Exodus 40:1-38
40 Áádóó Bóhólníihii éí Mózes yichʼįʼ haadzíiʼgo ání,
2 Áłtsé nídízídígíí binih łaʼa jı̨́ı̨́ góneʼ níbaal biiʼ dahozdísinii nidííʼááł.
3 Índa éí biiʼ tsitsʼaaʼ dílzinii éí neeznáago bikʼeh óʼooʼníiłii bee bééhániihii biiʼ sinilii nidííʼááł, áádóó tsitsʼaaʼ dílzinii bichʼą́ą́h aníbaalgo ádíílííł.
4 Índa bikááʼ adání ałdóʼ yah adííʼááł, áádóó bikááʼ naaznil dooleełígíí bikááʼ nidadíínił, índa bee hoolʼiní bá yadaaʼáii yah adíítı̨́ı̨́ł áádóó bee dahoolʼinígíí bikááʼ nínilgo ádíílííł.
5 Bikááʼ nááʼiiniihí óola bee ályaii éí tsin bijeeh dilidgo łikání halchinii nááhániihii bá ályaii, áádóó tsitsʼaaʼ dílzinii neeznáago bikʼeh óʼooʼníiłii bee bééhániihii biiʼ sinilii bidááhjí nidííʼááł, índa níbaal biiʼ hodílzinii bichʼéʼétiingi aníbaalgo ádíílííł.
6 Didlidgo nááhániihii biniyé bikááʼ nááʼiiniihí éí níbaal biiʼ dahozdísinii bichʼéʼétiindóó bidááhjí nidííʼááł,
7 índa níbaal biiʼ dahozdísinii siʼánídóó bikááʼ nááʼiiniihí siʼání bitaʼgi biiʼ táʼádígisí nidííʼáałgo tó bee nidííkááł.
8 Níbaal biiʼ hodílzinii binaa hazʼánígi bináʼázbaalgo ádíílííł, índa bichʼéʼétiingi aníbaalgo ádíílííł.
9 Ákohgo akʼah akʼi yahiidzíidgo bee alzı̨́įhii łaʼ nídidííkáałgo níbaal biiʼ hodílzinii índa biyiʼ góneʼ naaznilígíí tʼáá ałtso bikʼi yadeidiyííził, áko níbaal biiʼ hodílzinii áádóó biyiʼ góneʼ chodaoʼíinii tʼáá ałtso atsʼádííniłgo dadíísįh, áádóó dadílzin dooleeł.
10 Áádóó didlidgo nááhániihii bá bikááʼ nááʼiiniihí índa bił chodaoʼíinii tʼáá ałtso bikʼi yadeidiyííził, áko bikááʼ nááʼiiniihí tsʼídá dílzingo ádíílííł, áádóó bikááʼ nááʼiiniihí tsʼídá aláahgo dílzin dooleeł.
11 Biiʼ táʼádígisí índa bá siʼánígíí ałdóʼ bikʼi yeidííziłgo tsʼídá dílzingo ádíílííł.
12 Ákohgo índa Éran áádóó biyeʼké éí níbaal biiʼ dahozdísinii bichʼéʼétiinjįʼ nihodííʼishgo tó bee táádahodíígis,
13 índa Éran éí ééʼ dadílzinii biih hodííłtééł, índa akʼah hakʼi yeidííził, áádóó diyingo áhodíílííł, áko shá nidajilʼaʼgo nááʼiiłniihii dajílı̨́į doo.
14 Áádóó Éran biyeʼké dííʼishgo tʼááłáʼí nítínígo ééʼ biih dahodiyííłtééł,
15 áádóó akʼah hakʼi yadeidiyííziłgo bee dahodíísįhgo bizhéʼé akʼah bikʼi yeiniziidígi átʼéego ádíílííł. Áko shá nidaalʼaʼgo nááʼiiłniihii danilı̨́į doo; jó, dazhdiyingo ádahoʼdiilyaaígíí hoolʼáágóó náádaʼiiłniihii dajílı̨́įgo náás daʼahijílchíih doo.
16 Áko Mózes tʼáá ákódziidzaa; Bóhólníihii áhodííniidígíí tʼáá ałtso bikʼehgo íʼjiilaa.
17 Naaki náhááh góneʼ áłtsé nídízídígíí binih łaʼa jı̨́ı̨́ góneʼ níbaal biiʼ hodílzinii niitʼą́.
18 Mózes éí níbaal biiʼ hodílzinii niiníʼą́; atłʼááh naaznilii tʼááłáhíjí biih dahasdzánígíí niinínil, áádóó tsin neheeshjííʼ neelkáalgo áyiilaa, áádóó tsin níyizii naaniigo bąąh daníʼáii deideeztsih, índa ííyah daniiʼáii adeiztsih.
19 Níbaal biiʼ hodílzinii atis ahííkaad dooígíí bitis ahííkaadgo áyiilaa, índa éí bikáaʼgi atis adahaazkaad dooígíí bitis adahaazkaadgo áyiilaa; Bóhólníihii éí Mózes yichʼįʼ yee haadzíʼígíí yiʼiilaa.
20 Ákohgo neeznáago bikʼeh óʼooʼníiłii bee bééhániihii éí tsitsʼaaʼ dílzinii yiih yiyíínil, áádóó éí tsitsʼaaʼ tsin níyizii bee naʼatʼáhígíí tʼáá ałchʼijí níʼáago áyiilaa, áádóó aa aʼááh hasinii bił hazʼáanii bidadinítą́ągo áyiilaa,
21 índa tsitsʼaaʼ dílzinii éí níbaal biiʼ hodílzinii yiih deizʼą́ągo ataʼnaníbaal dooígíí níbaalgo ádayiilaa, áko tsitsʼaaʼ dílzinii neeznáago bikʼeh óʼooʼníiłii bee bééhániihii biiʼ sinilii yichʼą́ą́h daʼdeesbaal; Bóhólníihii éí Mózes yichʼįʼ yee haadzíʼígíí yidaʼiilaa.
22 Áádóó bikááʼ adání néidiiʼą́ągo níbaal biiʼ dahozdísinii siʼání góneʼ tʼáá éí níbaal biiʼ hodílzinii ataʼnaníbaalídóó tłʼóóʼ bichʼįʼgo hazʼánígi náhookǫs bichʼijí niiníʼą́.
23 Bááh éí bikááʼ adání yikááʼ Bóhólníihii binááł niinínil; Bóhólníihii éí Mózes yichʼįʼ yee haadzíʼígíí yiʼiilaa.
24 Índa níbaal biiʼ dahozdísinii biyiʼ bee hoolʼiní bá yadaaʼáii niiníʼą́; níbaal biiʼ hodílzinii biyiʼ bikááʼ adání siʼání binaashiijí shádiʼááhjígo niiníʼą́.
25 Bee dahoolʼinígíí bikááʼ yíʼnilgo Bóhólníihii binááł deidiiłtłah; Bóhólníihii éí Mózes yichʼįʼ yee haadzíʼígíí yiʼiilaa.
26 Áádóó bikááʼ nááʼiiniihí óola bee ályaii éí níbaal biiʼ dahozdísinii biyiʼ ataʼnaníbaalígíí bitsı̨́įjįʼ niiníʼą́ągo
27 bikáaʼgi Mózes éí tsin bijeeh dilidgo łikání halchinii nááyiisniiʼ; Bóhólníihii éí Mózes yichʼįʼ yee haadzíʼígíí yiʼiilaa.
28 Índa níbaal biiʼ hodílzinii bichʼéʼétiingi dáádiníbaalígíí yideesbaalgo
29 didlidgo nááhániihii biniyé bikááʼ nááʼiiniihí néidiiʼą́ągo níbaal biiʼ dahozdísinii bichʼéédą́ąʼgi niiníʼą́ągo bikáaʼgi didlidgo nááhániihii índa akʼáán nááhániihii nááyiisniiʼ; Bóhólníihii éí Mózes áyidííniidígíí yiʼiilaa.
30 Áádóó níbaal biiʼ dahozdísinii índa bikááʼ nááʼiiniihí bitaʼgi biiʼ táʼádígisí niiníʼą́ągo tó bee táʼádazdigis dooleełígíí niiníką́.
31 Áko ákwii Mózes áádóó Éran índa biyeʼké dabílaʼ áádóó dabikeeʼ tánínádeigis doo,
32 áádóó níbaal biiʼ dahozdísinii siʼánígóó nídazhdikahgo áádóó bikááʼ nááʼiiniihí bichʼįʼ ninádajikahgo átsé táʼánídazdigis doo; Bóhólníihii éí Mózes yichʼįʼ yee haadzíiʼii yidaʼósin.
33 Índída níbaal biiʼ hodílzinii áádóó bikááʼ nááʼiiniihí binaa hazʼánígíí bináʼázbaalgo ájiilaa, áádóó bichʼéʼétiingi dáádiníbaal níbaalgo ájiilaa. Ákohgo Mózes naanish ałtso łaʼ yiyiilaa.
Kʼos éí níbaal biiʼ hodílzinii bikʼiildo
34 Áko índa níbaal biiʼ dahozdísinii éí kʼos bikʼiildo áádóó Bóhólníihii bitsʼádiʼnílíidii yee níbaal biiʼ hodílzinii tʼáá átʼé yiiʼ hólǫ́ silı̨́ı̨́ʼ.
35 Áko Mózes éí níbaal biiʼ dahozdísinii góneʼ doo yah ajóyaʼ átʼée da silı̨́ı̨́ʼ, háálá níbaal biiʼ hodílzinii éí kʼos bikʼiildogo bikʼi dah yilzhoł, áádóó Bóhólníihii bitsʼádiʼnílíidii yee níbaal biiʼ hodílzinii tʼáá átʼé yiiʼ hólǫ́.
36 Níbaal biiʼ hodílzinii bitsʼą́ą́dóó kʼos dego dah nídiildohgo bikʼehgo Ízrel dineʼé dah nídiikah, ákótʼéego tádínééh nítʼééʼ,
37 nidi kʼos doo dah diildóóhgóó Ízrel dineʼé doo dah diikáah da; kʼos dah nídiildohgo índa.
38 Jó, Bóhólníihii bitsʼą́ą́dóó kʼosígíí éí jı̨́įgo níbaal biiʼ hodílzinii yikʼi dah yilzhoł, áádóó tłʼéeʼgo kǫʼ níyizgo bikʼi dah yilzhołgo Ízrel dineʼé tʼáá ałtso éí deiníłʼı̨́įh łeh; éí bikʼehgo tʼáá átʼé tádííná.
