Ezekiel 18:1-32
18 Áádóó Bóhólníihii shichʼįʼ hanáánáádzíiʼgo ání,
2 Azhéʼé danilíinii chʼil naʼatłʼoʼii dadíkʼǫ́zhígíí dayooldéél índa áłchíní biwooʼ deidínéestseed, diníigo, díí saad nawóltaʼ Ízrel dineʼé bikéyah bee háánídzihígíí, haʼátʼíí ááhdiní?
3 Bóhólníihii Diyin God kóní, Tsʼídá tʼáá aaníí hinishná; ákótʼéego Ízrel dineʼé bitahgi díí saad nawóltaʼ tsʼídá tʼáá aaníí doo bee hanáádíídzih da.
4 Shoo, iiʼ naazíinii tʼáá ałtso shí; azhéʼé biiʼ sizíinii shííʼ átʼéego ayeʼ biiʼ sizíinii ałdóʼ shí; iiʼ sizíinii ádił niʼiisíihii dadootsaał.
5 Nidi diné tʼáá ákogi átʼéii éí bee hazʼáanii yikʼehgo ááníiłgo áádóó tʼáá ákogi átʼéii yikʼehgo hináago,
6 áádóó dziłdi hodílzingo nahazʼánígi tʼah doo ayą́ą́góó áádóó Ízrel dineʼé biʼedaʼalyaii yichʼįʼ nidahałáhígíí doo yichʼįʼ haaghaałgóó áádóó yił kééhatʼíinii beʼasdzą́ą́ doo yiłchxǫǫhgóó áádóó asdzání ąądii nilíinii doo yitʼáahjįʼ dighááhgóó,
7 áádóó diné tʼáá háiida doo yide áhósingóó, nidi diné bąąh niiníláii tʼáádóo nídí tʼóó yeidiiʼaahgo áádóó diné doo łaʼ yighaʼídláágóó, nidi dichin danilíinii yaʼałtsoʼgo áádóó tʼáá łichíʼígo nidaakaii ééʼ yitainiihii kótʼéego haidósingo,
8 áádóó ínáóltąʼí, doodaiiʼ tʼáá aláahgo doo yókeedgóó, áádóó doo ákwii átʼéii yitsʼąą náʼádiiltéégóó, áádóó doo haada yitʼéii yee ainítʼı̨́įgo, áádóó diné doo ałʼohgo yaa nitsíkeesgóó kótʼéego doo haada yitʼéii tʼáá aaníígóó ááníił dooleeł nízingo,
9 áádóó bee nihoyíʼáanii yikʼehgo níyáago índa shibikʼehgo hoogáałii yeʼełʼı̨́įgo éí tʼáá ákogi ájítʼé áádóó éí tʼáá aaníí jiináa dooleeł, ní Bóhólníihii Diyin God.
10 Áko biyeʼ bá yizhchíinii éí diné yighaʼiiʼníiłii, doodaiiʼ diné neiłtseedii nilı̨́įgo, éí doodaiiʼ díí kódaatʼéii bikʼis yee atííłʼíinii nilı̨́įgo,
11 (nidi azhéʼé nilíinii kódaatʼéii tʼáadoo áyiilaa da) éí biyeʼ dziłghą́ąʼdi hodílzingo hazʼánígi ayáanii índa yił kééhatʼíinii beʼasdzą́ą́ yił ahidoolyáii,
12 diné badahojoobaʼíii índa hojoobaʼ nahasʼáanii yide áhósinii, aghaʼiiʼníiłgo yaa naagháii, diné niidooléełgo yee nihoníʼáanii doo yá hashtʼenéídléehii, edaʼalyaii yichʼįʼ aheeghaałii, doo yildinii yaa naagháii,
13 béeso aʼiiʼníłígíí yee ínáóltąʼí yókeedii, bee bilááh neheleehígíí áłah áyoolíiłii, éí dinéésh hináa doo? Éí doo jiináa da doo; díí doo daaldinii tsʼídá tʼáá ałtso baa nijiyá; tsʼídá tʼáá aaníí dazdootsaał; tʼáá hó hadił hakʼéidootʼih.
14 Ákondi, éí diné biyeʼ hazlı̨́įʼgo éí biyeʼígíí bizhéʼé ádił niʼiisííʼ yę́ę tʼáá ałtso yiyiiłtsą́ągo yaa nitsízkééz, áko doo yikékʼeh deeyáágóó,
15 dziłghą́ąʼdi hodílzingo hazʼánígi doo ayáanii, Ízrel dineʼé biʼedaʼalyaii doo yichʼįʼ ahighaałii, yił kééhatʼíinii beʼasdzą́ą́ doo yił ahidoolyáii,
16 doo łaʼ yide áhósinii, diné béeso beidiníʼáanii, Tsı̨́įłgo shaa nínííł, doo yiłníinii, diné doo yighaʼ iiʼníiłii tʼáá bí bichʼiyąʼ diné dichin danilínígíí yaʼałtsoʼii, tʼáá łichíʼígo nidaakaii ééʼ yitainiihii,
17 badahojoobáʼíii doo atííłʼíinii, ínáóltąʼí índa bee alááh náádleełii doo yinízinii, shibikʼehgo hoogáałii yiʼiilaii índa bee nihoyíʼáanii yikʼehgo yigáałii éí hazhéʼé doo ákwii áátʼįįdii biniinaa doo dazhdootsaał da, nidi tʼáá aaníí jiináa dooleeł.
18 Nidi hazhéʼé doo yitsʼíídgóó diné yichʼįʼ nahwiisnáaʼgo áádóó bikʼis tʼáá naʼníleʼdii yighaʼídláago índa bidineʼé yitahgóó doo yáʼátʼéehii yaa naayáago biniinaa doo ákwii áátʼįįdii bąą dadootsaał, jóʼakon.
19 Nidi ádadohní, Doo haniih hayeʼgo bizhéʼé doo ákwii áátʼįįdii yá yikʼé tiʼhooníih da? Hayeʼ éí bee bá hazʼáanii índa tʼáá ákogi éʼétʼéii yikʼehgo ádzaa áádóó bee nihwiishʼaahii tʼáá ałtso yiʼiilaago éí yee tʼáá aaníí hináa doo.
20 Iiʼ sizíinii ádił niʼiisíihii dadootsaał. Azhéʼé jílíinii éí doo ákwii ájíítʼįįdígíí hayeʼ doo yikʼé tiʼhwiidoonih da, índa hayeʼ doo ákwii áátʼįįdígíí doo bikʼé tiʼhwiizhdoonih da; tʼáá ákogi ájooníiłii éí hatʼáá ákogi éʼétʼéii hoł hólǫ́ǫ doo; doo yáʼáshǫ́ǫ́góó ájooníiłii éí hadoo yáʼáshǫʼ hoł hólǫ́ǫ doo.
Diyin God ááníiłii doo haada yitʼée da (Ezek. 33:10-20)
21 Nidi diné tʼáá íiyisí doo yáʼáshóonii ádił niʼiisíiʼii tʼáá ałtso yóóʼiidííʼą́ągo áádóó bee nihwiishʼaahii tʼáá ałtso yikʼeh hółʼı̨́įgo áádóó bee bá hazʼáanii índa tʼáá ákogi éʼétʼéii yaa naagháago éí doo dadootsaał da; tsʼídá tʼáá aaníí hináa dooleeł.
22 Tʼáá ákogi ádziidzaaígíí bąą jiináa doo; doo ákwii ájíítʼįįdii tʼáá ałtso doo há bééhodoonih da.
23 Diné doo yáʼáshóonii daaztsą́ągoósh bąą shił hózhǫ́ǫ doo? ní Bóhólníihii Diyin God. Nidi éí diné yee átʼéii yóóʼiidííʼą́ągo hinánígíí baa shił hózhǫ́.
24 Diné tʼáá ákogi átʼéii tʼáá ákogi ájítʼéhígíí yóóʼazhdííʼą́ągo, áko doo ákwii éʼétʼéii baa nijigháago, índa diné tʼáá íiyisí doo yáʼáshóonii doo daaldinii yaa naakaígíí baa nijiyáago, daʼ éísh diné jiináa doo? Tʼáá ákogi ádaatʼéii baa nijiyáhígíí doo há bééhodoonih da, háálá hoł nilíinii bikʼijįʼ dzizlı̨́įʼgo índa ádił adzisiihgo ízhdiilyaaígíí tʼáá éí biniinaa dazdootsaał.
25 Nidi Bóhólníihii yee átʼéii éí doo ákǫ́ǫ́ átʼée da, dadohní. Ízrel dineʼé danohłíinii, geʼ, bee áníshtʼéiísh doo ákǫ́ǫ́ átʼée da? Nihí bee ádanohtʼéii tsʼídá doo ákǫ́ǫ́ ádaatʼée da.
26 Diné tʼáá ákogi átʼéii tʼáá ákogi ájítʼéhígíí yóóʼazhdííʼą́ągo, áko doo ákwii éʼétʼéii baa nijigháago, éí bikʼee dazhdootsaał; doo ákwii ájíítʼįįdii bikʼee dazhdootsaał.
27 Nááʼáłdóʼ, diné tʼáá íiyisí doo yáʼáshóonii éí doo yáʼáshǫʼ yaa naagháhígíí yóóʼiidííʼą́ągo áádóó bee bá hazʼáanii índa tʼáá ákogi átʼéii yaa naagháago éí diné yisdáʼádidooltééł.
28 Háálá doo ákwii ájooníiłii nabikʼítsídzízkéezgo ałtso yóóʼazhdííʼą́ągo doo dazhdootsaał da; tsʼídá tʼáá aaníí jiináa doo.
29 Nidi Ízrel dineʼé ádaaní, Bóhólníihii yee átʼéii éí doo ákǫ́ǫ́ átʼée da. Ízrel dineʼé danohłíinii, bee áníshtʼéiísh doo ákǫ́ǫ́ átʼée da? Nihí bee ádanohtʼéii tsʼídá doo ákǫ́ǫ́ ádaatʼée da.
30 Éí bąą Ízrel dineʼé danohłíinii, tʼááłáʼí nootínígo baa nidaahkaígíí bikʼehgo nihaa nídéeshtʼįįł, ní Bóhólníihii Diyin God. Doo ákwii ádanohtʼéhígíí bąą doo atínihidiʼdoolníłígíí biniyé bee hazʼáanii dahohtíihii ałtso yóóʼadahidohʼaahgo łahgo átʼéego Diyin God bichʼįʼ tsíńdadohkees.
31 Bee hazʼáanii dahohtíihii ałtso yóóʼadahidohʼaah ajéí ániidíii índa nitsáhákees ániidíii nihaa dideeshʼááł. Haʼátʼíísh biniyé dadínóohnééł, Ízrel dineʼé danohłíinii?
32 Tʼáá háiida bizééʼ hazlı̨́įʼii éí doo baa shił hózhǫ́ǫ da, ní Bóhólníihii Diyin God, áko łahgo átʼéego tsídahidohkeesgo dahinohnáa doo.
