Exodus 4:1-31
4 Áko Mózes ánáádooʼniidgo ání, Nidi shoo, doo dashoodlą́ą da doo; doo dashíistsʼą́ąʼ da doo, áko ádadidooniił, Bóhólníihii yeeʼ doo nichʼįʼ yitʼíní íʼdiilyaa da.
2 Bóhólníihii áhodííniid, Haʼátʼíísh dah yítı̨́ı̨́ł? Áko ázhdííniid, Gish átʼé.
3 Áko ánááhodooʼniid, Niʼjįʼ aniłtʼeʼ. Ákohgo niʼjįʼ ajííłtʼeʼ, nítʼééʼ tłʼiish silı̨́įʼgo bitsʼą́ąjįʼ Mózes yáájiiltáál.
4 Nidi Bóhólníihii éí Mózes áyidííniid, Kʼídílchíidgo bitseeʼ yiiłtsóód. Tʼáá áko yiyiiłtsoodgo bílákʼeejįʼ gish násdlı̨́ı̨́ʼ.
5 Áko danihizhéʼé yę́ę biBóhólníihii Diyin God, Éíbraham biDiyin God áádóó Áízak biDiyin God índa Jéíkab biDiyin God nichʼįʼ yitʼíní íʼdiilyaago deidoodląął.
6 Nááʼáłdóʼ Bóhólníihii ánááhodooʼniid, Nijéítsʼiinjįʼ átʼadílnííh. Áko hajéítsʼiinjįʼ átʼazhdoolniiʼ áádóó háázhdoolniiʼ nítʼééʼ; łóód atsʼíís yiyáanii naałdzidii bee hálaʼ yas nahalingo yiigaii lá.
7 Áádóó Diyin God ánááhodooʼniid, Nijéítsʼiinjįʼ átʼanáádílnííh. Áko átʼanáázhdoolniiʼ áádóó hanínáázhdoolniiʼ, nítʼééʼ tʼáá hatsįʼ yę́ęgi átʼé násdlı̨́ı̨́ʼ lá.
8 Diyin God ánáádooʼniid, Doo danoodlą́ą́góogo, doodaiiʼ átsé bee ééhózinii doo dayoodlą́ą́góó akéeʼdi bee ééhózinii deizhdoodląął.
9 Díí naakigo bee ééhózinii íinilaa nidi, doo dayoodlą́ą́góó índa doo daníistsʼą́ą́ʼgóó toohdę́ę́ʼ tó łaʼ nídííkáałgo niʼ hóółtseijįʼ yeidííził. Áko toohdę́ę́ʼ tó nídinikánígíí hóółtseijįʼ yeiniziidígíí éí dił dooleeł.
10 Nidi Mózes éí Bóhólníihii áyidííniid, Shoo, Bóhólníihii, tʼáá shiidą́ąʼdii shí doo ayóogo yáshtiʼ da; tsʼídá átsé ná naalʼaʼí nishłíinii shichʼįʼ háínídzííʼ yę́ędóó nidi chʼééh haasdziih; saad shił nantłʼa.
11 Áko Bóhólníihii ánááhodooʼniid, Háishąʼ éí diné bizééʼ áyiilaa? Háishąʼ diné doo yádaałtiʼgóó, doodaiiʼ bijédaahkałgo, doodaiiʼ daʼooʼı̨́įgo, doodaiiʼ doo daʼooʼı̨́ı̨́góó ádeileʼ? Jó, shí Bóhólníihii nishłíinii ákóʼeeshłííł.
12 Éí bąą kʼad nílááh, ákǫ́ǫ́ dínááh; nił honishłǫ́ǫgo yániishtiʼ doo, áko bee hahidíídzihígíí bínaninishtin doo.
13 Nidi ázhdííniid, Shoo, shiBóhólníihii nílíinii, nánooshkąąh, tʼáá háiidago díłʼá.
14 Áko Bóhólníihii éí Mózes yichʼįʼ báhóóchįįdgo ání, Shą́ą́ʼ, Éran, Líívai dineʼé nilíinii nínaaí nilı̨́; éí shił bééhózingo yáʼátʼéehgo yáłtiʼgo bizaad nizhóní; jó, áádę́ę́ʼ nidááh doogááł, áko niiłtsą́ągo tʼáá íiyisí nąąh bił hózhǫ́ǫ doo.
15 Áko bichʼįʼ hadíídzihgo saad yee hahidoodzihígíí baa dadíísįįł, áko éí yee hahidoodzih; nizaad índa bizaad bił honishłǫ́ǫ doo, áko baa naahʼaash dooleełígíí bínanihinishtin doo.
16 Hó diné bichʼįʼ ná yájíłtiʼ doo, áko azééʼ ná jílı̨́į doo áádóó ni éí Diyin God nahalingo há sínízı̨́į doo.
17 Áko díí gish yítı̨́ı̨́ł; bee éédahózinii bee áníłʼı̨́į doo.
Mózes éí Ííjip kéyahdi nádzá
18 Mózes dah nízdiidzá áádóó baadaaní jílíní Jéthro baa nidzídzáago ábizhdííniid, Baa nánooshkąąh, Ííjip kéyahdi shikʼéí kéédahatʼíinii bichʼįʼ nídeeshdááł; tʼah daatsʼí dahiná shił bééhodoozįįł. Áko Jéthro éí Mózes áyidííniid, Nílááh hózhǫ́ǫgo yínááł.
19 Áko Bóhólníihii éí Mídiyan hoolyéedi Mózes áyidííniid, Ííjip kéyahgóó nihéénídááh, háálá diné nidaʼniiłhı̨́ı̨́ nítʼééʼ yę́ę ałtso daneezná.
20 Ákohgo Mózes hweʼasdzą́ą́ bił áádóó hayeʼké éí télii dabíyeehgo Ííjip kéyahgóó dashdiikai. Mózes éí Diyin God bigish jootı̨́ı̨́ł.
21 Áko Bóhólníihii éí Mózes áyidííniid, Ííjip kéyahdi néínídzáago bikʼee tʼóó ayóigo áhooníiłii nílákʼedííʼánígíí Féro binááł ádadííliił, nidi Féro bijéí deestłʼisgo diné doo yééʼdoołnih da.
22 Áko Féro ábididííniił, Bóhólníihii kóní, Ízrel shiyeʼ alą́ąjįʼ yizhchíinii jílı̨́.
23 Áko ándishní, Shiyeʼ shichʼįʼ nahałáa doo biniyé bééʼníłnííh; doo bééʼníłnííhgóó, jó, niyeʼ alą́ąjįʼ yizhchíinii nitsʼą́ą́ʼ diyeeshxééł.
24 Níjookahgo nídaʼnjahgi jíkaigo Bóhólníihii haa honíleʼgo hodiyeeshxééł, hóʼní.
25 Ákohgo Zipórah éí tsé deeníinii nízhdiiʼą́ągo hayáázh yee alizhígíí bikágí bílátah ahéézhníłgizhgo Mózes bikétsı̨́įjįʼ ajiyííłhan, áko ázhdííniid, Ni éí shá ahastiin diłii nílı̨́.
26 Áko Diyin God éí Mózes tʼóó yikʼi deeyá áádóó ąąh náhinilgish biniinaa hweʼasdzą́ą́ ání, Ni éí shá ahastiin diłii nílı̨́.
27 Bóhólníihii éí Éran áyidííniid, Nílááh honoojíidi Mózes bidááh nínááh. Áko dashdiiyáago Diyin God bidziłdi Mózes bidááshníyáago dziztsʼǫs.
28 Áádóó Mózes éí Bóhólníihii bizaad tʼáá ałtso yił honíłʼaʼígíí índa bee ééhózinii tʼáá ałtso áálíił doo hodííniidígíí bee Éran bił hojoolneʼ.
29 Áko Mózes éí Éran bił dashdiiʼáazhgo Ízrel dineʼé yá aląąjįʼ naazíinii tʼáá ałtso áłah ájiilaa.
30 Áko Éran éí Bóhólníihii bizaad tʼáá átʼé Mózes yichʼįʼ yee hahaasdzíiʼii bee hadziisdzííʼ, áádóó bee éédahózinii diné binááł ííshją́ą́ ádajiilaa.
31 Áko diné daʼoosdląąd, áádóó Bóhólníihii éí Ízrel dineʼé yaa honíleʼígíí índa tiʼdahooníihgo yaa ákoniizı̨́ʼígíí yaa dahodiiztsʼą́ą́ʼ, ákohgo yaa ádaadzaago yichʼįʼ nidahasá.
