Exodus 38:1-31
38 Níbaal biiʼ hodílzinii tʼáá éí neeznáago bikʼeh óʼooʼníiłii bee bééhániihii biiʼ sinilii kónéeltʼeʼgo bee hadiidzaaígíí yééltaʼ. Mózes yee hasʼáanii bikʼehgo Líívai dineʼé yindaalnishgo Éran nááʼiiłniihii nilíinii biyeʼ Íthamar joolyéii dayiyííłtaʼ.
2 Dı̨́įʼgo naanázʼáhídóó adeeʼ hadaazʼáago tʼáá łaʼ bizhiʼee áyiilaa, índa béésh łitsoii yikʼíístiʼ.
3 Bikááʼ nááʼiiniihí bił chodaoʼínígíí tʼáá ałtso áyiilaa: ásaaʼ éí łeeshchʼiih bee hadahakaahí áádóó ásaaʼ dantsaaígíí áádóó bílaʼtáaʼii danineezígíí índa tsííd bee naakáhí éí tʼáá ałtso béésh łitsoii yee áyiilaa.
4 Bikááʼ nááʼiiniihí bá béésh łitsoii ałnáshizhoozhgo bikááʼ atʼeesí áyiilaa; bikááʼ nááʼiiniihí bidáaʼgi ahééníʼáhídóó yaago ałníiʼgi béésh łitsoii ałnáshizhoozhgo bikááʼ atʼeesí dah siʼą́ągo áyiilaa.
5 Béésh łitsoii ałnáshizhoozhígíí tʼáá dı̨́įʼgo naanázʼáhígi béésh łitsoii názbąsii yídeidiyiiłhı̨́ı̨́ʼ; éí tsin níyizii iiʼ níʼáago bee naatʼáa doo biniyé áyiilaa.
6 Tsin nitłʼizii níyizgo béésh łitsoii bikʼéstiʼgo áyiilaa.
7 Bikááʼ nááʼiiniihí booshkʼiizh tʼáá ałchʼishjí béésh łitsoii názbąsii yiiʼ tsin níyizii yideeztsiígíí bee naatʼáa doogo áyiilaa; tsin nitłʼizii tsitsʼaaʼgo áyiilaa, nidi biyaadę́ę́ʼ tʼáá biih hoolʼá.
Biiʼ táʼádígisí álnéhígíí (Ex. 30:18)
8 Áádóó biiʼ táʼádígisí índa bá siʼánígíí béésh łitsoii yee áyiilaa; sáanii éí níbaal biiʼ dahozdísinii bichʼéédą́ąʼgi nidaalʼaʼígíí béésh łitsoii biiʼ adéestʼı̨́ı̨́ʼ nideijaah yę́ę áajįʼ adayiiznilgo éí yee biiʼ táʼádígisí índa bá siʼánígíí áyiilaa.
Níbaal biiʼ hodílzinii binaa hazʼánígíí (Ex. 27:9-19)
9 Níbaal biiʼ hodílzinii binaa hazʼą́ągo áyiilaa; shádiʼááhjígo tʼááłáhídi neeznádiidóó baʼaan ashdladiin ké silá ánízahgo áłtsʼóózígo yisdizígíí bee naʼatʼą́hí łigaii ditsʼidgo ályaii nídadilbałígíí áyiilaa.
10 Bá ííyah daniiʼáii naadiingo áádóó bitłʼááh naaznilígíí tʼááłáhíjí biih dahasdzánígíí ałdóʼ naadiingo béésh łitsoii bee ádaalyaa, nidi ííyah daniiʼáii bąąh hadaʼazhahígíí índa bitaʼndaazʼáhígíí éí béésh łigaii bee ádaalyaa.
11 Náhookǫsjí ałdóʼ tʼááłáhídi neeznádiindóó baʼaan ashdladiin ké silá ánízah; ííyah daniiʼáii naadiin áádóó bitłʼááh naaznilígíí tʼááłáhíjí biih dahasdzánígíí ałdóʼ naadiin; éí béésh łitsoii bee ádaalyaa, nidi ííyah daniiʼáii bąąh hadaʼazhahígíí áádóó bitaʼndaazʼáhígíí éí béésh łigaii bee ádaalyaa.
12 Eʼeʼaahjígo tsostsʼidiindóó baʼaan ashdlaʼ ké silá ánízahjįʼ nínááʼdílbał; bá ííyah daniiʼáii éí neeznáá índa bitłʼááh naaznilígíí tʼááłáhíjí biih dahasdzánígíí ałdóʼ neeznáá; ííyah daniiʼáii bąąh hadaʼazhahígíí índa bitaʼndaazʼáhígíí éí béésh łigaii bee ádaalyaa.
13 Haʼaʼaahjígo tsostsʼidiindóó baʼaan ashdlaʼ ké silá áhoníłtéél.
14 Chʼéʼétiingi łahjí naadiin naakidóó náʼáłníiʼgo ké silá ánízahjįʼ nídaʼdilbał; bá ííyah daniiʼáii tááʼ índa bitłʼááh naaznilii tʼááłáhíjí biih dahasdzánígíí ałdóʼ tááʼ.
15 Łahjígo tʼáá ákónáánátʼé; chʼéʼétiingi ałchʼishdę́ę́ʼ naadiin naakidóó nááʼáłníiʼgo ké silá ánízahjįʼ nídaʼdilbał; bá ííyah daniiʼáii ałchʼishdę́ę́ʼ tááʼ índa bitłʼááh sinilii tʼááłáhíjí biih dahasdzánígíí ałchʼishdę́ę́ʼ ałdóʼ tááʼ.
16 Níbaal biiʼ hodílzinii binaa hazʼánígi nídadilbałígíí tʼáá átʼé áłtsʼóózígo yisdizígíí bee naʼatʼą́hí łigaii ditsʼidgo ályaii bee ádaalyaa.
17 Ííyah daniiʼáii bitłʼááh naaznilígíí tʼááłáhíjí biih dahasdzánígíí béésh łitsoii bee ádaalyaa; bąąh hadaʼazhahígíí índa bitaʼndaazʼáhígíí béésh łigaii bee ádaalyaa; bílátahjįʼ dah naaznilígíí béésh łigaii yikʼídeistiʼ, índa bitaʼndaazʼáhígíí béésh łigaii bee ádaalyaago bee ahee daniłdzilgo áyiilaa.
18 Níbaal biiʼ hodílzinii binaa hazʼánígíí bichʼéʼétiingi dáádiníbaalígíí éí yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ naashchʼąąʼgo yistłʼǫ́ǫgo tádiin ké silá áníłnééz índa dego éí tsostsʼidóó nááʼáłníiʼgo ké silá áníłtéél; tʼáá ahééníbaal áníłtélígíigi áníłtéél.
19 Éí bá ííyah daniiʼáii dı̨́ı̨́ʼ; bitłʼááh naaznilígíí tʼááłáhíjí biih dahasdzánígíí ałdóʼ dı̨́ı̨́ʼ; éí béésh łitsoii bee ádaalyaa; bąąh hadaʼazhahígíí éí béésh łigaii bee ádaalyaa índa bílátahjįʼ dah naaznilígíí ałdóʼ béésh łigaii yikʼídeistiʼ, áádóó ataʼndaazʼáhígíí ałdóʼ béésh łigaii bee ádaalyaa.
20 Níbaal biiʼ hodílzinii índa binaa hazʼánígíí bá anídaalkałígíí tʼáá ałtso béésh łitsoii bee ádaalyaa.
Béésh ałtaasʼéí níbaal biiʼ hodílzinii álnéehgi choozʼįįdígíí
21 Níbaal biiʼ hodílzinii tʼáá éí neeznáago bikʼeh óʼooʼníiłii bee bééhániihii biiʼ sinilii kónéeltʼeʼgo bee hadiidzaaígíí yééltaʼ. Mózes yee hasʼáanii bikʼehgo Líívai dineʼé yindaalnishgo Éran nááʼiiłniihii nilíinii biyeʼ Íthamar joolyéii dayiyííłtaʼ.
22 Biizáliyel éí Yúrai biyeʼ jílı̨́ áádóó hanálí éí Her yiyeʼ nilı̨́; hó éí Júdah dineʼé jílı̨́įgo Bóhólníihii éí Mózes yee yichʼįʼ haadzíiʼii bikʼehgo tʼáá ałtso hashtʼejiilaa,
23 índa yił naalnishii éí Ahóliyab wolyéii éí Ahísamak biyeʼ nilı̨́įgo Dan dineʼé éí naʼachʼąąhgo atsidjí áádóó iichįįh yee binaanishii nilı̨́. Índa yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ naʼachʼąąhgo atłʼó yinaalnishii nilı̨́.
24 Óola éí Bóhólníihii baa nídahideestʼánígíí tʼáá ałtso hodiyingo hazʼą́ą́ góneʼ tʼáá átʼé bee hahodidzaii éí naadiin náhástʼéí tálent wolyéii áádóó tsostsʼidi neeznádiindóó baʼaan tádiin shékel dah hidiidlohígíí bíighahgo ánéelą́ą́ʼ; éí hodiyingo hazʼą́ą́ góneʼ shékel chooʼíinii bikʼehgo wóltaʼ.
25 Ízrel dineʼé dabiʼdééltaʼii éí béésh łigaii nidayiizhjaaʼígíí tʼááłáhídi neeznádiin tálent áádóó tʼááłáhídi mííldóó baʼaan tsostsʼidi neeznádiindóó baʼaan tsostsʼidiindóó baʼaan ashdlaʼ shékel dah hidiidlohígíí bíighahgo ánéelą́ą́ʼ; éí hodiyingo hazʼą́ą́ góneʼ shékel chooʼíinii bikʼehgo wóltaʼ.
26 Jó, dinéhígíí tʼááłáʼí nítínígo bííka wolyéii nidayiizhjaaʼ; éí shékel ałnííʼdóó hodiyingo hazʼą́ągi chooʼíinii bikʼehgo ákónéeltʼeʼgo wóltaʼ; tʼááłáʼí jinítínígo dah hoʼdóltaʼgóó nidadziskai; naadiin hwéédááhaidóó degoígíí tʼáá ádzíłtso naaltsoos bikááʼ daházhiʼ ádaalyaii; hastą́ądi neeznádiindóó baʼaan táadi mííldóó baʼaan ashdladi neeznádiindóó baʼaan ashdladiin nidaʼiizhjaaʼ lá.
27 Tʼááłáhídi neeznádiin béésh łigaii tálent dah hidiidlohígíí bíighahgo éí níbaal biiʼ hodílzinii índa ataʼnaníbaal bá neelkálígíí bitłʼááh naaznilígíí tʼááłáhíjí biih dahasdzánígíí ádaalyaa, áko neeznádiin atłʼááh naaznilígíí éí neeznádiin tálent bíighahgo bee ádaalyaa; tʼááłáʼí atłʼááh siʼánígíí éí tʼááłáʼí tálent bíighahgo bee ályaa.
28 Índa ííyah daniiʼáii bąąh hadaazhahígíí áádóó bitaʼndaazʼáhígíí béésh łigaii yee ádayiilaa índa bílátahjįʼ dah naaznilígíí béésh łigaii yikʼídeistiʼ; éí béésh łigaii tʼááłáhídi mííldóó baʼaan tsostsʼidi neeznádiindóó baʼaan tsostsʼidiindóó baʼaan ashdlaʼ shékel dah hidiidlohígíí bíighah.
29 Béésh łitsoii éí Bóhólníihii yaa nídeidiyiizʼánígíí éí tsostsʼidiin tálent áádóó naakidi mííldóó baʼaan dı̨́įdi neeznádiin shékel bíighahgo ánéelą́ą́ʼ.
30 Áko níbaal biiʼ dahozdísinii bichʼéʼétiingi dáádiníbaal bá ííyah daniiʼáii bitłʼááh naaznilígíí tʼááłáhíjí biih dahasdzánígíí éí béésh łitsoii yee áyiilaa, índa béésh łitsoii bikááʼ nááʼiiniihí áádóó béésh łitsoii ałnáshizhoozhígíí índa bikááʼ nááʼiiniihí bił chodaoʼíinii tʼáá ałtso tʼáá éí yee ánáádayiidlaa,
31 áádóó binaa hazʼánígíí índa chʼéʼétiin bitłʼááh naaznilígíí tʼááłáhíjí biih dahasdzánígíí áádóó níbaal biiʼ hodílzinii índa binaa hazʼánígi bá anídaalkałígíí ałdóʼ éí béésh łitsoii bee ádaalyaa.
