Exodus 29:1-46
29 Dahoʼdidoolzįh biniyé kótʼéego ádahodoohłííł, áko náádaʼiiłniihii dajílı̨́įgo shá nidajilʼaʼ doo. Dóola yázhí hadaałtʼéii índa deenástsʼaaʼ naakigo hadaałtʼéii,
2 índa dííkʼǫsh tʼáágééd bááh ályaii áádóó dííkʼǫsh tʼáágééd łeesʼáán akʼah bił ályaii, índa bááh dáʼákaʼí nahalinígíí akʼah bee yistłahgo ályaii shóidííłtʼeeł. Tłʼoh naadą́ą́ʼ akʼáán bee ádadííliił.
3 Éí tsʼaaʼ tʼááłáʼí biih dííniłgo bee dííkááł, índa dóola yázhí áádóó deenástʼaaʼ naakigo dííʼish.
4 Níbaal biiʼ dahozdísinii bichʼéʼétiinjįʼ Éran áádóó biyeʼké nidííʼishgo tó bee táádahodíígis.
5 Ééʼ nídidííniłgo ééʼ nineezígíí áádóó ééʼ agod taʼjįʼ nineelʼánígíí áádóó íífad wolyéii índa íífad bikáaʼgi ayidgi dah siłtsooz dooígíí Éran bee hadidíílííł, áádóó sis íífad bąąh nítʼiʼgo baa nahodeesgįʼgo yistłʼónígíí bee áká hodíílzis,
6 áádóó chʼah dijoolí bee álʼínígíí hatsiinídííłtʼih, índa átáaʼgi dah sitą́ą dooígíí hátáaʼgi dah díítı̨́ı̨́ł.
7 Áko akʼah akʼi yahiidzídígíí nídidííkááł, índa hatsiiʼkáaʼgi yeidííziłgo bee hoʼdoolzı̨́įʼ doo.
8 Áko índída hayeʼké ałdóʼ nídidííʼishgo íífad biyaadi ééʼ nineezígíí bee hadahodidííliił;
9 sis bee áká dahodíílzis índa chʼah dijoolí dahachʼahgo ádahodííliił; nááʼiiłniihii binaanishgo ahóyéelʼáágóó yee nihoníʼáanii átʼée doo. Éran áádóó biyeʼké diyingo bitsʼąą hastiʼii dajílı̨́įgo áhodíílííł.
10 Áko níbaal biiʼ dahozdísinii bichʼéédą́ąʼgi dóola yázhí díílóosgo Éran áádóó biyeʼké éí dóola yázhí bitsiiʼkáaʼgi dah dahizhdilníih doo,
11 índa níbaal biiʼ dahozdísinii bichʼéédą́ąʼgi Bóhólníihii binááł diyííłhééł,
12 áádóó dóola yázhí bidił łahjįʼ nídidííkáałgo nílaʼ bee bikááʼ nááʼiiniihí bideeʼ hadaazʼáhígíí dadíídlish, índa yidziihígíí bikááʼ nááʼiiniihí bitsı̨́įjįʼ yeidííził.
13 Bitsą́ siláii bąąh akʼahígíí áádóó azid bíighahgi akʼahígíí índa atsą́ áshkʼazhí bąąh akʼahígíí tʼáá bił nídidííniłgo bikááʼ nááʼiiniihí bikáaʼgi didííłił.
14 Nidi dóola yázhí bitsįʼ áádóó bikágí índa bichaan éí níbaal haalʼáhídóó bitsʼáhwiiníʼą́ądi didííłił; ádił niʼiidzííhjí nááhániihii átʼé.
15 Ákohgo deenástsʼaaʼ łaʼ nínáádidíídlóosgo Éran áádóó biyeʼké éí deenástsʼaaʼ bitsiiʼkáaʼgi dah dahizhdilníih doo.
16 Áádóó deenástsʼaaʼ diyííłhéełgo bidił nídidííkáałgo bikááʼ nááʼiiniihí tʼáá ałtsodę́ę́ʼ bikʼídííłtah.
17 Áko éí deenástsʼaaʼ nihidííłgishgo bitsą́ siláii índa bijáád ałdóʼ táádadíígis, áádóó nihíníłgizhígíí índa bitsiiʼ tʼáá bił tʼááłáhígi nidííniłgo
18 bikááʼ nááʼiiniihí bikáaʼgi deenástsʼaaʼ tʼáá átʼé didííłił; éí Bóhólníihii bichʼįʼ didlidgo nááhániihii átʼé; Bóhólníihii bichʼįʼ didlidgo nááhániihii łikání halchinii átʼé.
19 Áko deenástsʼaaʼ łaʼígíí nínáádidíídlóosgo Éran áádóó biyeʼké éí deenástsʼaaʼ bitsiiʼkáaʼgi dah náádahididoolnih,
20 áádóó deenástsʼaaʼ náádiyííłhééł, áko bidił łahjįʼ nídidííkáałgo Éran bijaaʼ nishʼnáájíígíí bílátahgi bee díídlish, índa biyeʼké dabijaaʼ nishʼnáájíígíí bílátahgi ałdóʼ bee dadíídlish, áádóó Éran índa biyeʼké dabílátsoh nishʼnáájíígíí dadíídlish, áádóó dabikétsoh nishʼnáájíígíí ałdóʼ dadíídlish, índa yidziihígíí bikááʼ nááʼiiniihí tʼáá ałtsodę́ę́ʼ bikʼídííłtah.
21 Dił éí bikááʼ nááʼiiniihí bikʼísíníłtahii tʼáá bííʼohígíí áádóó akʼah akʼi yahiidzíidgo bee alzı̨́hígíí łaʼ nídidííkáałgo Éran áádóó biʼééʼ bikʼídííłtah, índa hayeʼké áádóó dabiʼééʼ ałdóʼ bikʼídadííłtah, áko hó índa haʼééʼ dadiyin doo; hayeʼké áádóó dabiʼééʼ ałdóʼ dadiyin doo.
22 Éí deenástsʼaaʼ bikʼah áádóó bitseeʼ neeskʼahígíí áádóó bitsą́ siláii bąąh akʼahígíí áádóó azid bíighahgi akʼahígíí, áádóó atsą́ áshkʼazhí bąąh akʼahígíí índa ajáád nishʼnáájíígíí bił nídidíínił, háálá diyingo bitsʼąą hastiʼgo deenástsʼaaʼ há nááhániihii átʼé.
23 Nááʼáłdóʼ bááh áádóó akʼah bił bááh ályaii índa dííkʼǫsh tʼáágééd bááh ályaii Bóhólníihii binááł tsʼaaʼ bee siką́ągo tʼáá daałáʼígo nídidíínił,
24 áko éí tʼáá ałtso Éran áádóó biyeʼké bílákʼee dííniłgo náásee bił nídiʼdilnihgo nááhániihii* átʼéego Bóhólníihii binááł náásee bił nídabidiyíłnih doo.
25 Áko índa dabilákʼeedóó nídidííniłgo bikááʼ nááʼiiniihí bikáaʼjįʼ Bóhólníihii bichʼįʼ łikání halchinii átʼéego didlidgo nááhidííłnih; éí Bóhólníihii bichʼįʼ didlidgo nááhániihii átʼé.
26 Deenástsʼaaʼ bijéítsʼiin bee Éran diyingo bibitsʼąą hastiʼgo há náásee bił nídiʼdilnihgo nááhániihii Bóhólníihii binááł ajéítsʼiin náásee bił didíílnih; ajéítsʼiinígíí éí ni doo.
27 Ajéítsʼiin náásee bił nídiʼdilnihgo* áádóó ajáád bił dah nídiʼdiilnihgo nááhániihii dílzingo ádíílííł; deenástsʼaaʼ bee diyingo hatsʼąą haastiʼgo éí Éran áádóó biyeʼké bá átʼé.
28 Éran áádóó biyeʼké éí Ízrel dineʼé náádayiiłniihii hóóʼ neheleehgo yee nihoníʼą́ągo ahoolʼáa doo; jó, bił dah nídiʼdiilnihgo nááhániihii átʼé; Ízrel dineʼé bihózhǫ́ǫ́jí nááhániihii bitsʼą́ą́dóó Bóhólníihii bichʼįʼgo bił dah nídiʼdiilnihgo náádayiiłniihii átʼé.
29 Éran bikééʼ áhásdįįdgo biʼééʼ dadílzinii biyeʼké baa daalzįįhgo yąąh noonéeł doo; tʼáá bí biʼééʼ yileehígíí yiiʼ sitı̨́įgo akʼah bee biʼdilzįh áádóó diyingo bitsʼąą hastiʼii ábiʼdiilʼįįh.
30 Hayeʼ hatsáskʼehgi nááʼiiłniihii dooleełígíí éí ééʼ bee hazhdítʼéego tsostsʼid yidoołkáałgo níbaal biiʼ dahozdísinii hodiyingo hazʼání góneʼ nijilʼaʼ doo biniyé yah aníjídáah doo.
31 Diyingo hatsʼąą hastiʼgo há deenástsʼaaʼ bitsįʼ nááhaazniiʼii hodiyingo hazʼą́ągi náníłbish doo,
32 áko Éran áádóó biyeʼké éí deenástsʼaaʼ bitsįʼ índa tsʼaaʼ bee bááh sikánígíí nídeidı̨́įh doo; níbaal biiʼ dahozdísinii bichʼéʼétiingi ákódaatʼı̨́į doo.
33 Éí nídeidı̨́įhgo bee á kʼénáhoodǫǫłii anídayiilʼįįhgo diyingo bitsʼąą hastiʼii índa dadiyingo ádayósin doo. Diné tʼáá azlı̨́ʼígíí éí doo yidooyı̨́įł da, háálá dólzinii átʼé.
34 Atsʼáhwííníłtínígíí há nááhaazniiʼii atsįʼ áádóó bááh łaʼ abínígo chʼínííłnaʼgo didííłił; éí doo doodı̨́įł da, háálá nááhániihii dólzinii átʼé.
35 Áádóó Éran índa biyeʼké bá bee ádííniidígíí tʼáá átʼé bikʼehgo ádíílííł; tsostsʼid jı̨́ diyingo hatsʼąą hastiʼ doo.
36 Tʼáá ákwíí jı̨́ ádił niʼiidzííhjí nááhániihii dóola yázhí nááhíłniih doo áádóó bikááʼ nááʼiiniihí doo bąąh chinígóó áníléehgo bikáaʼgi bee kʼééhoodǫǫłii nááhíłniih doo índa bikáaʼjįʼ akʼah yeidííziłgo dólzingo ádíílííł.
37 Tsostsʼid jı̨́ bee kʼééhoodǫǫłii ánéinilʼįįhgo bikááʼ nááʼiiniihí bá náhíłniihgo dólzingo ádíílííł; bikááʼ nááʼiiniihí aláahgo dólzinii átʼée doo; haʼátʼíhígíida bíhidééʼnáaʼgo dólzin doo.
Tʼáá ákwíí jı̨́ náádahaniihii (Num. 28:1-8)
38 Bikááʼ nááʼiiniihí bikáaʼgi nááhíłniih dooígíí éí díí: dibé yázhí łaʼ binááhaii naakigo tʼáá ákwíí jı̨́ nááhíłniihgo hoolzhish doo.
39 Dibé yázhí łaʼ abínígo nááhíłniih doo; éí eʼeʼáahgo łaʼígíí nááhíłniih doo;
40 áłtséhé góneʼ dibé yázhí nááhíłniihgo ómer* bee íʼneelʼąąhí bee akʼáán tʼááłáhídi haaką́ągo éí kwáart bee íʼneelʼąąhí bee áliv sikaadii bineestʼąʼ níkʼíbíʼneeshtłishii bikʼah haaką́ągo bił ałtahgo nááhíłniih doo, índa yanáadziʼgo nááhániihii biniyé kwáart bee íʼneelʼąąhí bee wáin hadookááł.
41 Dibé yázhí łaʼígíí éí eʼeʼáahgo nááhíłniih doo; abínígo nááhíłniihígi átʼéego akʼáán nááhidoonihii índa yanáadziʼgo nááhidoonihii bił nááhíłniih doo; Bóhólníihii bichʼįʼ łikání halchingo didlidgo nááhániihii átʼé.
42 Díí tʼáá ákwíí jı̨́ didlidgo nááhániihii éí náás daʼahíínółchííhgóó níbaal biiʼ dahozdísinii bichʼéédą́ąʼgi Bóhólníihii binááł náádahoołniih doo; áadi nichʼįʼ hanásdzih doo biniyé nił ahínéishtʼash doo.
43 Áadi Ízrel dineʼé bił áłah náshdleehgo ayóó áníshtʼéego shitsʼádiʼnílídígíí bee ákwii hazʼánígíí dílzingo ályaa doo.
44 Níbaal biiʼ dahozdísinii índa bikááʼ nááʼiiniihí dílzingo ádeeshłííł, áádóó Éran índa biyeʼké diyingo nihodideeshʼáałgo shá nidaalʼaʼgo náádaʼiiłniihii danilı̨́į doo.
45 Áko Ízrel dineʼé bitah kééhashtʼı̨́įgo biDiyin God nishłı̨́į doo.
46 Áko díí hoł béédahózin doo: Bóhólníihii haDiyin God nishłı̨́įgo hatah kééhashtʼı̨́į doo biniyé Ííjip kéyahdę́ę́ʼ chʼíhoníʼeezhígíí áshtʼı̨́ ni; Bóhólníihii haDiyin God nishłı̨́.
Footnotes
^ Náásee bił nídiʼdilnihgo nááhániihii jiníigo éí nááhániihii tʼááłáhídi náásee bił adideesʼniiʼ áádóó tʼą́ą́ʼ bił nídiʼdeesniiʼgo óolyé.
^ Bił dah nídiʼdiilnihgo jiníigo éí nááhániihii tʼááłáhídi bił dah adidiilniiʼ áádóó tʼą́ą́ʼ bił nídiʼdeesʼniiʼgo óolyé.
^ Ómer jiníigo deal ałdóʼ wolyé. Ómer neeznáago éí íífa wolyéii bił aheełtʼé. Ex. 16:36.
