Exodus 30:1-38
30 Bikááʼ nááʼiiniihí áníléehgo éí bikáaʼjįʼ tsin bijeeh dilidgo łikání halchinii nááhániih doo biniyé tsin nitłʼizii bee ádíílííł.
2 Tʼááłáʼí ké siláádóó náʼáłníiʼgo áníłnéez doo, índa naaniigo tʼááłáʼí ké siláádóó nááʼáłníiʼgo áníłtéel doo; dikʼą́ą doo, nidi dego éí tááʼ ké silá ánízah doo; bideeʼ hadaazʼáa dooígíí bił tʼáá łaʼ bizhiʼee ádíílííł.
3 Óola tʼáá bízhání bikʼídadííłtih; bikááʼdę́ę́ʼ áádóó booshkʼiizh naazʼáhígíí índa bideeʼ hadaazʼáa dooígíí ákódíílííł, áádóó ałdóʼ bibąąhgóó óola ahénálchʼah dooígíí ádíílííł.
4 Índa biyaagi tʼáá ałchʼishjí tsin níyizii iiʼ níʼáago bee naatʼá biniyéhígíí bá óola názbąsgo bąąh dah sinilgo ádíílííł.
5 Tsin nitłʼizii níyizgo íinilaago óola bikʼéstiʼgo ádíílííł.
6 Áko tsitsʼaaʼ dílzinii éí neeznáago bikʼeh óʼooʼníiłii bee bééhániihii biiʼ sinilii bidáahgi ataʼnaníbaalígíí éí bitsı̨́įgi nidííʼááł; éí neeznáago bikʼeh óʼooʼníiłii bee bééhániihii bikáaʼgi aa aʼááh hasinii bił hazʼánígi tʼáá ákwii nił ahínéishtʼash doo.
7 Áko Éran éí tʼáá ákwíí ábíní bikááʼ nááʼiiniihí bikáaʼjįʼ tsin bijeeh dilidgo łikání halchinii jidiłid doo; bee dahoolʼinígíí baa áhojilyą́ągo éí łikání halchinii jidiłid doo,
8 índa tʼáá ináʼátʼááh bikʼeh Éran éí bee dahoolʼinígíí nízhdiiłtłiʼgo tsin bijeeh dilidgo łikání halchinii jidiłid doo, áko tʼáá ákwíí jı̨́ tsin bijeeh dilidgo łikání halchinii éí Bóhólníihii binááł náádahołniihgo náás daʼahíínółchíih dooleeł.
9 Tsin bijeeh dilidgo łikání halchinii doo dílzinígíí áádóó didlidgo nááhániihii áádóó akʼáán nááhániihii díí bikááʼ nááʼiiniihí bikáaʼgi tsʼídá doo didoodlił da, índa yanáadziʼgo nááhániihii doo bikʼi yeidooził da.
10 Áádóó Éran éí ádił niʼiihdzíihii bee kʼééhoodǫǫłgo biniyé nááhániihii bidiłígíí bee díí bikááʼ nááʼiiniihí bideeʼ hadaazʼáhígíí níjiidlish; tʼáá nináháhááh bikʼeh bee á kʼééhodǫǫłii ánáyiilʼįįhgo bikááʼ nááʼiiniihí bideeʼ dił yee náyiidlishgo náás daʼahíínółchíih dooleeł, áko Bóhólníihii bichʼįʼ tsʼídá aláahgo dílzinii átʼé.
Béeso bee kʼééhodǫǫłgo á nináhályéii
11 Bóhólníihii éí Mózes áyidííniid,
12 Nizaad kʼehgo Ízrel dineʼé ánéeltʼeʼgi bééhodoozįįłgo biʼdééltaʼígíí tʼááłáʼí jinítínígo tʼáá hó Bóhólníihii bichʼįʼ ádá nináhályéii nizhníláhígíí hoł daʼééltaʼ doo, áko dahwííníłtaʼígíí hatahgóó naałniih doo bee hachʼįʼ nidahwiiʼnáa da doo.
13 Dahoʼdééltaʼígíí tʼááłáʼí jinítínígo nidahizhdoojihígíí éí díí: shékel wolyéii hodiyingo hazʼą́ą́ góneʼ chooʼíinii bikʼehgo ałnííʼdóó* nidajiijáah doo; shékel wolyéii naadiin gíírah bíighah; díí shékel éí Bóhólníihii bichʼįʼ nááhániih doo.
14 Íighah dah dahizhdiikáahgo dahoʼdééltaʼígíí naadiin hwéédááhaidóó degoígíí tʼáá ádzíłtso éí Bóhólníihii díí baa dahizhdidooʼááł.
15 Ádá nináhályéii nijiléego nihitahgóó daʼjitʼíinii béeso shékel ałnííʼ biláahgo, doodaiiʼ hadahojoobáʼígíí ałdóʼ ałnííʼ tʼáá biʼohgo, doo Bóhólníihii baa nídahizhdiʼaah da doo; éí bee nihá kʼééhoodǫǫłii átʼé.
16 Ízrel dineʼé bitsʼą́ą́dóó béeso bee á kʼééhojooldǫǫłii nídidííniłgo níbaal biiʼ dahozdísinii biiʼ chooʼı̨́į doogo atsʼádíínił; éí bee Ízrel dineʼé yénálniihgo Bóhólníihii binááł ákótʼée doo; éí nihá bee kʼééhoodǫǫłii átʼé.
Biiʼ táʼádígisí
17 Bóhólníihii éí Mózes áyidííniid,
18 Biiʼ táʼádígisí biiʼ táʼádazdigis doo biniyé índa bá siʼánígíí béésh łitsoii bee ádíílííł, áádóó níbaal biiʼ dahozdísinii índa bikááʼ nááʼiiniihí bitaʼgi nidííʼáałgo tó bee nidííkááł.
19 Ákwii Éran áádóó biyeʼké dabílaʼ índa dabikeeʼ tánínádeigis doo.
20 Níbaal biiʼ dahozdísinii góneʼ yah anídaakahgo átsé táʼánídadigisgo, áko doo dadínóonéeł da, doodaiiʼ bikááʼ nááʼiiniihí yichʼįʼ ninádaakahgo shá nidaalʼaʼgo Bóhólníihii yichʼįʼ didlidgo nááhániihii náádayiiłniih doo biniyé,
21 áko dabílaʼ áádóó dabikeeʼ tánínádeigis doo, áko doo dadínóonéeł da; éí yee nihoníʼáanii ahóyéelʼáágóó bá átʼée doo; bí áádóó biyeʼké bitsʼą́ą́dóó náás ahoolchíiłii bá átʼée doo.
Akʼah akʼi yahiidzíidgo bee alzı̨́įhii áádóó tsin bijeeh dilidgo łikání halchinii
22 Nááʼáłdóʼ Bóhólníihii éí Mózes áyidííniid,
23 Spáis tsʼídá yáʼádaatʼéehii nídidíínił: akʼah ílíinii mir wolyéii ashdladi neeznádiin shékel bíighahgo áádóó sínaman wolyéego łikání halchinii ashdladi neeznádiin ałnííʼdóó; éí naakidi neeznádiindóó baʼaan ashdladiin bíighahgo, áádóó akaz łikání halchinígíí kálamas wolyéii naakidi neeznádiindóó baʼaan ashdladiin bíighahgo
24 índa kásha wolyéhígíí ashdladi neeznádiin bíighahgo nídidíínił, éí shékel hodiyingo hazʼánígi chooʼíinii bikʼehgo, índa áliv bineestʼąʼ bikʼah tʼááłáhídi yikááł bíighahgo éí tʼáá ałtso nídidíínił.
25 Akʼah akʼi yahiidzíidgo bee alzı̨́įhii éí bił bééhózinii ałtahgo ííłʼínígi átʼéego ádíílííł; dílzingo akʼah akʼi yahiidzíidii átʼée doo.
26 Áko éí bee níbaal biiʼ dahozdísinii índa tsitsʼaaʼ dílzinii éí neeznáago bikʼeh óʼooʼníiłii bee bééhániihii biiʼ sinilii bikʼídííłtah;
27 bikááʼ adání áádóó bibeedí tʼáá ałtso índa bee hoolʼiní bá yadaaʼáhígíí áádóó bił chodaoʼíinii tʼáá ałtso índa bikááʼ nááʼiiniihí éí tsin bijeeh dilidgo łikání halchinii bá ályaaígíida
28 áádóó bikááʼ nááʼiiniihí éí didlidgo nááhániihii bá ályaaígíí índa bił chodaoʼíinii tʼáá ałtso, áádóó biiʼ táʼádígisí áádóó bá siʼánígíida bikʼídadííłtah;
29 éí dílzingo ádadííliił, áko tsʼídá aláahgo dadílzin doo, áko tʼáá haʼátʼíhída bíhidééʼnáʼígíí éí dílzin dooleeł.
30 Éran áádóó biyeʼké akʼah bikʼi yadeidííziłgo diyingo bitsʼąą dahastiʼgo shá nidaalʼaʼgo nááʼiiłniihii danilı̨́į doo.
31 Áko Ízrel dineʼé ábididííniił, Díí akʼah dílzingo akʼi yahiidzíidii shá atsʼádeetʼą́ągo náás daʼahíínółchííhgóó nihá átʼée doo.
32 Diné tʼáá azlı̨́ʼígíí doo bitsʼíís bikʼi yeidooził da; tʼááká spáis ałtahgo álʼínígi átʼéego éí akʼah bił aheełtʼéhígíí ánáádaohdleʼ yíilaʼ; dílzinii átʼé, áko nihichʼįʼgo dílzingo nideetʼáanii átʼé.
33 Tʼáá háiida díí bił aheełtʼéego ájiilaago índa tʼáá háiida doo Ízrel dineʼé nilíinii bikʼi yadziiziidgo éí hadineʼé bitsʼą́ąjįʼ hodiʼyoolyééł.
34 Áádóó Bóhólníihii éí Mózes áyidííniid, Spáis łikání dahalchinii nídidíínił: éí stáktii wolyéhígíí áádóó ánika wolyéhígíí índa gálbanam wolyéhígíí áádóó tsin bijeeh dilidgo łikání halchinii fránkinsens wolyéii bił tʼáá bízhání nídidíínił; tʼáá ahidaałtʼéego dah dahidiidloh doo,
35 áko tsin bijeeh dilidgo łikání halchin dooígíí éí áshįįh bił ałtahgo tʼáá bízhánígo índa dílzingo bił bééhózinii ííłʼínígi átʼéego ádíílííł.
36 Łaʼ áłtsʼíísígo dadidííséigo łahjįʼ níbaal biiʼ dahozdísinii biyiʼ góneʼ éí tsitsʼaaʼ dílzinii bidááhjí łaʼ nidííjih; áadi nił ahínéishtʼash doo; éí nihichʼįʼgo tsʼídá aláahgo dílzinii átʼé.
37 Tsin bijeeh dilidgo łikání halchinii tʼáá bee hazʼą́ągo álʼínígíí bikʼehgo ádíílíłígíí éí doo tʼáá nihí ádá ádadoohłíił da, háálá nihichʼįʼgo Bóhólníihii dílzingo bá atsʼátʼáanii átʼé.
38 Tʼáá háiida éí łikání halchin doo biniyé bił aheełtʼéii ádá ájiilyaago éí hadineʼé bitsʼą́ąjįʼ hodiʼyoolyééł.
Footnotes
^ Tádiindóó baʼaan ashdlaʼ shékel wolyéii éí tʼááłáʼí dah hidiidloh.
