Ezekiel 22:1-31
22 Áádóó ałdóʼ Bóhólníihii shichʼįʼ haadzíiʼgo ání,
2 Diné nílíinii, kin haalʼáhígi diné naatseedgo bidił danílínígíísh baa nídíítʼįįł? Éísh baa nídíítʼįįł? Ákónínéehgo doo yildinígi ájíítʼįįdígíí tʼáá ałtso bee hoł hodíílnih.
3 Kóbididííniił, Bóhólníihii Diyin God kóní, Kin haalʼáagi diné nideiłtseedgo bidił danílı̨́įgo ádeileʼii índa edaʼalyaii ádá ádeileʼgo yee nidaʼádiilchxǫǫhii éí atíhodiʼdoolníłígíí bikʼíhodoolzhishgo átʼé.
4 Dił danílı̨́įgo ádahwiinilaaígíí bee ádihodiniltʼiʼ; edaʼalyaii ádeinilaaígíí bee ádíínílchxǫʼ; éí bee bijı̨́ ándiʼdoolníłígíí koshídę́ę́ʼ áchʼįʼ nidíínídzı̨́ı̨́z, nánihootʼáanii éí baa hoolzhiizh; éí bąą ałʼąą dineʼé nándahałtʼiʼgo ániishłaa áádóó kéyah naaznildę́ę́ʼ tʼáá ałtso naa daadlohgo ániishłaa.
5 Doo yáʼáníshxóonii índa nił hóóląądgo hahwííníłʼáii, tʼáá áyídígóó kéédahatʼíinii índa nízaadi kéédahatʼíinii ná nidahałtʼiʼ doo.
6 Nitahgi Ízrel dineʼé binanitʼaʼí danilíinii tʼááłáʼí nítínígo bibee adziilii bikʼehgo diné nidootsiłgo bidił danílı̨́į dooleełígíí yídadínéelná, jóʼakon.
7 Nihitahgóó azhéʼé índa amá deiʼı̨́; tłʼóóʼdę́ę́ʼ nihaa nídaaldahígíí yindaʼaloʼgo bikʼee tiʼdahoonííh; áłchíní bizhéʼé ádaadinii índa asdzání bąąh ádahasdįįdii nihitahgóó doo ákǫ́ǫ́ ádayííłʼįįd da.
8 Dadílzinii daashíhígíí dasooʼįįd índa shihááʼáyı̨́ı̨́h jı̨́ doo diyingóó ádaohłaa.
9 Nihitahgóó diné nidootsił biniyé tʼáá ádzaagóó yaa dahalneʼgo bidił danílı̨́įgo ádeileʼ áádóó dziłghą́ąʼdi doo dahodísingóó daʼayánígíí nihitah hólǫ́ índa nihitahgóó naʼageh yaa nidaakai.
10 Nihitahgóó dahazhéʼé bidaʼasdzą́ągo bił daʼahizhdoolyá índa nihitahgóó diné éí asdzání ąądii nilíinii yá nidaʼazyeh.
11 Diné łaʼ éí diné yił kééhatʼíinii beʼasdzą́ą́ doo yildinígi áyííłʼįįd; náánáłaʼ diné éí bizhááʼáád yił ahidoolyá; nihitahgóó náánáłaʼ diné éí bizhéʼé bitsiʼ, hadeezhígo bádzízyeh.
12 Nihitahgóó diné diyoolyééł yiniyé diné yikʼé ałchʼįʼ nidaʼiizlá. Bił kééhótʼíinii bitsʼą́ą́dóó ínáóltąʼí biniyé nááhíníchid; bee bilááh nííʼ dooleełii ahanihínínil índa nee áchą́hwíídéeniʼgo bee bilááh dooleełii hashtʼeʼnihínínil; kwíínítʼįįdígíí bee sheisínínah, ní Bóhólníihii Diyin God.
13 Éí bąą inaʼíloʼgo shóísíníłtʼeʼígíí áádóó nihitahgóó diné nidaaztseedgo bidił dadeeznaʼígíí biniinaa yéego ahísíkad, jóʼakon.
14 Nihainíshtʼı̨́įgo yidiiską́ądi daatsʼí hadaʼíínóhníigo bídanołʼą́ą dooleeł, índa bichʼįʼ daatsʼí danihidziil dooleeł; tsʼídá biʼdeeshłíłí, shí Bóhólníihii haasdzííʼ.
15 Kéyah naaznilgóó tanihiidínéeshkałgo ałʼąą dineʼé bitahgóó tanihiidínéeshkał, áádóó nichxǫ́ʼígíí nihiiʼdi dahólóonii ałtso nihiiʼdę́ę́ʼ hahidideeshkʼą́ą́ł.
16 Áádóó ałʼąą dineʼé bitahgóó nidiʼdoolchxǫǫł, áko índa Bóhólníihii nishłı̨́įgo nił bééhodoozįįł.
17 Áádóó Bóhólníihii shichʼįʼ haadzíiʼgo kóní,
18 Diné nílíinii, Ízrel dineʼé éí béésh łigaii bitsʼádahideesyı̨́ʼígíí silı̨́įʼgo baa nitséskees; tʼáá ałtso déédíljah góneʼ béésh łitsoii áádóó béésh kágí, béésh nitłʼizii índa dilyı̨́hí éí béésh łigaii bitsʼádahideesyı̨́įʼii danilı̨́.
19 Éí bąą Bóhólníihii Diyin God kóní, Tʼáá ánółtso atsʼádahideesyı̨́įʼii dasoolı̨́įʼgo bąą Jerúsalem nahaníiʼgi áłah ánihideeshłííł, jóʼakon.
20 Diné éí béésh łigaii áádóó béésh łitsoii áádóó béésh nitłʼizii áádóó dilyı̨́hí índa béésh kágí didoolyįhígíí biniyé déédíljah góneʼ adayiiniłgo yikʼijįʼ kǫʼ deisołígíigi átʼéego sháhóóchįįdígíí índa tʼóó báhádzidgo bee atíʼéshʼı̨́įgo áłah ánihideeshłííł, áádóó yah anihideeshniłgo ałtso nihidideeshxįh.
21 Áko áłah ánihideeshłíiłgo tʼóó báhádzidgo bee atíʼéshʼíinii bikǫʼ nihikʼijįʼ deesoł, áko éí bitahgi ałtso dadidoołhįh.
22 Déédíljah góneʼ béésh łigaii doolyı̨́ʼígíigi átʼéego nihí ałdóʼ tʼóó báhádzidgo bee atíʼéshʼíinii bee nihidiʼdoolyįh, áko shí Bóhólníihii tʼóó báhádzidgo bee atíʼéshʼíinii nihikʼijįʼ áshłaaígíí nihił bééhodoozįįł.
23 Áádóó Bóhólníihii shichʼįʼ haadzíiʼgo ání,
24 Diné nílíinii, kóhodiní, Nichʼįʼ doo shił hóózhǫǫdą́ą́ʼ kéyah doo hashtʼenáʼnéehii índa bikááʼ doo nahałtinii nílı̨́.
25 Náshdóítsoh bitsiijįʼ daditłʼooígíí yidoolghałii yił didiłgo niyiiłdlaʼígi átʼéego hatahgi áhodooníiłii yaa dahalneʼii hondahaʼá; diné dayooldéél; yódí índa daʼílíinii nishódayoostʼeʼ; hatahgi asdzání tʼóó ahayóí yąąh ádahasdįįd.
26 Hanááʼiiłniihii danilíinii éí shibee hazʼáanii doo yikʼeh dahóółʼįįd da; shá dadílzinii éí doo dadílzingóó ádayiilaa; dadiyinii índa doo dadiyinii éí doo ałʼąą ádayósingóó tʼáá ałtso aheełtʼéego ádayósin índa, Yáʼátʼéehii áádóó tʼóó baaʼihii éí doo ałʼąą átʼée da, daaníigo yíndaʼneeztą́ą́ʼ; shihááʼáyı̨́ı̨́h jı̨́ doo bił danilı̨́į da, áko bitahgóó doo anishłı̨́į da.
27 Hatahgóó naatʼáanii danilíinii éí mąʼiitsoh yidoolghałii yił didiłgo niyiiłdlaʼígíí nahalingo diné nideiłtseedgo bidił bitsʼádaazlı̨́įgo ádeileʼ áádóó bindaʼadloʼgo badaʼiideeł doo biniyé diné dahináanii atídeileʼ.
28 Bóhólníihii tʼáadoo yee haadzííʼgóó, Bóhólníihii Diyin God kóní, daaníigo tʼáadoo leʼé nazhniłʼingo łigaígíí bee jizhdlézhígi átʼéego ił áhátʼı̨́, tʼáá ádzaaí índa woochʼííd éí tʼáá aaníí nahalingo áhodooníiłii yaa dahalneʼii yee bił dahalneʼ.
29 Éí kéyahgi diné kééhatʼínígíí achʼįʼ nidahwiisnááʼ áádóó diné yighadaʼiisʼnil, diné badahojoobáʼíii índa hojoobaʼ nahasʼáanii yaa nahodeeskai; tʼáadoo bee hazʼánígi átʼéego déʼéyóní yichʼįʼ nidahwiisnááʼ.
30 Kéyah doo atídeeshłíił da biniyé hatahgóó diné łaʼ hanítą́ą́ʼ; éí ahééʼítłʼinígíí bidziilgo íidoolííł, áádóó ahééʼítłʼinígíí nídeeshgizhgi shidááhdóó kéyah yá yidoozįįł, nisin, nidi tʼáadoo łaʼ bikʼíníyáa da.
31 Éí bąą hachʼįʼ tʼáá íiyisí doo shił hóózhǫǫdgóó, tʼóó báhádzidgo bee atíʼéshʼínígíí kǫʼ nahalingo bee áhosíłdįįd; tsiʼjookah yę́ę tʼáá éí bee kʼééhodiishdlaa, ní Bóhólníihii Diyin God.