Ezekiel 10:1-22
10 Dééʼı̨́ı̨́ʼ nítʼééʼ, shoo, diyingo naalʼaʼí bidaʼalyaii chérabim daolyéii bikáaʼdi yádiłhiłígíí éí náábikáaʼdi tsé sáfairgi átʼéii bikááʼdóó hootʼáałii nahalingo siʼą́ągo yiiłtsą́.
2 Áko Bóhólníihii éí diné áłtsʼóózígo yisdizígíí bee naʼatʼą́hí łigaii ditsʼidgo ályaii yee hadítʼéii yichʼįʼ haadzíiʼgo yidííniid, Nílááh, chérab biyaagi bąąs yimasii bitaʼ góneʼ anináahgo chérabim bitaʼdę́ę́ʼ nílaʼ tʼáá áłah biiʼ tsííd hadiłbingo kin haalʼá bikʼijįʼ aniłkaad.
Áko tʼáá shinááł yah ííyá.
3 Diné yah ííyáago kin binishʼnáájí chérabim naazı̨́; nítʼééʼ binaagóó hazʼání góneʼ kʼos hadéébįįd.
4 Ákohgo Bóhólníihii bee bitsʼádiʼnílíidii chérab bitsʼą́ą́dóó dah diildohgo chʼéʼétiinjįʼ eeldoh, áko kin biiʼ sohodizin góneʼ kʼos hadéébįįdgo hodílzingo hazʼą́ą́ góneʼ éí Bóhólníihii bee biʼoh adidilyéehii bitsʼádiʼnílíidii hadéébįįd.
5 Áko nítʼééʼ Diyin God Aláahgo Ayóóʼábóodziilii biinééʼ diitsʼaʼígi átʼéego chérabim bitʼaʼ deiłbalgo tʼáá tłʼóoʼdi hazʼą́ąjįʼ nidi hodiistsʼą́ą́ʼ.
6 Ákohgo kóníigo diné éí áłtsʼóózígo yisdizígíí bee naʼatʼą́hí łigaii ditsʼidgo ályaii yee hadítʼéii yichʼįʼ haadzííʼ, Chérabim bitaʼgi bąąs yimasii bitaʼdóó kǫʼ nídiiłtʼááh, áko yah ajííyáago bąąs łaʼ bíighahdóó dziizįʼ.
7 Nítʼééʼ chérab éí chérabim daolyéii yitaʼdę́ę́ʼ chʼídeelniiʼgo chérabim bitaʼgi kǫʼígíí łaʼ néidiitʼąągo éí diné áłtsʼóózígo yisdizígíí bee naʼatʼą́hí łigaii ditsʼidgo ályaii yee hadítʼéii yílákʼee yidííłtʼą́; éí yiyiiłtsoodgo chʼíníyá.
8 Chérabim bitʼaʼ biyaagi éí diné bílaʼ nahalingo yitʼı̨́ silı̨́ı̨́ʼ.
9 Náádééshtʼı̨́ı̨́ʼ nítʼééʼ, shoo, chérabim bíighahgóó bąąs dı̨́ı̨́ʼ naazı̨́; bąąs tʼááłáʼí níʼánígo chérabim yíighahgóó siʼą́; bąąs éí tsé béril wolyéii nahalingo bikʼi nidazdiłtooł.
10 Bąąs éí tʼáá dı̨́įʼgo ahidiníłnáago ahiiʼ sinilígíí tʼáá ahidaałtʼé.
11 Dah diijahgo éí tʼáá dı̨́ı̨́ʼgóó deíjeeh łeh; deíjeehgo doo naanájeeh da, nidi tʼáá háajigo shı̨́ı̨́ deezhjééʼgóó doo naanájeehgóó tʼáá ádeinízingóó deíjeeh łeh.
12 Bąąs tʼáá siʼą́ą́ nítʼééʼ, dabíígháán tʼáá bił dabílaʼda, dabitʼaʼ ałdóʼ, bąąs tʼáá dı̨́įʼgo tʼáá bił binááʼ tʼáá átʼé tʼáadoo bitaʼ hazʼání bee binidadeeswoł.
13 Diistsʼaʼgo bąąsígíí éí bąąs yimasii, deiłní.
14 Chérabim éí tʼáá dı̨́įʼgo dı̨́ı̨́ʼ dabiniiʼ: áłtséhígíí chérab yilniiʼ, tʼáá éí naaki góneʼ diné yilniiʼ, tʼáá nááná éí náshdóítsoh bitsiijįʼ ditłʼooígíí yilniiʼ, dı̨́ı̨́ʼ góneʼé éí atsá yilniiʼ.
15 Ákohgo chérabim wótʼááhgóó dah dadiitʼaʼ. Díí éí dahináanii Kííbar tooh bibąąhdi yiiłtsánígíí ádaatʼı̨́.
16 Chérabim dah diijahgo bąąs tʼáá bíighahgóó deílyeed; chérabim nídadiitʼááh biniyé dabitʼaʼ de ádayiiłʼįįhgo bąąs doo bitsʼáhályeed da.
17 Hashtʼeʼnaazı̨́įgo bąąs ałdóʼ hashtʼeʼ naazı̨́; nídadiitʼahgo bąąs ałdóʼ tʼáá bíighah dego nídiijah, háálá dahináanii ádeinízinígíí éí biiʼ dahólǫ́.
18 Ákohgo Bóhólníihii bibiʼoh adidilyéehii chʼéʼétiingi dah yildohii dah diildogo chérabim bikáaʼjįʼ niildoh.
19 Áádóó shinááł chérabim dabitʼaʼ deideesbaalgo bąąs tʼáá bíighahgóó deílyeedgo nídadiitʼaʼ áádóó náás dadeestʼaʼ; nítʼééʼ Bóhólníihii bikin biiʼ sohodizin siʼánígíí haʼaʼaahjígo dáńʼdítı̨́hígíí chʼéʼétiingi nidahaastłahgo Ízrel dineʼé biDiyin God bibiʼoh adidilyéehii bikʼijįʼ eeldoh.
20 Díí lą́ą Kííbar tooh bibąąhdi Ízrel dineʼé biDiyin God biyaadóó dahináanii yiiłtsánígíí éí ádaatʼı̨́, áko chérabim ádaatʼı̨́įgo shił bééhózin.
21 Tʼááłáʼí nítínígo dı̨́ı̨́ʼ dabiniiʼ áádóó tʼááłáʼí nítínígo dı̨́ı̨́ʼ dabitʼaʼ; dabitʼaʼ biyaadi éí diné bílaʼ nahalingo dahólǫ́.
22 Dabiniiʼ éí Kííbar tooh bibąąhdi yiiłtsánígíí tʼáá éí dabiniiʼ; tʼááłáʼí nítínígo tʼáá kʼéhézdon náásee naaldeeh.
