Exodus 39:1-43
39 Yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí bee ééʼ tsʼídá yáʼátʼéhígíí yiih nídaakahgo hodiyingo hazʼą́ągi nidaalʼaʼ doo biniyé ádayiilaa; Bóhólníihii éí Mózes yichʼįʼ yee haadzíiʼii bikʼehgo ééʼ dadílzinii Éran bá ádayiilaa.
2 Íífad wolyéii éí óola áłtsʼóózígo neheeshgizhígíí áádóó yisdizii yá nahalingo dootłʼizhígíí áádóó tsídídééh nahalingo łichíʼígíí áádóó łichxíʼígíí índa áłtsʼóózígo yisdizígíí bee naʼatʼą́hí łigaii ditsʼidgo ályaii yee áyiilaa.
3 Óola ałtʼą́ą́ʼígo hashtʼeʼnabíʼílneʼgo áłtsʼóózígo niheeshgizhgo bee náʼálkadí ádayiilaago éí yisdizii yá nahalingo dootłʼizhígíí áádóó tsídídééh nahalingo łichíʼígíí áádóó łichxíʼígíí índa áłtsʼóózígo yisdizígíí bee naʼatʼą́hí łigaii ditsʼidgo ályaii yił nideineesheeʼgo iichįįhgo yaa nidadeesgįʼgo deiztłʼǫ́.
4 Íífad wolyéii awostisgi tʼáá ałchʼijí bee ahídahaashchaʼígíí ádayiilaa.
5 Íífad wolyéii anííʼ gónaa ahééhiníłtsoozígíí baa nahodeesgįʼgo yistłʼónígíí éí bee áká náʼálzis doo biniyé bił ahídahaashchaʼgo ályaa; óola áłtsʼóózígo neheeshgizhígíí áádóó yisdizii yá nahalingo dootłʼizhígíí áádóó tsídídééh nahalingo łichíʼígíí áádóó łichxíʼígíí índa áłtsʼóózígo yisdizígíí bee naʼatʼą́hí łigaii ditsʼidgo ályaii bee tʼáá íífad naashchʼąąʼgo ályaaígi átʼéego sis naashchʼąąʼgo ályaa; Bóhólníihii éí Mózes yichʼįʼ yee haadzíiʼii bikʼehgo ályaa.
6 Tsé ílíinii ániks wolyéii hashtʼeʼniyídaʼakʼaashii álʼínígi átʼéego tsé yinídaʼakʼaashgo yízhí bikʼi naaznilgo bibąąhgóó óola bee ahéédeelghasgo Ízrel biyeʼké dabízhiʼ bikʼi sinilgo ádayiilaa.
7 Éí tséhígíí Ízrel biyeʼké bee bééhániih biniyé íífad wolyéii bikáaʼgi awostisgi tʼáá ałchʼijí sinilgo Bóhólníihii éí Mózes yichʼįʼ yee haadzíiʼii bikʼehgo áyiilaa.
8 Íífad bikáaʼgi ayidgi dah siłtsoozígíí éí óola áłtsʼóózígo neheeshgizhígíí áádóó yisdizii yá nahalingo dootłʼizhígíí áádóó tsídídééh nahalingo łichíʼígíí áádóó łichxíʼígíí índa áłtsʼóózígo yisdizígíí bee naʼatʼą́hí łigaii ditsʼidgo ályaii baa nahodeesgįʼgo iichįįhgo íífad ályaaígi átʼéego áyiilaa.
9 Éí dikʼą́ągo ályaa; ayidgi dah siłtsoozígíí ahą́ą́h nániilyáago yílá deestsʼǫ́ǫ́d áníłnééz áádóó yílá deestsʼǫ́ǫ́d áníłtéelgo
10 bikáaʼgi dı̨́įʼgo hadahidiitʼiʼígíí tsé daʼílíinii biih heesʼnil; áłtsé hadiitʼiʼígíí éí sárdiyas,* áádóó tópaz,* índa kárbankal;*
11 naaki góneʼ hanáádiitʼiʼígíí éí émerald,* áádóó sáfair,* índa dáíman;*
12 tááʼ góneʼ hanáádiitʼiʼígíí éí jéísinth,* áádóó égad,* índa ámethist;*
13 dı̨́ı̨́ʼ góneʼ hanáádiitʼiʼígíí éí béril,* áádóó ániks,* índa jásper;* tʼááłáʼí níʼánígo óola binídadeesghasgo ádaalyaa.
14 Tsé naakitsʼáadahgo Ízrel biyeʼké dabízhiʼ éí tsé hashtʼeʼniyídaʼakʼaashii tsé yinídaʼakʼaashgo Ízrel biyeʼké naakitsʼáadahígíí dabízhiʼ tʼááłáʼí nítínígo bikʼehgo ádaalyaa.
15 Ayidgi dah siłtsoozígíí bá tłʼóół ałkʼésgizígi átʼéego óola tʼáá bízhání daʼahólzhaʼígíí ałkʼésgizgo ádayiilaa;
16 óola ahéédeelghasígíí naaki áádóó óola názbąsí naaki áyiilaa, áko ayidgi dah siłtsoozígíí tʼáá ałchʼijí éí óola názbąsí bąąh dah sinilgo ádayiilaa,
17 índa óola ałkʼésgizgo ályaaígíí naaki éí ayidgi dah siłtsoozígíí tʼáá ałchʼijí óola názbąsgo naaki bąąh sinilígíí yídayiishchaʼ.
18 Tʼáá ałchʼijí nineelʼánídóó óola ałkʼésgizígíí bitsʼánítʼiʼgi ałdóʼ óola naakigo ahéédeelghasígíí yídayiishchaʼgo éí bee ayidgi dah siłtsoozígíí íífad wolyéii bikʼijįʼ awostisjįʼ tʼáá ałchʼijí bídajiishchaʼ.
19 Índa óola názbąsgo naaki ánáádayiidlaago ayidgi dah siłtsoozígíí yaago nineelʼání biyiʼdóó íífad bichʼįʼgo dah sinilgo ádayiilaa.
20 Áádóó óola názbąsgo naaki ánáádayiidlaa, áko éí íífad bikʼijįʼ awostisdóó tʼáá ałchʼijí háátʼiʼígíí yaago ninítʼiʼgi bąąh dah sinilgo ádayiilaa; tʼáá sis íífad bąąh nítʼiʼígíí baa nahodeesgįʼgo yistłʼónígíí béheeshchaʼgi bąąh sinilgo ádayiilaa.
21 Áádóó ayidgi dah siłtsoozígíí óola názbąsgo bąąh dah sinilii éí íífad wolyéii óola názbąsgo bąąh dah sinilígíí tłʼóółtsʼósí yá nahalingo dootłʼizhígíí yee yídayiistłʼǫ́, áko ayidgi dah siłtsoozígíí éí sis íífad bąąh nítʼiʼígíí baa nahodeesgįʼgo yistłʼónídóó bidejígo siłtsooz doo, áádóó íífad doo bitsʼą́ą́ʼ nidiʼdooltsʼił da; Bóhólníihii éí Mózes yichʼįʼ yee haadzíiʼii bikʼehgo ádayiilaa.
22 Íífad wolyéii biyaadi ééʼ agod taʼjįʼ nineelʼánígíí ałdóʼ tʼáá átʼé yá nahalingo dootłʼizhígíí bee yistłʼǫ́ǫgo áyiilaa,
23 áko éí éʼígíí biih náʼnítʼáahgo biih náʼádáahgo doo adoodlał da biniyé bizénághą́ą́ gónaa yistłʼǫ́ǫgo béésh ééʼ bee naʼabaahii álʼínígi átʼéego yíidiiłkad.
24 Ééʼ agod taʼjįʼ nineelʼánígíí bibąąhgi ajánilgi átʼéego pámgrenit aneestʼąʼ dijoolígi átʼéego éí yisdizii yá nahalingo dootłʼizhígíí áádóó tsídídééh nahalingo łichíʼígíí áádóó łichxíʼígíí índa áłtsʼóózígo yisdizígíí bee naʼatʼą́hí łigaii ditsʼidgo ályaii yee ádayiilaa.
25 Óola tʼáá bízhání yooʼ achaaí ádayiilaa, áko pámgrenit aneestʼąʼ éí yooʼ achaaí bił ałtaʼnínilgo ajánil ádayiilaa;
26 yooʼ achaaí índa pámgrenit aneestʼąʼ bił ałtaʼyíʼnilgo ajánil ályaago éí ééʼ agod taʼjįʼ nineelʼánígíí biih náʼádáahgo naʼalʼaʼ doo biniyé Bóhólníihii éí Mózes yichʼįʼ yee haadzíiʼii bikʼehgo ádayiilaa.
27 Éran áádóó biyeʼké bá ééʼ nineezígíí áłtsʼóózígo yisdizígíí bee naʼatʼą́hí łigaii ditsʼidgo ályaii yee deiztłʼǫ́ǫgo ádayiilaa,
28 índa chʼah dijoolí éí áłtsʼóózígo yisdizígíí bee naʼatʼą́hí łigaii ditsʼidgo ályaii bee yistłʼǫ́ǫgo ádayiilaa, áádóó Éran biyeʼké bichʼah éí áłtsʼóózígo yisdizígíí bee naʼatʼą́hí łigaii ditsʼidgo ályaii bee yistłʼǫ́ǫgo ałdóʼ ádayiilaa, índa tłʼaajiʼééʼ ałdóʼ áłtsʼóózígo yisdizígíí bee naʼatʼą́hí łigaii ditsʼidgo ályaii bee yistłʼǫ́ǫgo há ádayiilaa,
29 áádóó sis bee áká náʼálzisígíí éí yisdizii yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii biyiʼjįʼ naashchʼąąʼgo yistłʼǫ́ǫgo ádayiilaa; Bóhólníihii éí Mózes yichʼįʼ yee haadzíiʼii bikʼehgo ádayiilaa.
Níbaal biiʼ hodílzinii biiʼ ałtso hahodidzaa (Ex. 35:10-19)
30 Béésh tʼą́hí dílzinii átáaʼgi dah sitánígíí éí óola tʼáá bízhání yee ádayiilaa, áádóó kóníigo tsé biiʼ naʼashkʼaazhgo yízhí bikʼi sinilígi átʼéego Bóhólníihii Bá Atsʼá Deetʼą́ yikááʼ ádayiilaa.
31 Chʼah dijoolí bikááʼ átáaʼgi tłʼóółtsʼósí yá nahalingo dootłʼizhígíí bee bíhidoolchah biniyé bíheestłʼǫ́; Bóhólníihii éí Mózes yichʼįʼ yee haadzíiʼii bikʼehgo ádayiilaa.
32 Kótʼéego níbaal biiʼ dahozdísinii ałtso yindaashnishgo ałtso hadidzaa áádóó Ízrel dineʼé danilíinii Bóhólníihii éí Mózes yichʼįʼ yee haadzíiʼii tʼáá ałtso bikʼehgo ádaʼiilaa.
33 Áko níbaal biiʼ hodílzinii índa bił chodaoʼíinii tʼáá ałtso éí Mózes baa dajiizhjaaʼ: ił dah nídaatı̨́hí tsin neheeshjííʼ áádóó tsin níyizii naaniigo bąąh daníʼáhígíí áádóó ííyah daniiʼáii índa bitłʼááh naaznilgo tʼááłáhíjí biih dahasdzánígíí;
34 deenástsʼaaʼ bikágí niilchiiʼígíí índa nahashchʼid bikágí daaldzą́ągo atis ahííkaadígíí áádóó ataʼnaníbaalígíí;
35 tsitsʼaaʼ dílzinii éí neeznáago bikʼeh óʼooʼníiłii bee bééhániihii biiʼ sinilii áádóó tsin níyizii bee naʼatʼáhígíí tʼáá bił índa aa aʼááh hasinii bił hazʼáanii;
36 bikááʼ adání índa bibeedí tʼáá ałtso áádóó Diyin God bichʼįʼ bááh nááhániihígíí;
37 bee hoolʼiní bá yadaaʼáii óola tʼáá bízhání bee ályaii índa bee dahoolʼinígíí tʼáá bikááʼ nínilgo áádóó bił chodaoʼíinii tʼáá ałtso tʼáá bił índa akʼah bee hoolʼin biniyé iih náhádzídígíí;
38 bikááʼ nááʼiiniihí óola bee ályaii áádóó akʼah akʼi yahiidzíidgo bee alzı̨́įhii áádóó tsin bijeeh dilidgo łikání halchinii índa níbaal biiʼ hodílzinii bichʼéʼétiingi dáádiníbaalígíí;
39 bikááʼ nááʼiiniihí béésh łitsoii bee ályaii áádóó béésh łitsoii ałnáshizhoozhii áádóó tsin níyizii bee naʼatʼáhígíí índa bił chodaoʼíinii tʼáá bił; biiʼ táʼádígisí índa bá siʼánígíí,
40 áádóó níbaal biiʼ hodílzinii binaa hazʼą́ągi ahééníbaalígíí áádóó bá ííyah daniiʼáii índa bitłʼááh naaznilii tʼááłáhíjí biih dahasdzánígíí índa chʼéʼétiingi dáádiníbaalígíí; tłʼóół índa anídaalkałígíí; níbaal biiʼ hodílzinii bee binaʼanishii tʼáá ałtso,
41 áko ééʼ tsʼídá yáʼádaatʼéehii yiih nídaakahgo hodiyingo hazʼą́ągi nidaalʼaʼ doo biniyéhígíí áádóó ééʼ dadílzinii Éran nááʼiiłniihii nilíinii báhígíí índa Éran biyeʼké náádaʼiiłniihii danilíinii éí éʼígíí yee nidahałáa doo biniyéhígíida nidayiizhjaaʼ.
42 Bóhólníihii éí Mózes yichʼįʼ yee haadzíiʼii bikʼehgo Ízrel dineʼé naanish ałtso łaʼ dayiyiilaa.
43 Áko Mózes éí naanish ałtso łaʼ dajiilaaígíí hayíísid; jó, Bóhólníihii éí hachʼįʼ yee haadzíiʼii bikʼehgo ałtso nidaashnish lá. Ałtso nidajishnishígíí Mózes hakʼijisdliʼ.
Footnotes
^ Sárdiyas wolyéhígíí éí tsé łichííʼ niłtólígíí átʼé.
^ Tópaz wolyéhígíí éí tsé diniltsxogo dootłʼizhígíí átʼé.
^ Kábankal wolyéhígíí éí tsé łichíiʼgo łitsxoígíí átʼé.
^ Émerald wolyéhígíí éí tsé tátłʼidgo dootłʼizhígíí átʼé.
^ Sáfair wolyéhígíí éí tsé yági átʼéego dootłʼizhgo niłtólígíí átʼé.
^ Dáíman wolyéhígíí éí tsé disǫsígíí agháadi ílíinii átʼé.
^ Jéísinth wolyéhígíí éí tsé łitsoígíí átʼé.
^ Égad wolyéhígíí éí tsé noodǫ́zígíí átʼé.
^ Ámethist wolyéhígíí éí tsé tsídídééh nahalingo niłtólígíí átʼé.
^ Béril wolyéhígíí éí tsé łitsoígíí átʼé.
^ Ániks wolyéhígíí éí tsé łigaii áádóó dootłʼizhgo noodǫ́zígíí átʼé.
^ Jásper wolyéhígíí éí tsé yéego tátłʼidgo dootłʼizhígíí átʼé.
