Exodus 36:1-38
36 Biizáliyel áádóó Ahóliyab índa diné náádaałaʼ éí níbaal biiʼ hodílzinii ádoolníiłgi bindaʼdoonishígíí tʼáá ałtso hoł béédahózin doo biniyé Bóhólníihii daʼjiichįįhgo índa akʼidazhdiʼyiitįįhgo áhoolaii éí Bóhólníihii hachʼįʼ yee haadzíiʼii tʼáá ałtso bikʼehgo binjilnish nítʼééʼ.
Diné éí aa doolyéełii ląʼí nidayiizhjaaʼ
2 Íídą́ą́ʼ Mózes éí Biizáliyel áádóó Ahóliyab yíká ádííniid, áádóó Bóhólníihii éí diné náádaałaʼ bíniʼ bíighahgo iichįįhgo átʼé hwiindzin biiʼ hólǫ́ǫgo áyiilaaígíí tʼáá éí adiih ádaatʼı̨́įgo atah nideeshnish daniizı̨́ʼígíí ałdóʼ Mózes háká ádííniidgo
3 Ízrel dineʼé éí níbaal biiʼ hodílzinii bee ádoolnííł biniyé nidayiizhjaaʼígíí tʼáá ałtso Mózes haa yiiznil. Tʼáá ákwíí ábíní tʼáá hó daznízinígíí bikʼehgo Bóhólníihii baa nídahizhdiʼaahígíí tʼah nidajiijááh,
4 áko naanish dayiichįįhii tʼáá ałtso níbaal biiʼ hodílzinii tʼáá átʼé yindaalnishígíí éí tʼááłáʼí nítínígo nidaalnishídę́ę́ʼ nidahaaskai,
5 áádóó Mózes yichʼįʼ yádaałtiʼgo ádaaní, Diné tʼáá áchą́hwíídéeniʼgo nidaʼiijáahgo bindeiilnishii bilááh danéésʼąąd; éí Bóhólníihii yichʼįʼ nihííłʼaad.
6 Ákohgo Mózes hachʼįʼ yee haadzíiʼgo níbaal haalʼáhígóó tʼáá átʼé hazhóʼó baa nídahojoolneʼgo diné áádóó asdzání éí níbaal biiʼ hodílzinii bee adoolnííł biniyé bá nidahizhdiʼaahígíí kʼadí doo; tʼáadoo nidahohjáhí, deidííniid. Áko Mózes yee haadzíʼígíí bikʼehgo doo łaʼ náádeíjáah da,
7 háálá yee nidadoolnishígíí dabíighah áádóó tʼáá bilááh danéésʼąąd.
Níbaal biiʼ hodílzinii álnéhígíí (Ex. 26:1-37)
8 Ákohgo diné bitahdóó naanish dayiichįįhígíí éí níbaal biiʼ hodílzinii bitis hííkaadígíí neeznáá ádayiilaa; éí yisdizii yá nahalingo dootłʼizhígíí áádóó tsídídééh nahalingo łichíʼígíí áádóó łichxíʼígíí índa áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ yistłʼǫ́ǫgo diyingo nidaalʼaʼí chérabim wolyéii bikʼi danízı̨́įgo nidaashchʼąąʼgo dayiichįįhgo ádayiilaa.
9 Éí tʼááłáʼí níłtsoozígo dízdiindóó baʼaan naaki ké silá ádaníłnééz, áádóó tʼááłáʼí níłtsoozígo hastą́ą́h ké silá ádaníłtéél; tʼáá ałtso tʼáá ahee daníłtso.
10 Áko Biizáliyel éí atis ahííkaadígíí ashdlaʼgo ahídayiishchaʼ áádóó nááʼáshdlaʼgo tʼáá ákónáánátʼéego ahínáádayiishchaʼ.
11 Áádóó áłtsé ahídayiishchaʼígíí bibąąhgi naʼatʼą́hí yá nahalingo dootłʼizhígíí łoh bąąh yíʼnilgo áyiilaa; naaki góneʼ ahídayiishchaʼígíí tʼáá ákónáánátʼéego łoh bąąh yíʼnilgo ánááyiidlaa.
12 Łaʼ bibąąhgi łohígíí ashdladiingo bąąh yíʼnilgo áyiilaa, áádóó naaki góneʼ ahídayiishchaʼígíí łaʼ bibąąhgi łohígíí ashdladiingo bąąh yíʼnilgo ánááyiidlaa; ałnaashiijí łoh bąąh yíʼnilíjįʼ ahihidiiłtsooz.
13 Áko óola ashdladiingo ił dah nídaatı̨́ı̨́h dooleełígíí áyiilaa, áko bitis hííkaadígíí ahihidiiłtsoozgi łoh bąąh yíʼnilígíí óola ił dah nátı̨́hí yee daʼahótąʼgo áyiilaa, ákohgo níbaal tʼáá łaʼ bizhiʼ ee siʼą́ silı̨́ı̨́ʼ.
14 Áádóó níbaal biiʼ hodílzinii bitis hííkaadígíí tłʼízí bighaaʼ bee yistłʼǫ́ǫgo łaʼtsʼáadahgo áyiilaa.
15 Díí bitis hííkaadígíí tʼááłáʼí níłtsoozígo dízdiindóó baʼaan ashdlaʼ ké silá ádaníłnééz, áádóó tʼááłáʼí níłtsoozígo hastą́ą́h ké silá ádaníłtéél; łaʼtsʼáadahgo bitis hííkaadígíí tʼáá aheedaníłtso.
16 Éí ashdlaʼgo tʼáá sahdii ahídayiishchaʼ, áádóó hastą́ągo ałdóʼ tʼáá sahdii ahínáádayiishchaʼ.
17 Áádóó áłtsé ahídayiishchaʼígíí bibąąhgi łoh ashdladiingo bąąh yíʼnilgo áyiilaa, índa naaki góneʼ ahídayiishchaʼígíí tʼáá ákónáánátʼéego łoh ashdladiingo bąąh yíʼnilgo ánááyiidlaa.
18 Ahidahidiiłtsooz dooígíí biniyé béésh łitsoii ił dah nídaatı̨́hí ashdladiingo ádayiilaa; éí bee daʼahótąʼgo níbaal tʼáá łaʼ bizhiʼee siʼą́ą dooleeł.
19 Éí bikáaʼgi deenástsʼaaʼ bikágí daaldzą́ągo deilchiiʼgo tááʼ góneʼ atis ahííkaadígíí áyiilaa; náábíkáaʼdi índa nahashchʼid bikágí daaldzą́ągo dı̨́ı̨́ʼ góneʼ atis ahííkaadígíí ánááyiidlaa.
20 Tsin nitłʼizii bee tsin neheeshjííʼ ályaii níbaal biiʼ hodílzinii bá ahééneelkáal dooígíí ánááyiidlaa.
21 Tsin neheeshjííʼ tʼááłáʼí nítánígo ashdlaʼáadah ké silá ádaníłnééz, áádóó tʼááłáʼí nítánígo tááʼ ké silá ádaníłtéél.
22 Tsin neheeshjííʼ tʼááłáʼí nítánígo tʼáá ahedaałtʼéego biyaadóó naaki bąąh hadaʼazʼáago áyiilaa; kótʼéego níbaal biiʼ hodílzinii bá tsin neheeshjííʼ tʼáá ałtso áyiilaa.
23 Níbaal biiʼ hodílzinii bá tsin neheeshjííʼ éí shádiʼááhjí naadiingo noolkáal dooígíí áyiilaa.
24 Áádóó dízdiingo béésh łigaii biih dahasdzą́ągo tsin neheeshjííʼ naadiingo bitłʼááh naaznil doo biniyé áyiilaa; tsin neheeshjííʼ tʼááłáʼígo biyaadóó naaki bąąh haʼííʼáago áyiilaaígíí bá atłʼááh sinilii naakigo biih dahasdzánígíí tʼáá ahedaałtʼéego áyiilaa.
25 Áádóó níbaal biiʼ hodílzinii bá tsin neheeshjííʼ náhookǫsjí neelkáal dooígíí naadiingo ánááyiidlaa,
26 índa dízdiingo béésh łigaii biih dahasdzą́ągo tsin neheeshjííʼ bitłʼááh naaznil doo biniyé ałdóʼ ánááyiidlaa; tsin neheeshjííʼ tʼááłáʼígo bitłʼááh sinilii naakigo biih dahasdzánígíí tʼáá ahedaałtʼéego ánááyiidlaa.
27 Áádóó níbaal biiʼ hodílzinii bá eʼeʼaahjí tsin neheeshjííʼ hastą́ągo ánááyiidlaa.
28 Índa níbaal biiʼ hodílzinii bikééʼjí naanázʼáhígi éí tʼáá ałchʼijí bá tsin neheeshjííʼ naakigo yaaʼáa doo biniyé áyiilaa.
29 Áko bitłʼáahdi tʼéiyá tʼóó ahidiiʼá, nidi dego yaaʼáhíjįʼ béésh názbąsii áłtsé bąąh siʼą́ągo ałchʼįʼ yótąʼgo tʼáá ałchʼijí bee nástłʼahgi ákótʼéego áyiilaa.
30 Ákohgo tsin neheeshjííʼ tseebíigo áádóó bitłʼááh naaznil dooígíí béésh łigaii biih dahasdzą́ągo hastą́ʼáadahgo áyiilaa; tsin neheeshjííʼ tʼááłáʼí nítánígo naaki bitłʼááh naaznil.
31 Áádóó tsin nitłʼizii bee tsin níyizii ashdlaʼgo níbaal biiʼ hodílzinii booshkʼiizhjí naaniigo bąąh daníʼáa doo biniyéhígíí áyiilaa,
32 áádóó náánáłahjí booshkʼiizhjí ałdóʼ ashdlaʼgo naaniigo bąąh daníʼáa doo biniyé, índa nááʼáshdlaʼgo éí níbaal biiʼ hodílzinii eʼeʼaahjígo ałdóʼ naaniigo bąąh daníʼáa doo biniyé áyiilaa.
33 Ałnííʼgóó níʼáa dooígíí éí tʼáá níléijįʼ haʼnaa hadiiʼáago áyiilaa.
34 Óola éí tsin neheeshjííʼ bikʼi naazkaadgo áyiilaa, áádóó naaniigo bąąh daníʼáa dooígíí éí óola bąąh yíʼnilgo tsin níyizii éí biiʼ nídaditsih dooígíí ałdóʼ áyiilaa, índa tsin níyizgo iiʼ nídaditsih dooígíí ałdóʼ óola bikʼédaastiʼgo áyiilaa.
35 Áádóó ataʼnaníbaal dooígíí éí yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ yistłʼǫ́ǫgo diyingo nidaalʼaʼí chérabim wolyéii bee nidaashchʼąąʼgo dayiichįįhgo ádayiilaa.
36 Áko ataʼnaníbaal dooígíí bá tsin nitłʼizii dı̨́įʼgo ííyah daniiʼáii adaazʼáa dooígíí óola bikʼédaastiʼgo áyiilaa, áádóó óola bąąh hadaazhahgo áyiilaa, índa tsin nitłʼizii bitłʼááh sinilígíí dı̨́įʼgo béésh łigaii doolyı̨́įʼgo tʼááłáhíjí biih dahasdzą́ągo áyiilaa.
37 Níbaal biiʼ hodílzinii bichʼéʼétiingi dáádiníbaalígíí éí yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ yistłʼǫ́ǫgo naashchʼąąʼgo áyiilaa.
38 Áádóó éí bá tsin nitłʼizii ashdlaʼgo bąąh hadaazhahii tʼáá yił ííyah daniiʼáii áyiilaa; éí bílátahjįʼ dah naaznilígíí áádóó bitaʼndaazʼáhígíí óola bikʼédaastiʼgo áyiilaa, nidi ashdlaʼgo bitłʼááh naaznil doo biniyé tʼááłáhíjí biih dahasdzánígíí béésh łitsoii yee áyiilaa.