Ezekiel 12:1-28
12 Áádóó Bóhólníihii shichʼįʼ hanáánáádzíiʼgo kóní,
2 Diné nílíinii, dineʼé nidaalteehii bitahgi kééhótʼı̨́; éí binááʼ dahólǫ́ǫ nidi, doo yee daʼooʼı̨́į da; bijaaʼ dahólǫ́ǫ nidi, doo yee ádahodiiltsʼaʼ da, háálá nidaalteehii danilı̨́.
3 Éí bąą diné nílíinii, yisnááh biyéél hashtʼenilééh, áko jı̨́įgo yisnááh nílı̨́į dooleełgóó binááł díínááł; tʼáá dabinááł jı̨́įgo dah didíínéełgo náánáłahdi nidíínééł; azhą́ nidaalteeh nidi, ákwíindzaago tʼáá daatsʼí yaa nitsídadookos.
4 Tʼáá dabinááł jı̨́įgo héłígíí beʼestłʼǫ́ǫgo yisnááh nahonílingo dííłjił; diné nidabiʼdiilnéehgo ahinilkaadígíí nahalingo tʼáá dabinááł iʼííʼą́ągo dah adidííłjił.
5 Bis ahéénátłʼingo níʼáhígíí tʼáá dabinááł bigháʼníníiłgo niyéél bił bigháʼníłjiid.
6 Tʼóó nihoojı̨́ʼígo tʼáá dabinááł niwostis dah siyı̨́įgo yíłjił doo; niʼgóó doo hootʼı̨́į da doo biniyé niniiʼ bikʼídííłtih, háálá Ízrel dineʼé dajílíinii hachʼįʼ bee ééhózinii ániishłaa.
7 Bee shichʼįʼ haʼoodzíiʼii biʼiishłaa: shiyéél dooleełgo dah dideeshjiłígíí jı̨́įgo chʼéhéjaaʼ áádóó iʼííʼą́ągo bis ahéénátłʼingo níʼáhígíí tʼáá shílaʼ bee bigháʼnínil; tʼóó nihoojı̨́ʼígo hanááł hééł shiwostis dah siyı̨́įgo níłjid.
8 Áádóó hoosʼįįdgo Bóhólníihii kóshidííniid,
9 Diné nílíinii, Ízrel dineʼé, éí nidaalteeh danilíinii, Haʼátʼíísh baa naniná? Dandííniid yaʼ?
10 Kóbididííniił, Bóhólníihii Diyin God kóní, Díí baa niséyáhígíí Jerúsalemgi naatʼáanii índa ákwii Ízrel dineʼé kéédahatʼínígíí tʼáá ałtso bídéétʼiʼgo ááhyiłní.
11 Nihichʼįʼ bee ééhózinii nishłı̨́, bidiní; tʼáá baa niséyáhígi átʼéego ákóhodiʼdoolnííł; hooghan bitsʼádahizhdoonéełgo náánáłahgóó yisnááh dazhdooleeł.
12 Hatahdóó naatʼáanii nilíinii biyéél biwostis dah siyı̨́įgo tʼóó nihoojı̨́ʼígo dah didoonééł; bis ahéénátłʼingo níʼáhígíí yigháʼdooniłgo biyéél yigháidoołjił; niʼgóó doo hootʼı̨́į da doo biniyé biniiʼ yikʼídoołtih.
13 Shibee ayaʼayiiltsósí há nideeshkałgo biishdoogááł, áko Kaldíya dineʼé bikéyahgóó Bábilan kin haalʼáadi hodeesłóós; azhą́ áadi dazdootsaał nidi, kéyah tʼáadoo yizdoołtséeł da.
14 Hasiláo dah deínéehii tʼáá ałtso índa háká anájahii tʼáá ałtso daʼníłtsʼą́ą́ʼgóó tahodínéeshkałgo diltłish hakééʼ tádíshtįįh doo.
15 Ałʼąą dineʼé bitahgóó áádóó kéyah naaznilgóó adahonííłkaadgo Bóhólníihii nishłı̨́įgo hoł béédahodoozįįł.
16 Nidi diné éí tʼáá díkwíí yiltʼéego ałʼąą dineʼé bitahgóó adadziiskaígíí doo haldinígi ádajíítʼįįdígíí baa nidahojilneʼ doo biniyé diltłish índa dichin áádóó naałniih bitsʼąą ááhodeesįįł, áko Bóhólníihii nishłı̨́įgo hoł béédahodoozįįł.
17 Áádóó ałdóʼ Bóhólníihii kóníigo náádisétsʼą́ą́ʼ,
18 Diné nílíinii, nitah hoditłidgo nibááh niyą́ áádóó nitah hoditsxizgo nił yéeʼgo nitoʼ nidlą́;
19 kéyah yiiʼ kéédahatʼínígíí ábidiní, Ízrel dineʼé bikéyahgi Jerúsalem kin haalʼáagi kéédahatʼínígíí, Bóhólníihii Diyin God haa yáłtiʼgo kóní, Ákweʼé diné tʼáá ałtso tʼáá naʼníleʼdii kéédahatʼı̨́įgo biniinaa éí kéyah bikááʼgóó dahólóonii tsʼídá ałtso baa nahodiʼdooldahgo doo yidoolaałí da; éí bąą hoł daayéeʼgo habááh dazhdooyı̨́ı̨́ł índa tʼóó hoł adahayóigo hatoʼ dazhdoodlı̨́ı̨́ł.
20 Kin hadaasʼáago kéédahojitʼínígóó ałtso dahodidoołkǫǫł, áko tʼáá ałtsogóó doo yidoolaałí da; áadi índa Bóhólníihii nishłı̨́įgo nihił béédahodoozįįł.
21 Áádóó Bóhólníihii kóshíłníigo náádisétsʼą́ą́ʼ,
22 Diné nílíinii, Ízrel dineʼé bitahgóó kóháʼníigo, Ląʼí yiską́ áádóó ił áhátʼínígíí tʼáá ałtso tʼáadoo nináhádleehí da, haʼnínígíishąʼ, haʼátʼíí saad shı̨́ı̨́ átʼé?
23 Éí bąą kódíní, Bóhólníihii Diyin God kóní, Díí saad bikʼeh náhodiitʼéehgo bee yádajiłtiʼígíí hatsʼą́ą́ʼ nahjįʼ kódeeshłííł, áko Ízrel dineʼé bitahgóó éí saad doo bikʼeh náhodiitʼéehii átʼéego bee yádajiłtiʼ da doo, nidi kóbidiní, Ił ádahoodzaaígíí tʼáá ałtso bidahodoolníłígíí kʼadę́ę beíłkaah.
24 Ízrel dineʼé bitahgóó tʼáadoo biniyéhígóó ił áhátʼínígíí índa tʼáá ádzaagóó ił chʼídahwiiʼaahgo yee yádaałtiʼii doo tʼáá náás dayíłtʼéeh da doo.
25 Háálá shí Bóhólníihii nishłíinii saad bee hadeesdzihígíí bohodoolnííł; doo náás bił nááhodoolzhish da, nidi, nidaalteeh dineʼé danohłíinii, nihídayéełkaah góneʼ saad bee hadeesdzihgo bohodoolnííł, ní Bóhólníihii Diyin God.
26 Nááʼáłdóʼ Bóhólníihii kóshíłníigo náádisétsʼą́ą́ʼ,
27 Diné nílíinii, shoo, Ízrel dineʼé danilínígíí kódaaní, Doo hah beidoołkáłígíí hoł átʼı̨́įgo jooʼı̨́; doo nináznáhahídi bił dahwéelzhíish dooleełígíí baa hojilneʼ.
28 Éí bąą kóbidiní, Bóhólníihii Diyin God kóní, Saad bee hahásdzíʼígíí doo náás bił nááhodoolzhish da, nidi saad bee hadeesdzihígíí éí tsʼídá bohodoolnííł, ní Bóhólníihii Diyin God.
