Exodus 26:1-37
26 Nááʼáłdóʼ níbaal biiʼ hodílzinii bitis hííkaad dooígíí neeznáago ádadoohłííł; yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ yistłʼǫ́ǫgo, diyingo nidaalʼaʼí chérabim wolyéii bee nidaashchʼąąʼgo daohchįįhgo ádadoohłííł.
2 Éí tʼááłáʼí níłtsoozígo dízdiindóó baʼaan naaki ké silá ádaníłnéez doo, áádóó tʼááłáʼí níłtsoozígo hastą́ą́h ké silá ádaníłtéel doo; tʼáá ałtso tʼáá aheedaníłtso doo.
3 Áko éí ashdlaʼgo ahídahididoolchah, áádóó nááʼashdlaʼgo tʼáá ákónáánátʼéego ahínáádahididoolchah.
4 Áádóó áłtsé ahídahididoolchahígíí bibąąhgi naʼatʼą́hí yá nahalingo dootłʼizhígíí łoh ashdladiingo bąąh yíʼnil dooígíí ádadoohłííł; naaki góneʼ ahídahididoolchahígíí tʼáá ákónáánátʼéego łoh ashdladiingo bąąh náánáʼnil dooígíí ádadoohłííł.
5 Łaʼ bibąąhgi łohígíí ashdladiingo bąąh yíʼnil dooígíí ádadoohłííł, áádóó naaki góneʼ ahídahididoolchahígíí łaʼ bibąąhgi łohígíí ashdladiingo bąąh náánáʼnil dooígíí ánáádadoohdlííł; łoh bąąh yíʼnil dooígíí éí ałnaashii yíʼnil doo.
6 Áko óola ił dah nídaatı̨́įh dooígíí ashdladiingo ádadoohłííł, áko bitis hííkaad dooígíí ahihidiiłtsoozgi łoh bąąh yíʼnilígíí óola ił dah nátı̨́hí yee daʼahótąʼgo ádadoohłííł; ákohgo níbaal biiʼ hodílzinii tʼáá łaʼ bizhiʼee siʼą́ą dooleeł.
7 Áádóó níbaal biiʼ hodílzinii bitis hííkaad dooígíí tłʼízí bighaaʼ bee yistłʼǫ́ǫgo łaʼtsʼáadahgo ádadoohłííł.
8 Díí bitis hííkaad dooígíí tʼááłáʼí níłtsoozígo dízdiindóó baʼaan ashdlaʼ ké silá ádaníłnéez doo, áádóó tʼááłáʼí níłtsoozígo hastą́ą́h ké silá ádaníłtéel doo; łaʼtsʼáadahgo bitis hííkaad dooígíí tʼáá ahee daníłtso doo.
9 Bitis hííkaad dooígíí ashdlaʼgo tʼáá sahdii ahídahidoołchah, áádóó hastą́ą́h bitis hííkaad dooígíí ałdóʼ tʼáá sahdii ahínáádahidoołchah, índa hastą́ą́h góneʼígíí éí níbaal biiʼ hodílzinii bichʼéʼétiingi tʼą́ąjįʼ ahą́ą́h nániilyéehgo ádadoohłííł.
10 Áádóó áłtsé ahídahidiilchaʼígíí bibąąhgi łoh ashdladiingo bąąh yíʼnil dooígíí ádadoohłííł, índa naaki góneʼ ahídahidiilchaʼígíí tʼáá ákónáánátʼéego łoh ashdladiingo bąąh náánáʼnil dooígíí ádadoohłííł.
11 Ahidahidiiłtsooz doo biniyéhígíí béésh łitsoii ił dah nídaatı̨́hí ashdladiingo ádadoohłííł, áko łoh bighá nídaatsihgo yee daʼahótąʼgo níbaal tʼáá łaʼ bizhiʼee siʼą́ą dooleeł.
12 Áádóó níbaal biiʼ hodílzinii bitis hííkaadii chʼíhííłtsooz dooígíí éí níbaal bikéédę́ęʼgo łaʼ tʼáá ałníʼídóó chʼíhííłtsooz doo.
13 Áádóó níbaal biiʼ hodílzinii bikʼínáltih doo biniyé bitis hííkaadii tʼáá ałchʼijí booshkʼiizhjįʼ chʼíhííłtsooz dooígíí éí tʼááłáʼí ké siláádóó náʼáłníiʼgo áníłtéél chʼíhííłtsooz doo.
14 Nááʼáłdóʼ deenástsʼaaʼ bikágí daaldzą́ągo deilchiiʼgo índa nahashchʼid bikágí daaldzą́ągo níbaal bikʼídooltih biniyé ánáádadoohdlííł.
15 Tsin nitłʼizii bee tsin neheeshjííʼ ályaii níbaal biiʼ hodílzinii bá neelkáal dooígíí ádadoohłííł.
16 Tsin neheeshjííʼ tʼááłáʼí nítánígo ashdlaʼáadah ké silá ádaníłnéez doo; tʼááłáʼí nítánígo naaki ké siláádóó tááʼ asdzoh ádaníłtéel doo.
17 Tsin neheeshjííʼ neelkáalii tʼááłáʼígo biyaadóó naaznilígíí naaki bąąh haʼííʼáago ádadoohłííł; kótʼéego níbaal biiʼ hodílzinii bá tsin neheeshjííʼ tʼáá ałtso ádadoohłííł.
18 Níbaal biiʼ hodílzinii bá tsin neheeshjííʼ éí shádiʼááhjí naadiingo noolkáal dooígíí ádadoohłííł.
19 Áádóó dízdiingo béésh łigaii tʼááłáhíjí biih dahasdzánígíí tsin neheeshjííʼ naadiingo bitłʼááh sinil doo biniyé ádadoohłííł; tsin neheeshjííʼ tʼááłáʼí nítánígo bitłʼááh sinil dooígíí naakigo ádadoohłííł.
20 Áádóó níbaal biiʼ hodílzinii bá tsin neheeshjííʼ náhookǫsjí noolkáál dooígíí naadiingo ánáádadoohdlííł,
21 índa dízdiingo béésh łigaii tʼááłáhíjí biih dahasdzánígíí tsin neheeshjííʼ bitłʼááh sinil doo biniyé ałdóʼ ánáádadoohdlííł; tsin neheeshjííʼ tʼááłáʼí nítánígo bitłʼááh sinil dooígíí naakigo ánáádadoohdlííł.
22 Áádóó níbaal biiʼ hodílzinii bá eʼeʼaahjí tsin neheeshjííʼ éí hastą́ągo ánáádadoohdlííł.
23 Índa níbaal biiʼ hodílzinii bikééʼjí naanázʼáhígi éí tʼáá ałchʼijí bá tsin neheeshjííʼ yaaʼáa doo biniyé ádadoohłííł.
24 Áko bitłʼáahdi tʼéiyá tʼóó ahiníʼáa doo, nidi dego yaaʼáhíjįʼ béésh názbąsii bąąh siʼą́ągo ałchʼįʼ yótąʼgo tʼáá ałchʼijí bee nástłʼahgi ákótʼéego ádadoohłííł.
25 Ákohgo tsin neheeshjííʼ tseebíigo áádóó bitłʼááh sinil dooígíí béésh łigaii tʼááłáhíjí biih dahasdzánígíí hastą́ʼáadahgo ádadoohłííł; tsin neheeshjííʼ tʼááłáʼí nítánígo naaki bitłʼááh naaznil doo.
26 Áádóó tsin nitłʼizii bee tsin daníyizii ashdlaʼgo níbaal biiʼ hodílzinii booshkʼiizhjí naaniigo tsin neheeshjííʼ bąąh daníʼáa doo biniyéhígíí ádadoohłííł,
27 áádóó náánáłahjí booshkʼiizhjí ałdóʼ ashdlaʼgo naaniigo bąąh daníʼáa doo biniyé índa nááʼashdlaʼgo éí níbaal biiʼ hodílzinii eʼeʼaahjígo ałdóʼ naaniigo bąąh daníʼáa doo biniyé ádadoohłííł.
28 Ałnííʼgóó tsin níyizii níʼáa dooígíí éí tʼáá níléijįʼ haʼnaa hadiiʼáa doo.
29 Tsin neheeshjííʼ éí óola bikʼídaastiʼgo ádadoohłííł, áádóó óola názbąsgo bąąh yíʼnilgo tsin níyizii naaniigo bąąh daníʼáa dooígíí biiʼ nídaditsih dooígíí ałdóʼ ádadoohłííł, índa tsin níyizgo iiʼ nídaditsih dooígíí ałdóʼ óola bikʼídaastiʼgo ádadoohłííł.
30 Áko níbaal biiʼ hodílzinii binahoséʼą́ągo dziłghą́ąʼdi nił ííshjání áshłaaígíí bikʼehgo nidadoohʼááł.
31 Áádóó ataʼnaníbaal dooígíí ádoolnííł; éí yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ yistłʼǫ́ǫgo, diyingo nidaalʼaʼí chérabim wolyéii bee nidaashchʼąąʼgo dayiichįįhgo ádeidoolííł.
32 Áko ataʼnaníbaal dooígíí bá tsin nitłʼizii dı̨́įʼgo ííyah daniiʼáa dooígíí óola bikʼídaastiʼgo ádadoohłííł, áádóó óola bąąh hadaazhahgo ádadoohłííł, índa dı̨́įʼgo bitłʼááh sinil dooígíí béésh łigaii tʼááłáhíjí biih dahasdzánígíí bee ádadoohłííł, áko ataʼnaníbaal dooígíí dadidoołbał.
33 Ił dah nídaatı̨́hí bąąh yíʼnilígíí bee dadidoołbał, índa tsitsʼaaʼ dílzinii éí neeznáago bikʼeh óʼooʼníiłii bee bééhániihii biiʼ sinilii éí ataʼnaníbaalígíí bineʼjí náwóneʼédi yah adadoohʼááł, áko ataʼnaníbaal dooígíí éí hodiyingo hazʼánídóó tsʼídá aláahgo hodiyingo hazʼánígíí bitsʼąą nanihinil doo biniyé bitaʼndadoołbałgo tʼáá ałʼąą hazʼą́ą doo.
34 Aa aʼááh hasinii bił hazʼáanii éí tsitsʼaaʼ dílzinii bidańʼdítı̨́įhgo ádadoohłíiłgo tsʼídá aláahgo hodiyingo hazʼání góneʼ nidadoohʼááł.
35 Ataʼnaníbaalídóó tłʼóóʼ bichʼijígo bikááʼ adání nidadoohʼááł, índa bee hoolʼiní éí níbaal biiʼ hodílzinii biiʼ bikááʼ adání siʼánígíí binaashiijí shádiʼááhjígo nidadoohʼááł; bikááʼ adání éí náhookǫsjí siʼą́ą doo.
36 Níbaal biiʼ hodílzinii bichʼéʼétiingi dáádiníbaal dooígíí yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ yistłʼǫ́ǫgo naashchʼąąʼgo bee ádadoohłííł.
37 Dáádiníbaal bá tsin nitłʼizii ashdlaʼgo ííyah daniiʼáa dooígíí bąąh hadaʼazhahgo ádadoohłíiłgo óola bikʼídadoołtih; éí bąąh hadaʼazhah dooígíí ałdóʼ óola bee ádadoohłííł, áádóó ashdlaʼgo bitłʼááh sinil dooígíí béésh łitsoii tʼááłáhíjí biih dahasdzánígíí ádadoohłííł.
