Exodus 31:1-18
31 Bóhólníihii éí Mózes áyidííniid,
2 Shoo, Yúrai biyeʼ Biizáliyel wolyéii yízhiʼgo bikʼi diishʼniiʼ. Yúrai éí Her biyeʼ jílı̨́įgo Júdah dineʼé jílı̨́.
3 Áko Biizáliyel bíniʼ bíighahgo Diyin God biNíłchʼi Diyinii biiʼ hólǫ́ǫgo áádóó hóyą́ągo índa akʼidiʼyiitįįhgo áádóó bił ééhózingo índa naanish ałʼąą ádaatʼéii yiyiichįįhgo íishłaa,
4 áko naʼachʼąąh yindoolnishii yinahaʼáa doo; éí óola áádóó béésh łigaii índa béésh łitsoii bee ázhdoolííł;
5 tsé daʼílíinii bee hazhdidoolííł áádóó tsin nijikʼęęhgo bee nizhdoochʼąh biniyé hashtʼezhdoolííł, áko naanish ałʼąą ádaatʼéii binizhdoolnish.
6 Áádóó, jó, Ahóliyab bił nijilnish doo biniyé nídiiłtı̨́; éí Ahísamak biyeʼ jílı̨́įgo Dan dineʼé jílı̨́; diné daʼiichįįhii tʼáá ałtso bee hódzáanii baa diníʼą́, áko bee ná hoołʼaʼígíí tʼáá ałtso bidazhdoolííł;
7 éí níbaal biiʼ dahozdísinii áádóó tsitsʼaaʼ dílzinii éí neeznáago bikʼeh óʼooʼníiłii bee bééhániihii biiʼ sinilii áádóó Diyin God aa aʼááh nízinii bił hazʼáanii índa níbaal biiʼ hodílzinii biiʼ chodaoʼíinii tʼáá ałtso ádazhdoolííł
8 índa Diyin God bichʼįʼ bááh nááhániihii bikááʼ adání bá siʼáanii áádóó chodaoʼíinii áádóó bee hoolʼiní bá yadaaʼáii tʼáá bízhání áádóó bił chodaoʼíinii tʼáá ałtso índa tsin bijeeh dilidgo łikání halchinii bikááʼ nááʼiiniihí bá ádoolníłígíí ádazhdoolííł.
9 Nááʼáłdóʼ bikááʼ nááʼiiniihí éí didlidgo nááhániihii bá ádoolníłígíí áádóó biiʼ táʼádazdigisgo bá siʼánígíí tʼáá bił ádazhdoolííł,
10 áádóó ééʼ tsʼídá yáʼátʼéehgo ádazhdoolííł; éí ééʼ dadílzingo Éran nááʼiiłniihii bá, áádóó biyeʼké ałdóʼ daabá; éí yiih nídaakahgo shá nidaalʼaʼgo náádaʼiiłniihii danilı̨́į doo biniyé ádazhdoolííł,
11 áádóó índa akʼah akʼi yahiidzíidgo bee alzı̨́įhii índa tsin bijeeh dilidgo łikání halchinii éí hodiyingo hazʼánígi chooʼı̨́į dooleełígíí ádazhdoolííł; bee nichʼįʼ haasdzíʼígíí tʼáá ałtso bikʼehgo ádajitʼı̨́į doo.
Hááʼáyı̨́ı̨́h jı̨́ éí bee ééhózinii átʼé
12 Áko Bóhólníihii éí Mózes áyidííniid,
13 Ízrel dineʼé kóbididííniił, Shihááʼáyı̨́ı̨́h jínígíí hodiyingo ádayínóhsin doo, háálá náás daʼahidoołchı̨́ı̨́góó nihitaʼgi éí bee ééhózinii átʼé, áko shí Bóhólníihii nishłı̨́įgo diyingo ninihidiishʼaahígíí nihił béédahózin doo.
14 Hááʼáyı̨́ı̨́h jínígíí hodiyingo ádayínóhsin doo, háálá diyingo nihá ályaa. Tʼáá háiida éí jííłchxǫʼígíí tʼóó hodiʼyoolyééł; tʼáá háiida hááʼáyı̨́ı̨́h jı̨́ı̨́ góneʼ nijilnishígíí hadineʼé bitsʼą́ąjįʼ hodiʼyoolyééł.
15 Hastą́ą́h jı̨́ tʼéí naʼanish dooleeł, nidi tsostsʼid jínígíí éí hááʼáyı̨́ı̨́h jı̨́ átʼéego dílzin; Bóhólníihii bichʼįʼgo hodílzin; łaʼ hááʼáyı̨́ı̨́h jı̨́ı̨́ góneʼ tʼáá haʼátʼéegoda nijilnishígíí tʼóó hodiʼyoolyééł.
16 Éí bąą Ízrel dineʼé danilíinii hááʼáyı̨́ı̨́h jínígíí deidísin doo; náás daʼahideeshchı̨́ı̨́góó hááʼáyı̨́ı̨́h jínígíí deidísin dooígíí yéédaalniih doo; éí hoolʼáágóó bee ahaʼdeetʼą́.
17 Éí shí áádóó Ízrel dineʼé danilíinii nihitaʼgi hoolʼáágóó bee ééhózinii átʼé, háálá Bóhólníihii hastą́ą́h jı̨́įjįʼ yádiłhił índa nahasdzáán áyiilaa, áko tsostsʼid jı̨́ı̨́ góneʼ hanáályı̨́įʼgo chánah silı̨́ı̨́ʼ.
Béégashii yáázh óola bee ályaaígíí (Deut. 9:6-29)
18 Áádóó índa Dził Sáínai bighą́ąʼdi Diyin God ałtso Mózes yichʼįʼ haadzíiʼgo tsé dilkǫǫhii naakigo bikáaʼgi neeznáago bikʼeh óʼooʼníiłii bee bééhániihii Mózes yeinínil; éí Diyin God tʼáá bí bílaʼ yee yikʼeʼashchı̨́.
