Ezekiel 17:1-24
17 Áádóó Bóhólníihii shichʼįʼ haadzíiʼgo kóní,
2 Diné nílíinii, saad nanilʼingo béédiʼdootı̨́įłii łaʼ bee handziih, áádóó Ízrel dineʼé haneʼ bee akʼidiʼdootı̨́įłii łaʼ bee bichʼįʼ handziih;
3 kóbidiní, Bóhólníihii Diyin God kóní, Atsá ayóó átʼéé léiʼ bitʼaʼ ayóida átʼéego, bitsʼos ayóida áníłnéezgo ahineestihgo bitsʼos hólǫ́;* éí bitsʼos tʼáá ałʼąą ádaatʼéego łikizh, áko kéyah Lébanandi yítʼaʼgo gad bílátahí łaʼ* kʼíinítiʼgo dah yidiitą́;
4 gad bílátahí ániid náádadínéesánígíí łaʼ kʼíinítiʼgo kéyah ayóo biyiʼ nidaʼiiniihgóó ayíítą́ągo naalyéhé baa nidahaniihgo kin haalʼáá léiʼgi* ayíítsih.
5 Éí kéyahdę́ę́ʼ ałdóʼ álástsiiʼ łaʼ néiníjaaʼgo łeezh yáʼátʼéehii hólǫ́ǫgi kʼiidíílá; tó bee ádaʼazįįdgo bíighahjįʼ niiníjaaʼ, kʼaiʼ kʼizhdilé nahalingo kʼiidíílá.
6 Áko dínéesą́ągo bitsʼáozʼaʼ naaniigo daʼítłʼóohgo bichʼįʼgo dadínéesą́; behétłʼóól éí biyaa góneʼ dínéesą́, áko áʼííʼáii silı̨́įʼgo bitsʼáozʼaʼ hazlı̨́ı̨́ʼ índa bitʼąąʼ háájééʼ.
7 Nítʼééʼ náánáłaʼ atsá ayóida ánáánátʼéé léiʼ,* bitʼaʼ ayóida átʼéédóó bitsʼos ahineestihgo hólǫ́ǫ́ léiʼ náánátʼaʼgo; éí áʼííʼáhídóó behétłʼóól índa bitsʼáozʼaʼ tó yił niyiikaah doo biniyé bichʼįʼgo dínéesą́.
8 Bitsʼáozʼaʼ hodooleeł biniyé índa bineestʼąʼ hodooleełgo yáʼátʼéehgo áʼííʼáii dooleeł biniyé tó bee ádaʼazįįd bíighahgi łeezh yáʼátʼéehii biiʼ kʼidoolyáá nítʼééʼ.
9 Diné kóbidiní, Bóhólníihii Diyin God kóní, Tʼáá daatsʼí ąą kwáaniił doo? Dínóołnah biniyé bineestʼąʼ kʼíidoogish índa behétłʼóól haidoołtsʼǫł. Bitʼąąʼ ániid háájéʼígíí tʼáá átʼé dínóołnahgo behétłʼóól éí doo adziil bee áádóó doo diné ląʼí bee hadooltsʼǫł da.
10 Shoo, tʼáá aaníí, kʼidoolyá, ákoósh dínóosééł? Haʼaʼaahdę́ę́ʼ bichʼįʼ deeyolgo ałtso dínóołnah. Kʼídoolyáago nooséłígi tʼáá ákǫ́ǫ́ dínóołnah.
11 Nááʼáłdóʼ Bóhólníihii shichʼįʼ hanáánáádzíiʼgo ání,
12 Nidaalteehii dineʼé kóbidiní, Díí ááhyiłnínígíísh doo nihił béédahózin da? Díí bee bił hólneʼ, Shoo, Bábilan dineʼé aláahgo binanitʼaʼí Jerúsalem kin haalʼáadi níbaaʼgo ákwii aláahgo naatʼáanii nilíinii índa naatʼáanii danilíinii Bábilan kéyahgóó dah yidiiʼeezh.
13 Áádóó aláahgo naatʼáanii bibízhí* yitsʼáiníłtı̨́įgo, Shichʼįʼ ádee hadídziih, yidííniid índa yił ahaʼdeetʼą́, áádóó ałdóʼ diné dabíiyisii éí kéyahdóó dah yidiiʼeezh,
14 áko ákwii bee óhólníihgo hazʼánígíí tʼáá yaa kóolzingo doo bidziilgo háádoolwoł da, nidi bee ahaʼdeetʼánígíí bikʼeh dahojíłʼı̨́įgo doo nidootʼih da biniyé diné dah yidiiʼeezh.
15 Nidi Ííjip kéyahdę́ę́ʼ łı̨́ı̨́ʼ bee nidaʼabaahii índa siláo tʼóó ahayóí yinéełgo haa didootʼááł biniyé ákóyaa há nidaalʼaʼí jííłʼaadgo éí bee aláahgo naatʼáanii bichʼįʼ nidzisteeʼ. Ákódziidzaaígíí daatsʼí tʼáá háká adoolwoł? Diné ákótʼíinii daatsʼí yisdádoogááł? Bee ahaʼdeetʼáanii doo yikʼeh hóółʼįįdgóósh tʼáá yisdádoogááł?
16 Bóhólníihii Diyin God ání, Tsʼídá tʼáá aaníí hinishná; ákótʼéego aláahgo naatʼáanii bichʼįʼ bee ádee hadzoodzíiʼii jííʼįįdii, áádóó hoł ahaʼdeetʼáanii doo bikʼeh hojííłʼįįdii éí aláahgo naatʼáanii jílı̨́įgo áhoolaii kééhatʼı̨́įgi tsʼídá tʼáá aaníí Bábilandi dazhdootsaał.
17 Diné tʼóó ahayóí nidootsił biniyé deílkʼidgo ádaalyaa índa hashtłʼish tsé bił deítłʼingo ádaalyaago anaaʼ hazlı̨́įʼgo Féro* índa bisiláo dah deínéehii dahayóii éí ákónéelą́ąʼ nidi, doo yee háká adoolwoł da;
18 bee ádee hadzoodzíiʼii jííʼįįd índa bee ahaʼdeetʼáanii doo bikʼeh hojííłʼįįd da; álákʼezhdoolniiʼgo bee lą́ adzisłı̨́įʼ nidi, díí tʼáá ałtso baa nijiyáhígíí biniinaa doo yisdázhdoogáał da.
19 Éí bąą Bóhólníihii Diyin God kóní, Tsʼídá tʼáá aaníí hinishná; ákótʼéego shichʼįʼ ádee hadzoodzíiʼii jííʼįįdgo áádóó shił ahazhdeetʼáanii doo bikʼeh hojííłʼįįdgóó bee doo ákǫ́ǫ́ ájíítʼįįdígíí tsʼídá tʼáá aaníí hakʼijįʼ nídoodleełgo ádeeshłííł.
20 Shitłʼóól naneesdizí hakʼídeeshtihgo dahizhdidoogáałgo Bábilan kéyahdi hodeesłóós; shichʼįʼ nátʼą́ą́ʼ ninájílwodgo náshíízhníibaaʼígíí biniinaa áadi haa nídéeshtʼįįł.
21 Hasiláo dah deínéehii tʼáá ałtso bitahdóó aláahgo dahayóii tʼáá ałtso diltłish bee nidadootsił índa daadziihígíí éí tʼáá ałtso daʼníłtsʼą́ąʼgi tabidíʼnóolkał, áko shí Bóhólníihii haasdzíiʼgo nihił béédahodoozįįł.
22 Bóhólníihii Diyin God kóní, Tʼáá shí gad yaaʼáhígíí bílátahdóó łaʼ* kʼídeeshtihgo kʼidideeshłééł; bílátahdi ániid náádeitsooígíí éí łaʼ kʼídeeshtihgo dził aghááʼáhígíí bighą́ąʼgi kʼidideeshłééł;
23 bitsʼáozʼaʼ índa bineestʼąʼ dahodooleełgo gad baa dzólníinii dooleełígíí biniyé Ízrel dineʼé bidził wótʼááh yíʼáhígíí bighą́ąʼgi kʼidideeshłééł; éí gad biyaagóó tsídii tʼáá ałtso ałʼąą ádaatʼéii łaʼ kéédahatʼı̨́į doo; bitsʼáozʼaʼ bee chahaʼohígíí ákǫ́ǫ́ kéédahatʼı̨́į doo.
24 Shí Bóhólníihii nishłíinii, tsin sikaadii aghááʼáníłnézígíí áłtsʼísígo áshłééh áádóó tsin sikaadii áłtsʼísígíí éí ayóó áníłnéezgo áshłééh; tsin dootłʼizhii éí yishgan áádóó tsin siganii éí náás nooséełgo dootłʼizhgo ánáshdléehgo tsin yílʼáhígíí tʼáá ałtso bił béédahózin doo. Shí Bóhólníihii nishłíinii haasdzííʼ áádóó biʼdeeshłiił.
Footnotes
^ Bábilan dineʼé aláahgo naatʼáanii Nébukadnézzar ááhyiłní.
^ Júdah dineʼé aláahgo naatʼáanii Jehóíyakin ááhyiłní.
^ Bábilan hoolyé.
^ Ííjip dineʼé aláahgo naatʼáanii ááhyiłní.
^ Júdah dineʼé aláahgo naatʼáanii Zedekáíyah ááhyiłní.
^ Ííjip dineʼé aláahgo binanitʼaʼí nilı̨́.
^ Aláahgo naatʼáanii David bitsʼą́ą́dóó oochíiłii łaʼ ááhyiłní.
