Ezekiel 23:1-49
23 Bóhólníihii shichʼįʼ haadzíiʼgo kóní,
2 Diné nílíinii, asdzání tʼáá łaʼ hááʼáazhgo tʼááłáʼíígíí bimá;
3 éí Ííjip kéyahdi ałjiłnii nilı̨́ı̨́ nítʼééʼ; tʼáá ániid naaʼaashdą́ą́ʼ ałjiłnii nilı̨́ı̨́ nítʼééʼ; áadi lą́ą diné habeʼ há nídeineezniiʼ ni; áadi lą́ą bízháán naagháii jílı̨́įgo diné habeʼ há nideizhchʼid ni.
4 Alą́ąjįʼ naagháhígíí éí Ahólah* wolyé; bideezhí éí Ahólibah* wolyé; éí tʼáá áłah shííʼ silı̨́ı̨́ʼ, áko bichʼéʼéké índa biyáázhké niyiishchı̨́. Ahólah éí Samériya ááhyiłní, áádóó Ahólibah éí Jerúsalem ááhyiłní.
5 Ahólah éí shííʼ jílı̨́įgo ałjiłnii jílı̨́ı̨́ nítʼééʼ; hanaashiijí Asíriya dineʼé kééhatʼíinii bichʼįʼ ajiłjił nítʼééʼ;
6 nidaabaahígíí ééʼ tsídídééh nahalingo łichíʼígíí yiiʼ naazhjééʼ; agháago naatʼáanii danilíinii índa hashkééjí naatʼááh danilíinii éí tʼáá ałtso dinééh bíká laanaa hwiindzinii danilı̨́; łı̨́ı̨́ʼ yee nidaakaii łı̨́ı̨́ʼ dabíyeeh.
7 Asíriya dineʼé bitahdóó diné danilíinii tʼáá ałtso yaa ádeetʼą́ągo tʼáá bí nízinígi ádabííłʼįįd; biʼedaʼalyaii tʼáá ałtso bichʼįʼ diné bił ałchʼįʼ dah dajilwoʼii bee ázhdoolchxǫʼ.
8 Ííjip kéyahdi hóyoołkááł yę́ędą́ą́ʼ ajiłjiłgo baa hajííyáii éí tʼáadoo nahjįʼ nizhdiníʼą́ą da, háálá chʼikę́ę́h bízháán naagháii jílı̨́ı̨́dą́ą́ʼ diné éí habeʼ nideichʼidgo áádóó yídin danilíinii yee haa naakaigo hoł nídabiilkááh nítʼééʼ.
9 Éí bąą Asíriya dineʼé bił ałchʼįʼ dah dajilwoʼii baa hodiníʼą́.
10 Díí lą́ą bił daʼahizhdoolyá ni; hayáázhké índa hachʼéʼéké haghadayiisʼnil, áko diltłish yee dahwiisxı̨́; kótʼéego haa hwiinístʼįįdgo éí áádóó bikʼijįʼ kóʼóolyéenii yę́ę haʼní hazlı̨́ı̨́ʼ.
11 Azhą́ hadeezhí Ahólibah díí tʼáá ałtso bił bééhoozin nidi, éí haláahgo diné yił ałchʼįʼ dah daalwoʼ nítʼééʼ, índa haláahgo ałjił nítʼééʼ, áko éí bádí yiláahgo tsiʼnaayá.
12 Asíriya dineʼé agháago naatʼáanii danilíinii, índa hashkééjí naatʼááh danilíinii, nidaabaahii éí ééʼ ayóó ádanoolningo yee hadadítʼéego łı̨́ı̨́ʼ yee nidaabaahii łı̨́ı̨́ʼ dabíyeehgo éí tʼáá ałtso dinééh bíká laanaa hwiindzinii ádaatʼéego yichʼįʼ dah yilwoʼ nítʼééʼ.
13 Áko jííchxǫʼgo shił bééhoozin; éí asdzání tʼáá áłah tʼááłáhí góneʼ ałkééʼ ííʼáázh.
14 Áko tsé yistłʼingo ahééníʼáhígíí éí bąąhjįʼ Kaldíya dineʼé bidaʼalyaago áádóó biʼééʼ daalchíiʼgo yiyiiłtsą́, áko tʼóó yówehda ałjiłnii nilı̨́įgo tádííyá;
15 éí diné sis binídaaztʼiʼ, bitsiiʼ nídaaztʼiʼígíí éí dah nidaasaał, tʼáá ałtso naatʼáanii nidahalin, Kaldíya kéyahdi nidahaazhchı̨́įgo Bábilan dineʼé danilı̨́įgo bidaʼalyaa.
16 Éí yiyiiłtsą́ą́ nítʼééʼ yichʼįʼ dah yilwoʼgo yaa nídiidzá, áko Kaldíya kéyahgóó haneʼ nideiʼáii ayiisʼaʼ.
17 Nítʼééʼ Bábilan dineʼé haa yíkaigo tsáskʼeh bikáaʼgi yidádanoolníinii yee haa naaskaigo dahóółchxǫʼ, áko tʼóó haaʼih ádahoolaago bichʼįʼ doo ákójítʼéégóó bitsʼą́ąjįʼ dashdiiyá.
18 Tʼáadoo bahatʼaadí ałjiłnii nilı̨́įgo áádóó tʼáá łichíʼígo naagháago, tʼáá hádí doo niizı̨́ʼígi átʼéego hó ałdóʼ doo honiizı̨́įʼ da.
19 Azhą́ bichʼįʼ ákósdzaa nidi, ániid naagháádą́ą́ʼ Ííjip kéyahdi ałjiłnii nilı̨́ yę́ędą́ą́ʼ yénáálniiʼgo tʼóó tséʼédinda ałjiłnii yileeł nítʼééʼ.
20 Jó, bił ałchʼįʼ dah danilwoʼii éí télii yee alizhii nitsxaazgo bee dahólónígi átʼéego áádóó łı̨́ı̨́ʼ nahalingo bíígąsh dahólóonii bichʼįʼ yóóʼiʼjoolchaʼ.
21 Kótʼéego ániid nanináádą́ą́ʼ Ííjip dineʼé éí nibeʼ nándeizhchʼidii áádóó nibeʼ nánídeineezniiʼii bídin nílı̨́.
22 Éí bąą Bóhólníihii Diyin God kóní, Ahólibah yinílyéii, diné bił ałchʼįʼ ádantʼíinii doo nił aaníígóó bitsʼą́ąjįʼ dah diniyáii éí nichʼįʼ nábidideeshkah, áádóó tʼáá ałtsodę́ę́ʼ ninídoolzhish.
23 Bábilan dineʼé áádóó Kaldíya dineʼé tʼáá ałtso áádóó Pííkad dineʼé áádóó Shówa dineʼé áádóó Kówa dineʼé índa Asíriya dineʼé tʼáá ałtso* éí tsíłkéí bídin hóyéeʼii, agháago naatʼáanii danilíinii índa hashkééjí naatʼááh danilíinii, tʼáá ałtso bídahólníihii áádóó łı̨́ı̨́ʼ yee nidaabaahii éí tʼáá ałtso łı̨́ı̨́ʼ bił nihidoojah.
24 Yee nidaabaahii áádóó tsindaabąąs bijáád naakiígíí áádóó tsindaabąąs índa diné ayóó ánéelą́ąʼgo yił náhookǫsdę́ęʼgo nihaa doonééł, áko tʼáá ałtsodę́ę́ʼ naagé áádóó naagééd dah deíʼaahgo áádóó béésh chʼah dabichʼahgo anadanihidoołʼįįł. Áko yee nihaa nídadóotʼįįłígíí baa dideeshʼááł áádóó tʼáá bí bikʼehgo nihaa nídadóotʼįįł.
25 Łeʼnisingo tʼóó hóyéʼígi átʼéego nihaa nídadóotʼįįłígíí biniyé tʼáá íiyisí doo shił hózhónígíí nihikʼijigo nídeesxis; nihíchı̨́ı̨́h deidiyoogish, nihijaaʼ deidiyoogish, yisdádahastłʼáhígíí éí diltłish bee nidadootsił; nihiyeʼké índa nihitsiʼké éí adeidiyooʼish, áádóó nihitahdóó daadziihígíí éí adahididoolkʼą́ą́ł.
26 Nihiʼééʼ ałtso nihąąh deídóobeeł índa nihilátsínída, yoostsahda, yooʼda tʼáá íiyisí yáʼádaatʼéehii éí adeidiyoojih.
27 Ííjip dineʼé doo bichʼįʼ anáádadoohgałígíí áádóó doo bénínáádadoołnihígíí biniyé Ííjip kéyahdi ałjiłnii bídahoołʼą́ʼígíí áádóó adáhonooníinii bídahoołʼą́ʼígíí éí áádę́ę́ʼ bił noonánígíí kótʼéego nihitsʼą́ą́ʼ ádeeshdįįł.
28 Dineʼé bikʼee dadinohniihii áádóó doo danoozı̨́ʼígíí éí baa nihidideeshʼááł, jóʼakon, ní Bóhólníihii Diyin God;
29 nihikʼee dadiniihgo nihaa nídaatʼı̨́į doo índa bindaałnishgo bee bilááh nídaasdlı̨́įʼii éí adeidiyoojih áádóó tʼáá łichíʼígo nidaahkaigo adanihidoolííł índa tʼóó baaʼihgo ááníłígíí áádóó ałjiłnii nílı̨́įgo tʼáá łiníchíʼí nitsʼą́ą́ʼ yááʼdiʼdoołtsos.
30 Ałʼąą dineʼé bichʼįʼ íłjił nítʼéʼígíí lą́ą áádóó biʼedaʼalyaii yichʼįʼ nidahałáhígíí atah bichʼįʼ nahółá nítʼéʼígíí biniinaa tʼáá ni bidáninilníinii índa ałjiłnii nílíinii tʼáá éí kótʼéego nikʼéidootʼih.
31 Nádí naayáhą́ągóó tʼáá ákǫ́ǫ́ yíníyá, áko éí bąą bibee adlání nílákʼe deeshʼááł.
32 Bóhólníihii Diyin God kóní, Nádí bibee adlání nízaadgóó biih hodzáanii áádóó nitsaaígíí éí tʼóó ahayóí biiʼ hólóonii bee adíídlı̨́ı̨́ł; diné tʼóó naa daadloh doo, áádóó ná nidahałtʼiʼ doo.
33 Nił honeezdogo tʼáá íiyisí yínííł nanináa doo; bikʼee ił nihooyeehii áádóó tʼáadoo siláhígóó ádahaleʼii bee adlání éí nádí Samériya bibee adlání átʼé.
34 Éí díídlı̨́įłgo ałtso biiʼ hadíítsʼǫs áádóó dííłtsʼiłgo niʼaał doo índa nibeʼ hadííłdlał; shí Bóhólníihii Diyin God kótʼéego bee haasdzííʼ.
35 Éí bąą Bóhólníihii Diyin God kóní, Sheisínínahígíí áádóó nidinínáágóó ashiyíníłhanígíí biniinaa bidáhonooníinii baa nisíníyáii índa íłjił yę́ę bikʼee tiʼhoyíníih doo.
36 Áádóó Bóhólníihii áshíłní, Diné nílíinii, Ahólah áádóó Ahólibahásh baa nídíítʼįįł? Áko doo yildinígi áátʼįįdii bee bił hólneʼ,
37 háálá éí tʼáá áłah adíílá áádóó diné neistseedgo bílaʼ dił bee łichííʼ; biʼedaʼalyaii yichʼįʼ nahasááʼ áádóó biyáázhké shá deizhchíinii edaʼalyaii bichʼiyąʼ biniyé yichʼįʼ kǫʼ yee náádayiisniiʼ.
38 Áádóó ałdóʼ kónááshijííłʼįįd: shihodiyingo hazʼą́ tʼáá łaʼóo jı̨́ dajííłchxǫʼ; shihááʼáyı̨́ı̨́h jı̨́ tʼóó baaʼihgo índa doo ílı̨́ı̨́góó ájiilaa.
39 Jó, biʼedaʼalyaii yichʼįʼ baʼáłchíní nááyiisniiʼgo nideistseed tʼáá éí bijı̨́, shikin biiʼ sohodizin góneʼ yah ííʼáazhgo doo ílı̨́ı̨́góó áyiilaa, áko shikin biiʼ sohodizin góneʼ kwáátʼįįd, jóʼakon.
40 Diné nidi nízaadę́ę́ʼ dookah biniyé ákǫ́ǫ́ bíká oʼoołʼaʼ, áádóó yíkai, jóʼakon; ákódzaago nisoobı̨́ı̨́ʼ áádóó nihinátʼéézh wooshı̨́ı̨́ʼ índa bídazdilidgo bikʼi nidazdidlaadii bee naʼáshidoohchʼąąʼ,
41 bikááʼ adání bikáaʼgi tsin bijeeh dilidgo łikání halchingo nááhániihii shíhígíí áádóó sheʼakʼah nííníką́ągo éí bichʼįʼ ił ídlı̨́ı̨́jí bikááʼ dah asdáhí daalcháazhgo danineezígíí siʼą́ągo áádóó dah sookéé nítʼééʼ.
42 Diné tʼáadoo ádayóleʼígóó nidaakaii tʼóó ahayóí haa áłah nilı̨́ı̨́ nítʼééʼ; diné tʼáá bitaʼígi ádaatʼéii áádóó daʼadláanii honoojíídę́ę́ʼ nidayiizhʼeezh; éí diné látsíní hálátsíín yąąh nideiznil, índa chʼah ayóó ánóolninii tʼáá ájíłah hakʼi deideeznil.
43 Áko ádíshní, Diné tʼáá íídą́ą́ʼ bił daʼjiłjił nítʼéeʼgo, ákoósh kʼad bił daʼahizhdilyé?
44 Ałjiłnii diné bił yah anídaakah nítʼéʼígi átʼéego diné bił yah anídaakah nítʼééʼ; kótʼéego bidáhonooníinii yaa nidaakai dooleeł biniyé Ahólah índa Ahólibah, asdzání tʼóó baaʼihii nilíinii, yił yah anídaakah nítʼééʼ.
45 Nidi asdzání adííláii bee bá nihwiitʼaahii índa asdzání diné neiłtseedii bee bá nihwiitʼaahii éí bee diné tʼáá ákogi ádaaníiłii haa nídadóotʼįįł, háálá éí tʼáá ájíłah azhdilé áádóó diné nidziłtseedgo hálaʼ dił bee łichííʼ.
46 Éí bąą Bóhólníihii Diyin God kóní, Diné tʼóó ahayóí haa doonéełgo ółééh, áko éí bikʼee hoł yéeʼ doo, áádóó binaalyeʼé ałtso bighahidooʼniłgo ółééh.
47 Áko diné tʼóó ahayóí haa nínáhígíí hoł nidazdiyoołniił, áádóó bidiltłish yee tadahwiidínóołkał, índa hayeʼké áádóó hatsiʼké nideidoołtsił, áko haghan adeididoołkʼą́ą́ł.
48 Tʼáá ałtso bił ahaa naołdeehgo bee tsiʼnisoohkaígíigi átʼéego asdzání tʼáá ałtso bił béédahózingo doo tʼáá ałtso yił ahaa nináánáldeeh da doo biniyé kótʼéego kéyah tʼáá náhwiistʼą́ą́ nítʼééʼ bikááʼgóó tʼáá ałtso yił ahaa naaldeehii ádingo ádeeshłííł.
49 Áko tʼáá ałtso bił ahaa naołdeehígíí nihikʼijįʼ nídoodleeł, áádóó ádił nidaʼayohsíihgo biʼedaʼalyaii bichʼįʼ nidahohłáhígíí bikʼee tiʼnídahwiidoohnih, áko índa shí Bóhólníihii Diyin God nishłı̨́įgo nihił béédahodoozįįł.
Footnotes
^ Ahólah jiníigo Hííbrew kʼehjí bidiyingo hazʼáanii jiníigo óolyé.
^ Ahólibah jiníigo Hííbrew kʼehjí shidiyingo hazʼáanii bitahgi hólǫ́ jiníigo óolyé.
^ Díí ałʼąą dineʼé Bábilan kéyahdi kéédahatʼı̨́.
