Ezekiel 21:1-32
21 Bóhólníihii shichʼįʼ hanáánáádzíiʼgo ání,
2 Diné nílíinii, Jerúsalem kin haalʼá bichʼįʼgo ninítʼaahgo hodiyingo nahazʼánígíí bikʼijįʼ handziih, áádóó Ízrel dineʼé bikéyah náásgóó kótʼée dooleeł, diníigo baa handziih,
3 Ízrel dineʼé bikéyah bichʼįʼ handziihgo kóbidiní, Bóhólníihii kóní, Nihikʼijįʼ nishłı̨́, jóʼakon; shidiltłish bizis biyiʼdę́ę́ʼ hadeeshtı̨́įłgo diné tʼáá ákogi ádaatʼéii índa diné tʼáá íiyisí doo yáʼádaashóonii nihitsʼą́ą́ʼ ádeeshdįįł.
4 Diné tʼáá ákogi ádaatʼéii índa diné tʼáá íiyisí doo yáʼádaashóonii nihitsʼą́ą́ʼ ádeeshdįįłígíí bąą shádiʼááhdóó náhookǫsjįʼ diné tʼáá ałtso ádoodįįł biniyé shidiltłish bizis biiʼdę́ę́ʼ hadeeshtı̨́ı̨́ł,
5 áko shí Bóhólníihii shidiltłish bizis biiʼdę́ę́ʼ háátą́ągo doo biih nídeeshtı̨́ı̨́łgóó diné tʼáá ałtso bił béédahodoozįįł.
6 Tʼáá dabinááł atínídinídleehgo áádóó tʼáá íiyisí yínííł nílı̨́įgo ádił handzooł, diné nílíinii, ádił handzooł.
7 Haʼátʼíísh biniyé ádił hahídzooł? daniłníigo ábididííniił, Jó, haneʼ doo yáʼátʼéehii nihichʼįʼ ályaa: ajéí tʼáá ałtso doo dahiidoonaał da, álaʼ tʼáá ałtso bitah doo dahináa da doo; tʼááłáʼí jinítínígo hąąh nidahodookał índa tʼáá ádzíłtso hagodtaʼ gónaa tʼóó nidanilʼeeł doo; shoo, baa hodoogáałgo bohodoolnííł, ní Bóhólníihii Diyin God.
8 Bóhólníihii shichʼįʼ hanáánáádzíiʼgo ání,
9 Diné nílíinii, shá hólneʼ kódíníigo, Bóhólníihii kóní, Diltłish, diltłish łaʼ hááhaashkʼaazh, áádóó bikʼi nizdidlaadgo ályaa,
10 bee niʼdootsiłígíí biniyé hááhaashkʼaazh; bikʼi nizdidlaad dooleeł biniyé ákótʼéego ályaa. Ákoósh nihił dahózhǫ́ǫ doo? Shiyeʼ binaatʼá gish éí gish tsin bee ádaalyaii tʼáá ałtso yizʼįįd.
11 Áko diltłish choidooʼįįł biniyé haatą́ áádóó bikʼi nizdidlaadgo ádoolníiłgo biniyé baa yítą́; niʼdoołtsiłii baa dootı̨́łígíí biniyé hááhaashkʼaazh áádóó bikʼi nizdidlaadgo ályaa.
12 Diné nílíinii, yéego atínídinídleehgo nichxa; eiidí shidineʼé áádóó Ízrel dineʼé binanitʼaʼí danilíinii biniyé áhátʼı̨́; eiidí shidineʼé tʼáá bóóltąʼgo diltłish baa hoʼdeetʼą́; éí bąą nitsooskʼid bił dzidíkaad.
13 Jó, bee naʼóhontaahii átʼé, ákoshąʼ naatʼá gish yizʼįįdígíí tsʼídá ádoodįįł, ní Bóhólníihii Diyin God.
14 Éí bąą diné nílíinii, áhodooníiłii baa hólneʼ áádóó ahííkad; hániʼdii táadi diltłish bikʼi néikęęs; nidabidiztseedii bidiltłish éí diné ayóó ádaatʼéii nidabidiztseedii bidiltłish bił bináʼáznánígíí átʼé.
15 Hąąh nidahodookał áádóó hadándaʼditı̨́įhgi tʼóó ahayóí dazhdínóonééł biniyé diltłish bízdílidii áánítą́. Dooládóʼ atsiniltłʼish nahalingo ályaa lá. Bee niʼdootsił biniyé hááhaashkʼaazh lá.
16 Eii tʼáá deezʼáajigo náníyis; łahjigo, doodaiiʼ náánáłahjigo; nishʼnáajigo, doodaiiʼ nishtłʼajigoda ajígéésh.
17 Bóhólníihii nishłíinii ádíshní, Shí ałdóʼ ahídeeshkał; tʼóó báhádzidgo sháhóóchįįdii nidootʼihgo ádeeshłííł.
18 Áádóó Bóhólníihii shichʼįʼ hanáánáádzíiʼgo ání,
19 Diné nílíinii, Bábilan dineʼé aláahgo binanitʼaʼí bidiltłish yidootı̨́łídę́ę́ʼ naakigo bá dahodiitʼiʼ; éí tʼáá áłah tʼááłáʼí kéyahígíí biyiʼdę́ę́ʼ yidootı̨́ı̨́ł; bee ééhózinii łaʼ ádíílíiłgo kin haalʼáajįʼ dah adiitiinígi ákwii adíítsih.
20 Áman dineʼé bikin haalʼáii Rábathgóó,* doodaiiʼ Júdah kéyahgi Jerúsalem kin haalʼá ditą́ągo binaa ahééʼítłʼinígóó éí ákǫ́ǫ́ diltłish dootı̨́łígíí bá adidíílnih.
21 Bábilan dineʼé aláahgo binanitʼaʼí éí álíleego bee ééhózinii choidoołʼįįłgo bikʼaayééł yigháadgo áádóó biʼedaʼalyaii neídídóołkiłgo bił dahodoolnih índa azid siʼą́ą́ góneʼ yidínóołʼįįł biniyé naakigo ałtsʼáʼáztiingi ákwii sizı̨́.
22 Tsin nitsaazgo bee náʼnílgohii áádóó nidaabaahii biinééʼ ayóó íídóotsʼįįłgo áádóó dáńʼdaʼditı̨́ı̨́h bikʼijįʼ tsin nitsaazgo bee náʼnílgohii áádóó łeezh ahénálkʼidgo ádeidoolíiłii índa yadaʼniiltłʼǫ́ǫgo ádeidoolíiłii éí Jerúsalem atídoolnííł biniyé álíleego bee ééhózinii nishʼnáájí dah yootı̨́ı̨́ł.
23 Nidi bídę́ęʼgo álíleego bee ééhózinii tʼáá ádzaaí átʼéego yaa nitsídaakees doo; tʼáadoo naaki nilíní ádee hadadeesdzííʼ danízin nidi, áhodiʼdoolníłígíí biniyé doo ákwii ádajíítʼįįdii bééhodiʼyoolnih.
24 Éí bąą Bóhólníihii Diyin God kóní, Bee hazʼáanii dahootiʼ yę́ę bááʼdooltsoozgo bee doo ákwii ádaotʼįįdii índa baa nidaohkaígíí tʼáá ałtso ádił nidaʼiyohsíhígíí yitʼíní neheleeh bee nihééhóóniiʼígíí biniinaa nihidiʼdoolnééł.
25 Ízrel dineʼé binanitʼaʼí* tʼáá íiyisí doo yáʼáníshóonii áádóó bidiʼyoolyéełii nílíinii, doo ákwii íínítʼįįdii biniinaa atíndiʼdoolníłígíí kʼad beiníłką́.
26 Bóhólníihii Diyin God kóní, Nitsiiʼ bikʼídeesdizígíí nahjįʼ kónílééh áádóó naatʼá chʼah nahjįʼ kónílééh; tʼáadoo leʼé doo tʼáá ákódaatʼée da dooleeł; wóyahdi ádaatʼéii de ádanileʼ áádóó wódahdi danilíinii wóyahgo ádanileʼ.
27 Deeshchxǫǫłí bee deeshchxǫǫłí bee deeshchxǫǫł; bí dooleełii níyáajįʼ doo bitsáskʼeh hazʼą́ą da dooleeł, áko éí baa dideeshʼááł.
Áman dineʼé atídabidiʼdoolnííł
28 Áko ni, diné nílíinii, áhodooníiłii baa hólneʼgo kódíní, Bóhólníihii Diyin God éí Áman dineʼé kótʼéego yaa haadzííʼ; ándahojiłtʼiʼígíí biniinaa diltłish, diltłish bee nahodiʼdootsiłígíí biniyé haatą́; bízdílid dooleeł biniyé béʼéshjool áádóó atsiniltłʼish ahootahígíí nahalingo bikʼéézdiidlaʼ doo;
29 tʼáadoo nánídlíníii yee daniníłʼı̨́įgo índa tʼáá ádzaagóó chʼídahwiiʼaahgo diné tʼáá íiyisí doo yáʼádaashóonii diltłish bee nidabidiʼdootsiłígíí áádóó doo ákwii ádáátʼįįdii biniinaa atíbidiʼdoolníłígíí beiníłką́.
30 Diltłish éí bizis biih nánítįįh. Ániʼdiilyaa yę́ędi, kéyah biiʼ niʼdizhchı̨́ yę́ędi atíndeeshłííł.
31 Áko doo shił hózhǫ́ǫ́góó atíndeeshłííł; tʼóó báhádzidgo bee atéʼéshʼíinii bee nichʼįʼ níyolgo ádeeshłííł; diné doo daatsʼíidii nidaʼałtseedgo dayiichįįhii baa nidideeshʼááł.
32 Didooliłii nílı̨́į doo; kéyah ałníiʼgi nidił naaziid doo; tsʼídá doo nénínááhodoonih da, háálá shí Bóhólníihii díí bee haasdzííʼ.
Footnotes
^ Áman dineʼé binahatʼá bá kin haalʼáhígíí.
^ Júdah dineʼé aláahgo binanitʼaʼí Zedekáíyah ááhyiłní.
