Ezekiel 24:1-27
24 Náhástʼéí náhááh góneʼ, neeznáá nídízííd binih, neeznáágóó yoołkáałgo Bóhólníihii shichʼįʼ haadzíiʼgo kóní,
2 Diné nílíinii, díí ooʼáłígíí, díí jínígíí bízhiʼ bikááʼ ánílééh; díí jı̨́ Bábilan dineʼé aláahgo binanitʼaʼí bisiláo Jerúsalem yináshzhiizh.
3 Ízrel dineʼé nidaalteehii, haneʼ bee akʼidiʼdootı̨́įłii bee bichʼįʼ handziihgo ábidiní, Bóhólníihii Diyin God kóní, Biiʼ abézhí dedíʼaah, dedíʼaah áádóó ałdóʼ tó biih nikaah;
4 atsįʼ yáʼádaatʼéehii tʼáá ałtso éí ásaah niłjeeh; ajáád lá áádóó awos lá, tsʼin yáʼádaatʼéehii biiʼ hadíłbin.
5 Dibé naakaidóó dibé agháago yáʼátʼéehii bitsʼádííłtéełgo ásaah díínił, áko biyaagi tsʼin éí chizh bił dididííłjah, áádóó tsʼin łaʼígíí ásaah dííniłgo nizhónígo dííłbish.
6 Éí bąą Bóhólníihii Diyin God kóní, Kintahgóó dił danílı̨́įgo kin haalʼáii doo hojoobaʼ ájíníi da; biiʼ abézhí biiʼ náhodiniichiiʼii, tʼáá éí biiʼ abézhí biiʼ náhodiniichiiʼgo doo nahjįʼ kónéehii! Áko biniyé tʼáadoo yááʼiiltʼeʼí tʼááłáʼí níʼánígo biiʼdę́ę́ʼ hahidíínił.
7 Háálá dił danílı̨́įgo áyiilaii bitahgi naashchiiʼ; tséʼéłkáaʼgi doo siláhígi naashchiiʼgo áyiilaa; łeezh yikʼiidooził biniyé tʼáadoo łeeshtahjįʼ yayiinil da.*
8 Dił danílı̨́įgo áyiilaii doo bikʼi hwiidoodziłígíí biniyé tséʼéłkáaʼgi tʼáadoo siláhígi naashchiiʼgo áshłaa, áko tʼóó báhádzidgo bee atíʼéshʼíinii yá hodoołchįįłgo kʼéédideeshnííł.
9 Éí bąą Bóhólníihii Diyin God kóní, Diné nidaaztseedgo bidił kin taazlı̨́įgo kin haalʼáii doo hojoobaʼ ájíníi da! Ákwii ałdóʼ bee dididooljah biniyé tʼóó ahayóí yanáaʼáago ádeeshłííł.
10 Chizh hózhǫ́ bikʼijįʼ adahohnííł, áádóó bohodohnííł; atsįʼ yáʼátʼéehgo wołbéézh; bitooʼ éí bąąh haołbéézh; tsʼin éí ałtso dadohłid.
11 Hózhǫ́ dínóolgahgo yidoochih áádóó béésh łitsoii bídiilidígíí bąąh hadidoolkʼą́ą́ł áádóó nídiniichxiiʼii adidookʼą́ą́ł biniyé tʼáadoo biiʼ siláhí tsííkááʼ dah síʼaah.
12 Tʼáadoo biniyéhígóó chʼééh áátʼįįd; ditą́ągo bídiilidgo bikʼi sitáanii doo hadikʼą́ą́hgóó dookʼą́ą́ł.
13 Tʼáá ałtso bił ahaa nanildeehgo adáninilníigo tʼóó naaʼihígíí átʼé; tʼóó baaʼihii nąąh ásíłdįįd nítʼééʼ, nidi tʼóó baaʼihii tʼáadoo nąąh yildeeʼ da; tʼóó báhádzidígi átʼéego atíníshʼínígíí bee hwiih sélı̨́įʼjįʼ tsʼídá doo hashtʼenándeeshdlíił da.
14 Shí Bóhólníihii haasdzííʼ; tsʼídá bohodoolníłí, tsʼídá biʼdeeshłíłí; doo tʼą́ą́ʼ kónídeeshníił da; doo áándeesįįł da; doo łahgo átʼéego tsínáádeeskos da; hinínáá nítʼéʼígíí áádóó baa nisíníyáhígíí bikʼehgo naa nídadóotʼįįł, ní Bóhólníihii Diyin God.
Iizííkiyel beʼasdzą́ą́ daaztsą́
15 Nááʼáłdóʼ Bóhólníihii shichʼįʼ hanáánáádzíiʼgo kóní,
16 Diné nílíinii, ninááʼ yídin nilíinii kʼadę́ę tʼáá hahooʼneehee kʼadę́ę nitsʼą́ą́ʼ nahjįʼ kóshłééh, jóʼakon, nidi doo yínííł nidíínaał da áádóó doo atídíníídleeł da índa ninákʼeeshtoʼ doo yaa nidadoonah da.
17 Tʼáadoo íitsʼaʼí ádił handzooł; daneeznáanii tʼáadoo baa yínííł nanináhí; nitsiiʼ bináʼíłtʼih áádóó kééh niʼéés; nizééʼ doo bichʼą́ą́h niʼdííłbał da índa yínííł danilíinii bibááh doo dííyı̨́įł da.
18 Áko abínígo diné bichʼįʼ yéíłtiʼ, áádóó iʼííʼą́ągo sheʼasdzą́ą́ daaztsą́ áádóó, Baa nidíínaał, shiʼdiʼníigo bee shichʼįʼ haʼoodzíiʼii hoosʼįįdgo baa niséyá.
19 Nítʼééʼ diné ádashidííniid, Díí baa nanináhígíishąʼ haʼátʼíí nihiłní? Daʼ éísh doo bee nihił hodíílnih da?
20 Áko índa ábidííniid, Bóhólníihii shichʼįʼ haadzíiʼgo kóní,
21 Ízrel dineʼé kóbidiní, Bóhólníihii Diyin God kóní, Shikin biiʼ sohodizin, nihibee adziil bee nihiʼáshodahódliʼii daołtseʼgo baa nihił dahózhóonii áádóó nihiiʼ sizíinii yídin nilíinii doo ílı̨́ı̨́góó ádadeeshłííł, jóʼakon, índa nihiyeʼké áádóó nihitsiʼké daadziihígíí doo ílı̨́ı̨́góó ádadeeshłíiłgo diltłish bee nidadootsił.
22 Áko nihí tʼáá baa niséyáhígi ádadoohnííł: nihizééʼ doo bikʼídaʼdoołtih da, índa yínííł danilíinii bibááh doo dadoohsı̨́įł da.
23 Nihichʼah éí nihitsiinídaaztʼiʼ doo, áádóó kééʼ nisooʼeez doo; doo yínííł naahkai da doo, áádóó doo atíńdadinohdleeh da doo, nidi doo ákwii ádaotʼįįdii bił nidadínóołnah áádóó ałchʼįʼ dadinohʼníi doo.
24 Kótʼéego Iizííkiyel nihichʼįʼ bee ééhózinii átʼée doo: tʼáá ałtso nihinááł yaa naayáhígíí bikʼehgo nihí ałdóʼ ákódanohtʼée doo; díí baa hoolzhiizhgo Bóhólníihii Diyin God nishłı̨́įgo nihił béédahodoozįįł.
25 Diné nílíinii, bineʼ nidadzidziʼii áádóó bee ádaa deijódlíigo baa hoł dahózhóonii áádóó hanááʼ yidádanoolníinii índa hayeʼké índa hatsiʼké hajéí bee baa hoł dahózhóonii haghanishʼnil bijı̨́ı̨́ góneʼ tsʼídá ákóhodoonííł:
26 éí yoołkáałdi yisdááyáii naa doolwołgo haneʼ neidooʼááł.
27 Éí bijı̨́įdi yisdááyáii bichʼįʼ hadíídzih áádóó doo yáłtiʼí doo náánídlı̨́į da doo. Áko éí bichʼįʼgo ni nee ééhózin doo, áko Bóhólníihii nishłı̨́įgo hoł béédahodoozįįł.
Footnotes
^ Dił éí bee iiná átʼéego dílzingo átʼé áádóó atsʼánahgo łeeshtahjįʼ bikʼi hoodziʼgo bee hazʼą́.
