Exodus 19:1-25
19 Ííjip kéyahdę́ę́ʼ Ízrel dineʼé chʼínínáádóó táadi hanííbą́ązgo tʼáá éí bijı̨́ Sáínai* honoojíijįʼ ííná.
2 Jó, Réfidim hoolyéédóó dah diináago Sáínai honoojíijįʼ ííná, áko honoojíidi dziłtsı̨́įgi Ízrel dineʼé tʼóó áłtsééd niníná.
3 Áádóó Mózes éí Diyin God yichʼįʼ haayá, áko dziłghą́ą́ʼdę́ę́ʼ Bóhólníihii hachʼįʼ haadzíiʼgo kóní, Jéíkab bidineʼé kóbidiní, Ízrel baʼáłchíní bił hólneʼ.
4 Áko Ííjip dineʼé ááłʼįįdígíí áádóó atsá bitʼaʼ bee náás hojoojihígi átʼéego náás nihiníjaaʼígíí índa ádínihiishʼnilígíí daołtsą́.
5 Éí bąą kʼad tʼáá aaníí shizaad bikʼeh dahonołʼı̨́įgo índa nihił bee ahaʼdiʼnishtʼáanii nihił danilı̨́įgo dadineʼé tʼáá ałtso bitahdóó tʼáá shí shidineʼé danohłı̨́į doo; jó, nahasdzáán éí tʼáá átʼé shí.
6 Áko náádaʼiiłniihii danohłı̨́įgo aláahgo nihinanishtʼáa doo índa diyin dineʼé shichʼįʼgo danohłı̨́į doo. Díí saadígíí Ízrel dineʼé bichʼįʼ bee yáníłtiʼ doo.
7 Áko Mózes nádzáago diné aląąjįʼ naazíinii hágo yidííniidgo dabinááł díí saad tʼáá átʼé Bóhólníihii hachʼįʼ yee haadzíʼígíí bił chʼíjiizʼą́.
8 Áko diné tʼáá ałtso tʼáá ahąąh ádaaní, Bóhólníihii nihichʼįʼ yee haadzíʼígíí tʼáá ałtso bikʼeh ádadiiʼnííł. Áádóó Mózes éí diné hachʼįʼ yee hadaasdzíʼígíí bee Bóhólníihii bił náhojoolneʼ.
9 Áádóó Bóhólníihii éí Mózes áyidííniid, Shoo, kʼos diłhił bee nichʼįʼ ninishááh, áko nichʼįʼ yáshtiʼgo diné deididootsʼı̨́ı̨́ł áádóó hoolʼáágóó danoodlą́ą doo.
Áádóó Mózes éí diné hachʼįʼ yee hadaasdzíʼígíí bee Bóhólníihii bił náhojoolneʼ.
10 Áko Bóhólníihii éí Mózes áyidííniid, Nílááh, diné bichʼįʼ nídídáahgo díí jı̨́ áádóó yiską́ągo diyingo nidahodiyííʼaał, áádóó haʼééʼ dazdoogis.
11 Díí jı̨́ı̨́dóó naaki yiską́ąjįʼ* ałtso hashtʼeʼádazhdidoolnííł, háálá tágí jı̨́ aleeh góneʼ diné tʼáá ádzíłtso hanááł Dził Sáínai bikáaʼjįʼ Bóhólníihii hadadooleeł.
12 Áko dziłtsı̨́ı̨́góó diné bichʼą́ąhgi hoodzogo ádíílíiłgo ábididííniił, Ádaa ádahołyą́; tʼááká łaʼ dził bóohááh lágo; bibąąhgi nidi doo łaʼ bíhididoohʼnáał da; tʼáá háiida dził yíhidééʼnáʼígíí tʼáá aaníí hodiʼyoolyééł.
13 Doo łaʼ yididoolchił da, nidi yideelchidígíí tsé bee bił nizdoolniił, doodaiiʼ bigházdoolkah; alı̨́ı̨́ʼ, doodaiiʼ diné éí doo tʼáá hináa da doo; deenátsʼaaʼ bideeʼ bee íʼdílzoołí diistsʼą́ąʼgo dził bitsı̨́įjįʼ hizhdookah.
14 Áko Mózes éí dziłghą́ą́ʼdę́ę́ʼ diné yichʼįʼ hadanáádzáago diyingo diné atsʼéidiníʼą́, índa dabiʼééʼ deizgis.
15 Áádóó diné áyidííniid, Díí jı̨́ı̨́dóó naaki yiską́ąjįʼ hashtʼeʼádazhdidoolnííł; hweʼasdzą́ą́ tʼáadoo bitʼáahjįʼ nidajikaí doo.
16 Ákódzaago tágí jı̨́ aleehgo abínígo daʼdiʼní áádóó nídaʼiilgęsh áádóó dził bąąhdóó kʼos diłhił, índa deenástsʼaaʼ bideeʼ bee íʼdílzoołí ayóó íitsʼaʼgo diitsʼaʼ, áko diné dah yinéłígíí tʼáá ałtso éí yikʼee bitah dahoditłid.
17 Áko Mózes éí Ízrel dineʼé ninínáádóó Diyin God yaa dookah biniyé chʼíiníʼeezhgo dził tsı̨́įdi áłah silı̨́ı̨́ʼ.
18 Áko Dził Sáínai tʼáá átʼé łid bąąh hazlı̨́ı̨́ʼ, háálá dził bikáaʼjįʼ Bóhólníihii éí kǫʼ yił hadah hóóleʼ, áko déédíljahdóó łidígíí nahalin, áádóó dził ayóó átʼéego nahaʼná.
19 Áádóó deenástsʼaaʼ bideeʼ bee íʼdílzoołí nineezgo diitsʼaʼígíí tʼóó náás áániiłgo tʼáá íiyisí diitsʼaʼgo Mózes haadzííʼ, áádóó Diyin God biinééʼ diistsʼą́ąʼgo ánááhodooʼniid.
20 Áko Dził Sáínai bighą́ąʼdi tʼáá dził bikáaʼjįʼ Bóhólníihii hadahóóleʼ, áádóó Mózes hágo yidííniidgo Mózes ákóde haayá.
21 Áádóó Bóhólníihii éí Mózes áyidííniid, Hadáánídáahgo diné hazhóʼó biʼníłnííh, áko Bóhólníihii doo deidínóolgęsh da biniyé bá hoodzoígíí doo yitis dookah da, doodago éí lą́ʼí ádoodįįł.
22 Áko náádaʼiiłniihii ałdóʼ Bóhólníihii yitʼáahjįʼ dookahígíí bíniʼdii dadiyingo atsʼáʼádadidootʼááł, áko Bóhólníihii doo nabidoołtsił da.
23 Áko Mózes éí Bóhólníihii áyidííniid, Diné doo Dził Sáínai yóokááh átʼée da, háálá tʼáá íiyisí bee ánihidííníniidgo ádíní, Dziłtsı̨́įgi hoodzoígíí doo bitis naʼadáágóó dził dílzingo nidinohʼaah.
24 Áko Bóhólníihii áhodííniid, Nílááh, hadáánídáahgo áádę́ę́ʼ Éran bił hadííʼash, nidi náádaʼiiłniihii áádóó diné éí Bóhólníihii bitʼááh deeshááł danízingo bá hoodzoígíí tʼááká yitis wokááh lágo; ákódaadzaago Bóhólníihii nabidoołtsił.
25 Áko Mózes éí diné yichʼįʼ hadanáádzáago yee yił hoolneʼ.
Footnotes
^ Dził Sáínai wolyéii éí Hóreb ałdóʼ wolyé. Ex. 3:1; 17:6.
^ Naaki jı̨́ hashtʼeʼádadilnéehgo tágí jı̨́ı̨́ góneʼ Bóhólníihii hadahodooleeł, ááhyiłní.