Exodus 6:1-30
6 Ákohgo Bóhólníihii éí Mózes áyidííniid, Kʼad Féro áhodeeshłíłígíí dínííłʼįįł, háálá yílá bidziilii bee bééʼdoolnih, índa tsʼídá yílá bidziilii bee bikéyahídóó chʼíhodínóołkał.
Mózes bíká ánááhodooʼniid
2 Áko Diyin God éí Mózes áyidííniid, Shí Bóhólníihii nishłı̨́.
3 Éíbraham áádóó Áízak índa Jéíkab shízhiʼ Diyin God Aláahgo Ayóóʼábóodziilii bee bichʼįʼ ííshjání íʼdiishyaa, nidi Bóhólníihii shízhiʼ nilı̨́įgo tʼáadoo bee bichʼįʼ ííshjání íʼdiishyaa da.
4 Áádóó ałdóʼ chánahgo bił ahadadiʼnishtʼą́ągo Kéínan kéyah nihaa dideeshʼááł, bidííniid niʼ; tʼáá éí kéyah tʼóó átsééd yikááʼ naasdeeʼgo déʼéyóní danilı̨́ı̨́ nítʼééʼ yę́ę baa dideeshʼáałgo bee haasdzííʼ.
5 Áádóó Ízrel dineʼé éí Ííjip dineʼé binaalteʼ dajílı̨́įgo nidazhdiʼniʼgo disétsʼą́ą́ʼ, nidi bił ahadadiʼnishtʼáanii bénáshniih.
6 Éí bąągo Ízrel dineʼé kóbididííniił, Shí Bóhólníihii nishłı̨́, áko Ííjip dineʼé naanish yídanihiniłkadgo atídanihiłʼı̨́ı̨́dóó chʼínihideeshʼish, áádóó binaalteʼ danohłínídóó dah nihidideeshʼishgo tsʼídá bidziilgo índa ayóó átʼéego baa nídéeshtʼįįłii bee nihikʼé nináʼdeeshdlééł.
7 Áko shidineʼé danohłı̨́į doo áádóó shí nihiDiyin God nishłı̨́į doo índa shí Bóhólníihii nihiDiyin God éí Ííjip dineʼé naanish yídanihiniłkadgo atídanihiłʼı̨́ yę́ędóó chʼínihiníʼeezhii nishłı̨́įgo nihił béédahodoozįįł.
8 Áko kéyah biih nihideeshʼishígíí éí Éíbraham áádóó Áízak índa Jéíkab tsʼídá baa dideeshʼáałgo bichʼįʼ bee ádee hahidísdzíiʼii nihaa dideeshʼáałgo nihííʼ dooleeł. Shí Bóhólníihii nishłı̨́.
9 Mózes éí kónááháʼní níigo Ízrel dineʼé yichʼįʼ yáłtiʼ, nidi Mózes doo dayíistsʼą́ąʼ da, háálá tʼáá íiyisí bąąh nidahwiizkaadgo naalteʼ danilı̨́įgo naanish yąąh niikááh.
10 Áko Bóhólníihii éí Mózes ánéidooʼniidgo ání,
11 Nihílááh, Ííjip dineʼé aláahgo binanitʼaʼí Féro bił yah oohʼaashgo kóbidohní, Nikéyahdóó Ízrel dineʼé bééʼníłnííh.
12 Mózes éí Bóhólníihii áyidííniid, Jó, Ízrel dineʼé doo dashíistsʼą́ąʼ dago haash yitʼéego Féro shíistsʼą́ąʼ doo, háálá saad doo sheiszįįd da?*
13 Nidi Bóhólníihii éí Mózes áádóó Éran áyidííniid, Ízrel dineʼé índa Ííjip dineʼé aláahgo binanitʼaʼí Féro bichʼįʼ hadoohdzih, Ííjip kéyahdóó Ízrel dineʼé chʼídiitʼish, bididoohniił.
Mózes áádóó Éran náás ahoolchíiłii
14 Díí dabizhéʼé yę́ę dabighandóó alą́ąjįʼ nidaakaii: Ízrel bá alą́ąjįʼ yizhchínígíí Rúben wolyéii biyeʼké éí Héínak áádóó Pállu áádóó Hézran índa Kármai daolyé. Díí Rúben baʼáłchíní ádaatʼı̨́.
15 Símiyan biyeʼké éí Jíímuwel áádóó Jéímin áádóó Óhad áádóó Jéíkin áádóó Zóhar índa Shéíyal daolyé. (Shéíyal bimá éí Kéínan dineʼé asdzání nilı̨́.) Díí Símiyan baʼáłchíní ádaatʼı̨́.
16 Díí Líívai biyeʼké náás ahoolchíłígíí kódaolyé: Gérshan áádóó Kóhath índa Miirárai, áko Líívai bíídíiską́ą́dóó neeznádiindóó baʼaan tádiindóó baʼaan tsostsʼid binááhai.
17 Gérshan biyeʼké éí Líbnai índa Shímiyai wolyé.
18 Kóhath biyeʼké éí Ámram áádóó Ízxar áádóó Hííbran índa Azáíyel daolyé. Kóhath bíídíiską́ą́dóó neeznádiindóó baʼaan tááʼ binááhai.
19 Miirárai biyeʼké éí Málai áádóó Múshai wolyé. Díí Líívai baʼáłchíní náás ahoolchíłígíí ádaatʼı̨́.
20 Ámram éí hazhéʼé bilah Jákebed hweʼasdzą́ą́ ájiilaa, áko Éran áádóó Mózes yishchı̨́. Ámram bíídíiską́ą́dóó neeznádiindóó baʼaan tádiindóó baʼaan tsostsʼid binááhai.
21 Ízxar biyeʼké éí Kórah áádóó Níífeg índa Zíkrai daolyé.
22 Azáíyel biyeʼké éí Mísheiyel áádóó Élzefan índa Zítrai daolyé.
23 Amínadab bitsiʼ éí Néíshan bilah nilíinii Iiláísheba wolyéii Éran beʼasdzą́ą́ silı̨́ı̨́ʼ. Áko Néídab áádóó Abáíhu áádóó Eliyéízar índa Íthamar díí Éran yá niyiishchı̨́.
24 Kórah biyeʼké éí Áser áádóó Elkéínah índa Iibáíyasaf daolyé. Díí Kórah dineʼé baʼáłchíní ádaatʼı̨́.
25 Éran biyeʼ Eliyéízar éí Pútiyel bitsiʼké łaʼ beʼasdzą́ą́ áyiilaa, áko Fíniyas yishchı̨́; díí Líívai dabizhéʼé yę́ę bighandóó alą́ąjįʼ nidaakaii baʼáłchíní ádaatʼı̨́.
26 Éran áádóó Mózes lą́ą Bóhólníihii kóhodííniid, Ízrel dineʼé tʼáá dah deínéhígíí bikʼehgo Ííjip kéyahdóó bił chʼídoohnééł.
27 Ííjip dineʼé aláahgo binanitʼaʼí Féro Ííjipdę́ę́ʼ Ízrel dineʼé chʼídootʼishgo bee bichʼįʼ yájííłtiʼígíí éí díí Mózes áádóó Éran ájítʼı̨́.
Bóhólníihii yee hoołʼaʼígíí Mózes áádóó Éran yee yichʼįʼ haadzííʼ
28 Ííjip kéyahdi Bóhólníihii éí Mózes yichʼįʼ haadzííʼ yę́ędą́ą́ʼ
29 Bóhólníihii éí Mózes áyidííniid, Shí Bóhólníihii nishłı̨́; nichʼįʼ hahásdzíʼígíí tʼáá ałtso Ííjip dineʼé aláahgo binanitʼaʼí Féro bee bił hólneʼ.
30 Nidi Mózes éí Bóhólníihii binááł ájíní, Shoo, shí éí saad doo sheiszįįd da,* ákoshąʼ haash yitʼéego Féro shíistsʼą́ąʼ doo?
Footnotes
^ Ąąh náhinoolgish kweʼé bee akʼeʼashchínígíí Hííbrew kʼehjígo saad doo sizaalyáa da níigo ááhyiłní.
^ Ąąh náhinoolgish kweʼé bee akʼeʼashchínígíí Hííbrew kʼehjígo saad doo sizaalyáa da níigo ááhyiłní.
