Exodus 22:1-31
22 Diné łaʼda béégashii, doodaiiʼ dibé yineezʼı̨́įʼgo áádóó yiyiisxı̨́įgo, doodaiiʼ baa nahazniiʼgo hó éí béégashii jineezʼı̨́ʼígíí béégashii ashdlaʼ ninázhʼdoodlééł; dibé jineezʼı̨́ʼígíí dibé dı̨́ı̨́ʼ ninázhʼdoodlééł.
2 Índa aniʼįįhii yah iiʼnéehii habiʼdeelʼı̨́įʼgo bił nidzílghaal ládą́ą́ʼ bidiłígíí doo łaʼda bee bohodidootʼih da.
3 Nidi haʼííʼą́ągo aniʼįįhii jiisxı̨́įgo bidił bee hohodidootʼih. Azneezʼı̨́ʼígíí tʼahdii jiináago diné bichʼįʼ ałtso ninázhʼdoodlééł, nidi bee ninázhʼdoodléełii ádingo azneezʼı̨́ʼígíí biniinaa nahodiʼyoolnih.
4 Áko neestʼı̨́įʼii éí béégashii, doodaiiʼ télii, doodaiiʼ dibé tʼáá hináago bił habiʼdeelʼı̨́ı̨́ʼ ládą́ą́ʼ éí ahą́ą́h nániiláago ninázhʼdoodlééł.
5 Áko diné éí náánáłaʼ diné bidáʼákʼehjįʼ, doodaiiʼ bichʼil naʼatłʼoʼii yílʼáajįʼ halı̨́ı̨́ʼ yah ajííłtʼeʼgo ííłchozhgo tʼáá hó hadáʼákʼehdóó aneestʼąʼ tsʼídá yáʼádaatʼéhígíí, doodaiiʼ tʼáá hó hachʼil naʼatłʼoʼii yílʼáádóó aneestʼąʼ tsʼídá yáʼádaatʼéhígíí ninázhʼdoodlééł.
6 Hodiiltłahgo chʼil ahoshí adííkʼą́ąʼgo tłʼoh naadą́ą́ʼ bidaʼastłʼónígíí, doodaiiʼ tłʼoh naadą́ą́ʼ yílʼáhígíí, doodaiiʼ dáʼákʼehgóó hodíílidgo éí iihozhdíínilígíí tʼáá aaníí nályééh ninázhʼdoodlééł.
7 Diné łaʼda éí béeso, doodaiiʼ naalyéhé bił kééhojitʼíinii baʼałkʼee nizhnínilgo, nítʼééʼ bighandóó neestʼı̨́įʼgo aneezʼı̨́įʼii bénálkáaʼgo bíniʼdii ahą́ą́h nániiláago nináʼdoodlééł.
8 Nidi aneezʼı̨́įʼii tʼáadoo bénálkááʼgóó kin bee hóhólníhígíí ándahwiiʼaahii* baa hodiʼdoodlóós; éí bił kééhojitʼíinii binaalyeʼé daatsʼí dzidínéesʼı̨́įʼgo bił bééhodoozįįł.
9 Tʼáá haʼátʼíhída baa saad hólóonii éí béégashii, doodaiiʼ télii, doodaiiʼ dibé, doodaiiʼ bee haʼdítʼéii, doodaiiʼ tʼáá haʼátʼíhída yóóʼeeldéelgo łaʼda eii shí nítʼééʼ níigo yaa nitsiʼníłdéelgo tʼáá ájíłah ándahwiiʼaahii baa hodiʼdootʼishgo tʼáá háiida ádihodiiltʼiʼgo ándahwiiʼaahii bá nihodooʼáałgo bił kééhojitʼíinii ahą́ą́h nániiláago bichʼįʼ ninázhʼdoodlééł.
10 Diné łaʼda hatélii, doodaiiʼ habéégashii, doodaiiʼ hadibé, doodaiiʼ halı̨́ı̨́ʼ bił kééhojitʼíinii baʼałkʼee nizhníłtı̨́įgo nítʼééʼ daaztsą́ągo, doodaiiʼ haada yidzaago, doodaiiʼ yóóʼanoolchą́ąʼgo, nidi tʼáadoo haideelʼı̨́ʼí dago
11 éí Bóhólníihii binááł bił kééhojitʼíinii binaalyeʼé tʼáadoo haada jiilaaígíí bee ádee hazdidoodzih, áádóó bííʼ ílíinii lą́ didooniił, áko doo ninázhʼdoodléeł da.
12 Nidi bee neestʼı̨́įʼgo éí bííʼ ílíinii bichʼįʼ ninázhʼdoodlééł.
13 Naaldlooshii hashkéii biisxı̨́įgo hániʼdii bitsįʼ yidzíʼígíí bee bééhózin doo biniyé nízhdoojih, áko doo ninázhʼdoodléeł da.
14 Áádóó diné łaʼda bił kééhojitʼíinii alı̨́ı̨́ʼ haʼníłtı̨́įgo, nítʼééʼ haada yidzaago, doodaiiʼ daaztsą́ągo bííʼ ílíinii doo ákwii naagháágóó éí tʼáá aaníí ninázhʼdoodlééł.
15 Nidi bííʼ ílíinii ákwii naagháago doo ninázhʼdoodléeł da. Adeenáago alı̨́ı̨́ʼ aʼíltı̨́įgo tʼáá íídą́ą́ʼ bilı̨́ı̨́ʼ ílíinii bichʼįʼ naʼílyá.
Diné ádaʼahóʼníi dooleełgi áádóó binahaghaʼ bee nahazʼáanii
16 Diné łaʼda chʼikę́ę́h doo baa yíltíinii yiʼdeezloʼgo yił neezhtéezhgo éí hweʼasdzą́ą́ doogo tʼáá aaníí bizhéʼé bichʼįʼ yigééh nizhʼdoolééł.
17 Nidi bizhéʼé tʼáá íiyisí doo haa hodooltéeł da, níigo chʼikéí tʼah doo diné bee dahaleehii bikʼé nahalyéii béeso ánéeltʼeʼígíí bikʼehgo nizhʼdoolééł.
18 Asdzání azhdiłgąshii tsʼídá doo jiináa da doo.
19 Tʼáá háiida alı̨́ı̨́ʼ bił jineezhtéézhígíí tʼáá aaníí hodiʼyoolyééł.
20 Tʼáá háiida diyin dabidiʼníinii yichʼįʼ nááʼiiłniihgo tʼáá hazhóʼó doo Bóhólníihii tʼéí yichʼįʼ nááʼiiłniihgóó nidi éí tʼáá aaníí ábidiʼdooldįįł.
21 Déʼéyóní tʼáadoo bináʼíloʼgo bide áhwíínísiní, háálá Ííjip kéyahdi nihí łah déʼéyóní danohłı̨́ı̨́ nítʼééʼ.
22 Asdzání bąąh áhásdįįdii, doodaiiʼ áłchíní bizhéʼé ádinii tʼáadoo bide ádahwíínóhsiní.
23 Haʼátʼéegoda bide ádahwíínóhsingo shichʼįʼ daachago tʼáá aaníí daachago dideestsʼı̨́ı̨́ł.
24 Áko tʼáá íiyisí shá hodoochįįłgo diltłish bee nanihideestsxiłgo nihidaʼasdzą́ą́ bąąh áhásdįįdii índa nihaʼáłchíní bizhéʼé ádaadinii dadooleeł.
25 Shidineʼé bił kééhótʼíinii badahojoobáʼígíi nidi łaʼ béeso baʼíínínil ládą́ą́ʼ ínáóltąʼí biniyé béeso adaʼiiníłígi átʼéego éí dooda; doo łaʼ bá bínéidííʼáał da.
26 Bił kééhótʼíinii biʼééʼ nąąh niiníłtsoozgo tʼáadoo eʼeʼaahí biʼééʼ baa nídííłtsos.
27 Háálá éí tʼéí yiih nádááh; éí tʼéí yee áká nálzis; haʼátʼíí yikááʼ nánítéeh doo? Jó, ákódzaago shichʼįʼ yichago dideestsʼı̨́ı̨́ł, háálá shí éí jooshbaʼ.
28 Diyin God tʼáadoo baaʼihgo baa yáníłtiʼí, doodaiiʼ nidineʼé binanitʼaʼí nidi doo hóyéeʼgo bá hadíídzih da.
29 Aneestʼąʼ dasinoołtʼáanii áádóó chʼil naʼatłʼoʼii bineestʼąʼ bitooʼ dahólóonii alą́ąjįʼ náníníłtʼáanii náádiyííłnihígíí tʼááká bił náás hodólzhíísh lágo.
Nihiyeʼké alą́ąjįʼ nihá daazhchíinii shaa dahohnííł.
30 Tʼáá ákótʼéego béégashii índa dibé ałdóʼ ákódaałʼı̨́į doo; áłtsé yizhchíinii tsostsʼid yiską́ąjįʼ bimá yił naaʼaash doo; tseebíí yiską́ągo shaa dííłtééł.
31 Áko nihí diné diyinii shá danohłı̨́į doo; éí bąą halgaidi naaldlooshii hashkéii biisxíinii doo dadoohsı̨́įł da; tʼóó łééchąąʼí bichʼįʼ adahołtłʼiid doo.
Footnotes
^ Ándahwiiʼaahii baa hodiʼdoodlóós éí Diyin God baa hodiʼdoodlóós ááhyiłní.
