Ezekiel 26:1-21
26 Łaʼtsʼáadah náhááh góneʼ háázidígíí łaʼa jı̨́ı̨́ góneʼ, Bóhólníihii shichʼįʼ haadzíiʼgo kóní,
2 Diné nílíinii, Táir dineʼé kótʼéego Jerúsalem yaa haadzííʼ, Tsʼíigo lą́ą hadáńʼdítı̨́hí kʼídeiztiʼ áádóó shichʼįʼ ąą ádzaa; kʼad lą́ą shił ádaʼíízįįd ni, kʼad lą́ą tʼáadoo biniyéhí da dzizlı̨́ı̨́ʼ, dííniid;
3 éí bąą Bóhólníihii Diyin God kóní, Táir dineʼé danohłíinii, nihikʼijįʼ nishłı̨́, jóʼakon; tónteel tábąąhjigo yilkʼoołígi átʼéego ałʼąą dineʼé tʼóó ahayóí nihikʼijįʼ biʼdeeshnih.
4 Táir kin haalʼá binaa ahéédaʼastłʼinii naaʼadeidiyoołkał áádóó yadaʼniiltłʼóonii naaʼadeidiyoonił; łeezh éí nahjįʼ hatsʼą́ą́ʼ adeesiłgo ákwii tséʼéłkááʼ nahalingo ádeeshłííł.
5 Łóóʼ bee hahaltsósí tónteel biih dzółtsósígi átʼéegi ákwii hojílǫ́ǫ doo* áádóó ałʼąą dineʼé bá bąąh aseesyíinii jílı̨́į doo; kótʼéego shí Bóhólníihii Diyin God haasdzííʼ.
6 Hachʼéʼé éí tábąąhdi nidaakaii diltłish bee nidabiʼdidootsił, áko Bóhólníihii nishłı̨́įgo hoł béédahodoozįįł.
7 Háálá Bóhólníihii Diyin God kóní, Náhookǫsdę́ęʼgo aláahgo naatʼáanii danilíinii aláahgo binanitʼaʼí éí Bábilan dineʼé aláahgo yinanitʼaʼí Nébukadnézzar éí łı̨́ı̨́ʼ áádóó tsindaabąąs bijáád naakiígíí áádóó łı̨́ı̨́ʼ yee nidaabaahii áádóó siláo dah naazhjaaʼgo índa diné tʼóó ahayóigo yił doonéełgo Táir dineʼé yikʼiidoojahgo ádeeshłííł.
8 Nichʼéʼé éí tábąąhdi nidaakaii diltłish yee neidoołtsił; łeezh ninázʼáago íidoolííł; bíilkʼidgo ałdóʼ íidoolííł áádóó naagé niniyé dah deíjáah doo.
9 Tsin bee náʼnílgohí éí kóneʼ nídanołgoh, níigo binaa ahéédaʼastłʼinii nídeiniłgoh doo, índa yadaʼniiltłʼóonii éí bitsénił yee kʼíidiyoołniił.
10 Bilı̨́ı̨́ʼ tʼóó ahayóí yijahígíí bąą łeezh nił hááʼáa doo; kin haalʼáii ditą́ągo ninaa ahéédaʼastłʼinígíí łahgi bitsʼą́ą́ʼ naalkaadgo ákóneʼ diné yah eekaígi átʼéego éí aláahgo naatʼáanii yah ííyáago bilı̨́ı̨́ʼ yee nidaabaahígíí nihitʼááh yíjéeʼgo áádóó tsindaabąąs índa tsindaabąąs bijáád naakiígíí bee daʼíbąąsígíí bee hodiitsʼaʼgo tsé nihinástłʼinii yildil doo.
11 Kintah daʼnítiingóó tʼáá átʼé łı̨́ı̨́ʼ yee nidaabaahii łı̨́ı̨́ʼ bikétłʼiin dadiitsʼaʼgo bił tádidoojah; diltłish yee nidineʼé neidoołtsił índa áyah daniiʼáii bidziilgo daastłʼinii éí naaʼahidoołdas.
12 Niyódí éí bąąh aseesyíinii ádeidoolíiłgo nitsʼą́ą́ʼ adeidiyooyééł; ninaalyeʼé éí daasnáanii ádeidoolííł; ninaa ahéédaʼastłʼinii éí nideidiyoołkał áádóó nikin danizhóníii nideidiyoołchxǫǫł; nitsé áádóó nitsin índa nileezh éí tʼáá ałtso taah deidiyoołkał.
13 Sin bee dahohtaałii nihitsʼą́ą́ʼ niʼ kódeeshłííł áádóó tsin tłʼóół bąąh daneelzheeʼgo dadiitsʼaʼii doo dadiitsʼaʼ da doo.
14 Tséʼéłkáaʼgi doo siláhí da nahonohłingo ánihideeshłííł; éí bikáaʼgi łóóʼ bee hahaltsósí ninálkaʼii danohłı̨́į doo, tsʼídá doo hashtʼéénihidiʼdoolníił da; shí Bóhólníihii bee haasdzííʼ, ní Bóhólníihii Diyin God.
15 Bóhólníihii Diyin God éí Táir dineʼé kwííłní, Atínihiʼdilʼı̨́įgo hodiistsʼą́ąʼgo diné kʼadabiʼdilkʼehígíí dadiʼníigo nihitahgóó diné nidabidiʼtseedgo hodeeshzhiizhgo tónteel bibąąhgóó diné kéédahatʼínígíí bitah dahoditłid doo.
16 Ákódzaago tónteel bibąąhgóó naatʼáanii danilíinii tʼáá ałtso bibikááʼ dah asdáhí yikááʼdóó hadah dahidookah, áko bibeeldládí ééʼ ádaa deididooʼnił áádóó biʼééʼ bibąąhgóó nidaashchʼąąʼii hadeididooʼniłgo bitah dahoditłid doo; niʼgóó dínóobįįłgo tʼáadoo bitaʼ hooʼaahí bitah dahoditłid doo, áko nihikʼee tʼóó bił adahayói doo.
17 Geʼ, jidííniidgi átʼéego łaʼ táłkááʼdóó tónteel bikááʼdóó dooládóʼ ásoohdįįd da, daaníigo nihaachaał bighą́ągo yínííł danilı̨́į doo; táłkááʼgóó tʼáá íiyisí doo nił nahontłʼagóó naʼałʼeełí nílíinii áádóó tʼáá íiyisí nééhoʼdílzingo kin háínílʼáii ni lá áádóó nitahgóó kéédahatʼíinii éí nihokááʼgóó kéédahatʼíinii tʼáá ałtso biyaa nidahosoołhiz!
18 Kʼad éí ásoohdįįd bijı̨́ı̨́ góneʼ tábąąhgóó kédaayahgi diné kéédahatʼíinii bitah dahoditłid; tʼáá aaníí ánihiʼdisdįįdígíí biniinaa tábąąhgóó kédaayahgi diné kéédahatʼíinii nihéédaaldzid.
19 Bóhólníihii Diyin God kóní, Kin hadaasʼá yę́ęgóó diné doo kéédahatʼínígíí nahalingo kin haalʼáii ánihiséłdįįdgo tónteeldę́ę́ʼ tó ayóó ánéelą́ą́ʼ nikʼi didoolkǫǫł.
20 Áko índa aʼáán góyaa diné neheleehígíí bił ałkʼidą́ą́ʼ diné ákóyaa niheezlı̨́ʼígíí bichʼįʼ anihideeshkał, áko doo kǫ́ǫ́ kéédahohtʼı̨́į da doo, áádóó dahináanii bitahgóó doo nihá hazʼą́ą da doo, nidi wóyahdi náhástʼą́ądi ákóyaa ánihideeshłíiłgo diné aʼáán góyaa neheleehii áadi bikintsʼiil dah naazhjaaʼgóó bitah dahonohłǫ́ǫ doo, áádóó dahináanii bikéyahgi ayóó átʼéego áhodeeshłííł,
21 tʼáá íiyisí bikʼeʼíyéʼígi átʼéego doo náádahonoohdlǫ́ǫ́góó ánihideeshłííł; azhą́ hadanintáa nidi, tsʼídá doo nikʼínáádadookah da, ní Bóhólníihii Diyin God.
Footnotes
^ Táyiʼdi kéyah hááʼáhígi Táir kin haalʼáii ályaa.
