Exodus 25:1-40
25 Áko Bóhólníihii éí Mózes áyidííniid,
2 Ízrel dineʼé bichʼįʼ hadíídzihgo ábididííniił, Bóhólníihii kóní, Náádahidoołnihii shaa dahidoohjih; diné tʼááłáʼí nítínígo bił hóódleeʼii shichʼįʼ nááhidoonihígíí naa deidiyoojih.
3 Díí náádahidoonihígíí naa deidiyooniłgo nídidíínił: éí óola áádóó béésh łigaii áádóó béésh łitsoii
4 áádóó yisdizii yá nahalingo dootłʼizhii áádóó tsídídééh nahalingo łichíʼígíí áádóó łichxíʼígíí áádóó áłtsʼóózígo yisdizígíí bee naʼatʼą́hí łigaii ditsʼidgo ályaii áádóó tłʼízí bighaaʼ
5 áádóó deenástsʼaaʼ bikágí daaldzą́ągo deilchiiʼii áádóó nahashchʼid bikágí áádóó tsin nitłʼizii akéíshiya wolyéii
6 áádóó akʼah bee hoolʼin dooígíí áádóó spáis* éí akʼah akʼi yahiidzíidgo bee yilzı̨́įʼii biniyéhígíí áádóó spáis éí tsinbijeeh dilidgo łikání halchinii biniyéhígíí
7 áádóó tsé ániks wolyéii áádóó tsé daʼílíinii, áko íífad wolyéii índa ayidgi dah siłtsooz dooígíí bikáaʼgi éí tsé daʼílíinii bee nidoochʼąhii; éí tʼáá ałtso Bóhólníihii baa dahidoohjih.
8 Áádóó bíniʼdii diyingo hazʼą́ągo shá ádeidoolííł, áko hatahgi kééhashtʼı̨́į doo.
9 Níbaal biiʼ hodílzinii ályaii bikʼehgo áádóó bee hahodítʼéii dooleełii ályaii bikʼehgo éí nichʼįʼ ííshją́ą́ áshłééh, áko tsʼídá tʼáá ákótʼéego ádadoohłííł.
Tsitsʼaaʼ dílzinii éí neeznáago bikʼeh óʼooʼníiłii bee bééhániihii biiʼ sinilii (Ex. 37:1-9)
10 Áko tsin nitłʼizii bee tsitsʼaaʼ ádeidoolííł; éí tááʼ ké siláádóó náhástʼéí asdzoh áníłnéez doo áádóó naaniigo naakidi ké siláádóó tááʼ asdzoh áníłtéel doo índa dego naakidi ké siláádóó tááʼ asdzoh ánízah doo.
11 Áko biyiʼdę́ę́ʼ índa bikááʼdę́ę́ʼ óola tʼáá bízhání bikʼéstiʼgo ádíílííł, áádóó bibąąhgóó óola ahééníʼáago ádadoohłííł.
12 Tsitsʼaaʼ bitłʼááhdóó tʼáá dı̨́ı̨́ʼgóó naanídaazʼáhígi ałchʼijí naakigo óola názbąsgo bídadidííłhı̨́.
13 Tsin nitłʼizii níyizgo ádadoohłííł áádóó óola bikʼídadoołtih.
14 Áko tsitsʼaaʼ booshkʼiizhjí díí óola názbąs bąąh dah sinilígíí bee naatʼáa doo biniyé tsin níyizii bighá dadoohtsih.
15 Tsin níyizígíí éí óola názbąs bąąh sinil dooígíí tʼáá áłahjįʼ bighá níʼáa doo; éí doo bąąh nááʼdiiʼnił da doo.
16 Áádóó neeznáago bikʼeh óʼooʼníiłii bee bééhániihii naadeeshʼniłígíí tsitsʼaaʼ dílzinii biih dadoohnił.
17 Índa aa aʼááh hasinii bił hazʼánígi éí óola tʼáá bízhání bee ádadoohłííł; éí táadi ké siláádóó náhástʼéí asdzoh áníłnéez doo, índa naaniigo naakidi ké siláádóó tááʼ asdzoh áníłtéel doo.
18 Áko óola tʼáá bízhání bee diyingo naalʼaʼí naakigo bééʼályaago chérabim wolyéii ádadoohłííł; hashtʼeʼnibídaʼdoołniiłgo aa aʼááh hasinii bił hazʼání nineelʼánígi tʼáá ałchʼishdę́ę́ʼ sizı̨́įgo ádadoohłííł.
19 Łahjí nineelʼánígi chérab wolyéii tʼááłáʼí sizı̨́į doo, áádóó náánáłahjí nineelʼánígi chérab tʼááłáʼí náánásdzı̨́į doo; aa aʼááh hasinii bił hazʼánígi índa nineelʼą́ągi ałchʼishdę́ę́ʼ chérabim sizínígíí bił tʼáá łaʼ bizhiʼee ádadoohłííł.
20 Aa aʼááh hasinii bił hazʼání bikʼijįʼ chérabim bitʼaʼ dah yoołbał doo; aa aʼááh hasinii bił hazʼáníjįʼ ałchʼishdę́ę́ʼ déezʼı̨́įʼgo ałchʼįʼ sizı̨́į doo.
21 Áko tsitsʼaaʼ dílzinii bikáaʼgi aa aʼááh hasinii bił hazʼání dańʼdítı̨́įhgo ádadoohłííł; neeznáago bikʼeh óʼooʼníiłii bee bééhániihii naa deeshʼniłígíí éí tsitsʼaaʼ dílzinii biih dadoohnił.
22 Ákwii nił ahínéishtʼash doo, áádóó chérabim naakigo tsitsʼaaʼ dílzinii yikáaʼgi dah sizínígíí bitaʼgi aa aʼááh hasinii bił hazʼánídóó bikʼeh óʼooʼníiłii tʼáá ałtso Ízrel dineʼé bá naa dideeshʼáłígíí ałchʼįʼ baa yéiiltiʼ doo.
Diyin God bichʼįʼ bááh nááhániihii bikááʼ adání bá siʼáanii (Ex. 37:10-16)
23 Bikááʼ adání ałdóʼ tsin nitłʼizii bee ádadoohłííł; táadi ké silá áníłnéez doo, áádóó naaniigo tʼááłáʼí ké siláádóó náʼáłníiʼgo áníłtéel doo, índa dego naakidi ké siláádóó tááʼ asdzoh ánízah doo.
24 Óola tʼáá bízhání bikʼídííłtihgo łaʼ bibąąhgóó ahééhiníkaadgo ádadoohłííł.
25 Dı̨́ı̨́ʼ yílá bikʼeh áníłtéelgo binázʼáa doogo índa óola éí bibąąh ahééhiníkaadgo ádadoohłííł.
26 Dı̨́ı̨́ʼgóó naanídaazʼáhígíí biyaagi bijáád éí óola nídaazbąsgo bídadidoołhį.
27 Ahééníʼáhígíí bíighahgi tsin níyizii iiʼ níʼáago bee naatʼáa doo biniyé óola názbąsii bąąh dah naaznil doo.
28 Tsin níyizii łaʼ ádadoohłííł, áádóó óola bikʼídadoołtih; éí bikááʼ adání bee naatʼáa doo biniyé ádadoohłííł.
29 Łeetsʼaaʼ niteelígíí áádóó tsin bijeeh dilidgo łikání halchinii bá łeetsʼaaʼ áádóó ásaaʼ índa bee yaʼiyiidzídígíí éí óola tʼáá bízhání bee ádadoohłííł.
30 Índa bikááʼ adání bikáaʼgi Diyin God bichʼįʼ bááh nááhániihii tʼáá áłahjįʼ shinááł sinilgo ádeínóhsin doo.
Bee hoolʼiní bá yadaaʼáhígíí óola bee ályaii (Ex. 37:17-24)
31 Bee hoolʼiní bá yadaaʼáhígíí éí óola tʼáá bízhání bee ádadoohłííł. Óola hashtʼeʼnibíʼdííłniiłgo bá siʼánígíí índa dego bá yadaaʼáhígíí áádóó bílátah dah naʼazką́ągo akʼah biih náhádzídígíí áádóó éí bitłʼááh níʼdeeskǫʼígíí índa chʼilátah hózhóón bee naashchʼąʼígíí éí tʼáá łaʼ bizhiʼee ádadoohłííł.
32 Hastą́ągo atsʼádaazʼáa doo, éí bee hoolʼiní bá yadaaʼáhígíí łahjí tááʼ bitsʼáníʼáa doo; náánáłahjí ałdóʼ tááʼ bitsʼáníʼáa doo;
33 tʼááłáʼígo atsʼázʼáhígíí álman wolyéii bílátah yiigahígíí nahalingo táaʼgo ałkééʼ honíką́ągo bee naashchʼąąʼ doo; bílátah haleehii áádóó yiigahígíí tʼáá bił, bee hoolʼiní bá yaaʼáhígíí hastą́ągo bitsʼádaazʼáhígíí ákótʼéego ádadoohłííł.
34 Bee hoolʼiní bá yadaaʼáhígíí dı̨́įʼgo ałkʼi honíką́ągo álman wolyéego chʼilátah hózhóón nahalingo bee naashchʼąąʼ doo.
35 Naakigo ałtsʼą́ąjįʼ dadeezʼáhígíí tʼáá táaʼgo bitłʼáahgi níʼdaʼdeezwodgo bił tʼáá łaʼ bizhiʼee ádadoohłííł.
36 Atsʼá daazʼáhígíí áádóó ałkééʼ honíkánígíí éí bá yaaʼáhígíí bił tʼáá łaʼ bizhiʼee ádadoohłííł; bee hoolʼinígíí tʼáá átʼé óola tʼáá bízhání hashtʼeʼnibídaʼdoołniiłgo tʼáá łaʼ bizhiʼee ádadoohłííł.
37 Áko bá bee dahoolʼinígíí tsostsʼidgo ádadoohłííł, índa bikááʼ yíʼnilgo bidáahjįʼ hazʼánígi bee hoolʼin doo biniyé ádadoohłííł.
38 Kǫʼ bee náhiniltsésígíí áádóó łeeshchʼiih bee naakáhígíí óola tʼáá bízhání bee ádadoohłííł.
39 Bee hoolʼiní bá yadaaʼáhígíí índa beedí chodaoʼíinii tʼáá ałtso éí óola tʼáá bízhání tʼááłáʼí* tálent dah hidiidloh bíighahgo ádadoohłííł.
40 Áko díí tʼáá ałtso ályaii bikʼehgo dziłghą́ąʼdi nichʼįʼ ííshjání áshłaaígíí tsʼídá tʼáá éí bikʼehgo baa honíyą́ągo ádadoohłííł.
Footnotes
^ Spáis wolyéhígíí éí chʼil tʼáá ałʼąą ádaatʼéii yikʼą́ągo bitsʼą́ą́dóó łikání halchin áádóó halniihígíí óolyé.
^ Tálent wolyéhígíí tsostsʼidiindóó baʼaan ashdlaʼ dah hidiidloh bíighahgo daatsʼí óolyé.
