Exodus 28:1-43
28 Éran nínaaí hágo bidiní, biyeʼké yił dookah; éí Ízrel dineʼé bitahdóó nááʼiiłniihii danilı̨́įgo shá nidaalʼaʼ doo: Néídab áádóó Abáíhu áádóó Eliyéízer índa Íthamar éí Éran biyeʼké danilı̨́įgo yił dookah.
2 Ééʼ dadílzinii éí nínaaí Éran bá ádeidoolíiłgo íínísin; yee ił nilı̨́į doo índa yee ayóó ánoolnin doo.
3 Daʼiichįįhii, hódzą́ baa sísįįdii tʼáá ałtso bichʼįʼ hadíídzih; éí Éran biʼééʼ ádeidoolííł, áko diyingo bitsʼąą hastiʼii nilı̨́į doo; éí shá naalʼaʼgo nááʼiiłniihii nilı̨́į doo.
4 Ééʼ ádadoolníłígíí éí díí: ayidgi dah siłtsooz dooígíí áádóó íífad wolyéii áádóó ééʼ agod taʼjįʼ nineelʼánígíí áádóó ayaadi ééʼ nineezígíí éí nidaashchʼąąʼ dooígíí áádóó chʼah dijoolígíí índa sis bee áká náʼálzis dooígíí nínaaí Éran índa biyeʼké bá ééʼ dadílzinii ádeidoolííł; éí shá nidaalʼaʼ doo biniyé náádaʼiiłniihii danilı̨́į doo.
5 Óola áłtsʼóózígo neheeshgizhígíí áádóó yisdizii yá nahalingo dootłʼizhígíí áádóó tsídídééh nahalingo łichíʼígíí áádóó łichxíʼígíí índa áłtsʼóózígo yisdizígíí bee naʼatʼą́hí łigaii ditsʼidgo ályaii baa dahidooʼnił.
6 Óola áłtsʼóózígo neheeshgizhígíí áádóó yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii daʼiichįįhgo bee íífad wolyéii ádeidoolííł.
7 Íífad wolyéii awostisgi tʼáá ałchʼijí bee ahídahidoolchahígíí ádoolnííł.
8 Íífad anííʼ gónaa ahééhiníłtsooz dooígíí sis baa nahodeesgįʼgo yistłʼónígíí éí bee áká dzíszaaz doo biniyé bił ahídahidoolchah; óola áłtsʼóózígo neheeshgizhígíí áádóó yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí yisdizii áłtsʼóózígo yisdizígíí bee naʼatʼą́hí łigaii ditsʼidgo ályaii bee tʼáá íífad naashchʼąąʼgo ádoolníłígi átʼéego sis naashchʼąąʼgo ádoolnííł.
9 Tsé ílíinii naakigo ániks wolyéhígíí nídidííniłgo hashtʼeʼnibíʼdookʼashgo bikáaʼgi Ízrel biyeʼké dabízhiʼ bikʼi sinilgo ádeidoolíiłgo íínísin;
10 tsé tʼááłáʼí bikáaʼgi hastą́ltʼéego bízhiʼ tʼáá ałkééʼ nidabiʼdiizhchínígíí bikʼehgo bikʼi sinilgo índa náánáłahjí tséhígíí bikáaʼgi hastánáánáltʼéhígíí bízhiʼ tʼáá ałkééʼ nidabiʼdiizhchínígíí bikʼehgo bikʼi náánásnilgo ádeidoolíiłgo íínísin.
11 Tsé hashtʼeʼniyídaʼakʼaashii tsé yinídaʼakʼaashgo yízhí bikʼi naaznilgo ádeileʼígi átʼéego ni ałdóʼ tʼáá éigi átʼéego tsé ílíinii naakigo Ízrel biyeʼké dabízhiʼ bikʼi nidíínił áádóó bibąąhgóó óola bee ahéédeelghas dooígíí ádeidoolíiłgo íínísin.
12 Índa éí tsé naakiígíí Ízrel biyeʼké bee bééhániih doo biniyé íífad wolyéii bikáaʼgi awostisgi tʼáá ałchʼijí sinilgo ádíílííł; Éran éí Ízrel biyeʼké dabízhiʼ hawostisgi bikʼi sinilgo bee Bóhólníihii yee hwénálniih doo biniyé binááł yah aníjídáah doo.
13 Áádóó óola ahéédeelghas dooígíí naakigo ádeidoolíiłgo íínísin,
14 índa tłʼóół ałkʼésgizígi átʼéego óola tʼáá bízhání daʼahólzhaʼí naakigo ałkʼésgizgo ádeidoolíiłgo íínísin; éí ahéédeelghasígíí tʼáá ałchʼijí bíhidííłchah.
15 Áko íífad wolyéii baa nahodeesgįʼgo ályaaígi átʼéego bee nihodiitʼaahjí ayidgi dah siłtsooz dooígíí ajiichįįhgo ájíléehgo íínísin; éí óola áłtsʼóózígo neheeshgizhígíí áádóó yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ yistłʼǫ́ǫgo ádeidoolíiłgo íínísin.
16 Éí ahą́ą́h nániilyáago dikʼą́ą doo; yílá deestsʼǫ́ǫ́d áníłnéezgo áádóó yílá deestsʼǫ́ǫ́d áníłtéelgo ályaa.
17 Índa bikáaʼgi tsé daʼílíinii biih hidííniłgo dı̨́įʼgo hahidiitʼiʼgo ádeidoolíiłgo íínísin; áłtsé hadiitʼiʼ dooígíí éí sárdiyas áádóó tópaz índa kárbankal;
18 naaki góneʼ hanáádiitʼiʼ dooígíí éí émerald áádóó sáfair índa dáíman;
19 tááʼ góneʼ hanáádiitʼiʼ dooígíí éí jéísinth áádóó égat índa ámethist;
20 dı̨́ı̨́ʼ góneʼ hanáádiitʼiʼ dooígíí éí béril áádóó ániks índa jásper; tʼááłáʼí níʼánígo óola bił ahéédadeesghas dooígíí ádaʼdoolííł.
21 Ízrel biyeʼké dabízhiʼ éí tsé naakitsʼáadahgo biiʼ nidaʼashkʼaazhgo bee akʼedaʼashchı̨́į doo; tsé biiʼ naʼashkʼaazhgo bee yízhí bikʼi sinilígíí nahalingo Ízrel dineʼé dabízhiʼ bikʼi sinil doo.
22 Ayidgi dah siłtsooz dooígíí bá tłʼóół ałkʼésgizígi átʼéego óola tʼáá bízhání daʼahólzhaʼígíí ałkʼésgizgo ádeidoolíiłgo íínísin;
23 ayidgi dah siłtsooz dooígíí bá óola názbąs naaki bąąh sinil dooígíí ałdóʼ ádeidoolíiłgo íínísin, áko ayidgi dah siłtsooz dooígíí tʼáá ałchʼijí bąąh dah sinilgo ádeidoolíiłgo íínísin.
24 Índa óola naaki ałkʼésgizgo ádoolníłígíí éí ayidgi dah siłtsooz dooígíí tʼáá ałchʼijí óola názbąs naaki bąąh dah sinilígíí bíhidííłchah.
25 Tʼáá ałchʼijí nineelʼánídóó óola ałkʼésgizígíí ninítʼiʼgi tʼáá ałchʼijí óola naakigo ahéédeelghasígíí bíhidííłchah, áko éí bee ayidgi dah siłtsooz dooígíí íífad wolyéii bikáaʼgi awostisjįʼ tʼáá ałchʼijí bíhidoolchah.
26 Índa óola názbąsgo naakigo ánáádeidoodlíiłgo íínísingo ayidgi dah siłtsooz dooígíí yaago nineelʼání biyiʼdóó íífad bichʼįʼgo bąąh sinilgo ádíílííł.
27 Áádóó óola názbąsgo naakigo ałdóʼ ánáádeidoodlíiłgo íínísin, áko éí íífad bikáaʼgi awostisdóó tʼáá ałchʼijí háátʼiʼígíí yaago ninítʼiʼgi bąąh sinilgo ádíílííł; sis éí íífad bąąh nítʼiʼígíí daʼiichįįhgo nídeiskadígíí bidáahjigo béheeshchaʼgi bąąh sinilgo ádíílííł.
28 Áádóó ayidgi dah siłtsoozígíí óola názbąsgo bąąh sinilii áádóó óola názbąsgo íífad bąąh sinilii yisdizii yá nahalingo dootłʼizhígíí yee yídeidiyoołtłʼóół, áko ayidgi dah siłtsooz dooígíí éí íífad bąąh sis nítʼiʼígíí yiyiichįįhgo yiztłʼónígíí bikáaʼgi siłtsooz doo biniyé, áádóó ałdóʼ ayidgi dah siłtsooz dooígíí éí íífad doo bitsʼą́ą́ʼ dínóotłóoł da biniyé yídeidiyoołtłʼóół.
29 Éran éí bee nihodiitʼaahjí ayidgi dah siłtsoozígíí bikáaʼgi Ízrel biyeʼké dabízhiʼ bikáaʼgo hajéíkáaʼgi siłtsooz doo, áko hodiyingo hazʼą́ąjįʼ tʼáá yah aníjídááh bikʼeh Bóhólníihii tʼáá áłahjįʼ hwéénálniih.
30 Áko bee nihodiitʼaahjí ayidgi dah siłtsooz dooígíí biyiʼ Yúrim wolyéii áádóó Thámmim wolyéii nidííniłgo Éran hajéíkáaʼgi sinilgo éí Bóhólníihii binááł yah aníjídáah doo, ákójítʼínígíí bee Éran éí Ízrel dineʼé bibee nihodiitʼaahii tʼáá áłahjįʼ Bóhólníihii binááł hajéíkááʼ hólǫ́ǫ doo.
31 Íífad wolyéii biyaadi ééʼ agod taʼjįʼ nineelʼánígíí ałdóʼ tʼáá átʼé yá nahalingo dootłʼizhgo ádeidoolíiłgo íínísin.
32 Bizénághą́ą́ gónaa yistłʼǫ́ǫgo éí éʼígíí tʼóó biih náʼnítʼáahgo biih náʼádáahgo béésh ééʼ bee naʼabaahii álʼínígi átʼéego náskad doo.
33 Ééʼ agod taʼjįʼ nineelʼánígíí tʼą́ą́ʼ ánátʼéego ahénálkadígi tsin pámgrenit* aneestʼąʼ dijoolígi átʼéego éí yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí bee ádeidoolíiłgo íínísin; óola yooʼ achaaí éí pámgrenit bił ałtaʼyíʼnilgo íínísin.
34 Ééʼ agod taʼjįʼ nineelʼánígíí bijánil bibąąhgi óola yooʼ achaaí índa tsin pámgrenit aneestʼąʼ bił ałtaʼyíʼnilgo ádíílííł.
35 Áko Éran ninájílʼaah bikʼeh ééʼ bijánil bąąh yooʼ achaaí bąąh sinilígíí diitsʼaʼ doo biniyé biih níjídáahgo hodiyingo hazʼání góneʼ Bóhólníihii binááł yah aníjídááh áádóó chʼééjiidááh, ákótéego doo dazdootsaał da.
36 Óola tʼáá bízhání átáaʼgi dah sitą́ą dooígíí ádeidoolíiłgo íínísin índa kóníigo tsé biiʼ naʼashkʼaazhgo yízhí bikʼi sinilígi átʼéego Bóhólníihii Bá Atsʼádeetʼą́, níigo bikááʼ ádeidoolíiłgo íínísin.
37 Éí tłʼóółtsʼósí yá nahalingo dootłʼizhígíí bee chʼah dijoolí bíhidííłchah; chʼah dijoolí bidááhjígo bíheestłʼǫ́ǫ doo.
38 Éí Éran bítáaʼgi dah sitą́ą doo, áko dílzingo náádahaniihii doo ákwii ádaatʼéhígíí Ízrel dineʼé tʼáá deidísingo dílzingo náádayiiłniihgo éí Éran yá naatłizh doo; tʼáá áłahjįʼ bítáaʼgi dah sitą́ą doo, áko Ízrel dineʼé éí Bóhólníihii yił dahóshǫ́ǫ doo.
39 Áádóó ééʼ nineezígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii naashchʼąąʼgo bikʼi yíʼnilgo deidootłʼóołgo íínísin; chʼah dijoolí ałdóʼ áłtsʼóózígo yisdizígíí bee naʼatʼą́hí łigaii ditsʼidgo ályaii bee ádeidoolíiłgo índa sis bee áká náʼálzis dooígíí naashchʼąąʼgo yistłʼǫ́ǫgo ádeidoolíiłgo íínísin.
40 Áádóó Éran biyeʼké bá ééʼ nineezígíí áádóó sis bee áká náʼálzis dooígíí índa chʼah dijoolí ádeidoolíiłgo íínísin; éí yee ił nilı̨́į doo índa yee ayóó ánoolnin doo.
41 Índa nínaaí Éran áádóó biyeʼké tʼáá bił éí ééʼ bee hadahodidíílííł, áádóó akʼah hakʼi yadeidííziłgo dahodíísįh índa diyingo hatsʼąą hastiʼii atsʼádahodííniłgo dazhdiyin doo.
42 Nááʼáłdóʼ doo tʼáá łichíʼígo nidajikai da doo biniyé naʼatʼą́hí łigaii ditsʼidígíí bee tłʼaajiʼééʼ há ádeidoolíiłgo íínísin; hanííʼdóó achʼozhjįʼ daneelʼą́ą doo;
43 Éran áádóó biyeʼké éí tłʼaajiʼééʼ yiih nídaatʼisgo níbaal biiʼ dahozdísinii góneʼ yee yah anídaakah doo, doodaiiʼ shá nidaalʼaʼ doo biniyé bikááʼ nááʼiiniihí siʼáníjįʼ hodiyingo hazʼánígi yee yah anídaakah doo, áko doo ákwii ádáátʼįįdígíí doo yee ádidahodidooltʼih da áádóó doo dadínóonéeł da. Díí yee nihoníʼáanii ahoyéelʼáágóó Éran índa bitsʼą́ą́dóó náás daʼahidoolchíłígíí bá átʼée doo.
Footnotes
^ Pámgrenit aneestʼąʼ éí bilasáana nahalingo bikʼǫ́ǫ́ʼ tʼóó ahayóígíí óolyé.
