Exodus 23:1-33
23 Tʼáadoo tʼáá áhoodzaagóó chʼíhoyíʼaahí. Tʼáá ádzaagóó haneʼ ííłʼíní doo dííleeł da biniyé doo yáʼáshóonii nilíinii tʼáadoo bił ałchʼoníʼníní.
2 Doo yáʼátʼéehii doo baa nanináa da doo biniyé dahasłą́ą́góó tʼáadoo nanináhí; doo ákǫ́ǫ́ ádaatʼı̨́ı̨́góó índa tʼáadoo haa deitʼéii łahgo átʼéego ádeileʼgo yee ádaa nidahalneʼgo agháʼánéelą́ʼígíí tʼáadoo bikééʼ ninánílwoʼí.
3 Diné bahojoobáʼígo ádihodiiltʼiʼgo doo bichʼohaʼníigo ádíílíił da.
4 Niʼanaʼí bibéégashii, doodaiiʼ bitélii yóóʼiigháahgo bidááh yíníyáago tsʼídá tʼáá baa nídíídlósí.
5 Índa nijoołáii bitélii biyéél yiyaa sitı̨́įgo yiniłtsą́ągo tʼóó bíighah chʼóoyaʼígi átʼée nidi tsʼídá tʼáá bíká adíílwołí.
6 Nihidiné badahojoobáʼígíí bide áhootʼéego baa hwiinítʼíinii tʼáadoo nanigizgo baa yáníłtiʼí.
7 Tʼáá ádzaagóó áhooníiłii tsʼídá bitsʼąą ádaa áhólyą́, áádóó tʼáadoo bee bikʼídahótʼahíii índa tʼáá ákogi ádaatʼéii doo diyííłhéeł da, háálá doo yáʼáshónígi ááníiłii éí doo tʼáá ákogi átʼéego bá hadeesdzih da.
8 Bee naniʼdiiniihii doo nídidííléeł da, háálá éí dahóyáanii bíniʼ ádeiłdįįh, áádóó tʼáá ákogi ádaatʼéii bizaad łahgo ádeileʼ.
9 Nááʼáłdóʼ déʼéyóní doo bide áhwíínísin da doo, háálá Ííjip kéyahdi nihí ałdóʼ déʼéyóní danohłı̨́ı̨́ nítʼéʼígíí bąą déʼéyóní bijéí átʼéegi nihił béédahózin.
Nináháháahjįʼ hááʼáyı̨́hígíí áádóó hááʼáyı̨́ı̨́h jı̨́
10 Hastą́ą́h nínáhahjįʼ kʼéédídléeh doo, áádóó nídantʼı̨́įhii áłah ánéinilʼįįh doo.
11 Nidi tsostsʼid nínáhah góneʼ doo náʼígish da doo, áko nidineʼé badahojoobáʼígíí chʼiyáán bee hólǫ́ǫ doo áádóó nihihiniideeʼígíí naaldlooshii bichʼiyąʼ doo. Tʼáá ákótʼéego nichʼil naʼatłʼoʼii yílʼáii bineestʼąʼ índa áliv naazkaadii bineestʼąʼ doo áłah ánéinilʼįįh da doo.
12 Hastą́ą́h jı̨́ tʼéí ninánílnish doo, nidi tsostsʼid jı̨́ı̨́ góneʼ éí hááhílyı̨́įh doo, índa nibéégashii áádóó nitélii ałdóʼ háádaalyı̨́įh doo, áko asdzání ná naalteʼ biyáázh áádóó déʼéyóní nilíinii bikʼéé dahwiitáah doo.
13 Áko bee nihichʼįʼ haasdzíʼígíí tʼáá ałtso baa dahonohsą́, áádóó diyin dabidiʼníinii dabízhiʼ tʼáadoo bee hahídziihí; doo nidi baa yáníłtiʼ da doo.
Táadi hodílzingo áłah náʼádleeh bee nihootʼą́ (Ex. 34:18-26; Deut. 16:1-17)
14 Táadi shichʼįʼgo dahodíínóhsingo áłah náhdleehgo nínáhah doo.
15 Dííkʼǫsh tʼáágééd bááh ályaii binahjįʼ dahodíínóhsingo áłah náhdleeh doo; dííkʼǫsh tʼáágééd bááh ályaii tsostsʼid néíłkáahjįʼ daohsą́ą doogo nihichʼįʼ haasdzíiʼ niʼ; Éíbib yiziłígíí binih łaʼa jı̨́ bee nihootʼáníjįʼ ánáhwiilzhíishgo ákódaahtʼı̨́į doo, háálá éí biyiʼ Ííjip kéyahdę́ę́ʼ chʼínoohkai niʼ, áádóó łaʼda nááhániihii doo tʼáágéedgo shichʼįʼ nizhdoogáał da.
16 Nihidáʼákʼehgi kʼéédaʼdohdléehgo bindashoołnishígíí bitsʼą́ą́dóó aneestʼąʼ áłtsé nídantʼı̨́įhii binahjįʼ dahodíínóhsingo áłah náhdleeh doo. Ałtso náhshı̨́įhgo nihidáʼákʼehdóó nídaohishígíí áłah áńdaołʼįįhgo dahodíínóhsingo áłah náhdleeh doo.
17 Nínáhahjįʼ táadi nidiné tʼáá ałtso Bóhólníihii Diyin God yichʼįʼ ninákah doo.
18 Shichʼįʼ nááhániihii bidił éí tʼááká dííkʼǫsh bił bááh ályaii bił náádahołniih lágo; shichʼįʼ nááhániihígíí bikʼah abíníjįʼ doo łaʼ tʼáá sinil da doo.
19 Nihikéyahdóó tsʼídá átsé aneestʼąʼ nídantʼı̨́įhii Bóhólníihii nihiDiyin God bikin góneʼ yah adahohjáah doo. Tłʼízí yázhí bitsįʼ tʼáadoo bimá bibeʼ bee daałbézhí.
Bóhólníihii bidiyingo naalʼaʼí Ízrel dineʼé yooʼish doogo biniyé yílʼaʼ
20 Jó, diyingo naalʼaʼí nihilą́ąjįʼ deeshʼaałgo éí wohnééłgóó nihaa áhályą́ą doo, áádóó índa kéyah nihá hashtʼehooshłaaí góneʼ yah anihidooʼish.
21 Binááł ádaa ádahołyą́, áádóó bizaad bikʼeh dahonołʼı̨́įgo tʼáadoo bá nídahołchįįhí, háálá bee hazʼáanii nidahisootiʼígíí doo nihá yóóʼanéididooʼáał da, háálá shízhiʼ yee átʼé.
22 Nidi tʼáá aaníí bizaad bikʼeh dahonołʼı̨́įgo áádóó bee hahasdziihígíí tʼáá ałtso bikʼeh ádaahníiłgo nihidaʼanaʼí biʼanaʼí nishłı̨́į doo, índa nihikʼijįʼ danilíinii bikʼijįʼ nishłı̨́į doo.
23 Jó, shidiyingo naalʼaʼí nihilą́ąjįʼ yigáałgo Ámor dineʼé áádóó Hét dineʼé áádóó Píírez dineʼé áádóó Kéínan dineʼé áádóó Háíva dineʼé índa Jííbas dineʼé yichʼįʼ nihidooʼish, áko éí ádahodeeshdįįł.
24 Bidiyin dabidiʼníinii tʼááká bichʼįʼ yaa áńdaahtʼįįh lágo, doodaiiʼ doo bichʼįʼ nidahohłáa da doo, doodaiiʼ áyoolíiłii tʼáadoo béédaʼohdleʼí, nidi biʼedaʼalyaii tʼáá átʼé bitsʼą́ą́ʼ naaʼadahidoołtłʼiłgo ahiih nídahidoohtih.
25 Bóhólníihii nihiDiyin God bichʼįʼ nidahohłáa doo, áko nihichʼiyąʼ índa nihitoʼ łą́ągo yee nihikʼijidlíi doo, áádóó naałniih nihinííʼdóó nahgóó kódeeshłííł.
26 Nihikéyahgi doo łaʼ bitsą́ haʼaʼeeł da doo, nidi nidaʼiiłchíih doo, índa asʼahgóó dahinohnáago nihá ádeeshłííł.
27 Nihidáahdi kéédahatʼínígíí shikʼee bił dayéeʼgo ádeeshłííł, áádóó diné tʼáá baa dahohnéhígíí tʼáá ałtso ádeeshdįįł, áádóó nihidaʼanaʼí tʼáá ałtso nihitsʼą́ąjįʼ yóóʼadahinichéeh doo.
28 Áko tsésnáłtsoí nihilą́ąjįʼ biʼdeeshnih; éí Háíva dineʼé áádóó Kéínan dineʼé índa Hét dineʼé nihilą́ąjįʼ hadeidínóołkał.
29 Tʼááłáʼí nááhaijįʼ doo tʼáá hooshchʼįʼ nihilą́ąjįʼ hadínéeshkał da, áko kéyah doo tʼáá bíniʼdii dadooleeł da, áádóó naaldlooshii dahashkéii doo tʼáá íiyisí nihide dooląął da.
30 Tʼáá bihidijáahgo nihilą́ąjįʼ hahidínéeshkał; ląʼí soolı̨́įʼgo índa kéyah nihííʼ dooleeł.
31 Tónteel Łichíiʼii siyínídóó Filístiya dineʼé bitónteel siyíníjįʼ, índa honoojíídóó tooh nílíníjįʼ nihá hodeeso; jó, kéyah yiiʼ kéédahatʼíinii nihílákʼee dideeshʼáałgo chʼídadínóołkał.
32 Éí diné, doodaiiʼ bidiyin dabidiʼníinii tʼááká bił ahadaʼdoohtʼááł lágo.
33 Éí nihikéyah doo yiiʼ kéédahatʼı̨́į da doo, háálá áadi tʼáá kéédahatʼı̨́įgo shichʼįʼ ádił nidaʼiyohsíihgo ádanihidoolííł; bidiyin dabidiʼníinii bichʼįʼ nidahohłáago łoh yee nihidoolohgo bizahohkáah doo.
