Exodus 37:1-29
37 Biizáliyel éí tsin nitłʼizii bee tsitsʼaaʼ dílzinii áyiilaa; éí táadi ké siláádóó náhástʼéí asdzoh áníłnééz áádóó naaniigo naakidi ké siláádóó tááʼ asdzoh áníłtéél índa dego naakidi ké siláádóó tááʼ asdzoh ánízah.
2 Biyiʼdę́ę́ʼ áádóó bikááʼdę́ę́ʼ óola tʼáá bízhání bikʼéstiʼgo áádóó bibąąhgóó óola ahééníʼáago áyiilaa.
3 Tsitsʼaaʼ dílzinii bitłʼááhdóó tʼáá dı̨́ı̨́ʼgóó naanídaazʼáhígi ałchʼijí naakigo óola názbąsii yídeidiyiiłhı̨́ı̨́ʼ.
4 Tsin nitłʼizii níyizgo áyiilaa áádóó óola yikʼíístiʼ,
5 áko tsitsʼaaʼ dílzinii booshkʼiizhjí éí óola názbąsii bąąh dah sinilígíí tsin níyizii bee naatʼáa doo biniyé bighá nátsih.
6 Áádóó aa aʼááh hasinii bił hazʼánígi éí óola tʼáá bízhání yee áyiilaa; éí táadi ké siláádóó náhástʼéí asdzoh áníłnéezgo índa naaniigo naakidi ké siláádóó tááʼ asdzoh áníłtéelgo áyiilaa.
7 Óola tʼáá bízhání diyingo naalʼaʼí naakigo bééʼélyaago chérabim wolyéii áyiilaa; hashtʼeʼnibízhníłneʼgo tʼáá łaʼ bizhiʼee áyiilaa; aa aʼááh hasinii bił hazʼání bikáaʼgi nineelʼánígi tʼáá ałchʼishdę́ę́ʼ sizı̨́.
8 Łahjí nineelʼánígi chérab wolyéii tʼááłáʼí sizı̨́, áádóó náánáłahjí nineelʼánígi chérab tʼááłáʼí náánásdzı̨́; aa aʼááh hasinii bił hazʼánígi índa nineelʼą́ągi ałchʼishdę́ę́ʼ chérabim sizínígíí bił tʼáá łaʼ bizhiʼee áyiilaa.
9 Aa aʼááh hasinii bił hazʼání bikʼijįʼ chérabim bitʼaʼ dah yoołbał; aa aʼááh hasinii bił hazʼáníjįʼ ałchʼįʼ déezʼı̨́įʼgo ałchʼįʼ sizı̨́.
Bikááʼ adání álnéhígíí (Ex. 25:23-30)
10 Bikááʼ adání ałdóʼ tsin nitłʼizii yee áyiilaa; táadi ké silá áníłnééz, áádóó naaniigo tʼááłáʼí ké siláádóó náʼáłníiʼgo áníłtéél, índa dego naakidi ké siláádóó tááʼ asdzoh ánízah;
11 óola tʼáá bízhání yikʼíístiʼgo łaʼ bibąąhgóó ahééníʼáago áyiilaa.
12 Dı̨́ı̨́ʼ yílá bikʼeh áníłtéelgo binázʼáago índa óola éí bibąąh ahééníʼáago áyiilaa.
13 Dı̨́ı̨́ʼgóó naanídaazʼáhígíí biyaagi bijáád éí óola nídaazbąsgo dı̨́įʼgo yídeidiyiiłhı̨́ı̨́ʼ.
14 Binázʼáhígíí bíighahgi tsin níyizii iiʼ níʼáago bee naatʼáa doo biniyé óola názbąsii bąąh dah naaznil.
15 Tsin nitłʼizii bee tsin níyizii áyiilaa áádóó óola yikʼíístiʼ; éí bikááʼ adání bee naatʼáa doo.
16 Beedí éí bikááʼ adání yikááʼ niyiiznilígíí éí łeetsʼaaʼ niteelígíí áádóó tsin bijeeh dilidgo łikání halchinii bá łeetsʼaaʼ dooleełígíí áádóó ásaaʼ índa ásaaʼ nímazí bee yah iyiizíid dooígíí óola tʼáá bízhání yee áyiilaa.
Bee hoolʼiní bá yadaaʼáhígíí álnéhígíí (Ex. 25:31-40)
17 Bee hoolʼiní bá yadaaʼáhígíí éí óola tʼáá bízhání yee áyiilaa. Óola hashtʼeʼnibízhníłneʼgo bá siʼánígíí áádóó dego bá yadaaʼáhígíí áádóó bílátah dah naʼazką́ągo akʼah biih náhádzíid dooígíí áádóó éí bitłʼááh níʼdeeskǫʼígíí índa chʼilátah hózhóón bee naashchʼąąʼii éí tʼáá łaʼ bizhiʼee áyiilaa.
18 Hastą́ągo atsʼádaʼazʼá; bee hoolʼiní bá yadaaʼáhígíí łahjí tááʼ bitsʼáníʼá; náánáłahjí ałdóʼ tááʼ bitsʼáníʼá;
19 tʼááłáʼígo atsʼázʼáhígíí álman wolyéii bílátah yiigahígíí táaʼgo ałkééʼ honíką́ągo bee naashchʼąąʼ; bílátah haleehii áádóó yiigahígíí tʼáá bił bee hoolʼiní bá yadaaʼáhígíí hastą́ągo bitsʼádaazʼáhígíí ákótʼéego áyiilaa.
20 Bee hoolʼiní bá yadaaʼáii dı̨́įʼgo ałkʼi honíką́ągo álman wolyéego chʼilátah hózhóón nahalingo yee neizhchʼąąʼ.
21 Naakigo ałtsʼą́ąjįʼ dadeezʼáhígi tʼáá táaʼgo bitłʼáahgi nídaʼdeeskǫʼgo bił tʼáá łaʼ bizhiʼee áyiilaa.
22 Ałtsʼádaazʼáhígíí áádóó ałkééʼ honíkánígíí éí bá yadaaʼáhígíí bił tʼáá łaʼ bizhiʼee áyiilaa; bee hoolʼiní tʼáá átʼé éí óola tʼáá bízhání hashtʼeʼniyíʼníłneʼgo tʼáá łaʼ bizhiʼee áyiilaa.
23 Bee hoolʼinígíí tsostsʼidgo áádóó kǫʼ bee náhiniltsésí índa łeeshchʼiih bee naakáhí éí óola tʼáá bízhání yee áyiilaa.
24 Bee hoolʼiní bá yadaaʼáii índa beedí chodaoʼíinii tʼáá ałtso éí óola tʼáá bízhání tʼááłáʼí tálent dah hidiidloh bíighahgo yee áyiilaa.
Tsin bijeeh dilidgo łikání halchinii bá bikááʼ nááʼiiniihí álnéhígíí (Ex. 30:1-5)
25 Bikááʼ nááʼiiniihí bikáaʼjįʼ tsin bijeeh dilidgo łikání halchinii nááhániih doo biniyéhígíí tsin nitłʼizii yee áyiilaa; tʼááłáʼí ké siláádóó náʼáłníiʼgo áníłnééz áádóó naaniigo tʼááłáʼí ké siláádóó náʼáłníiʼgo áníłtéél, áko dikʼą́ągo áyiilaa; dego éí tááʼ ké silá ánízah; bideeʼ hadaazʼáhígíí bił tʼáá łaʼ bizhiʼee áyiilaa.
26 Óola tʼáá bízhání yikʼídeistiʼ; bikááʼdę́ę́ʼ áádóó booshkʼiizh naazʼáhígíí índa bideeʼ hadaazʼáhígíí ákóyiilaa, áádóó ałdóʼ bibąąhgóó óola ahénálchʼahgo áyiilaa.
27 Índa biyaagi tʼáá ałchʼishjí tsin níyizii iiʼ níʼáago bee naatʼá biniyéhígíí bá óola názbąsgo bąąh dah sinilgo áyiilaa.
28 Tsin nitłʼizii níyizii áyiilaaígíí óola bikʼéstiʼgo áyiilaa.
Akʼah akʼi yahiidzíidgo bee alzı̨́įhii áádóó tsin bijeeh dilidgo łikání halchinii álnéhígíí
29 Dílzingo akʼah akʼi yahiidzíidgo bee alzı̨́įhii índa spáis łikání tsʼídá nizhóníii bee tsin bijeeh dilidgo łikání halchinii áyiilaa; bił bééhózinii ałtahgo ííłʼínígi átʼéego áyiilaa.