Ezekiel 1:1-28
1 Íídą́ą́ʼ tádiin náhááh góneʼ dı̨́ı̨́ʼ nídízííd binih ashdlaʼgóó yoołkáałgo Kííbar tooh bibąąhgóó dabiʼdisnáanii bitah honishłǫ́ǫgo yáʼąąshii ąą ádzaago Diyin God bitsʼą́ą́dóó shił áhátʼı̨́įgo yiiłtsą́.
2 Aláahgo naatʼáanii Jehóíyakin yisnááh nilı̨́įgo ashdlaʼ nááhaidóó bikʼijįʼ nídízíídóó ashdlaʼa jı̨́ı̨́ góneʼ,
3 Búzai biyeʼ Iizííkiyel nááʼiiłniihii nishłíinii Bóhólníihii áníinii tʼáadoo bahatʼaadí disétsʼą́ą́ʼ. Kííbar tooh bąąhgi Kaldíya dineʼé bikéyahdi kééhashtʼı̨́įgo Bóhólníihii shideelchid.
4 Ákohgo náhookǫsdę́ęʼgo tʼáá íiyisí deeyolgo kʼos diłhił dah shizhóód, éí biyiʼ atsiniltłʼish ahidíníłná anídahataʼ áádóó tʼáá íiyisí bitsʼádiʼnílííd silı̨́ı̨́ʼ índa ałníiʼgi éí béésh łitsoii bitsʼádiʼnílííd nahalingo biʼoh adidilyééh silı̨́įʼgo, díí tʼáá ałtso yiiłtsą́.
5 Éí kʼos binííʼdóó haʼátʼíí shı̨́ı̨́ dahináanii nahalingo dı̨́ltʼéego ałdóʼ haakai. Kódanoolnih; diné nidahalin.
6 Tʼááłáʼí nítínígo dı̨́ı̨́ʼ dabiniiʼ áádóó tʼááłáʼí nítínígo dı̨́ı̨́ʼ dabitʼaʼ.
7 Bijáád éí kʼédaazdon áádóó béégashii yáázh daalkeeʼgo béésh łitsoii bitsʼádiʼnílídígíí nidahalin.
8 Áádóó tʼááłáʼí nítínígo bitʼaʼ daadı̨́ʼígíí éí biyaadóó bílaʼ dahólǫ́, índa tʼáá dı̨́ltʼéego biniiʼ áádóó bitʼaʼ dahólǫ́.
9 Dabitʼaʼ éí ahidadiiʼáago neeʼnijįʼ deítʼáahgo doo nídaayées da; tʼááłáʼí nítínígo éí neeʼnijįʼ kʼéhézdon yikah.
10 Dabiniiʼ éí díí nidahalin: bidááhdóó éí diné daalniiʼ, nishʼnáajigo dabiniiʼígíí éí náshdóítsoh bitsiijįʼ ditłʼooígíí daalniiʼ, nishtłʼahjigo dabiniiʼígíí éí béégashii daalniiʼ, bikéeʼjigo dabiniiʼígíí éí atsá daalniiʼ.
11 Áko dabiniiʼ kódaatʼé. Bitʼaʼ dego dadeezʼá; bitʼaʼ naaki ahidadiiʼá áádóó bitʼaʼ naakigo bitééldę́ę́ʼ bikʼídaastiʼ.
12 Tʼááłáʼí nítínígo náásee tʼáá kʼéhézdon tʼáá deeshtʼah danízingóó tʼáadoo nídaayésí deítʼááh.
13 Dahináanii ádanóolninígíí tsííd dadiltłiʼ nidahalin, honooyééł dadéenood nahalingo ałnáádadinaʼ; kǫʼ éí hózhǫ́ dadiiltłahgo éí bitsʼą́ą́dóó hadajilgish.
14 Atsiniltłʼish anáhátaʼ nidahalingo dahináanii náásee náádiijah áádóó tʼą́ą́ʼ anáhájeeh.
15 Dahináanii níshʼı̨́ı̨́ nítʼééʼ, dahináanii tʼááłáʼí nítínígo bíighahgóó niʼgi bąąs tʼááłáʼí níʼánígo siʼą́.
16 Bąąs ánoolninígíí índa ádaalyaaígíí éí ahidiníłnáago ahiiʼ sinilgo tsé ílíinii béril wolyéii nahalingo bikʼi nizdiłtoołgo éí tʼáá dı̨́įʼgo ahidaałtʼé.
17 Tʼáá azlı̨́įʼjigo tʼáá ahąąh tʼáadoo nídaayésí dah dadiibą́ą́z.
18 Binídaazʼáhígíí éí wódahdi ahéédaazʼáago tʼóó báádahadzid, áko níshʼı̨́ı̨́ nítʼééʼ, tʼáá dı̨́įʼgo binááʼ binídadeeswoł.
19 Dahináanii dah diijahgo bąąs ałdóʼ tʼáá bíighah deíjeeh łeh áádóó índa dah dadiildohgo éí bąąs ałdóʼ tʼáá bíighah de kótʼįįh.
20 Tʼáá deeshtʼah danízinígóó bąąs tʼáá bíighah dah dadiildoh, háálá dahináanii íinízinígíí yee bąąs nayiiłná.
21 Dahináanii dah dadiildohgo bąąs tʼáá bíighah dah dadiildoh; tʼáá ákǫ́ǫ́ niildogo bąąs ałdóʼ tʼáá ákǫ́ǫ́ niildo; dah dadiildohgo bąąs ałdóʼ tʼáá bíighah dah dadiildoh, dahináanii íinízinígíí bąąsígíí nayiiłná.
22 Dahináanii bikáaʼdi éí haʼátʼíí shı̨́ı̨́ yá nahalingo dah sikaad; tin nahalingo niłtólígo tʼóó bikʼee ił yéeʼgo bikʼi nizdidlaad,
23 yá nahalinígíí biyaagi éí dahináanii tʼááłáʼí nítínígo bitʼaʼ deiníłbaalgo ahidadiiʼá; bitʼaʼ naakigo bitééldę́ę́ʼ bikʼídaastiʼ.
24 Deítʼáahgo dabitʼaʼ éí tó tʼóó ahayóí chʼílkaal nahalingo dadiitsʼaʼ; Aláahgo Ayóóʼábóodziilii biinééʼ nahalingo diitsʼaʼ; siláo tʼóó ahayóí hahóółʼá nahalingo diitsʼaʼ; dahináanii hashtʼeʼdeizįʼgo bitʼaʼ yaa ádayiilaa.
25 Dahináanii hashtʼeʼdeizįʼgo bitʼaʼ yaa ádayiilaago bikáaʼdi yádiłhił biyiʼdę́ę́ʼ iinééʼ disétsʼą́ą́ʼ.
26 Yáhígíí éí náábíkáaʼdi haʼátʼíí shı̨́ı̨́ bikááʼdóó nahatʼáii siʼą́ nahalingo yiiłtsą́; tsé ílíinii sáfair wolyéii yá nahalingo dootłʼizh; níléí wódahdi bikááʼdóó nahatʼáii bikáaʼgi éí diné nahalingo dah sidáago yiiłtsą́.
27 Binííʼdóó dego éí tʼáadoo leʼé bitsʼáhojilgishii nahalingo yiiłtsą́; binííʼdóó yaago éí kǫʼ binídoonałgo bitsʼádiʼnídínígíí nahalingo yiiłtsą́, áko binaagóó binídeezlííd.
28 Éí binídeezlídígíí nahałtı̨́įhgo náátsʼíílid kʼos biyiʼjįʼ niidiłígíí nahalin.
Díí éí Bóhólníihii bibiʼoh adidilyéehii kónoolningo yiiłtsą́ągo niʼjįʼ tséʼyaa níshjool, áko łaʼ hadzoodzíiʼgo hwiinééʼ disétsʼą́ą́ʼ.
