Exodus 32:1-35
32 Ákohgo dziłghą́ą́ʼdę́ę́ʼ Mózes doo hah níjídááhgóó diné haa ákodaniizı̨́įʼgo Éran yaa áłah silı̨́įʼgo ádeidííniid, Haaʼíshąʼ, diyin nihilą́ąjįʼ hooʼı̨́į dooleełígíí nihá ádíílííł, háálá díí diné éí Mózes joolyéii Ííjip kéyahdę́ę́ʼ chʼínihiníʼeezhígíí háájí shı̨́ı̨́ dzizlı̨́įʼgo doo nihił béédahózin da.
2 Áko Éran áhodííniid, Nihidaʼasdzą́ą́ áádóó danihiyeʼké índa danihitsiʼké éí óola bijadaatłʼólígíí baa dahidoohníiłgo shaa dahidoohjih.
3 Ákohgo diné tʼáá ałtso óola dabijaatłʼólígíí hadeidiyiiʼnilgo Éran yaa dayiizhjaaʼ.
4 Áko óola jaatłʼóół nízhdiinil áádóó jidííłhı̨́įʼgo nijikʼęęhgo béégashii yáázh bééʼjiidlaa, áko ádadííniid, Ízrel dineʼé danohłíinii, díí nihidiyin átʼéii Ííjip kéyahdę́ę́ʼ chʼínihiníʼeezh!
5 Ákohgo Éran éí béégashii yáázh beʼelyaaígíí yiyiiłtsą́ągo bidááhdóó bikááʼ nááʼiiniihí áyiilaa, áádóó kójíníigo diné bił hojoolneʼ, Yiską́ągo Bóhólníihii bichʼįʼgo dahodíínóhsingo áłah náhdleeh doo.
6 Áko tʼah abíínígo nízhdiijéeʼgo didlidgo náádahaniihígíí áádóó hózhǫ́ǫ́jí náádahaniihígíí náádadziisniiʼ, áádóó diné dineezbingo daʼííyą́ą́ʼ áádóó daʼoodlą́ą́ʼ, índa nídiijéeʼgo tsiʼdeeskaigo beʼelyaii yichʼįʼ nidahałáago idaʼniilzhiizh.
7 Áko Bóhólníihii éí Mózes áyidííniid, Nílááh, adáánídááh, háálá nidineʼé Ííjip kéyahdę́ę́ʼ chʼííníʼeezhígíí tʼáá bí ádadoolchxǫʼ;
8 bee bichʼįʼ haasdzíʼígíí tʼáadoo hodinaʼí yitsʼáhaaskai; tʼáá bí óola deidííłhı̨́įʼgo béégashii yáázh ádá ádayiilaa áádóó yichʼįʼ nidahałáago náádaʼiiłniih, áko ádaaní, Ízrel dineʼé danohłíinii, díí nihidiyin Ííjip kéyahdę́ę́ʼ chʼínihiníʼeezhii átʼé.
9 Áko Bóhólníihii éí Mózes ánéidooʼniid, Díí diné béédahasin; jó, ákʼeh dahalʼı̨́įgo tʼáá íiyisí doo nibídaʼdidzil da;
10 éí bąą kʼad, tʼáadoo shiníníłtłʼaaí díí diné hachʼįʼ tʼáá íiyisí hashké nísdzingo áhodeeshdįįł, áádóó nitsʼą́ą́dóó diné ayóó átʼéego náás ahoolchíiłgo ádeeshłííł.
11 Ákohgo Mózes éí Bóhólníihii haDiyin God níjookąąhgo ájíní, Bóhólníihii nílíinii, haʼátʼéegoshąʼ Ííjip kéyahdę́ę́ʼ ayóó átʼéego nibee adziilii áádóó nílaʼ bidziilii bee nidineʼé chʼííníʼeezhígíí bichʼįʼ hashké ninidzı̨́ı̨́ʼ?
12 Ííjip dineʼé haʼátʼíidashąʼ dadidooniił? Doo yáʼátʼééhgóó honahazʼą́ągo dziłghą́ąʼdi nahodoołtsiłgo nahasdzáán bikáaʼjįʼ áhodoołdįįł biniyé chʼíhoníʼeezh lá. Tʼóó báhádzidgo hashké ninidzı̨́ʼígíí bitsʼą́ąjįʼ ánáníʼnééh, áádóó nidineʼé doo yáʼátʼéehii bee bichʼįʼ nitsíníkeesígíí łahgo átʼéego bąąh tsíńdíkees.
13 Éíbraham áádóó Áízak índa Ízrel ninaalʼaʼí danilı̨́ı̨́ nítʼééʼ yę́ę béénílniih; éí bichʼįʼ ádee hahidíínídzíiʼgo ádabidííníniid, Yádiłhił biyiʼdi sǫʼígi ánéelą́ąʼgo nihaʼáłchíní tsʼídá tʼóó ahayóigo nídínéeshtʼı̨́ı̨́ł, áádóó díí kéyah tʼáá átʼé nihaʼáłchíní baa dideeshʼááł, diníigo bee háínídzííʼ, áko éí hoolʼáágóó bííʼ dadooleeł.
14 Áko Bóhólníihii bidineʼé doo yáʼátʼééhgóó yąąh tsídeezkééz yę́ę łahgo átʼéego yąąh tsíńdeezkééz.
15 Áko Mózes níjiiyáago tsé dilkǫǫhii naakigo bikáaʼgi neeznáago bikʼeh óʼooʼníiłii bee bééhániihii joojihgo dziłghą́ą́ʼdę́ę́ʼ hadah nihéédzídzá; éí tséhígíí tʼáá ałchʼishdę́ę́ʼ bikʼeʼashchı̨́.
16 Áádóó tsé dilkǫǫhgo ályaaígíí éí Diyin God binaanish átʼé, áádóó bikʼi naʼashkʼaazhgo Diyin God tʼáá bí akʼeʼashchı̨́įgo bikááʼ.
17 Ákohgo diné hahóółʼáago dadilwoshgo éí Jáshowa yidiiztsʼą́ąʼgo Mózes áyidííniid, Níbaal naaznilígi diné nidáahgo anaaʼ yiitsʼaʼ.
18 Áko ájíní, Akʼeh dazhdeesdlı̨́įʼgo bąą dazhdilwoshígíí doo laʼ ákwíitsʼaʼ da; haa dahoneeznáago biniinaa hahojííłʼáhígíí ałdóʼ dooda, nidi dahataałgo diistsʼaʼ.
19 Áádóó Mózes éí níbaal naaznilígíí bitʼáahjįʼ nizhníyáago béégashii yáázh beʼelyaii áádóó azhish baa naʼaldeehígíí dziiłtsą́, áko Mózes éí bikʼee háhóóchįįdgo hoł hazhchihgo biniinaa tséhígíí nahjįʼ adziistłʼííd, áko dził bitsı̨́įdi nidziiztiʼ.
20 Áko béégashii yáázh beʼelyaii ádayiilaaígíí nízhdiiłtı̨́įgo jidííłid áádóó jííkʼą́ągo táłkááʼgóó tajoozghaz, índa Ízrel dineʼé bízhníłkadgo éí tóhígíí dayoodlą́ą́ʼ.
21 Nítʼééʼ Mózes éí Éran áyidííniid, Díí dinéshąʼ haʼátʼíí daniłníigo biniinaa ayóó átʼéego ádił niʼiidzííh biih yínínil?
22 Áko Éran ájíní, Shinanitʼaʼí, tʼáadoo náháchįʼgo nił halchíʼí; díí diné átʼéii nił bééhózin; éí doo yáʼátʼéehii tʼéí deidiniidzı̨́ı̨́ʼ.
23 Háálá ádashidííniid, Diyin nihilą́ąjįʼ hooʼı̨́į dooleełígíí nihá ádíílííł, háálá díí diné, Mózes joolyéii, Ííjip kéyahdę́ę́ʼ chʼínihizhníʼeezhígíí háájí shı̨́ı̨́ dzizlı̨́įʼgo doo nihił béédahózin da.
24 Áko ábidishní, Tʼáá háiida óola bee dahólónígíí hániʼdii hadahizhdiiʼníił leʼ, ákohgo shaa dayiizhjaaʼgo tsídzáháłkaad, nítʼééʼ béégashii yáázh beʼelyaii silı̨́ı̨́ʼ lá.
25 Mózes éí diné tʼáá bí danízinígíí yaa naakaigo baa ákozniizı̨́ı̨́ʼ, jó, Éran éí diné bidaʼanaʼí dabinááł tʼáá bí danízinígíí yaa naakai doogo yichʼįʼ yiʼníłniiʼgo tʼóó baa yádahóósįįd,
26 áko níbaal naaznilígíí bichʼįʼ yah ahóótʼiʼígi Mózes dzizı̨́įgo ázhdííniid, Háishąʼ Bóhólníihii yichʼijí danilı̨́? Hágo, shaa hohkááh. Áko Líívai dineʼé tʼáá ałtso haa áłah silı̨́ı̨́ʼ.
27 Áko ábizhdííniid, Ízrel dineʼé biDiyin God Bóhólníihii kóní, Tʼááłáʼí nootínígo nihidiltłish bił áká daałzisgo níbaal haalʼáhígíí bichʼédaʼatiingóó dahidohkáahgo tʼááłáʼí nootínígo nihikʼis nidadoołtsił, áádóó ahíłkʼisii índa nihił kéédahatʼíinii ałdóʼ nidadoołtsił.
28 Ákohgo Mózes bizaad kʼehgo Líívai dineʼé ákódaadzaa, áko éí bijı̨́ diné éí hastóí áádóó tsíłkéí danilínígíí táadi mííl daatsʼí nidaaztseed.
29 Háálá tʼáá íídą́ą́ʼ Mózes áhodííniid, Diyingo bitsʼąą hastiʼgo díí jı̨́ Bóhólníihii bichʼįʼ niʼádidoohtʼááł; jó, tʼááłáʼí nootínígo nihiyeʼda áádóó nihikʼisda doo ákǫ́ǫ́ ádaadzaaígíí ádasoołdįįd, áko díí jı̨́ Bóhólníihii nihikʼijidlíi doo.
30 Ákódzaadóó biiskání Mózes éí diné áyidííniid, Tsʼídá ayóó átʼéego ádił daʼsoołziihgo átʼé, áko kʼad Bóhólníihii bichʼįʼ déyá; bee nihá kʼééhodoodǫǫłii nihá ádeeshłíiłgo tʼah nítʼéeʼda ádił daʼsoohsiihígíí nihá yóóʼanéididooʼááł.
31 Ákohgo Mózes éí Bóhólníihii yichʼįʼ anáádzáago áadi ádííniid, Dooládóʼ ayói da; díí diné ayóó átʼéego ádił daʼasiihgo óola dabidiyingo ádá ádayiilaa.
32 Nidi kʼad íinínízin ládą́ą́ʼ ádił daʼasiihígíí bá yóóʼanídíʼaah, doodaiiʼ ninaaltsoos biiʼ shízhiʼ sínízohígíí kʼééʼdííłchxǫǫłgo baa nánooshkąąh.
33 Nidi Bóhólníihii éí Mózes áyidííniid, Tʼáá háiida shichʼįʼ ádił asiihígíí éí tʼéí shinaaltsoos biyiʼ házhiʼ kʼééʼdeeshchxǫǫł,
34 nidi kʼad nílááh, kéyah binahjįʼ nichʼįʼ hahásdzíʼígíí éí diné biih niʼéésh; jó, shidiyingo naalʼaʼí nihilą́ąjįʼ hooleeł doo, ákondi ánihodeeshʼááł bijı̨́įdi ádił daʼasiihii bikʼi hwiideeshłeełgo atídahodeeshłííł.
35 Áádóó Bóhólníihii yee atíʼéłʼíinii yee atíhoolaa, háálá diné danilíinii dayókeedígíí bikʼehgo Éran éí béégashii yáázh beʼelyaii áyiilaa.
