Exodus 33:1-23
33 Bóhólníihii éí Mózes yichʼįʼ haadzíiʼgo ádííniid, Nihílááh, dah doohnééh; ni lá áádóó Ííjip kéyahdę́ę́ʼ diné chʼííníʼeezhígíí éí Éíbraham áádóó Áízak índa Jéíkab bichʼįʼ kéyah bee ádee hahidísdzíiʼgo, Nihaʼáłchíní baa dideeshʼááł, bidííniidígíí ákóde nídidoohʼnééł.
2 Áádóó diyingo naalʼaʼí nihilą́ąjįʼ deeshʼaał, áko Kéínan dineʼé, Ámor dineʼé, Het dineʼé, Píírez dineʼé, Háíva dineʼé índa Jííbas dineʼé chʼídahidínéeshkał.
3 Kéyahgi yáʼáhootʼéehgi abeʼ índa tsésʼná bitłʼizh bee ádaʼazįįdgo hazʼą́ąjįʼ nídidoohʼnééł, nidi shí éí doo ákóde nihitah déyáa da, háálá nihí éí diné ákʼehaʼı̨́ bee doo nibídaʼdidzilii danohłı̨́; jó, nihitah yisháałgo éí ánihideeshdįįłgoda átʼé.
4 Ákohgo diné díí haneʼ doo yáʼátʼéehii deidiiztsʼą́ąʼgo yaa yínííł daazlı̨́ı̨́ʼ, áko biyódí doo łaʼ yee háádadiitʼįįh da hazlı̨́ı̨́ʼ.
5 Háálá tʼáá íídą́ą́ʼ Bóhólníihii éí Mózes áyidííniid, Ízrel dineʼé kóbididííniił, Nihí éí diné ákʼehaʼı̨́ bee doo nibídaʼdidzilii danohłı̨́; jó, tʼóó nihitah honishłǫ́ǫgo tʼóó ánihideeshdįįł. Éí bąą kʼad, nihiyódí bee nidaʼádóhchʼąąhígíí ádaa dahidoohʼnííł, áko ánihideeshłíiłgi bee hashtʼeʼnitsídeeskos.
6 Éí bąą Ízrel dineʼé éí Dził Hóreb hoolyéegi biyódí yee háádadiitʼįįhígíí hadeidiyiiʼníiłgo hodeeshzhiizh.
Níbaal biiʼ ahínáʼiildahgi
7 Áko Mózes éí níbaal néidiiłtsoozgo níbaal haalʼáhídóó tʼáá nízaadi níbaal niiníʼą́, áko, Éí níbaal biiʼ dahozdísinii wolyée doo, dííniid. Áádóó tʼááłáʼí jinítínígo Bóhólníihii bichʼįʼ nídaʼjookąąhígíí éí níbaal biiʼ dahozdísinii éí níbaal haalʼáhídóó tʼáá sahdii nízaadi siʼáníjįʼ ałnáádajikah.
8 Áko Mózes éí níbaal biiʼ hodílzinii siʼánígóó tʼáá dashdiighááh bikʼeh diné tʼááłáʼí nítínígo nídiijah áádóó tʼááłáʼí danítínígo dabiníbaal bichʼéʼétiindóó naazı̨́įgo, Mózes éí níbaal biiʼ hodílzinii siʼání góneʼ yah ajigháahjįʼ dahoníłʼı̨́į łeh.
9 Áádóó Mózes éí níbaal biiʼ hodílzinii góneʼ tʼáá yah aníjídááh bikʼeh kʼos níyizgo níbaal biiʼ hodílzinii bichʼéʼétiinjįʼ análdohgo Bóhólníihii éí Mózes yichʼįʼ yáłtiʼ łeh.
10 Áko diné tʼáá ałtso éí kʼos níyizgo níbaal biiʼ hodílzinii bichʼéʼétiinjįʼ análdohígíí nídayiiltsééh bikʼeh diné tʼáá ałtso nídiijahgo tʼááłáʼí nítínígo dabiníbaal bichʼéʼétiingi nidahałáa łeh.
11 Áko diné éí bikʼis yił yáłtiʼ łeeígi átʼéego Bóhólníihii éí Mózes tʼáá biniiʼjįʼ yichʼįʼ yáłtiʼ łeh. Ákohgo Mózes éí níbaal haalʼáhígóó anáhádáahgo bá naalʼaʼí, Nán biyeʼ Jáshowa dinééh nilı̨́įgo níbaal biiʼ hodílzinii doo yitsʼágháah da.
Bóhólníihii éí bidineʼé yił hólǫ́ǫ doogo yee nihoníʼą́
12 Mózes éí Bóhólníihii áyidííniid, Shoo, áshidiníí lá, Díí diné ákóde dííʼish. Nidi háí ákǫ́ǫ́ shił dííłʼaałígíí tʼáadoo shił bééhózingo áshiinilaa da. Ákondi kóshidííníniid lá, Nízhiʼ bee nééhasin áádóó ajoobaʼ bee nichʼohaʼnéego nąąh tsídíkééz.
13 Éí bąą kʼad, baa nánooshkąąh, ajoobaʼ bee shichʼohaʼnéego shąąh tsídíníkééz ládą́ą́ʼ; ánítʼéii shił ííshjání ánílééh, ákótʼéego nééhasin doo. Áádóó ałdóʼ ajoobaʼ bee shichʼohaʼnéego shaa nitsíníkees doo. Díí dineʼé tʼáá ni nidineʼé átʼéego baa nitsíníkees leʼ.
14 Áko Bóhólníihii ání, Shí honishłónígíí nił honishłǫ́ǫ dooleeł, áádóó háánílyı̨́įhgo ándeeshłííł.
15 Áko ábijiní, Honílóonii bee doo nihił honílǫ́ǫ́góogo kodóó doo ákóde nihidííʼish da lá.
16 Háálá shí índa nidineʼé ałdóʼ ajoobaʼ bee nihichʼodahaʼnéego nihąąh tsídíníkézígíí haash yitʼéego bééhózin doo? Nihił honílónígíí bee shí índa nidineʼé ałdóʼ nahasdzáán bikááʼgóó náádaałaʼ dineʼé tʼáá ałtso bił ałʼąą ádaniitʼéego bééhózin.
17 Áko Bóhólníihii éí Mózes áyidííniid, Díí baa yáníłtiʼígíí bikʼehgo ádeeshnííł, háálá ajoobaʼ bee nichʼohaʼnéego nąąh tsídíkéezgo nízhiʼ bee nééhasin.
18 Áko Mózes ájíní, Nánooshkąąh, bee ayóó ánítʼéii shił ííshją́ą́ ánílééh.
19 Áko Bóhólníihii áhodííniid, Bee yáʼáníshtʼéhígíí tʼáá ałtso ninááł ádeeshłííł, áádóó Bóhólníihii shízhiʼ nilíinii bee nił hodeeshnih, áádóó tʼáá háiida baa jiideeshbaałii éí baa jooshbaʼ doo, índa tʼáá háiida baa aʼááh dínéesįįłii éí baa aʼááh nisin doo.
20 Nidi ánáádíʼní, Shiniiʼ éí doo nóółʼı̨́ı̨́ʼ átʼée da, háálá diné łaʼ shinééłʼı̨́įʼgo doo hináa da doo.
21 Áko Bóhólníihii ánááhodiʼní, Shoo, shíighahgi hazʼánígi tséʼéłkáaʼgi yiizįįh,
22 áko índa bee ayóó áníshtʼéii bee ną́ą́h dideeshááł biniyé tsékʼiz góneʼ nindeeshtééł, áádóó ną́ą́h díyáago nichʼą́ą́ dííníshʼniiʼ doo.
23 Áádóó índa nahjįʼ anídeeshʼniiʼgo shineʼdę́ę́ʼ tʼéí yidííłtsééł, nidi shiniiʼ éí doo yidííłtséeł da.
