Ezekiel 14:1-23
14 Ákohgo Ízrel dineʼé bitahdóó aląąjįʼ naazíinii léiʼ shaa yíkaigo shidááhdóó dineezbin.
2 Áko Bóhólníihii kóníigo shichʼįʼ haadzííʼ,
3 Diné nílíinii, díí diné éí edaʼalyaii dabijéí yídayółtąʼii áádóó doo ákwii ádaatʼéii yikʼee dadidoogohii ádá nidayiisnil. Bíniʼdiísh nidashídíłkid?
4 Éí bąą bichʼįʼ handziihgo kóbidiní, Bóhólníihii Diyin God kóní, Diné łaʼda edaʼalyaii hajéí bíjółtąʼgo áádóó doo ákwii ádajítʼéii bikʼee dahizhdigeehii ádáahgi nidajiiníiłgo Diyin God yá halneʼii baazhníyáii éí habeʼelyaii tʼóó ahayóígíí bikʼehgo shí Bóhólníihii nishłíinii hachʼįʼ tʼą́ą́ʼ háádeesdzih,
5 áko Ízrel dineʼé dabijéí dadeeshnééł, háálá biʼedaʼalyaii biniinaa shitsʼádahaaskai.
6 Éí bąą Ízrel dineʼé kóbidiní, Bóhólníihii Diyin God kóní, Łahgo átʼéego tsíńdadohkeesgo nihiʼedaʼalyaii bitsʼą́ąjįʼ dah nídahidoohkááh índa doo danihiʼdíldinii bitsʼą́ąjįʼ hadanołneʼ.
7 Háálá Ízrel dineʼé tʼááłáʼí jinítínígo, éí doodaiiʼ Ízrel dineʼé bitahgi tádazhdinéehii hweʼedaʼalyaii hajéí bídajółtąʼgo biniinaa shitsʼájiiskaii índa doo ákwii ádajítʼéii bikʼee dahizhdigeehii ádáahgi nidajiiníiłgo Diyin God yá halneʼii baa dajiikáahgo shí nidaʼízhdíłkidii tʼáá shí hachʼįʼ ééhodeesįįł;
8 éí diné hatsʼą́ąjįʼ díníshʼı̨́įʼ doo, bee ééhózinii áádóó saad bee haa yátiʼii áhodeeshłííł índa shidineʼé bitahdóó áhodeeshdįįł, áko Bóhólníihii nishłı̨́įgo nihił béédahodoozįįł.
9 Nihitahdóó halneʼii łaʼ hazdoodzihgo áhoʼdiilyaago éí shí Bóhólníihii nishłíinii hahoyííłdzíiʼ doo; hachʼįʼ kʼídideeshchiłgo shidineʼé Ízrel bitsʼą́ąjįʼ áhodeeshdįįł.
10 Doo ákǫ́ǫ́ ájíítʼįįdgóó biniinaa atíhodiʼdoolnííł; halneʼii éí nabídééłkidii atíbiʼdiilyaaígi átʼéego atíhoʼdidoolnííł,
11 áko Ízrel dineʼé doo shitsʼą́ą́ʼ yóóʼanáádookah da, índa bee hazʼáanii kʼídeiztiʼígíí tʼáá ałtso doo yee ánáádadiʼdoolchxǫǫł da, nidi shidineʼé danilı̨́į doo, áádóó biDiyin God nishłı̨́į doo, ní Bóhólníihii Diyin God.
Diyin God éí Jerúsalem atíidoolíiłgo tʼáá ákogi átʼée doo
12 Áádóó Bóhólníihii kóníigo shichʼįʼ hanáánáádzííʼ,
13 Diné nílíinii, łahgo diné bił hazʼą́ą́dóó doo ákwii ádaatʼínígíí yee shichʼįʼ ádił nidaʼiilzíihgo áádóó bichʼįʼ kʼídíshchiʼgo bááh íiyisí yee dah hináanii áshdįįhgo áádóó ákwii dahodichingo áshʼįįhgo índa éí kéyah bikááʼdóó diné áádóó naaldlooshii nisíłtseedgo,
14 azhą́ Nóah áádóó Daniel índa Job, díí diné táltʼéego éí kéyahgi kéédahatʼı̨́ı̨́ nítʼééʼ nidi, tʼáá ákogi ádaatʼéhígíí yee tʼáá bí tʼéí yisdádahaaskai doo, ní Bóhólníihii Diyin God.
15 Naaldlooshii dahashkéii éí kéyah biiʼgóó biʼníłniiʼgo kéyah ałtso dayííłchxǫʼgo doo naagháhí da hazlı̨́įʼgo, áko naaldlooshii dahashkéii ákweʼé hólónígíí bąą diné doo łaʼ ákóneʼ chʼóoyaʼ átʼéégóogo,
16 díí hastóí táltʼéego azhą́ ákwii kéédahatʼı̨́ı̨́ nítʼééʼ nidi, Bóhólníihii Diyin God ání, Tsʼídá tʼáá aaníí hinishná; ákótʼéego tsʼídá tʼáá aaníí bí tʼéí yisdádooʼnił; biyeʼké índa bitsiʼké doo yisdádeidoonił da, nidi kéyahgi doo nidaagháhí da doo.
17 Éí doodaiiʼ diltłish ákwii nítą́ągo áádóó, Diltłish, nahashkááʼgóó hadiikęęs, bidííniidgo éí bee diné áádóó daʼalı̨́ı̨́ʼ nisíłtseedgo,
18 díí hastóí táltʼéego azhą́ ákwii kéédahatʼı̨́ı̨́ nítʼééʼ nidi, Bóhólníihii Diyin God ání, Tsʼídá tʼáá aaníí hinishná; ákótʼéego tsʼídá tʼáá aaníí tʼáá bí tʼéí yisdádooʼnił; biyeʼké índa bitsiʼké doo yisdádeidoonił da.
19 Doodaiiʼ éí kéyahdi nahałniih áshłaago áádóó tʼóó báhádzidgo bichʼįʼ hashké niisdzı̨́ʼígíí bee dił naazlı̨́ silı̨́įʼgo diné áádóó daʼalı̨́ı̨́ʼ nisíłtseedgo,
20 Nóah áádóó Daniel índa Job azhą́ ákwii kéédahatʼı̨́ı̨́ nítʼééʼ nidi, Bóhólníihii Diyin God ání, Tsʼídá tʼáá aaníí hinishná; ákótʼéego tsʼídá tʼáá aaníí tʼáá bí tʼéiyá tʼáá ákogi ádaatʼéhígíí yee yisdádahaaskai doo; biyeʼké índa bitsiʼké doo yisdádeidoonił da.
21 Jó, Bóhólníihii Diyin God kóní, Dı̨́įʼgo hóyéeʼgo bee aa nídeeshtʼįįłii Jerúsalem kin haalʼá bikʼijįʼ bidííchidgo ákwii diné áádóó daʼalı̨́ı̨́ʼ nabídoodįįł biniyé diltłish áádóó dichin áádóó naaldlooshii dahashkéii índa naałniih báhádzidii tʼah yówehgo ádoonííł.
22 Nidi ayeʼké índa atsiʼké daadzíʼígíí chʼídabidiʼyootʼish; jó, éí naa haaskaigo ádaatʼéii índa yaa nidaakaígíí bá daníníłʼı̨́įʼgo Jerúsalem atéshłaaígíí tʼáá ałtso éí bąą haʼíínílníi doo.
23 Ádaatʼéii índa yaa nidaakaígíí bá daníníłʼı̨́įʼgo haʼíídíílniił, áko Jerúsalemgi baa niséyáhígíí tʼáá ałtso doo tʼáadoo biniyéhígóó baa niséyáágóó nił bééhodoozįįł, ní Bóhólníihii Diyin God.
