Exodus 20:1-26
20 Áko Diyin God díí saad tʼáá ałtso yee hahaasdzíiʼgo kóní,
2 Shí, Bóhólníihii nihiDiyin God éí Ííjip kéyahdi naalteʼ danohłı̨́ yę́ędóó háánihííʼeezhii áshtʼı̨́.
3 Tʼááká diyin náánáłaʼ dahólǫ́ǫgo íínísin yíilaʼ.
4 Haʼátʼíhígíida bidaʼalyaii doo ádá ádíílíił da; haʼátʼíhígíida yádiłhił biyiʼdi dahólóonii, doodaiiʼ nahasdzáán bikáaʼgi dahólóonii, doodaiiʼ táyiʼ naaldeehii doo bééʼdíídlíił da,
5 áko éí doo bichʼįʼ tséʼyaa náníljoł da doo, doodaiiʼ doo bee nahółáa da doo, háálá shí éí Bóhólníihii niDiyin God łeʼnízinii nishłı̨́; daʼazhéʼé yę́ę doo ákwii ádajíítʼįįdígíí éí doo dashidzisdįįdgóó hadaʼáłchíní náás ahoolchíiłii táadi índa dı̨́įdi ałkʼi náʼázhchı̨́įjįʼ bikʼi hwiileehgo bá nináhwiishʼnííł,
6 nidi shí baa aʼááh nisinígíí haa shı̨́ı̨́ néelą́ąʼdi mííl ádanéelą́ąʼgo ayóóʼádashóʼnínígíí áádóó shibikʼeh óʼooʼníiłii yikʼeh dahółʼíinii bikʼidajishdlí.
7 Bóhólníihii niDiyin God bízhiʼ doo dílzingóó doo ádíílíił da; jó, tʼáá háiida Bóhólníihii bízhiʼ doo dílzingóó ájiilaaígíí bee ádihozhdiiltʼiʼgo Bóhólníihii hakʼijįʼ yisʼą́ą doo.
8 Hááʼáyı̨́ı̨́h jı̨́ éí hodílzingo anáʼátʼáah dooígíí tsʼídá béénílniih.
9 Hastą́ą́h jı̨́ tʼéí nanilnish doo, áádóó tʼáá ákódígo nanilnish doo,
10 nidi tsostsʼid jínígíí éí Bóhólníihii niDiyin God bihááʼáyı̨́ı̨́h jı̨́ átʼé, áko éí bijı̨́ doo nanilnish da doo; ni lá, doodaiiʼ niyeʼ, doodaiiʼ nitsiʼ, doodaiiʼ diné ná naalteʼ, doodaiiʼ asdzání ná naalteʼ, doodaiiʼ nilı̨́ı̨́ʼ ałʼąą ádaatʼéii, doodaiiʼ déʼéyóní nił hólónígíí éí doo nidoolnish da,
11 háálá hastą́ą́h jı̨́įjįʼ Bóhólníihii éí yádiłhił áádóó nahasdzáán áádóó tónteel índa biyiʼdi dahólóonii tʼáá ałtso áyiilaa, áádóó tsostsʼid jı̨́ azlı̨́ı̨́ʼ góneʼ hanáályı̨́ı̨́ʼ; éí bąą Bóhólníihii hááʼáyı̨́ı̨́h jı̨́ yikʼijisdliʼ áádóó dílzingo atsʼéidiníʼą́.
12 Nizhéʼé índa nimá nił nilı̨́įgo íínísin; Bóhólníihii niDiyin God éí kéyah nihaiideeʼaahígíí bikáaʼgi asʼahgóó hinínáa doo.
13 Diné tsʼídá doo diyííłhéeł da.
14 Tsʼídá doo adidííléeł da.
15 Tsʼídá doo adínííʼı̨́įł da.
16 Bił kééhótʼíinii tsʼídá tʼáadoo tʼáá ádzaagóó baa hólneʼí.
17 Bił kééhótʼíinii bighan tsʼídá tʼáadoo bidáninilníní; bił kééhótʼíinii beʼasdzą́ą́ tsʼídá tʼáadoo bidáninilníní; diné bá naalteʼ, doodaiiʼ asdzání bá naalteʼ, doodaiiʼ bibéégashii, doodaiiʼ bitélii tsʼídá tʼáadoo bidáninilníní, áádóó bił kééhótʼíinii bíhígíí tsʼídá tʼáadoo bidáninilníní.
Ízrel dineʼé bił daayééʼ (Deut. 5:22-33)
18 Áko diné tʼáá ałtso éí daʼdiʼnínígíí, áádóó nídaʼiilgęshígíí, áádóó deenástsʼaaʼ bideeʼ bee íʼdílzoołí ánínígíí, índa dził bąąh łid hazlı̨́ʼígíí yaa ákodaniizı̨́įʼgo bikʼee bitah dahoditłidgo tʼáá nízaadi naazı̨́.
19 Áko Mózes ádayidííniid, Tʼáá ni nihichʼįʼ yáníłtiʼ, áko daníísíiltsʼą́ąʼ doo, nidi hániʼdii Diyin God tʼáadoo nihichʼįʼ yáłtiʼí dooleeł, áko doo dadíníiʼnéeł da.
20 Mózes éí diné áyidííniid, Tʼáadoo nihił daayéʼí, háálá Diyin God éí hanihisíid doo, áádóó dadíínóhsin doo yiniyé nihaa honíleʼ, áko doo ádił nidaʼíiyohsíih da doo.
21 Áko diné tʼáá nízaadi naazı̨́įgo Mózes éí ayóogo chahałheełígi áháníjįʼ Diyin God yichʼįʼgo náás hideeyá.
Bikááʼ náádaʼiiniihí bibee nahazʼáanii
22 Áko Bóhólníihii éí Mózes áyidííniid, Ízrel dineʼé kóbididííniił, Yáʼąąshdę́ę́ʼ nihichʼįʼ yéíłtiʼígíí tʼáá nihí nihił béédahoozin.
23 Tʼááká diyin dabidiʼníinii béésh łigaii bee edaʼalyaii, doodaiiʼ óola bee edaʼalyaii shí daóltąʼgo doo ádá ádadoohłíił da.
24 Shichʼįʼ náádadiʼyoołnih biniyé łeezh bee bikááʼ nááʼiiniihí ádadoohłííł, áko éí bikááʼ didlidgo nihinááhániihii, áádóó hózhǫ́ǫ́jí nihinááhániihii, áádóó nihidibé, índa nihibéégashii éí náádahołniih doo; tʼáá ałtso shízhiʼ bééhániihgo áshłaaígi nihaa deesháałgo nihikʼijiideeshdliił.
25 Áko shichʼįʼ náádadiʼyoołnih biniyé bikááʼ nááʼiiniihí tsé bee ádaahłéehgo, tsé ahihidoolkaalii doo bee ádadoohłíił da, háálá nihibee naʼanishí bee bindashoołnishgo éí tʼóó daołchxǫʼ doo.
26 Shibikááʼ nááʼiiniihí bichʼįʼ ałkʼi hooʼnil góde doo háánídáa da doo; tʼáadoo ałkʼi hooʼnilí ádíílííł, ákótʼéego íinilaago éí bikáaʼjįʼ tʼáá łichʼíʼígo naa daʼiidoołtsééł.
