Exodus 24:1-18
24 Áko Diyin God éí Mózes áyidííniid, Hágo, Bóhólníihii bichʼįʼ hasohkááh, ni lá índa Éran áádóó Néídab índa Abáíhu, áádóó Ízrel dineʼé yiląąjįʼ naazíinii tsostsʼidiin yiltʼéego, áko tʼáá nízaadę́ę́ʼ shichʼįʼ nidahohłáa doo.
2 Nidi Mózes tʼéiyá áháníjįʼ Bóhólníihii yichʼįʼ nidoogááł, nidi łaʼígíí éí tʼááká áháníjįʼ yichʼįʼ nookááh lágo, índa Mózes éí diné doo łaʼ hoł hadookah da.
3 Áko Mózes nádzáago Bóhólníihii bizaad tʼáá ałtso áádóó nidahodiistʼáanii tʼáá ałtso yee diné yił hoolneʼ, áko dinéhígíí tʼáá łaʼ bizhiʼee ádadííniid, Bóhólníihii bizaad ánínígíí tʼáá ałtso bikʼeh ádadiiʼnííł.
4 Áko Mózes éí Bóhólníihii bizaad tʼáá átʼé bee akʼeʼjishchı̨́, áádóó tʼah abínígo nízhdiiʼnaʼgo dziłtsı̨́įgi bikááʼ nááʼiiniihí ájiilaa, áádóó ákwii tsé naakitsʼáadahgo yadazhdíníishinígíí Ízrel dineʼé naakitsʼáadahígíí bá ájiilaa.
5 Áko Ízrel dineʼé bitahdóó dinééh łaʼ ákǫ́ǫ́ ayiisʼaʼ; éí didlidgo nááhániihii náádayiisniiʼ, índa náádahaazniiʼii hózhǫ́ǫ́jí nááhániihii átʼéego béégashii éí Bóhólníihii yichʼįʼ náádayiisniiʼ.
6 Áko Mózes éí dił ałnííʼdóó néidiiką́ągo łeetsʼaaʼ bee nidziizką́, áádóó dił ałnííʼdóó yidziihígíí bikááʼ nááʼiiniihí bikʼídzístah.
7 Áko ałhaʼdeetʼą́ naaltsoos bikáʼígíí nízhdiiʼą́ągo diné áłah nilínígíí bichʼįʼ jííłtaʼ, áko diné tʼáá ałtso deidiiztsʼą́ąʼgo ádadííniid, Bóhólníihii hahaasdzíʼígíí tʼáá ałtso bikʼeh ádadiiʼnííł áádóó bikʼeh dahoniilʼı̨́į doo.
8 Áko Mózes éí diłígíí nízhdiiką́ągo diné áłah nilínígíí bikʼídzístahgo ájíní, Jó, kótʼéego dił bee ahaʼdeetʼą́; éí Bóhólníihii tʼáá bí nihił ahaʼdeetʼą́ągo díí saad tʼáá átʼé yee yaa yáłtiʼ.
9 Áko Mózes índa Éran áádóó Néídab índa Abáíhu áádóó Ízrel dineʼé yiląąjįʼ naazíinii tsostsʼidiin yiltʼéego ákóde eekai.
10 Áadi Ízrel dineʼé biDiyin God dayiiłtsą́, nítʼééʼ déesʼeezgi tséghádiʼnídínii sikaad nahalin; tʼáá yáʼąąshii nahalingo niłtólí.
11 Áko Ízrel bidineʼé aghádahideezíinii tʼáadoo yeinístʼįįd da, áádóó Diyin God dayiiłtsą́ągo daʼííyą́ą́ʼ áádóó doodlı̨́įłii dayoodlą́ą́ʼ.
Dził Sáínai bighą́ąʼdi Mózes naagháá nítʼééʼ
12 Áko Bóhólníihii éí Mózes yichʼįʼ haadzíiʼgo áyidííniid, Dziłghą́ąʼjįʼ shichʼįʼ hasínáahgo ákwii shibaʼ nanináa doo; ákwii tsé bikʼeʼashchínígíí áádóó bee hazʼáanii índa bikʼeh óʼooʼníiłii tʼáá shí bee akʼeʼshéłchínígíí naa dadeesįįł, áko éí bee naʼnítin doo biniyé.
13 Áko Mózes índa há naalʼaʼí Jáshowa bił dashdiiʼáázh áádóó Mózes éí Diyin God bidził góde dashdiigháahgo
14 aląąjįʼ naazíinii ábizhdííniid, Nihaa nániitʼáazhjįʼ tʼáá kweʼé nihibaʼ nahísóotą́; jó, Éran índa Her bił naahkai; tʼáá háiida baaní hwee hólǫ́ǫgo tʼéiyá baa jiisíníbaad doo.
15 Áko Mózes éí dziłghą́ą́ʼgóó ajííyáago kʼos éí dził bikʼi diilkǫʼ.
16 Áko Bóhólníihii bee bitsʼádiʼnílíidii Dził Sáínai bikʼi hooleʼ, áádóó éí kʼosígíí tʼáá bikʼi dilkǫǫhgo hastą́ą́h jı̨́ azlı̨́ı̨́ʼ, áko tsostsʼid jı̨́ aleeh góneʼ kʼos biyiʼdę́ę́ʼ Diyin God éí Mózes yichʼįʼ haadzííʼ.
17 Áko Bóhólníihii bee bitsʼádiʼnílídígíí dził bílátahdi kǫʼ naanídoonałgo Ízrel dineʼé éí deiníłʼı̨́.
18 Áko Mózes éí kʼos biih jííyáago dziłghą́ąʼjįʼ hajiyá áádóó Mózes éí dziłghą́ąʼdi nijigháago dízdiin jı̨́ áádóó dízdiin tłʼééʼ azlı̨́ı̨́ʼ.