Ezekiel 25:1-17
25 Bóhólníihii shichʼįʼ hanáánáádzíiʼgo kóní,
2 Diné nílíinii, Áman dineʼé* bichʼįʼgo dah díníitʼaahgo, bikʼijįʼ nílı̨́įgo handziih,
3 áko Áman dineʼé ábidiní, Bóhólníihii Diyin God bizaad deísółtsʼą́ą́ʼ, Bóhólníihii Diyin God kóní, Shikin biiʼ sohodizin doo ílı̨́ı̨́góó áálʼįįd yę́ędą́ą́ʼ, índa Ízrel dineʼé bikéyahgi doo yiilaʼí yę́ędą́ą́ʼ, áádóó Júdah dineʼé yisnááhgóó abiʼdoojaaʼ yę́ędą́ą́ʼ, Tsʼíigo lą́ą, dadooniidígíí biniinaa,
4 haʼaʼaahjígo diné kééhatʼínígíí bííʼ danohłı̨́į dooleeł biniyé baa nihidideeshʼáałgo nihitahgóó nidahidoonéełgo ákǫ́ǫ́ kéédahatʼı̨́į dooleeł, jóʼakon, áádóó nínádaʼnoołtʼı̨́įhii nihitsʼą́ą́ʼ deiyą́ą doo, índa niheʼabeʼ nihitsʼą́ą́ʼ deidlą́ą doo.
5 Rábah kin haalʼáagi* éí ghą́ą́ʼaskʼidii nidaʼałchozhgo áhodeeshłííł, áádóó Áman dineʼé bikéyahdi dibé bighan naaznilgo ádeeshłííł, áko índa Bóhólníihii nishłı̨́įgo nihił bééhodoozįįł.
6 Háálá Bóhólníihii Diyin God kóní, Ízrel dineʼé bikʼijįʼ danohłı̨́įgo áádóó bikʼee dadinohniihii tʼáá ałtso bee baa nihił dahóózhǫǫd áádóó ahínídaohkaʼgo nihídadołtał nítʼéʼígíí biniinaa,
7 nihikʼijįʼ nishłı̨́įgo nihichʼįʼ kʼídinishniiʼgo bąąh oogą́ąʼii danohłı̨́įgo ałʼąą dineʼé baa nihidideeshʼááł, jóʼakon; dadineʼé bitsʼą́ąjįʼ kónihideeshłíiłgo kédaayahgi ánihideeshdįįł, áko atínihiishłaago áadi índa Bóhólníihii nishłı̨́įgo nihił béédahodoozįįł.
Móʼab dineʼé bichʼįʼ náasdi áhodoonííł baa haneʼ
8 Bóhólníihii Diyin God kóní, Júdah dineʼé éí ałʼąą dineʼé ádaatʼéhígi ádajítʼé, Móʼab dineʼé* áádóó Síyer dineʼé dadííniid;
9 éí bąą Móʼab dineʼé bikéyah bibąąhgóó yee ádaa dahaʼniihgo kin hadaasʼáii Beth-jéshimath áádóó Béíyal-míyan índa Kíriyathéíyim éí Móʼab kéyahgi bááłkʼiisdę́ęʼgo bichʼįʼ ąą ádeeshłííł, jóʼakon.
10 Éí Áman dineʼé bił haʼaʼaahjígo kéédahatʼíinii baa hodideeshʼááł, áko ałʼąą dineʼé doo hwénínáádadoolnih da.
11 Kótʼéego Móʼab dineʼé bee há nihodeeshʼáałii bee haa nídéeshtʼįįł; áadi índa Bóhólníihii nishłı̨́įgo hoł béédahodoozįįł.
Íídam dineʼé bichʼįʼ náasdi áhodoonííł baa haneʼ
12 Bóhólníihii Diyin God kóní, Íídam dineʼéʼ* éí Júdah dineʼé kʼéédeidiidlaago biniinaa tʼáá íiyisí ádidahodiiltʼiʼ;
13 éí bąą Bóhólníihii Diyin God kóní, Íídam dineʼé hakʼijigo kʼídideeshnihgo diné áádóó naaldlooshii nideestsiłgo doo naagháhígóó hazʼą́ągo ádeeshłííł; Tííman hoolyéédóó níléí Díídan hoolyéejįʼ* diltłish bee dazhdínóonééł.
14 Shidineʼé Ízrel éí bee Íídam dineʼé kʼééhodideeshdlííł; Íídam kéyahgi sháhóóchįįdígíí áádóó tʼóó báhádzidgo atéʼéshʼínígíí bikʼehgo nidadoobah, áko Bóhólníihii Diyin God kóní, Kʼéédiisdzaaígíí hoł béédahodoozįįł.
Filístiya dineʼé bichʼįʼ náasdi áhodoonííł baa haneʼ
15 Bóhólníihii Diyin God kóní, Filístiya dineʼé ałkʼidą́ą́ʼ hakʼee dadeeznih yę́ę bee bijéí yee doo yáʼáshǫ́ǫ́góó haa nitsídaakeesgo kʼéédahodiidlaa;
16 éí bąą Bóhólníihii Diyin God kóní, Filístiya dineʼé dajílíinii hachʼįʼ kʼídideeshnihgo, Kéreth dineʼé ádeeshdįįłgo áádóó tónteel bibąąhgóó kéédahojitʼíinii ałtso áhodeeshdįįł.
17 Tʼóó báhádzidgo bee atíʼéshʼíinii bee hainíshtʼı̨́įgo kʼééhodideeshdlííł, áko kʼééhodiishdlaago, Bóhólníihii nishłı̨́įgo hoł béédahodoozįįł.
Footnotes
^ Jórdan tooh haʼaʼ aahjigo Áman dineʼé bikéyah. Jer. 49:1-; Ezek. 21:28-32; Amos 1:13-15; Zeph. 2:8-11.
^ Áman dineʼé binahatʼá bá kin haalʼáhígíí.
^ Jórdan tooh haʼaʼaahjigo Móʼab dineʼé bikéyah. Is. 15:1-16:14; 25:10-12; Jer. 48:1-47; Amos 2:1-3; Zeph. 2:8-11.
^ Ízrel kéyah haʼaʼaahjigo áádóó shádiʼááhjígo Íídam dineʼé bikéyah. Is. 34:5-17; 63:1-6; Jer. 49:7-22; Ezek. 35:1-15; Amos 1:11,12; Obad. 1-14; Mal. 1:2-5.
^ Íídam kéyah shádiʼááhjígo kéyah.
