Ezekiel 20:1-49
20 Tsostsʼid náhááh góneʼ, ashdlaʼ nídízííd binih, neeznáágóó yoołkáałgo Ízrel dineʼé bitahdóó aląąjįʼ naazíinii léiʼ Bóhólníihii nideídídóołkił yiniyé yíkaigo shidááhdóó dineezbin.
2 Áádóó Bóhólníihii shichʼįʼ haadzíiʼgo áshidííniid,
3 Diné nílíinii, Ízrel dineʼé aląąjįʼ naazíinii bichʼįʼ handziihgo kóbidiní, Bóhólníihii Diyin God kóní, Nidashidídóołkiłísh biniyé nohkai? Tsʼídá tʼáá aaníí hinishná; ákótʼéego tsʼídá tʼáá aaníí doo nidashidídóołkił da, ní Bóhólníihii Diyin God.
4 Diné nílíinii, baa nídíitʼįįłísh, baa nídíitʼįįłísh? Ákónínéehgo dabizhéʼé yę́ę doo yildinígi ádáátʼįįdii bił béédahonísįįh.
5 Áko ábidiní, Bóhólníihii Diyin God kóní, Ízrel nídiiłtı̨́ı̨́dą́ą́ʼ, Jéíkab baʼáłchíní náás ahoolchíiłii bichʼįʼ ádee hadeesdzííʼ yę́ędą́ą́ʼ, Ííjip kéyahdi bichʼįʼ ádééhosiszįįdgo, Bóhólníihii nihiDiyin God nishłı̨́, dishníigo hachʼįʼ ádee hadeesdzííʼ yę́ędą́ą́ʼ,
6 Ííjip kéyahdóó chʼíhodeeshʼishgo kéyah agháadi ayóó áhonoolnindi bikáaʼgi abeʼ índa tsésʼná bitłʼizh bee ádaʼazįįdii há hanítą́ąʼgo há shóisíłtʼeʼii éí biih hodeeshʼish, hodííniidgo hachʼįʼ ádee hadeesdzííʼ.
7 Áádóó áhodishní, Diné tʼááłáʼí nootínígo doo daaldinii danółʼíinii átsʼá dahidoołtłʼił, índa Ííjip kéyahdi edaʼalyaii doo bee ádidoołchxǫǫł da; shí Bóhólníihii nihiDiyin God nishłı̨́.
8 Nidi shichʼįʼ nidaasteeʼ, índa doo tʼáá kʼad dashidiiztsʼą́ąʼ da; doo daaldinii deiníłʼínę́ę tʼáadoo yóóʼadeideezʼą́ą da, índa Ííjip kéyahdi edaʼalyaii naaznilii tʼáadoo yóóʼadeideezʼą́ą da.
Áko ádííniid, Hachʼįʼ sháhóóchįįdgo Ííjip kéyahdi bohodoolníłígíí biniyé tʼóó báhádzidgo shibee atíʼélʼíinii bee atíhodeeshłííł.
9 Ííjip kéyahdóó hahóóʼeezhgo ałʼąą dineʼé bichʼįʼ ádééhosészįįd yę́ędą́ą́ʼ bitah kéédahojitʼínígíí binááł shízhiʼ hoł danilı̨́įgo doo dazhdoołchxǫǫł da biniyé ásdzaa.
10 Éí bąą Ííjip kéyahdóó hahóóʼeezhgo honoojíijįʼ ahóóʼeezh.
11 Bee nihoyíʼáanii haa diníʼą́, áádóó shibikʼehgo hoogáałii hoł yitʼíní áshłaa; éí diné yikʼeh hółʼı̨́įgo hináa dooleeł.
12 Áádóó shí Bóhólníihii diyingo ádahashłéehgo hoł béédahodoozįįł biniyé shí áádóó hó nihitaʼgi shihááʼáyı̨́ı̨́h jı̨́ bee ééhózin doo biniyé haa diníʼą́.
13 Nidi honoojíidi Ízrel dineʼé shichʼįʼ nidaalteeh nítʼééʼ; bee nihoyíʼáanii doo yikʼehgo dayíkai da áádóó shibikʼehgo hoogáałii doo deiniizı̨́įʼ da; éí yee diné yikʼeh hółʼı̨́įgo hináa doo, áádóó shihááʼáyı̨́ı̨́h jı̨́ tʼáá íiyisí dayííłchxǫʼ.
Áko ádííniid, Ałtso áhodeeshdįįłígíí biniyé tʼóó báhádzidgo bee atéʼéshʼíinii honoojíidi bee atíhodeeshłííł.
14 Ałʼąą dineʼé binááł Ííjip kéyahdóó chʼíhoníʼeezhígíí éí binááł shízhiʼ doo dazhdoołchxǫǫł daígíí biniyé baa atíítʼįįd.
15 Áádóó kéyah agháadi ayóó áhonoolninii bikáaʼgi abeʼ índa tsésʼná bitłʼizh bee ádaʼazįįdii, Éí kéyahígíí doo biih danihideeshʼish da, hodishníigo honoojíidi bee hachʼįʼ ádee hadeesdzííʼ,
16 háálá hajéí bee edaʼalyaii bídin dajílínígíí biniinaa shibikʼehgo hoogáałii dajííʼįįd, áádóó bee nihoyíʼáanii doo bikʼehgo dajíkai da, índa shihááʼáyı̨́ı̨́h jı̨́ dajííłchxǫʼ.
17 Azhą́ ákótʼée nidi, honoojíidi hakʼi díshʼı̨́įʼgo bee ááhosésįįd, tʼáadoo atíhooshłaa da, índa tʼáadoo ałtso áhoséłdįįd da.
18 Honoojíidi haʼáłchíní ábidííniid, Danihizhéʼé yę́ę yee nidahwiizʼáanii tʼáadoo bikʼehgo deínóhkáhí; bibikʼehgo hoogáałii tʼáadoo bidaʼołʼíní, índa edaʼalyaii deidósin nítʼééʼ yę́ę bee ádadoołchxǫǫł lágo.
19 Shí Bóhólníihii nihiDiyin God nishłı̨́; bee nihoyíʼáanii bikʼehgo deínóhkááh, áádóó shibikʼehgo hoogáałii hazhóʼó bidaʼołʼı̨́.
20 Shí Bóhólníihii nihiDiyin God nishłı̨́įgo nihił béédahodoozįįł biniyé shí áádóó nihí nihitaʼgi bee ééhózinii átʼéego shihááʼáyı̨́ı̨́h jı̨́ náʼoodleełii hodílzingo ádeínóhsin doo.
21 Azhą́ ákótʼée nidi, shichʼįʼ nidaalteeh nítʼééʼ; bee nihoyíʼáanii tʼáadoo bikʼehgo dajíkai da, áádóó shibikʼehgo hoogáałii bidaʼjiłʼı̨́įgo dajiináa dooleełígíí tʼáadoo bikʼeh dahojííłʼįįd da índa shihááʼáyı̨́ı̨́h jı̨́ dajííłchxǫʼ.
Áko ádííniid, Tʼóó báhádzidgo bee atéʼéshʼíinii éí honoojíidi bee atíhodeeshłííł.
22 Azhą́ ákótʼée nidi, tʼóó báhádzidgo bee atéʼéshʼíinii bee atíhodeeshłííł yę́ę tʼą́ą́ʼ kónáshdlaago ałʼąą dineʼé binááł chʼíhoníʼeezh yę́ę éí dabinááł shízhiʼ doo ílı̨́ı̨́góó doo bee hadazdoodzihígíí biniyé baa atíítʼįįd.
23 Nááʼákóneʼ ałʼąą dineʼé bitahgóó tanihidínéeshkał áádóó kéyah naaznilgóó tanihidínéeshkał, dishníigo honoojíidi hachʼįʼ ádee hadeesdzííʼ,
24 háálá shibikʼehgo hoogáałii tʼáadoo bidaʼjiilaa da áádóó bee nihoyíʼáanii dajííʼįįd áádóó shihááʼáyı̨́ı̨́h jı̨́ dajííłchxǫʼ índa dahazhéʼé yę́ę biʼedaʼalyaii dazhdiniilgęęzhgo bichʼįʼ nidahojiłá.
25 Éí bąą bee nidahwiistʼáanii doo yáʼádaatʼéehii índa bikʼehgo hoogáałii iiná biiʼ ádinígíí baa hodiníʼą́;
26 haʼáłchíní áłtsé nidajiiłchíhígíí kǫʼ biiʼjįʼ náádajiiłniihgo áhooshłaa, kótʼéego aa dahizhdiʼaah yę́ę bee tʼóó baaʼihgo há áshłaa; Bóhólníihii nishłı̨́įgo hoł béédahodoozįįł biniyé kóhooshłaa.
27 Éí bąą diné nílíinii, Ízrel dineʼé danilíinii bichʼįʼ handziihgo ábidiní, Bóhólníihii Diyin God kóní, Danihizhéʼé yę́ę shichʼįʼ doo ákǫ́ǫ́ ádáátʼįįdígíí bee doo anishłı̨́ı̨́góó ádashiilaa.
28 Kéyah haa dideeshʼáałgo hachʼįʼ bee ádee hadeesdzíiʼii biih hóóʼeezhgo wódahgo deílkʼidii tʼáá ałtso índa tsin díłchʼilgo naazkaadii dayiiłtsą́ągo ákwii nááhidoonihii náádayiisniiʼ; ákwii Bóhólníihii bee bá dahozhdoołchįįłii náádajiisniiʼ; ákwii tsin bijeeh dilidgo łikání halchinii náádajiisniiʼ índa yanáadziʼgo nááhániihii yadajiinil.
29 Dah yiskʼid bighą́ąʼdi ályaaígíí bichʼįʼ ałnáádaahkahígíishąʼ, haʼátʼíísh óolyé? hodííniid. Áko dííshjı̨́įjįʼ bízhiʼ éí Bámah* hoolyé.
30 Éí bąą Ízrel dineʼé kóbidiníigo bichʼįʼ handziih, Bóhólníihii Diyin God kóní, Danihizhéʼé yę́ę ádáátʼįįdígi átʼéegoósh ádadoołchxǫʼgo doo yildinígi ádaadzaii bikééʼ yóóʼoohkááh?
31 Aa dahidohʼaahii náádahołniihgo índa nihaʼáłchíní ashiikéhígíí kǫʼ bee náádahołniihgo dííshjı̨́įjįʼ nihiʼedaʼalyaii tʼáá bił nidaʼádiyoołchxǫǫh; ákoósh, Ízrel dineʼé danohłíinii, nidashídółkid doo? Áko Bóhólníihii Diyin God kóní, Tsʼídá tʼáá aaníí hinishná; ákótʼéego nihí tsʼídá tʼáá aaníí doo nidashídídóołkił da.
32 Ałʼąą dineʼé ádaatʼéhígíigi átʼéego náádaałaʼ kéyah naaznilgóó dineʼé kéédahatʼínígíigi átʼéego tsin áádóó tsé bichʼįʼ nidahwiidláa dooleeł, danohsingo kótʼéego nitsídaohkeesígíí éí tsʼídá doo ádooníił da.
33 Tsʼídá tʼáá aaníí hinishná; ákótʼéego tsʼídá tʼáá aaníí shílaʼ ayóó ábóodziilii bee nihikʼi dah deeshnihgo tʼóó báhádzidgo bee atéʼéshʼíinii bee atínihishʼı̨́įgo aláahgo nihinanishtʼáa doo, ní Bóhólníihii Diyin God;
34 shílaʼ ayóó ábóodziilii bee nihikʼi dah deeshnihgo tʼóó báhádzidgo bee atéʼéshʼíinii bee atíʼéshʼı̨́įgo kéyah daʼníłtsʼą́ą́ʼgóó tanihidiʼnooskaad yę́ędę́ę́ʼ dadineʼé bitahdę́ę́ʼ áłah ánánihideeshdlííł.
35 Honoojíidi dadineʼé kéédahatʼı̨́įjįʼ anihideeshʼish; ákwii daʼahiníilʼı̨́įgo nihił ałghaʼdishtʼáah doo.
36 Ííjip kéyah honoojíidi danihizhéʼé yę́ę bił ałghadaʼdishtʼááh yę́ęgi átʼéego nihí nihił ałghaʼdishtʼáah doo, ní Bóhólníihii Diyin God.
37 Gish biyaa chʼínihidiyeeshkahgo nihił ahadadiʼdeeshtʼáałgo bínihííníshtąʼ.
38 Nidaalteehii índa shichʼįʼ doo ákǫ́ǫ́ ádaaníiłii nihitahdóó nahjįʼ hadeeshnił; kéyahgi tádazhdinéhídóó hahodeeshniłgo Ízrel dineʼé bikéyah doo biih dazhdookah da, áko índa Bóhólníihii nishłı̨́įgo nihił béédahodoozįįł.
39 Nihí, Ízrel dineʼé nohłíinii, doo dashíínółtsʼą́ą́ʼgóó kʼad índa hoolzhishgóó tʼááłáʼí nootínígo nihiʼedaʼalyaii bichʼįʼ nidahohłá, nidi aa dahidohʼaahígíí índa nihiʼedaʼalyaii bee shízhiʼ diyinii doo náádadoołchxǫǫł da, ní Bóhólníihii Diyin God.
40 Shidził diyingo siʼą́ąjįʼ* éí bighą́ąʼgi Ízrel dineʼé agháago dahodísingo kéyah tʼáá náhwiistʼą́ą́ nítʼééʼ Ízrel dineʼé kéédahatʼíinii ákwii shichʼįʼ nidahałáa doo; ákwii hodínéesįįł; ákwii shichʼįʼ náádahołniihii, áádóó áłtsé neestʼáanii aa dahidohʼaahii índa nihee dahólóonii dadiyinii tʼáá ałtso shichʼįʼ náádahołniih doo, bidideeshniił, ní Bóhólníihii Diyin God.
41 Kéyahgóó tanihidiʼnooskaad yę́ędę́ę́ʼ áłah ánihiishłaago dadineʼé bitahdę́ę́ʼ chʼínihiyíʼeezhgo łikání dahonołchingo nihidínéesįįł áádóó ałʼąą dineʼé binááł nihitahgóó tʼáá íiyisí dinishyinii ííshjání ádeeshłííł.
42 Danihizhéʼé yę́ę kéyah nihaa dideeshʼááł, bidishníigo bee bichʼįʼ ádee hadeesdzíiʼii biih nihííʼeezhgo Bóhólníihii nishłı̨́įgo nihił béédahodoozįįł.
43 Bee ádanohtʼéii índa ádaohtʼįįdii bee ádadoołchxǫʼ yę́ę, éí tʼáá ałtso béédadołnihgo tʼáá íiyisí doo yáʼáshóonii baa nidasoohkaii tʼáá ałtso biniinaa ádił ninádaʼohtʼįįh dooleeł.
44 Shízhiʼ bikʼehgo nihainíshtʼı̨́įgo Bóhólníihii nishłı̨́įgo nihił béédahodoozįįł, Ízrel dineʼé nohłíinii, tʼáá íiyisí doo yáʼáshǫ́ǫ́góó ádanohtʼéii índa tʼóó baaʼihígi ádaotʼįįdii bikʼehgo éí dooda, ní Bóhólníihii Diyin God.
Shádiʼááhjí kéyah bichʼįʼ náasdi áhodoonííł baa haneʼ
45 Áádóó Bóhólníihii shichʼįʼ haadzíiʼgo kóshíłní,
46 Diné nílíinii, shádiʼáahjigo dah díníitʼaahgo shádiʼááh* bikʼijįʼ yáníłtiʼ, áádóó shádiʼááhjí tsin yílʼáhígíí náásgóó kónóhtʼée dooleeł, bidiníigo bee bichʼįʼ handziih;
47 shádiʼááhjí tsin yílʼáhígíí ábidiní, Bóhólníihii bizaad dadoohtsʼı̨́ı̨́h; Bóhólníihii Diyin God kóní, Nihihodideeshniłgo nihitahgóó tsin dadootłʼizhgo naazkaadii tʼáá átʼé índa tsin daazgango naazkaadii tʼáá átʼé adidookʼą́ą́ł; kǫʼ shizhóod dooleełígíí doo dínóoltsis da, áádóó náhookǫsdóó shádiʼáahjįʼ diné tʼáá ałtso dabiniiʼ dadoodis.
48 Nihokááʼ dineʼé tʼáá ałtso éí shí Bóhólníihii ihodíínilgo bił béédahodoozįįł; éí doo dínóoltsis da.
49 Nítʼééʼ ádíshní, Bóhólníihii Diyin God nílíinii! Haneʼ bee akʼidiʼdootı̨́įłii yaa nahalneʼ yaʼ, dashiłní.
Footnotes
^ Hííbrew dineʼé éí wódahgo nahazʼánígi diyin dabidiʼníinii tʼáadoo bichʼįʼ nidahohłáhí, bidiní.
^ Dził Záíyangi kin biiʼ sohodizin siʼą́.
^ Júdah dineʼé biʼóhólnííh bił hazʼáanii ááhyiłní.