Exodus 27:1-21
27 Bikááʼ nááʼiiniih dooígíí tsin nitłʼizii bee ádadoohłííł; tsostsʼid ké siláádóó náʼáłníiʼgo áníłnéez doo, áádóó naaniigo tsostsʼid ké siláádóó náʼáłníiʼgo áníłtéel doo; dikʼą́ągo ádadoohłííł, índa dego éí dı̨́ı̨́ʼ ké siláádóó náʼáłníiʼgo ánízah doo.
2 Dı̨́įʼgo naanázʼáhídóó bideeʼ hadaazʼáa dooígíí tʼáá łaʼ bizhiʼee bideeʼ tʼáá bił ádadoohłííł, índa béésh łitsoii bikʼídadoołtih.
3 Ásaaʼ éí łeeshchʼiih biiʼ yadahiikaah dooígíí, áádóó łeeshchʼiih bee hadahakaahí, áádóó ásaaʼ dantsaaígíí, áádóó bílaʼtáaʼii danineezígíí índa tsííd bee naakáhí ádadoohłííł; bił chodaoʼíinii tʼáá ałtso béésh łitsoii bee ádadoohłííł.
4 Bikááʼ nááʼiiniihí bá béésh łitsoii ałnáshizhoozhgo tsííd dah yookáłí ádadoohłííł, áádóó éí dı̨́įʼgo naanídaazʼáhídóó béésh łitsoii názbąsgo bąąh dah naaznil dooígíí ádadoohłííł.
5 Bikááʼ nááʼiiniihí bidáaʼgi ahééníʼáhídóó yaago ałníiʼgi béésh łitsoii ałnáshizhoozhgo tsííd dah yookáłí dah siʼą́ągo ádadoohłííł.
6 Áádóó bikááʼ nááʼiiniihí bee naʼatʼáhígíí tsin nitłʼizii níyizgo béésh łitsoii bikʼéstiʼgo ádadoohłííł.
7 Tsin níyizii éí béésh łitsoii názbąsgo ádaalyaaígíí biiʼ níʼáago ályaa doo, áko bikááʼ nááʼiiniihí booshkʼiizh tʼáá ałchʼishjí tsin níyizii bąąh níʼáago éí bee naatʼáa dooleeł.
8 Dziłghą́ąʼdi nił ííshją́ą́ áshłaaígíí bikʼehgo tsin neheeshjííʼ nitłʼizígíí bee bikááʼ nááʼiiniihí dikʼą́ągo tʼáá bighá hoolʼáago ádadoohłííł.
Níbaal biiʼ hodílzinii binaa hazʼánígíí
9 Níbaal biiʼ hodílzinii binaagóó hazʼą́ągo ádaalyaa doo; shádiʼááhjígo tʼááłáhídi neeznádiindóó baʼaan ashdladiin ké silá ánízahgo, áádóó áłtsʼóózígo yisdizígíí bee naʼatʼą́hí łigaii ditsʼidgo ályaii nídadilbałígíí bee ádaalyaa doo.
10 Bá adaazʼáa dooígíí éí naadiingo áádóó bitłʼááh naaznilgo tʼááłáhíjí biih dahasdzą́ą dooígíí éí naadiingo béésh łitsoii bee ádaalyaa doo,* bá adaazʼáago bąąh hadaʼazhah dooígíí índa bitaʼndaazʼáa dooígíí éí béésh łigaii bee ádaalyaa doo.
11 Tʼáá ákónáánátʼéego náhookǫsjí ałdóʼ tʼááłáhídi neeznádiindóó baʼaan ashdladiin ké silá ánízahgo aníbaal doo; bá adaazʼáa dooígíí éí naadiin doo; bitłʼááh naaznil dooígíí ałdóʼ naadiingo béésh łitsoii tʼááłáhíjí biih dahasdzą́ągo ádaalyaa doo, nidi bá adaazʼáii bąąh hadaʼazhah dooígíí índa bitaʼndaazʼáa dooígíí éí béésh łigaii bee ádaalyaa doo.
12 Níbaal biiʼ hodílzinii binaagóó hazʼánígíí eʼeʼaahjígo tsostsʼidiindóó baʼaan ashdlaʼ ké silá ánízahgo aníbaal doo, índa bá adaazʼáhígíí éí neeznáa doo; bitłʼááh naaznil dooígíí tʼááłáhíjí biih dahasdzánígíí ałdóʼ neeznáa doo.
13 Níbaal biiʼ hodílzinii binaagóó hazʼánígíí haʼaʼaahjígo tsostsʼidiindóó baʼaan ashdlaʼ ké silá áhoníłtéel doo.
14 Chʼéʼétiingi łahjí naadiin naakidóó náʼáłníiʼgo ké silá ánízahjįʼ aníbaal doo; bá ííyah daniiʼáii éí tááʼ índa bitłʼááh naaznil dooígíí tʼááłáhíjí biih dahasdzánígíí ałdóʼ táaʼ doo.
15 Łahjígo naadiin naakidóó náʼáłníiʼgo ké silá ánízahjįʼ aníbaal doo; bá ííyah daniiʼáii ałdóʼ tááʼ índa bitłʼááh naaznil dooígíí tʼááłáhíjí biih dahasdzánígíí ałdóʼ táaʼ doo.
16 Níbaal biiʼ hodílzinii binaagóó hazʼánígíí bichʼéʼétiingi dáádiníbaal dooígíí éí tádiin ké silá áníłnéez doo; yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ yistłʼǫ́ǫgo naashchʼąąʼgo ályaa doo; bá adaazʼáa dooígíí dı̨́ı̨́ʼ índa bitłʼááh naaznil dooígíí tʼááłáhíjí biih dahasdzánígíí ałdóʼ dı̨́įʼ doo.
17 Níbaal biiʼ hodílzinii binaagóó hazʼánígíí bá adaazʼáhígíí bitaʼndaʼazʼáa dooígíí béésh łigaii bee ádaalyaa doo; bąąh hadaʼazhah dooígíí béésh łigaii bee ádaalyaa doo, índa bitłʼááh naaznil dooígíí tʼááłáhíjí biih dahasdzánígíí éí béésh łitsoii bee ádaalyaa doo.
18 Níbaal biiʼ hodílzinii binaagóó hazʼánígíí tʼááłáhídi neeznádiindóó baʼaan ashdladiin ké silá áníłnéez doo; naaniigo éí tsostsʼidiindóó baʼaan ashdlaʼ ké silá áníłtéel doo, índa dego éí tsostsʼid ké siláádóó náʼáłníiʼgo ánízahgo ahééníbaal dooígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii bee ádaalyaa doo, áádóó bá adaazʼáhígíí bitłʼááh naaznil dooígíí tʼááłáhíjí biih dahasdzánígíí béésh łitsoii bee ádaalyaa doo.
19 Níbaal biiʼ hodílzinii tʼáá ałtsojįʼ bił chodaoʼíinii áádóó níbaal biiʼ hodílzinii áádóó binaagóó hazʼánígi bá anídaalkał dooígíí éí tʼáá ałtso béésh łitsoii bee ádaalyaa doo.
Bee hoolʼiní baa áháyánígíí (Lev. 24:1-4)
20 Ízrel dineʼé bichʼįʼ hadíídzihgo éí tsin áliv bineestʼąʼ níkʼíbíʼníltłishgo bikʼah tʼáá bízhání bee hoolʼin doo biniyé naa deidiyookááł; éí bee hoolʼin doo biniyé tʼáá áłahjįʼ dookʼą́ął doo.
21 Níbaal biiʼ dahozdísinii biiʼ neeznáago bikʼeh óʼooʼníiłii bee bééhániihii bidááhjí ataʼnaníbaalídóó tłʼóóʼ bichʼįʼgo hazʼánígi Bóhólníihii binááł Éran áádóó biyeʼké eʼeʼááhdóó abíníjįʼ bee adinídíinii ninádeiʼnił doo. Díí hoolʼáágóó yee nihoníʼáanii Ízrel dineʼé náás daʼahideeshchı̨́ı̨́góó yaa dahóyą́ągo yaa ádahalyą́ą doo.
Footnotes
^ Béésh łitsoii neelkálígíí éí tsin neelkáál nahalin.
