Ezekiel 2:1-10
2 Éí shichʼįʼ haadzíiʼgo áshíłní, Diné nílíinii,* yiizįįh, nichʼįʼ hadeesdzih.
Iizííkiyel choizhdooʼįįłgo háká áhodooʼniid
2 Shichʼįʼ haadzíiʼgo níłchʼi shiih hóóleʼ áádóó shiisįʼgo yee shichʼįʼ haadzíʼígíí disétsʼą́ą́ʼ.
3 Kóshíłní, Diné nílíinii, Ízrel dineʼé nidaalteehii bichʼįʼ nidéłʼaʼ; éí shichʼįʼ nidaalteeh; díí jı̨́įjįʼ bí áádóó dabizhéʼé yę́ę shichʼįʼ ádił nidaʼiiszííʼ.
4 Éí dineʼé tʼáá íiyisí doo dajoobaʼ da áádóó doo nibídaʼdidzil da. Bichʼįʼ nííłʼaadgo ábididííniił, Bóhólníihii Diyin God kóní, diníi doo.
5 Áko daʼíistsʼą́ąʼgo, éí doodaléiʼ doo daʼíistsʼą́ą́ʼgóó, jó, shichʼįʼ nidaalteeh, Diyin God yá halneʼii bitahgóó tádííyáago bił béédahodoozįįł.
6 Diné tʼéiyá nílı̨́į nidi, tʼáadoo béédanildzidí; ádaanínígíí ałdóʼ tʼáadoo bééníldzidí, azhą́ diné éí hosh áádóó chʼil hooshahii índa séígoʼ nidahalingo bił kééhótʼı̨́į nidi, ádaanínígíí tʼáadoo bééníldzidí índa dadéezʼı̨́įʼgo ádaalniiʼígíí tʼáadoo bééníldzidí; shíyeeʼ shichʼįʼ nidaalteehgo ádaatʼı̨́.
7 Daʼíistsʼą́ąʼgo, éí doodaléiʼ doo daʼíistsʼą́ąʼ da nidi, kodóó bee bichʼįʼ hadíídzih nidishnínígíí bee bichʼįʼ yáníłtiʼ, háálá tʼáá íiyisí shichʼįʼ nidaalteeh.
8 Kodóó ándishnínígíí yísíníłtsʼą́ą́ʼ: Diné shichʼįʼ nidaalteehígíí nahalingo tʼáadoo shichʼįʼ nanilteehí; naʼastsoʼígíí niyą́.
9 Tʼáá díshʼı̨́ı̨́ʼ nítʼééʼ álaʼ léiʼ shichʼįʼ kʼídeelniiʼgo naaltsoos yisdisgo dah yootı̨́ı̨́ł, jóʼakon;
10 shidáahgi náyoostahgo atínídazhdindleeh dooleełígíí áádóó yínííł dajílı̨́į dooleełígíí índa tiʼdahojooníih dooleełígíí bikááʼdę́ę́ʼ áádóó bineʼdę́ę́ʼ bee bikʼedaʼashchı̨́.
Footnotes
^ Diné nílíinii jiníigo díí ááhyiłní: Iizííkiyel éí bílaʼ ashdlaʼii nilı̨́įgo doo hoolʼáágóó hináa da doo áádóó Diyin God bibee adziilii tʼéiyá bee iináago baa ákoznízin doo.
