Exodus 34:1-35
34 Áádóó Bóhólníihii éí Mózes áyidííniid, Átséédą́ą́ʼ tsé dilkǫǫhgo naaki naa nínil yę́ęgi átʼéego łaʼ hashtʼeʼnibíʼdííłniił, áádóó tsé dilkǫǫhii síníłtsʼilígíí saad bikááʼ sinil nítʼééʼ yę́ęgi átʼéego bikáaʼgi bee akʼenááʼdeeshchííł.
2 Áko abínígo hashtʼeʼádíínílzin doo, áádóó tʼah abíínídą́ą́ʼ Dził Sáínai bíidíínáałgo dziłghą́ąʼdi shichʼįʼ nidíínááł.
3 Diné doo łaʼ ákóde nił dooʼash da; diné tʼáadoo dziłghą́ą́ʼgóó nidaakaí dooleeł; dibé áádóó béégashii tʼáadoo dziłtsı̨́įjįʼ nidazhʼniłkaadí dooleeł.
4 Ákohgo Mózes éí tsé dilkǫǫhgo naaki áłtséhígíí nahalingo hashtʼeʼnibíʼnáázhníłneʼ, áádóó tʼah abíínídą́ą́ʼ nízhdiiʼnaʼgo Dził Sáínai bighą́ą́ʼgóó dashdiiyá; Bóhólníihii áhodííniidígíí bikʼehgo tsé dilkǫǫhii ákǫ́ǫ́ jiníjaaʼ.
5 Áko Bóhólníihii éí kʼos bił hadah hóóleʼgo hwíighahgi yiizįʼgo tʼáá Bí bízhiʼ yee hoł hoolneʼ.
6 Áádóó Bóhólníihii éí Mózes yą́ą́h deeyáago ání, Bóhólníihii, Bóhólníihii, éí Diyin God nilı̨́įgo aa aʼááh nízinii áádóó joobaʼii áádóó nízaadgóó haʼólníinii áádóó tsʼídá łą́ągo bibee ajoobaʼ índa bitʼáá aaníinii hólóonii,
7 ahóyéelʼáágóó bibeeʼaa aʼááh hasinii éí miilgo ádazhnéelą́ąʼgo doo ákwii ádajitʼínígíí áádóó bee hazʼáanii dajiitíhígíí índa ádił nidaʼjiilzíhígíí há yóóʼanéidiyiiʼaahgo hakʼijidlí, nidi ádił oodzííʼ bee bihodiitʼiʼii yá naatłizh yę́ę doo yénálniih da doo; jó, daʼazhéʼé yę́ę doo ákwii ádajíítʼįįdígíí hadaʼáłchíní náás ahoolchíiłii táadi índa dı̨́įdi ałkʼi náʼázhchı̨́įjįʼ bikʼi hwiileehgo bá nináhwiishʼnííł.
8 Áádóó tʼáá áko Mózes yaa ádziidzaago niʼjįʼ nitsidinígoʼgo nahodzisá.
9 Áko ájíní, Bóhólníihii nílíinii, ajoobaʼ bee shichʼohaʼnéego shąąh tsídíníkééz ládą́ą́ʼ, Bóhólníihii nílíinii, nánooshkąąh, nihitah honílǫ́ǫ doo; azhą́ díí diné ákʼehaʼı̨́ bee doo nibídaʼdidzilii danilı̨́į nidi, doo ákwii ádeiitʼínígíí índa ádił nidaʼayiilzihígíí nihitsʼáhidíʼaah áádóó nííʼ dadiidleeł biniyé nánihididíínił.
Bee ahaʼdeetʼáanii ániid ánályaa (Ex. 23:14-19; Deut. 7:1-5; 16:1-17)
10 Áádóó Bóhólníihii ádííniid, Jó, díí bee nihá hooshʼaah: nidineʼé tʼáá ałtso dabinááł tʼóó bikʼee bił adahayóí ááshłíił doo; nahasdzáán bikááʼgóó tʼáá átʼéé nítʼééʼ, doodaiiʼ ałʼąą dineʼé bitahgóó tʼah doo ánéehii ááshłíił doo, áko diné bitah nanináhígíí éí Bóhólníihii binaanish deidoołtsééł. Jó, ninahjįʼ tʼóó báhádzidígi átʼéii baa nideeshaał.
11 Díí jı̨́ bee nihichʼįʼ haasdzíʼígíí béédaałniihgo baa dahonohsą́; jó, nihilą́ąjįʼ Ámor dineʼé, Kéínan dineʼé, Het dineʼé, Píírez dineʼé, Háíva dineʼé índa Jííbas dineʼé chʼídahoniishkaad doo.
12 Ádaa honíyą́, doodaiiʼ éí kéyahjįʼ díínéłígi kéédahatʼínígíí bił ahadaʼdíínítʼą́ągo éí łoh nihąąh niitʼą́ nahalin dooleeł,
13 nidi bibikááʼ náádaʼiiniihí bitsʼą́ą́ʼ nidahidoołchxǫǫł, áádóó biʼedaʼalyaii bitsʼą́ą́ʼ naaʼadahidoołtłʼił, índa bitsin naazkaadii yichʼįʼ nidahałáhígíí nidahidoohtsił.
14 Jó, diyin bidiʼníinii doo łaʼ bichʼįʼ nidahohłáa da dooleeł, háálá Bóhólníihii Łeʼnízinii wolyéii, éí Diyin God nilíinii bidineʼé yaa łeʼnízinii nilı̨́.
15 Áko kéyahgi kéédahatʼínígíí doo bił ahadadiʼdíítʼáał da, áádóó éí diné bidiyin dabidiʼníinii bił tłʼééʼ naʼaldeehii áádóó bidiyin dabidiʼníinii yichʼįʼ náádayiiłniihii tʼáá háiida áajįʼ hágo niłníigo nááyiisniiʼii dííyı̨́įłgo bił ahaʼdóótʼááł lágo.
16 Nááʼáłdóʼ dabitsiʼké danilíinii danihiyeʼké bá nídahidoohnííł lágo, áko dabitsiʼké bidiyin dabidiʼníinii bił tłʼééʼ naʼaldeehii danihiyeʼké ałdóʼ tʼááká yił tłʼééʼ naaldeeh yíilaʼ.
17 Béésh doolyı̨́ʼígíí bee diyin dabidiʼníinii doo łaʼ ádá ádíílníił da.
18 Dííkʼǫsh tʼáágééd bááh ályaii yidą́ áńdaałʼįįhgo béédaałniih doo. Tsostsʼid jı̨́ dííkʼǫsh tʼáágééd bááh ályaii nídaahdı̨́įh dooleeł; bee nihichʼįʼ haasdzíiʼii bikʼehgo Éíbib yiziłígíí binih łaʼa jı̨́ bee nihoníʼáníjįʼ anáhwiilzhíishgo ákódaahtʼı̨́į doo, háálá Éíbib yiziłígíí binih Ííjip kéyahdę́ę́ʼ chʼínoohkai niʼ.
19 Alą́ąjįʼ nidahoʼdiizhchínígíí tʼáá ádzíłtso shííʼ dajílı̨́, índa danihilı̨́įʼda, béégashii áádóó dibéda dabikąʼgo alą́ąjįʼ nidahachíhígíí tʼáá ałtso daashí.
20 Nidi télii alą́ąjįʼ nidahachíhígíí bitsáskʼehgi dibé yázhígo bee tʼą́ą́ʼ náádahidoołnih, doodaiiʼ bitsáskʼehgi doo łaʼ nááhideeshnih da danohsingo éí tʼóó bikʼos dahohtíih doo. Nihiyeʼké alą́ąjįʼ nidahachíhígíí tʼáá ałtso éí dibé yázhí bee tʼą́ą́ʼ náádahidoołnih. Áko nááhániihii tʼáágéedgo doo łaʼ shichʼįʼ nizhdoogáał da.
21 Hastą́ą́h jı̨́ tʼéí ninánílnish doo, nidi tsostsʼid jı̨́ı̨́ góneʼ hááhílyı̨́įh doo; azhą́ nahojiyółdlaad áádóó ajóyizhígi átʼée nidi tʼóó hááhílyı̨́įh doo.
22 Atisʼadeesdzá bééhániihgo néiitʼaahdóó tsostsʼidi Damı̨́įgo náʼádleeh biiłkáhí tłʼoh naadą́ą́ʼ tsʼídá áłtsé bineestʼąʼ áłah ánálʼįįhgo hodílzingo áłah náʼádleehígíí béénílniih doo áádóó nídantʼı̨́įhii ałtso nánígishgo hodílzingo áłah náʼádleeh néiłʼaahgo nínáhah doo.
23 Nidinéhígíí tʼáá ałtso Bóhólníihii Diyin God, tʼáá éí Ízrel dineʼé biDiyin God nilíinii yichʼįʼ nináhákáahgo táadi náʼádleehgo nínáhah doo.
24 Jó, dadineʼé danilíinii nihilą́ąjįʼ chʼídahoniishkaad doo, índa nihikéyah nihá bínáhiishʼaah doo, áádóó ákóde Bóhólníihii nihiDiyin God nilíinii bichʼįʼ nináhkahgo táadi náʼádleehgo nínáhahgo diné doo łaʼ nihikéyahígíí yidádínóolnih da.
25 Tʼááká shinááhániihii bidił éí dííkʼǫsh tʼáá biłgo nááhółniih lágo; atisʼadeesdzá bee bééhániihii dibé yázhí bitsįʼ biʼoh daʼoodą́ʼígíí tʼáadoo abíníjįʼ łaʼ tʼáá chʼíhiniłnéhí.
26 Tsʼídá áłtséedi nihikéyahdóó áłtsé aneestʼąʼ nídahadleehígíí Bóhólníihii nihiDiyin God bikin góneʼ nidahohjáah doo. Tʼááká tłʼízí yázhí bimá bibeʼ bee daołbéézh lágo.
27 Áko Bóhólníihii éí Mózes áyidííniid, Díí saad bee akʼeʼíłchí; ni áádóó Ízrel dineʼé díí saad bikʼehgo nihił ahadadiʼnishtʼą́.
28 Áko Mózes éí Bóhólníihii bił hojílǫ́ǫgo dízdiin jı̨́ áádóó dízdiin tłʼééʼ azlı̨́ı̨́ʼ; tʼáadoo ajiyání áádóó tʼáadoo ajidlání. Áádóó tsé dilkǫǫhii bikáaʼgi saad bee ahaʼdeetʼáanii bee akʼeʼjishchı̨́; éí neeznáago bikʼeh óʼooʼníiłii átʼé.
Dził Sáínai bighą́ą́ʼdę́ę́ʼ Mózes hadanáádzá
29 Áádóó índa Dził Sáínaidę́ę́ʼ Mózes éí tsé dilkǫǫhii naakigo bikáaʼgi neeznáago bikʼeh óʼooʼníiłii bee bééhániihii joojihgo dziłghą́ą́ʼdę́ę́ʼ hadah níjoodáałgo haniiʼ bitsʼádiʼnílídígíí doo baa ákoznízingóó nídzídzá; jó, Diyin God bił ałchʼįʼ yájíłtiʼ nítʼééʼ.
30 Ákohgo Éran áádóó Ízrel dineʼé tʼáá ałtso Mózes dayiiłtsą́ągo, shoo, haniiʼ bitsʼádiʼnílííd, áko hwéédaaldzidgo hatʼáahjįʼ doo dadikáah da.
31 Nidi Mózes bíká ádííniidgo Éran áádóó áłah ílínígi diné nidaʼaʼeeshígíí tʼáá ałtso haa náhaaskai, áko Mózes hachʼįʼ haadzííʼ.
32 Áádóó bikʼijįʼ Ízrel dineʼé tʼáá ałtso haa haaskai, áko Dził Sáínai bighą́ąʼdi bikʼeh óʼooʼníiłii éí Bóhólníihii hachʼįʼ yee haadzíʼígíí tʼáá átʼé bee bił hojoolneʼ.
33 Áádóó índa Mózes éí diné yichʼįʼ ałtso yááłtiʼgo biniiʼjįʼ yikʼéʼéstiʼ.
34 Nidi Bóhólníihii binááł Mózes yah aníjídáahgo haniiʼjįʼ bikʼéstiʼígíí nahjįʼ aníjíłtsosgo bił ałchʼįʼ yájíłtiʼ łeh, áádóó chʼééjiidáahgo haniiʼ bikʼínínááʼjíłtihgo Ízrel dineʼé bił náhojilnih; éí Bóhólníihii hachʼįʼ yee haadzíiʼii bikʼehgo ákójítʼı̨́.
35 Ízrel dineʼé éí Mózes biniiʼ dayiiłtsą́ągo Mózes biniiʼ tʼáá íiyisí bitsʼádiʼnílííd lá, áko Bóhólníihii bił ałchʼįʼ yájíłtiʼ doo biniyé yah anáázhdoodáałjįʼ haniiʼ bikʼíníjíłtih łeh.
