí yaadaaní nilíní áyidííniid, Jó, diné éí Diyin God yíndashídíłkid yiniyé shaa dahakááh.
16 Áádóó bitaʼgi baaní dahólǫ́ǫgo shaa nídaakahgo bá beiníshtʼı̨́; Diyin God yee nihwiizʼáanii índa bibee nahazʼáanii bił nibééhoyeesįįł.
17 Áko Mózes yaadaaní nilíní ábidííniid, Tʼáá ni tʼéí ákónítʼı̨́įgo doo ná yáʼátʼéeh da.
18 Jó, tʼáá aaníí tʼóó ádił ninohkááh, háálá díí tʼáá íiyisí ná niłdzil; tʼáá sáhí baa nánítʼı̨́įgo doo bíninilʼą́ą da.
19 Shizaad yísíníłtsʼą́ą́ʼ; shí ná hodishʼaah; Diyin God nił hólǫ́ǫ leʼ; Diyin God bichʼįʼ diné bá sínízı̨́į doo, áko bidaʼdiiłʼáii Diyin God bichʼįʼ nabikʼíyáníłtiʼ doo.
20 Índa bikʼeh hoogáałii áádóó bee nahazʼáanii bínabiníłtin doo; deíkáah dooleełgóó índa hazhóʼó nidaalnish dooleełgóó bił ííshjání ádahodííliił.
21 Tʼah náábíláahgo diné tʼáá ałtso bitahdóó diné tʼáá nitsídaakeesii áádóó Diyin God deidísinii áádóó badaʼahódlíii índa adááh hání yijoołxáii náhidííla; éí miilgo, neeznádiingo, ashdladiingo índa neeznáago diné yindantʼáa doogo nídiinííł.
22 Áko éí tʼáá áłahjįʼ diné yá nidahwiiʼaah doo, áko kótʼée doo: baaní nitsaaígíí éí tʼáá ałtso tʼóó nichʼįʼ kódaalneʼ doo, nidi baaní áłtsʼíísígíí éí tʼáá bí yaa nídaatʼı̨́į doo, ákótʼéego doo ná niłdzil da doo, áádóó ade ádaatʼéii ná ásdzólígo ádayósin doo.
23 Díí ákwíindzaago áádóó Diyin God ałdóʼ ákóníłníigo, ákótʼéego tʼéiyá náásgóó bíninilʼą́ą doo, áádóó díí diné tʼáá ałtso ałdóʼ dabighangóó anáhidookahgo bił dahodéezyéel doo.
24 Tʼáá áko Mózes yaadaaní nilíní ádííniidígíí yidiiztsʼą́ąʼgo tʼáá ałtso yikʼeh hóółʼįįd.
25 Mózes éí Ízrel dineʼé bitahdóó diné tʼáá nitsídaakeesii łaʼ néidiinil; éí miilgo, neeznádiingo, ashdladiingo índa neeznáago diné yindantʼáa doo biniyé niinínil.
26 Áko tʼáá áłahjįʼ diné yá nidahwiiʼaah: baa nídahwíídóotʼįįłii nantłʼaígíí éí Mózes baa dahizhdiʼaah, nidi baaní áłtsʼíísígo éí tʼáá hó baa nídajitʼı̨́.
27 Áko Mózes baadaaní jílíní bił ałtsʼáníjíshtʼáazhgo tʼáá bí bikéyahgóó béézhníłniiʼ.
