Exodus 2:1-25
2 Diné léiʼ Líívai dineʼé nilı̨́įgo éí tʼáá Líívai dineʼé bitsiʼ łaʼ beʼasdzą́ą́ áyiilaa.
2 Éí asdzání iʼniiltsąądgo ashkii yishchı̨́, áko awééʼ tʼáá íiyisí bíiyisgo jiiłtsą́ągo bąą tááʼ nídeezidjįʼ nízdeesʼı̨́ı̨́ʼ.
3 Doo nahozhʼniłʼin leʼ átʼéégóó tʼóó teełtsʼaaʼ bá dziztłʼǫ́ǫgo łeejin dijéʼígíí áádóó tsin bijeeh bee jizhjééʼ, áko teełtsʼaaʼ biyiʼ góneʼ awééʼ ajííłtı̨́įgo tooh nílínígíí tábąąhgi teeł bitahgi táłkáaʼgi teełtsʼaaʼ bił nizhníʼą́.
4 Áko bádí éí awééʼ haa dashdoonííł nízingo tʼáá nízaadę́ę́ʼ sizı̨́.
5 Nítʼééʼ Féro bitsiʼ nidoobeeł yiniyé tooh nílínídi níyá, índa atʼééké bá nidaalʼaʼígíí ałdóʼ tábąąhgóó yił yikah, nítʼééʼ teełtsʼaaʼ teeł bitahgóó dah naaʼeełgo yiyiiłtsą́, áko atʼééké łaʼ ábizhdííniid, Haaʼíshąʼ wóshdę́ę́ʼ táłtsʼáníʼaah.
6 Áko ąą áyiilaago awééʼ jiiłtsą́ áádóó awééʼ hááchago baa aʼááh jiniizı̨́įʼgo ájíní, Díí Hííbrew dineʼé beʼawééʼ łaʼ átʼı̨́ı̨́ lá.
7 Tʼáá áko awééʼ bádí éí Féro bitsiʼ áyidííniid, Níláhgóósh deesháałgo Hííbrew asdzání łaʼ hágo bidideeshniił, áko éí awééʼ ná yaa áhályą́ą doo.
8 Áko Féro bitsiʼ áhodííniid, Nílááháneeʼ. Tʼáá áko chʼikę́ę́h dah diilwodgo awééʼ bimá hágo yidííniid.
9 Áko Féro bitsiʼ éí asdzání áyidííniid, Díí awééʼ nááłtééł; shá baa áhólyą́ą doo, áko bikʼé nichʼįʼ niʼiishłée doo. Áko asdzání éí awééʼ dah néidiiłtı̨́įgo yaa áhályą́ą́ nítʼééʼ.
10 Áádóó awééʼ iʼdíítʼóodgo Féro bitsiʼ yaa néiníłtı̨́įgo biyáázh dzizlı̨́ı̨́ʼ, áko, Mózes* joolyée doo, hodííniid, háálá ání, Jó, táyiʼdę́ę́ʼ táłtsʼáníłtı̨́.
Mózes éí Mídiyan kéyahgóó anííchą́ą́ʼ
11 Áádóó nízaad nihoolzhiizhgo Mózes jineeyą́, áko łah hadineʼé baazhníyáago naanish bee bide ádahólzingo baa ákozniizı̨́ı̨́ʼ; nítʼééʼ Ííjip dineʼé éí hodineʼé łaʼ Hííbrew nilı̨́įgo néiniłhałgo jiiłtsą́.
12 Áko ałtsʼą́ą́ʼ jidééʼı̨́įʼgo doo naagháhígóó Ííjip dinéhígíí jiisxı̨́ áádóó séí biiʼ nízhdeesʼı̨́ı̨́ʼ.
13 Áko biiskání chʼínáádzídzáago Hííbrew dineʼé nidiltʼéego ałkʼiilwod lá, áko bikʼis doo ákwii ííłʼínígíí ábizhdííniid, Haʼátʼéegoshąʼ tʼáá bił ałkʼis nídlínígíí náníłhał?
14 Áko áhodííniid, Háishąʼ naatʼáanii índa ánihwiiʼaahii nihá ániilaa? Ííjip dineʼé łaʼ síníłhínígi átʼéegoósh shí ałdóʼ shidiyííłhééł? Áko Mózes tʼóó hoł hóóyééʼ áádóó ájíní, Tʼáá gaʼ aaníí bił béédahoozin lá! dziniizı̨́ı̨́ʼ.
15 Áádóó Féro* yaa hodiiztsʼą́ąʼgo Mózes hodiyeeshxééł niizı̨́ı̨́ʼ.
Nidi Mózes éí Féro bitsʼą́ą́ʼ yóóʼajoolwodgo Mídiyan kéyahgi kééhojitʼı̨́ı̨́ nítʼééʼ, áko tó hahadleeh léiʼgi dzineezdá.
16 Áko Mídiyan hoolyéédóó nááʼiiłniihii léiʼ bitsiʼké tsostsʼid yiltʼéé lá, áko éí tó hadeidiyooʼááł yiniyé yíkai, áko bizhéʼé bilı̨́ı̨́ʼ daʼdoodlı̨́ı̨́ł biniyé tsin biiʼ dibé nídaʼadlı̨́hígíí yiiʼ tó hadeidééłbįįd.
17 Nidaʼniłkaadii łaʼ yíkaigo nahgóó adah honeeskaad, nidi Mózes hachʼą́ą́h nídiidzáago háká aalwodgo biniitʼaa dahadibé daʼoodlą́ą́ʼ.
18 Ákohgo nákaigo bizhéʼé Rúwel ábidííniid, Haʼátʼéegoshąʼ díí jı̨́ tʼáadoo hodíínaʼí nánoohkai?
19 Áko ádadííniid, Ííjip dineʼé léiʼ éí nidaʼniłkaadii nihá yichʼą́ą́h naagháago tó nihá hayiizʼą́, áko dibé daʼoodlą́ą́ʼ.
20 Tʼáá áko bitsiʼké áyidííniid, Áko háadishąʼ naaghá? Haʼátʼéegoshąʼ diné tʼáá áadigo tʼóó nánoojééʼ? Adooyı̨́ı̨́ł biniyé hágo bidohní.
21 Áádóó Mózes éí ákweʼé diné bighangi há hasih hooʼaʼ, áádóó éí dinéhígíí bitsiʼ łaʼ, Zipórah wolyéii Mózes yeiníłtı̨́.
22 Áko ashkii há yishchı̨́, éí Gérsham* wolyée doo, jidííniid, háálá ájíní, Déʼéyóní nishłı̨́įgo kéyah doo ééhonisindi naashá!
23 Áádóó náás hodeeshzhiizhgo Ííjip kéyahdi aláahgo naatʼáanii daaztsą́, áádóó Ízrel dineʼé naalteʼ danilı̨́įgo yikʼee nidadiʼniʼgo áádóó chooʼı̨́ı̨́łká daachago, áko bichʼįʼ nidahwiiʼnánígíí yikʼee daachago Diyin God bidiiztsʼą́ą́ʼ.
24 Áko Diyin God éí nidazhdiʼniʼgo hodiiztsʼą́ą́ʼ, áko Diyin God éí Éíbraham áádóó Áízak índa Jéíkab yił ahadaʼdeestʼáanii yénálniih.
25 Áko Diyin God éí Ízrel dineʼé yikʼi déezʼı̨́įʼgo ádajítʼéegi yaa ákoniizı̨́ı̨́ʼ.
Footnotes
^ Mózes jiníigo éí Hííbrew kʼehjígo táłtsʼááltíinii jinínígi átʼéego diitsʼaʼ.
^ Díí Féro éí Exodus 1:11 góneʼ yaa yáłtiʼígíí doo daatsʼí tʼáá éí átʼı̨́į da.
^ Gérsham jiníigo éí Hííbrew kʼehjígo déʼéyóní jinínígi átʼéego diitsʼaʼ.
