Ezekiel 13:1-23
13 Áádóó Bóhólníihii kóníigo náádisétsʼą́ą́ʼ,
2 Diné nílíinii, Ízrel dineʼé bitahgóó náás áhodoonííł yaa dahalneʼii tʼáá bí ádeinízingo dahalneʼígíí bikʼijįʼ nílı̨́įgo kótʼéego bichʼįʼ handziih, Bóhólníihii bizaad dadoohtsʼı̨́ı̨́h;
3 Bóhólníihii Diyin God kóní, Nihí doo dahonohsą́ą́góó dahołneʼígíí, tʼáadoo nihił ádahoodzaagóó tʼáá nihí nihíniʼ danilíinii baa dahołneʼígíí doo hojoobaʼ ájíníi da!
4 Ízrel dineʼé nohłíinii, nihitahdóó dahalneʼii éí honoojíigi mąʼii dootłʼizhí nidaajeehígíí nidahalin.
5 Tsé ahénátłʼingo níʼáhígíí nidahaasdáázgóó doo dadohkáah da, índa Bóhólníihii beiníłką́ądi anaaʼ hazlı̨́įʼgo Ízrel dineʼé yídaníłdzil doo biniyé ahééʼítłʼinígíí tʼáadoo nídasoohtłʼin da.
6 Bóhólníihii doo dabííłʼaadgóó tʼáadoo biniyéhígóó bił ádahoodzaago índa tʼáá bóhólníhígíí nayídanilyęęshgo yaa dahalneʼgo, Bóhólníihii ání, daaní, ákondi yaa dahalneʼígíí bohodoolnííł danízin.
7 Tʼáadoo biniyéhígóó nihił ádahoodzaa índa tʼáá bóhólníhígíí nabídanoołyęęzh. Azhą́ tʼáadoo bee haasdzíiʼ da nidi, ádadohní, Bóhólníihii kóní.
8 Éí bąą Bóhólníihii Diyin God kóní, Tʼáadoo biniyéhígóó nihił ádaadzaii baa nidahosoołneʼ índa doo tʼáá aaníinii nabídanoołyęęzhgo daołtsą́; éí bąą nihikʼijįʼ nishłı̨́, jóʼakon, ní Bóhólníihii Diyin God.
9 Nihá dahalneʼii tʼáadoo biniyéhígóó ił áhátʼı̨́ dayiiłtseʼii áádóó tʼóó nayídaneeshyęęzhii yaa dahalneʼii éí shidineʼé doo bitah dahojílǫ́ǫ da doo, áádóó Ízrel dineʼé bitahgi doo házhiʼ atah daasdzoh da doo, índa Ízrel dineʼé bikéyah doo biih dazhdookah da, áko Bóhólníihii Diyin God nishłı̨́įgo nihił béédahodoozįįł.
10 Háálá doo kʼé náhásdlı̨́ı̨́ʼgóó, Kʼé náhásdlı̨́ı̨́ʼ, daaníigo shidineʼé tsʼídá tʼáá ádzaagóó adeizhʼeezh áádóó shidineʼé tsé yítłʼingo níʼáhígíí ádayiiłʼįįhgo yitsʼą́ą́ʼ bikááʼdę́ę́ʼ łeezh łigaií yee deidlish;
11 łeezh łigaií yee daʼazhdlézhígíí ábidiní, Éí nidoołdas; tó yajiiłı̨́ nahalingo nahodoołtı̨́ı̨́ł, nílótsoh nidoołtı̨́ı̨́ł áádóó ayóó átʼéego dooyoł.
12 Shoo, tsé yítłʼinii nááłdáazgo łaʼ ádanihididooniił, Dashoodlézhígíí éí kʼad háadi?
13 Éí bąą Bóhólníihii Diyin God kóní, Tʼóó báhádzidgo bichʼįʼ sháhóóchįįdgo tʼáá íiyisí dooyoł; hachʼįʼ sháhóóchįįdgo tó yajiiłı̨́ nahalingo nahodoołtı̨́ı̨́ł; tʼóó báhádzidgo sháháchįʼgo nílótsoh nááłtánígíí bee ádooldįįł.
14 Tsé yítłʼingo níʼáii łeezh łigaií bee dashoodlézhígíí niʼjįʼ naaʼahideeshkałgo nihidílʼáa doo; bee niłdzilgo biyaadi ahééʼníʼáhígíí tʼáadoo bikááʼ siláhí da doo. Éí tsé nááłdáazgo nihí tʼáá ákwii dadínóohnééł, áko Bóhólníihii nishłı̨́įgo nihił béédahodoozįįł.
15 Ákótʼéego tsé yítłʼingo níʼáhígíí índa łeezh łigaií bee daʼjizhdlézhígíí tʼáá bił tʼóó báhádzidgo shibee atíʼélʼíinii bee atíhodeeshłííł, áádóó ádahodideeshniił, Tsé yítłʼingo níʼáhígíí doo níʼáa da índa daʼjizhdlézhígíí ádadzisdįįd;
16 éí ááhdishnínígíí, Ízrel dineʼé yá dahalneʼii éí kʼé náhásdlı̨́įʼgo dayooʼı̨́į nidi, Jerúsalem bá doo kʼé náhásdlı̨́įʼ da, ní Bóhólníihii Diyin God.
17 Áádóó diné nílíinii, nidineʼé bitsiʼké danilíinii tʼáá bí yaa nitsídaakeesgo yaa dahalneʼii bitsʼą́ąjįʼ díníʼı̨́įʼgo áádóó bikʼijįʼ nílı̨́įgo hólneʼgo
18 kódíní, Bóhólníihii Diyin God kóní, Doo tʼáá aaníinii biniyé diné hadanohtáii tsiiʼááł yázhí nídaołkadgo diné tʼáá ałtso bílátsíín gónaa bąąh nidahohníiłii índa tʼáá ałtso tsiiʼ bikʼínáltihí bá ádaołʼíinii, éí sáanii danohłíinii doo hojoobaʼ ájíníi da! Shidineʼéésh biiʼ naazíinii ádadoodįįł biniyé hadadínóohtaałgo éí bee nihí nihiiʼ naazíinii dadoodzih?
19 Shidineʼé bitahgóó doo anishłı̨́ı̨́góó ádashoohłaago tłʼoh naadą́ą́ʼ bideeʼí díkwíidida yílá bee haajaaʼ bíighahgo índa bááh bizéí bikʼé diné doo dadínóonéeł da yę́ę nidasoołtseed índa shidineʼé woochʼííd dayíistsʼą́ąʼii danóhʼáahgo dadinóonééł yę́ę yisdádahisoonil.
20 Éí bąą Bóhólníihii Diyin God kóní, Tsiiʼááł yázhí bee diné éí tsídii nidahalingo hadanootą́ąʼii bikʼijįʼ nishłı̨́įgo nihílátsı̨́ı̨́dóó nahjįʼ ahideeshdlał, áko diné éí tsídii nidahalingo hadanootą́ąʼii béédadideeshchił.
21 Tsiiʼ bikʼínáltihí nidaohjahii ałdóʼ nidahideesǫ́ǫsgo shidineʼé nihigháádeeshnił, áko shidineʼé doo tʼáá dayínóhtąʼ da doo, áko Bóhólníihii nishłı̨́įgo nihił béédahodoozįįł.
22 Tʼáá ákogi ádaaníiłii doo bíniʼ deiłʼaʼígíí éí nihí danóhʼáahgo bíniʼ daołʼaʼígíí biniinaa áádóó diné tʼáá íiyisí doo yáʼáshóonii yisdádoogáłígíí biniyé tʼáá íiyisí doo yáʼáshǫʼ náás yoołtʼihígíí bitsʼáoyaʼ lágo, dabidooniid;
23 éí bąą tʼáadoo biniyéhígóó ił áhátʼı̨́ áádóó tʼóó nabídanoołyęęshii doo náádeidoołtséeł da; shidineʼé nihigháádeeshnił, áko Bóhólníihii nishłı̨́įgo nihił béédahodoozįįł.
