Ezekiel 11:1-25
11 Áádóó ałdóʼ Níłchʼi Diyinii náshidiiłtı̨́įgo Bóhólníihii bikin biiʼ sohodizin haʼaʼaahjigo dáńʼdítı̨́įhjįʼ nishiníłtı̨́; nítʼééʼ shoo, éí dáńʼdítı̨́įhgi diné naadiin ashdlaʼ naazı̨́, áko nítʼééʼ éí bitahgi Ázer biyeʼ Jeiyazanáíyah áádóó Biinéíyah biyeʼ Pelatáíyah diné binanitʼaʼí yiiłtsą́.
2 Áko Bóhólníihii áshidííniid, Diné nílíinii, díí diné doo ákwii éʼétʼéii yinahagizgo díí kin haalʼáagi tʼáá íiyisí doo yáʼáshǫ́ǫ́góó kótʼéego níigo áhoonííł;
3 éí ání, Kin ádadoolníłígíí doo nízaad hadziih da; díí kin haalʼáhígíí éí ásaaʼ biiʼ abézhí átʼé; nihí éí atsįʼ niidlı̨́.
4 Éí bąą bikʼijįʼ nílı̨́įgo handziih; bikʼijįʼ handziih, diné nílíinii.
5 Áádóó Bóhólníihii biNíłchʼi shikʼi hooleʼgo áshidííniid, Kódíní, Bóhólníihii kóní, Ízrel dineʼé nohłíinii, kótʼéego nitsídaohkeesgo shił bééhózin, háálá bikʼítsídahidołkeesii shił bééhózin.
6 Díí kin haalʼáagi diné tʼóó ahayóí daoghą́ąʼgo kintaa daʼaztiingóó atsʼíís ałkʼi dadeeskʼidgo ádaohłaa.
7 Éí bąą Bóhólníihii Diyin God ání, Díí kin haalʼáhígíí éí ásaaʼ biiʼ abézhí átʼé, áko daoghą́ąʼii ałníiʼgi yáádaotsiígíí éí atsįʼ ádaatʼé, nidi nihí éí bitahdóó hanihideeshjih.
8 Diltłish béédasoołdzííd, nidi diltłish nihikʼijįʼ kódeeshłííł, ní Bóhólníihii Diyin God.
9 Kintahdóó hanihideeshjihgo déʼéyóní baa nihidideeshʼááł índa bee nihá nihootʼánígíí bohodoolnííł.
10 Diltłish bee nidanihidiʼdootsiłgo Ízrel dineʼé bikéyah bibąąhdi atídanihideeshłííł, áko Bóhólníihii nishłı̨́įgo nihił béédahodoozįįł.
11 Díí kin haalʼáhígíí éí doo ásaaʼ biiʼ abézhí nihá átʼée da doo, doo nidi biníiʼgi atsįʼ doohłeeł da; Ízrel dineʼé bikéyah bibąąhdi atídanihideeshłíiłgo
12 Bóhólníihii nishłı̨́įgo nihił béédahodoozįįł, háálá bee nihoyíʼáanii doo bikʼehgo danohkai da índa shibikʼehgo hoogáałii tʼáadoo bidaʼoohłaa da, nidi ałʼąą dineʼé nihinaagóó kéédahatʼínígíí bibikʼehgo dahwéegháahii, jó, éida bidaʼoohłaa.
13 Áko yáshtiʼgo Biinéíyah biyeʼ Pelatáíyah daaztsą́. Áadi tséʼyaa íígoʼgo ayóó íitsʼaʼgo haasdzíiʼgo ádííniid, Haʼátʼíí lá ahayóí lá, Bóhólníihii Diyin God nílíinii! Ízrel dineʼé daadziihígíísh ałtso ádííłdįįł?
Hashtʼéédoolníiłii áádóó ániidí nídoodleełii baa nihootʼą́
14 Áádóó Bóhólníihii ánááshidooʼniidgo ání,
15 Diné nílíinii, Jerúsalemdi kéédahatʼínígíí, éí nikʼisóó danilíinii, nikʼisóó danilíinii lą́ą, diné nikʼéí danilíinii, Ízrel dineʼé tʼááłáʼí nítínígo tsʼídá tʼáá ałtso kódeiłníigo yá hadaasdzííʼ, Eii lą́ą Bóhólníihii nízaadgóó bitsʼájíkai ni; díí kéyah éí nihí dooleełgo nihaa deetʼą́, daaní.
16 Éí bąą kódíní, Bóhólníihii Diyin God kóní, Azhą́ nízaadgóó ałʼąą dineʼé bitahgóó tahwiishíjaaʼ nidi, kédaayahgóó adahonííłkaad nidi, áadi éí kédaayahgóó tʼóó kónígháníjįʼ bineʼ aʼniichéehii há nishłı̨́ı̨́ nítʼééʼ.
17 Éí bąą kódíní, Bóhólníihii Diyin God kóní, Dadineʼé bitahdę́ę́ʼ áłah ánáhodeeshłííł; kédaayahgóó tahodiʼnooskaadii áádę́ę́ʼ áłah áhodeeshłíiłgo Ízrel dineʼé bikéyah haa dideeshʼááł.
18 Áko áajįʼ níjíʼnáago éí kéyahdi danchxǫ́ʼígíí tʼáá ałtso índa doo daaldinii tʼáá ałtso nahjįʼ kódeidoolííł.
19 Ajéí tʼááłáʼí haa dideeshʼáałgo nitsáhákees ániidíii hwiih dadeeshłééł, áko hayiʼdę́ę́ʼ hajéí daatséhígíí hadahideeshniłgo hajéí dahináago haa dadideeshʼááł,
20 áko bee nihoyíʼáanii índa shibikʼehgo hoogáałii bidaʼjiłʼı̨́ áádóó bikʼehgo dajíkáah doo, áko shidineʼé dajílı̨́į doo áádóó haDiyin God nishłı̨́į doo.
21 Nidi danchxǫ́ʼígíí índa doo daaldinígíí dabijéí yídin danilı̨́įgo yee hádaatʼíinii éí ádajíítʼįįdii hakʼi yáádeideestsihgo kʼéédahodideeshdlííł, ní Bóhólníihii Diyin God.
22 Ákohgo chérabim éí bąąs bíighahgóó naazı̨́įgo dabitʼaʼ de ádayiilaa áádóó Ízrel dineʼé biDiyin God bibiʼoh adidilyéehii bikáaʼgi dah yildoh.
23 Áádóó Bóhólníihii bibiʼoh adidilyéehii kintahdóó dego dah diildohgo kin haalʼáádóó haʼaʼaahjígo dził siʼánígíí bikááʼ niildoh.*
24 Áko Diyin God biNíłchʼi Diyinii bee shił áhátʼı̨́įgo áshiilaago dashidiiłtı̨́įgo Kaldííya kéyahdi diné daasnáanii nidaakaijįʼ nishiníłtı̨́. Nítʼééʼ shił áhátʼíinii shitsʼą́ą́ʼ de dah diildoh.
25 Áko Bóhólníihii shił ííshją́ą́ áyiilaaígíí tʼáá ałtso yisnááh danilíinii bee bił hweeshneʼ.
Footnotes
^ Dził Álivz hoolyé. Ezek. 43:2-5.
