Ezekiel 16:1-63
16 Nááʼáłdóʼ Bóhólníihii kóshíłníigo náádisétsʼą́ą́ʼ,
2 Diné nílíinii, Jerúsalemgi kéédahatʼínígíí doo daaldinígi ádajitʼínígíí hoł béédahózingo áhólééh,
3 áko ábidiní, Jerúsalemgi kéédahohtʼínígíí, Bóhólníihii Diyin God kónihiłní, Kéínan dineʼé bikéyahgi nidanihiʼdiizhchı̨́įgo áádóó haodéél; nihizhéʼé éí Ámor dineʼé nilı̨́ı̨́ nítʼééʼ; nihimá éí Het dineʼé nilı̨́ı̨́ nítʼééʼ.
4 Niʼdizhchı̨́ yę́ędą́ą́ʼ éí bijı̨́ nitsʼééʼ tʼáadoo kʼégizh da, índa tʼáadoo táániʼdisgiz da; doo nidi áshįįh nąąh ályaago naʼatʼą́hí tʼáadoo nił neeshjoł da.
5 Naa aʼááh hwiindzingo índa nikʼédí nilı̨́įgo díí łaʼ ná yaa nidoogaałgo tʼáadoo ninééłʼı̨́įʼ da, háálá niʼdizhchı̨́ yę́ędą́ą́ʼ éí bijı̨́ı̨́dóó tʼóó naaʼihgo nąąh tsíhodeeskéezgo biniinaa tʼáá ádzaajįʼ andiʼyoolghan.
6 Níighah dah diiyá yę́ędą́ą́ʼ nidił tʼah biiʼ díʼis yę́ędą́ą́ʼ, Hiníná, nidííniid; tʼáá aaníí, nidił tʼah biiʼ díʼis yę́ędą́ą́ʼ, Hiníná, nidííniid.
7 Chʼil hanootʼánígíigi átʼéego náás níítʼı̨́įłgo ániishłaa, áko dínínísą́ągo níneez sínílı̨́ı̨́ʼ áádóó asdzání ániid naagháago baa dzólníinii sínílı̨́ı̨́ʼ; nibeʼ hadzííʼá silı̨́ı̨́ʼ índa nitsiiʼ nineez silı̨́ı̨́ʼ, nidi tʼáá łiníchíʼí áádóó tʼáadoo nikʼéstiʼígóó nanináá nítʼééʼ.
8 Níighahgóó náánááshdáałgo náániiłtsą́ą́ nítʼééʼ ayóó ániʼdóʼníijįʼ aníínísą́ą́ lágo niiłtsą́, áko tʼáá łiníchíʼígo nanináago shiʼééʼ nikʼíséłtiʼ.* Tʼáá aaníí, ádee haasdzíiʼgo ahadiʼniitʼą́, áko shííʼ sínílı̨́ı̨́ʼ, ní Bóhólníihii Diyin God.
9 Áádóó tó bee táániségiz; tʼáá aaníí, nidił tsʼídá ałtso nąąh táásígizgo akʼah nikʼi yanáásdziʼgo bee nisíłtłah.
10 Nááʼáłdóʼ naʼatʼą́hí naashchʼąąʼgo bikʼi táʼdoolkadii biih nííłtı̨́įgo akał nitłʼizii ké ályaago biih nidííłʼeez áádóó áłtsʼóózígo yisdizígíí bee naʼatʼą́hí łigaii ditsʼidgo ályaii bee áká niséłzaaz índa naʼatʼą́hí daʼdijihígíí nikʼíséłtiʼ.
11 Áádóó dootłʼizhii nąąh dah dasínilgo bee nanishíchʼąąʼ; látsíní nílátsíín tʼáá ałchʼijí bąąh sinilgo ániishłaa índa béésh daʼahólzhaʼí yooʼ nizéénáztʼiʼgo ániishłaa.
12 Yoostsah éí níchı̨́ı̨́h bąąh niníʼą́ áádóó nijaatłʼóól ná áshłaa índa naatʼá chʼah ayóó ánóolninii nichʼahgo ániishłaa.
13 Ákótʼéego óola índa béésh łigaii bee nishíníchʼąąʼgo ániʼdiilyaa nítʼééʼ; áłtsʼóózígo yisdizígíí bee naʼatʼą́hí łigaii ditsʼidgo ályaii áádóó naʼatʼą́hí daʼdijihígíí índa naʼatʼą́hí naashchʼąąʼgo bikʼi táʼdoolkadii niʼééʼ nítʼééʼ; akʼáán dibahí áádóó tsésʼná bitłʼizh índa akʼah tʼáá bił niyą́ą́ nítʼééʼ, tʼáá íiyisí ayóó áníínílnin nítʼééʼ índa tʼáá náás iiyííłdiłgo asdzą́ą́ naatʼááh nílı̨́įjįʼ nííníyáá nítʼééʼ.
14 Bee nízhóníii bee nanishíchʼąąʼgo bee ayóó áníínílninígíí ałʼąą dineʼé bitahgóó bee nééhoʼdooszįįd nítʼééʼ, ní Bóhólníihii Diyin God.
15 Nidi ayóó áníínílninígíí baa dziisínílíiʼgo áádóó tʼáá íiyisí nééhoʼdílzinígíí binahjįʼ ałjiłnii sínílı̨́ı̨́ʼ; níighahgóó dahidikáahii tʼááłáʼí nítínígo bichʼįʼ neʼajiłgo bííʼ dasínílı̨́ı̨́ʼ.*
16 Niʼééʼ łaʼ nídininilgo dah daaskʼid bighą́ąʼdi ádeinilaaígi bee dahózhóní dooleeł biniyé bee nidashíníchʼąąʼgo ákweʼé ałjiłnii sínílı̨́ı̨́ʼ; tsʼídá doo ákóhodooníił da nítʼééʼ áádóó kodóó doo ákónááhodooʼníił da.
17 Shiʼóola áádóó shibéésh łigaii bee hadinítʼée doo biniyé naa diníʼáanii éí tʼáá ni ádá dinéshchíín ádeinilaago bichʼįʼ íłjił nítʼééʼ;
18 niʼééʼ nidaashchʼąąʼgo bikʼi tádaʼdoolkadii nídininilgo bikʼídasíníłtiʼ áádóó sheʼakʼah índa shitsin bijeeh dilidgo łikání halchinii bichʼįʼ níínínil.
19 Shichʼiyąʼ, éí akʼáán áádóó áliv bikʼah índa tsésʼná bitłʼizh éí naa hidishʼaahgo naʼiistsóodii łikání halchin biniyé bidááhdóó nidasíníką́; tsʼídá ákwíindzaa, ní Bóhólníihii Diyin God.
20 Nááʼáłdóʼ niyáázhké índa nichʼéʼéké shá nihíníłchíinii éí dadoodił biniyé edaʼalyaii bichʼįʼ náádahííníłniiʼ. Ałjiłnii nílínígíísh tʼįįhdígo átʼéego baa nitsíníkees?
21 Edaʼalyaii bichʼįʼ kǫʼ biiʼgóó chʼéhékáahgo íinilaaígíí bee kótʼéego lą́ą shaʼáłchíní nisíníłtseedgo ninádííníʼą́.
22 Áádóó bee doo niʼdíldinii índa íłjiłii tʼáá ałtso baa nanináago níyoołkááłdą́ą́ʼ ániid nanináago niʼééʼ ádingo tʼáá łiníchíʼígo nidił tʼah biiʼ díʼis yę́ę doo béénílniih da.
23 Bóhólníihii Diyin God ání, Doo hojoobaʼ ájíníi da, doo hojoobaʼ ájíníi da! Háálá tʼáá íiyisí doo yáʼáshónígi íínítʼįįdii ałtso bibahodooshzhiizhdóó bikʼijįʼ
24 hodílzingo nahazʼánígíí ádá íinilaa índa kintaa daʼnítiingóó tʼáá ałtso wódahgo nahazʼánígíí ádá íinilaa.
25 Kintahgóó dah daʼdiitiindóó tʼáá ałtso wódahgo nahazʼánígíí íinilaago áádóó níighahgóó dahidiikáhígíí bichʼįʼ ádíʼiinilkąąhígíí bee índa íłjiłgo tʼóó tséʼédinda íʼdiinilyaaígíí bee ayóó áníínílnin yę́ę doo niʼdóldingóó íʼdiinilyaa.
26 Tʼáá íiyisí íłjił sínílı̨́įʼgo adáninilníigo bił kééhótʼíinii Ííjip dineʼé ałdóʼ bił ahíníldah nítʼééʼ, áko sháhwííníłchįįd.
27 Éí bąą shoo, nikʼijįʼ kʼídíshniiʼgo chʼiyáán naa hidishʼaahii áłchʼı̨́ı̨́dígo áshłaa áádóó Filístiya dineʼé bitsiʼké tʼóó baaʼihgo hinínánígíí yaa yá danízinii, éí nikʼee dadiniihígíí baa nidiníʼą́.
28 Doo hwiih nileehígíí biniinaa Asíriya dineʼé ałdóʼ bichʼįʼ íłjił nítʼééʼ; tʼáá aaníí bichʼįʼ íłjił nidi, tʼáadoo hwiih sínílı̨́įʼ da.
29 Áádóó ałdóʼ nidaʼiiłniihí bikéyahdi Kaldíya dineʼé bichʼįʼ íłjił nítʼééʼ; azhą́ kónítʼı̨́ı̨́ nítʼééʼ nidi, tʼáadoo hwiih sínílı̨́įʼ da.
30 Ałjiłnii doo nánílyéesii áátʼįįdígi átʼéego díí tʼáá ałtso baa nisíníyáago, dooládóʼ yówéé átʼéego atsʼíís yidánoolníinii doo bichʼįʼ haʼíínílníi da!
31 Kintaa hadaʼiiztiingóó tʼáá ałtso hodílzingo nahazʼánígíí íinilaago índa kintaa daʼnítiingóó tʼáá ałtso wódahgo nahazʼánígíí íinilaago bikʼé nichʼįʼ niʼdoolyéłígíí doo nínízinígíí beego doo ałjiłniigi ánítʼée da nítʼééʼ.
32 Eʼasdzą́ą́ adiléii bahastiin doo yinízingóó diné doo bééhózingóó nidaakaii átʼayiiʼnííł!
33 Diné éí ałjiłnii tʼáá ałtso tʼáadoo leʼé yaa dayiinííł, nidi ni éí bił ałchʼįʼ ádantʼíinii tʼáá ałtso tʼáadoo leʼé baa dahíínínil; bichʼįʼ daʼíłjił dooleeł biniyé tʼáadoo leʼé bee níhíkąąhgo tʼáá ałtsodę́ę́ʼ nąąh hakáahgo íinilaa.
34 Áko ni tʼéí ałjiłnii nílı̨́įgo náánáłaʼ asdzání ádaatʼéhígi doo ákónítʼée da: diné łaʼ díníitish doo nidííniid da áádóó doo bikʼé naʼílyáa da, nidi ni bichʼįʼ naʼayínílá; ákótʼéego ni łahgo ánítʼé.
35 Éí bąą ałjiłnii nílíinii, Bóhólníihii bizaad diitsʼı̨́ı̨́h:
36 Bóhólníihii Diyin God kóní, Diné bił ałchʼįʼ ádantʼı̨́ yę́ę bił ahidadílyéego bee baa yánínízin yę́ę tʼáadoo bahatʼaadí íinilaago tʼáá łiníchíʼí sínílı̨́ʼígíí biniinaa áádóó edaʼalyaii tʼáá ałtso bił doo niʼdóldin yę́ę biniinaa índa edaʼalyaii bichʼįʼ naʼáłchíní náádahíłniihgo bidił dadeeznaʼ yę́ę biniinaa,
37 shoo, diné bił ałchʼįʼ ádantʼíinii bił ádee nídasíníldįįdgo ayóóʼádeíníʼní yę́ę tʼáá ałtso índa bikʼee dadiníniih yę́ę tʼáá ałtsodę́ę́ʼ nikʼijįʼ áłah ádeeshłíiłgo tʼáá łiníchíʼígo daniidoołtséłígíí biniyé niʼééʼ ałtso naa dideeshnił.
38 Áádóó asdzání daʼdiléii índa áłchíní nideiłtseedgo bidił bitsʼádaazlı̨́įgo ádeileʼii baa nídahatʼínígíigi átʼéego naa nídéeshtʼįįł, áádóó łeʼnisingo tʼóó báhádzidgo shibee atíʼélʼíinii bee nidił nitsʼánílı̨́įgo ádeeshłííł.
39 Áádóó ałdóʼ baa nidideeshʼáałgo hodílzingo nahazʼánígíí nitsʼą́ą́ʼ nahjįʼ adeidoogoł índa ninádahałaah doo biniyé wódahgo nahazʼą́ągo ádeinilaaígíí nitsʼą́ą́ʼ nideidiyootih; ałtso naa dadiʼdoojihgo bee hadinítʼéii danizhóní yę́ę nąąh deídóobeeł, áko tʼáá łiníchíʼígo doo nikʼéstiʼígóó ádandoolííł.
40 Áádóó ałdóʼ diné tʼóó ahayóí yił naa doonéełgo tsé yee nídandínóołniił índa bidiltłish yee nidandiyoołgish.
41 Nighan ałtso adeididoołkʼą́ą́ł índa asdzání tʼóó ahayóí binááł tʼáá ándiʼdoolnííł góneʼ ádandoolííł; ałjiłnii doo nílı̨́ı̨́góó ándeeshłíiłgo diné bichʼįʼ doo ninááʼayílée da doo.
42 Kótʼéego tʼóó báhádzidgo shibee atíʼélʼíinii bee atíniishłaago hwiih deeshłeeł; áadi índa doo łeʼnisin da doo, áko hashtʼedííníshtʼéego tsʼídá doo shá nááhodoochįįł da.
43 Ániid nanináádą́ą́ʼ níyoołkáałii doo béénílniihígíí biniinaa éí tʼáá ałtso bee sháhwííníłchįįd; éí bąą íínítʼįįdígíí tʼáá éí bee kʼééndideeshdlííł, ní Bóhólníihii Diyin God, áko díí tʼóó baaʼihígíí éí doo niʼdóldinii doo béédiʼdíítsih da.
44 Jó, saad bikʼeh náhodiitʼéehii yee yádaałtiʼii tʼáá ałtso díí saad yee naa yádaałtiʼ doo, Achʼéʼé tʼáá bimá átʼéhígi átʼé.
45 Nimá bahastiin índa baʼáłchíní doo yił niʼíłdįįhii éí bichʼéʼé nílı̨́; nádí áádóó nideezhí badahastiin índa badaʼáłchíní doo yił nidaʼíłdįįhii éí tʼáá łaʼ bił háíníjééʼ; nimá Het dineʼé nilı̨́ı̨́ nítʼééʼ; nizhéʼé éí Ámor dineʼé nilı̨́ı̨́ nítʼééʼ.
46 Nádí Samériya dineʼé nilı̨́įgo kééhótʼı̨́ı̨́dóó náhookǫsjígo bichʼéʼéké yił dabighan nítʼééʼ; nideezhí éí bichʼéʼéké yił Sádam dineʼé danilı̨́įgo shádiʼááhjígo dabighan nítʼééʼ.
47 Nidi ádaatʼéii bikékʼeh yíníyá índa bee doo dabiʼdildinii íinilaa, nidi tʼįįhdígo átʼéii baa nitsííníkéezgo tʼah biláhídi átʼéego íinidzaaígíí ałtso dííłdzid.
48 Bóhólníihii Diyin God ání, Tsʼídá tʼáá aaníí hinishná; ákótʼéego tsʼídá tʼáá aaníí ni áádóó nichʼéʼéké ádaotʼįįdii nideezhí Sádam áádóó bichʼéʼéké tsʼídá tʼáadoo ákódaadzaa da.
49 Jó, nideezhí Sádam díí yee ádąąh dahastʼą́ą́ nítʼééʼ: bí áádóó bichʼéʼéké bee ádaa dahodzódliʼ áádóó chʼiyáán tʼáá bilááh neelʼą́ą́ nítʼééʼ índa tʼáadoo ádayóleʼígóó kéédahatʼı̨́ı̨́ nítʼééʼ, nidi diné bahojoobáʼíii índa hojoobaʼ nahasʼáanii tʼáadoo łaʼda yíká ííjéeʼ da.
50 Bee ádaa dahodzódliʼgo doo daaldinii shinááł yaa nidaaskai; éí bąą dahoołtsą́ągo nahgóó kóhooshłaa.
51 Bee ádił niʼiyínílzíiʼii ałnííʼdóó nidi, Samériya tʼáadoo yee ádił niʼiisíiʼ da; bí doo daaldinígi ádaadzaaígíí biláahgo doo yildinígi íínítʼįįd; doo yildinígi íínítʼįįdígíí tʼáá ałtso bee nádí áádóó nideezhí tʼáá ákogi átʼé nahalingo íinilaa.
52 Niláahdi nádí áádóó nideezhí tʼáá bichʼohoʼníigo baa hwiinístʼįįdígíí bąą ádaa yánínídzingo nanináa doo; doo daaldinii yaa naazhʼázhígíí tʼah bilááh átʼéhígo doo yildinii baa nisíníyáhígíí bee tʼáá íiyisí ádił niʼiyínílzíʼígíí bił ahąąh naaʼnilgo doo hózhǫ́ ádił niʼiisíiʼ da, áko ádaa yánínídzingo bee naa yáhóósįįdii hólǫ́ǫgo naniná, háálá nádí áádóó nideezhí tʼáá ákogi átʼé nahalingo íinilaa.
53 Sádam áádóó bichʼéʼéké índa Samériya áádóó bichʼéʼéké éí tʼáá áłah biʼdisnáádę́ę́ʼ chʼéédeeshʼniłgo yáʼátʼéehgo iiná hólǫ́ǫjįʼ anídeeshʼnił, áádóó éí bitahjįʼ yáʼátʼéehgo iiná hólǫ́ǫjįʼ ni ałdóʼ niʼdisnáádę́ę́ʼ atah chʼééndeeshtʼeeł,
54 áko nee haʼólníi doogo íínítʼįįdígíí tʼáá ałtso biniinaa ádaa yánínídzingo bee naa yáhósįįdii hólǫ́ǫgo nanináa doo.
55 Nideezhí Sádam áádóó bichʼéʼéké éí dahináá nítʼééʼ yę́ęgi átʼéego náádahiʼnáa doo áádóó nádí Samériya áádóó bichʼéʼéké éí dahináá nítʼééʼ yę́ęgi átʼéego náádahiʼnáa doo índa ni áádóó nichʼéʼéké éí tʼáá dahinohnáá nítʼééʼ yę́ęgi átʼéego náádahinohnáa doo.
56 Ádaa hóʼniihgo yoołkááł yę́ędą́ą́ʼ nideezhí Sádam tʼáadoo bee háínídzíiʼ da.
57 Doo yáʼáníshónígíí tʼah doo bááʼdíltsóósdą́ą́ʼ bígi átʼéego ni kʼad Síriya bichʼéʼéké índa bił kéédahatʼíinii tʼáá ałtso Filístiya bichʼéʼéké danilíinii éí ninaagóó kéédahatʼínígíí tʼáá ałtso ná nidahałtʼiʼii sínílı̨́ı̨́ʼ.
58 Tʼóó naaʼihgo hinínáá nítʼééʼ yę́ę índa doo yildinígi áánííł nítʼééʼ yę́ę bikʼé atíndiilyaaígíí tádíłjiid, ní Bóhólníihii Diyin God.
59 Jó, Bóhólníihii Diyin God kóní, Bee ádee haʼoodzíiʼii yíníʼįįdgo bee ahaʼdeetʼáanii kʼíínítiʼígíí, tʼáá éí bikʼehgo tsʼídá íínítʼįįdígíí bee naa nídéeshtʼįįł.
60 Azhą́ ákótʼée nidi, ániid nanináago níyoołkááł yę́ędą́ą́ʼ nił ahaʼdinishtʼáanii bénáshniih doo áádóó hoolʼáágóó ahaʼdeetʼáanii ná ádeeshłííł.
61 Áko nádí índa nideezhí éí tʼáá áłah bił háíníjéʼígíí yiiłtsood áádóó nichʼéʼé nilı̨́į doogo naa deeshnił, áko índa íínítʼįįdii béédíílnihgo baa yánínízin doo, nidi shił ahaʼdíínítʼáanii éí bee dooda.
62 Áádóó nił ahadiʼdeeshtʼáałgo Bóhólníihii nishłı̨́įgo nił bééhodoozįįł.
63 Áko íínítʼįįdii tʼáá ałtso nitsʼánídiníʼą́ągo íínítʼįįdii béédíílnihgo índa tʼóó bikʼee nił ahayói doo áádóó biniinaa ádaa yánínídzinígíí doo bee hanáádíídzih da, ní Bóhólníihii Diyin God.
Footnotes
^ Íídą́ą́ʼ éí Ízrel dineʼé bitahgóó ákótʼéego aháʼdooyehgo bee ééhózin.
^ Diyin dabidiʼníinii bichʼįʼ nidahohłá.
