Ezekiel 27:1-36
27 Bóhólníihii shichʼįʼ haadzíiʼgo kóní,
2 Kʼad lą́ą, diné nílíinii, Táir baa nichago yínííł naniná,
3 tónteel nihiníyı̨́ı̨́dóó kéyah siʼáanii Táir tʼóó ahayóigo tónteel bibąąhgóó kéyah nahazʼą́ą́góó dadineʼé yił ahaa nidaʼiilniihii ábidiní, Bóhólníihii Diyin God kóní, Kéyah Táir yinílyéii, tʼáá ałtsojįʼ hadanishtʼéego shaa dzólní, diníi niʼ.
4 Tsʼídá tʼáá íiyisí ahaa nidaʼiiniihígi taah yíníʼá; hadandiilaii tʼáá ałtsojįʼ ayóó áníínílningo ádaniilaa.
5 Dził Sííner* hoolyéédę́ę́ʼ chʼó bitsʼą́ą́dóó tsin neheeshjííʼ danteelgo daditánígíí tʼáá ałtso ádayiilaa; Dził Lébanan hoolyéédę́ę́ʼ dilkʼis łaʼ nídeizhjaaʼgo éí bee tsinaaʼeeł bitʼaʼ bá ííʼáhígíí ná ádayiilaa.
6 Béíshan* hoolyéédę́ę́ʼ chéchʼil bee tsinaaʼeeł bee naalʼeełígíí ná ádayiilaa, Sáípras* kéyahdóó éí tónteel bibąąhgóó nídíshchííʼ deílʼáhígíí tsin neheeshjííʼ ádaalyaago nitsinaaʼeeł bikááʼdę́ę́ʼ dah náhástʼą́ągi nideiskaad, áádóó éí áívori wolyéii yee nideizhchʼąąʼ.
7 Niníbaal biníyolgo naʼaʼeełii Ííjip kéyahdę́ę́ʼ áłtsʼóózígo yisdizígíí bee naʼatʼą́hí łigaii ditsʼidgo bee ályaii bibąąhgóó naashchʼąąʼgo éí nitsinaaʼeeł bitʼaʼ nítʼééʼ; Iiláísha hoolyéedi tónteel bibąąhgóó kéyah hadaazʼáádę́ę́ʼ naʼatʼą́hí yá nahalingo dootłʼizh áádóó tsídídééh nahalingo łichíʼígíí bee nichahaʼoh nítʼééʼ.
8 Sáídan* índa Árvad* kin haalʼáádóó diné kéédahatʼíinii éí ooʼołgo tsin bee naʼalʼeełí ná nideiloʼ nítʼééʼ; Táir nílíinii, dineʼé dahóyáanii nee hólǫ́ǫgo éí ná nidaʼałʼeeł nítʼééʼ.
9 Gííbal* kin haalʼáádę́ę́ʼ hastóí danilíinii áádóó bidineʼé naanish dayiichįįhii niyiʼdi tó tsinaaʼeeł bighá daazlı̨́ı̨́góó yidanídaʼdiʼaʼgo nee hólǫ́ǫ́ nítʼééʼ; tsinaaʼeeł tʼáá ałtso nideiłʼeełii tʼáá bóóltąʼgo ninaalyéhé yił ałghááʼ daʼiiʼníiłgo nee hólǫ́ǫ́ nítʼééʼ.
10 Pérzha kéyahdę́ę́ʼ áádóó Lud kéyahdę́ę́ʼ índa Put kéyahdę́ę́ʼ siláo éí nisiláo dah yinéełii yił nidaabaah dooleeł biniyé daʼatah nítʼééʼ: niyiʼdę́ęʼgo binaageʼ áádóó bibéésh chʼah dah nídeidiyiiʼnił nítʼééʼ, tsʼídá tʼáadoo bee níínílninígóó ádanóhsin nítʼééʼ.
11 Árvad dineʼé éí nisiláo bił ninaa ahéédaʼastłʼinígíí yikááʼdóó dah naazı̨́įgo naa ádahalyą́ą́ nítʼééʼ. Nidiné dahayóii Gámadim daolyéii haʼalzííd biniyé yadaʼniiltłʼónígíí biyiʼdę́ę́ʼ binaageʼ dah nídeidiyiiʼnił nítʼééʼ; tʼáá ałtsojįʼ ayóó áníínílningo ádaniilaa.
12 Tsʼídá tʼáá ałtsojįʼ ítʼínígíí biniyé Társhish nił ahaa naʼiilniih nítʼééʼ, ninaalyéhé biniyé béésh łigaii áádóó béésh nitłʼizii áádóó béésh kágí índa dilyı̨́hí nił ałghááʼ daʼiiʼnííł nítʼééʼ.
13 Jéívan dineʼé áádóó Túbal dineʼé índa Mííshek dineʼé* nił ahaa nidaʼiilniih nítʼééʼ: ninaalyéhé biniyé diné danilíinii áádóó łeetsʼaaʼ béésh łitsoii bee ádaalyaii diné baa nidaʼiiniihígíí yił ałghááʼ daʼiiʼnííł nítʼééʼ.
14 Togármah dineʼé éí łı̨́ı̨́ʼ áádóó łı̨́ı̨́ʼ nidabiyéii índa dzaanééz nee hólóonii biniyé diné baa nidaʼiiniihii yił ałghááʼ daʼiiʼnííł nítʼééʼ.
15 Díídan dineʼé naalyéhé nił ałghááʼ daʼiiʼnííł nítʼééʼ; tónteel bibąąhgóó kéyah tʼóó ahayóígíí naa nidaʼiiłniih nítʼééʼ: áívori áádóó tsin ébonii nidayiijáahgo naa dayiinííł nítʼééʼ.
16 Síriya dineʼé naalyéhé tʼóó ahayóí nee hólónígíí bąą nił ahaa nidaʼiilniih nítʼééʼ; tsé ílíinii émerald wolyéii áádóó naʼatʼą́hí tsídídééh nahalingo łichíʼígíí índa naʼatʼą́hí bibąąhgóó nidaashchʼąąʼii áádóó áłtsʼóózígo yisdizígíí bee naʼatʼą́hí łigaii ditsʼidgo ályaii índa yooʼ łichíʼí índa tsé ílíinii ágat wolyéii nidayiijáahgo ninaalyéhé yił ałghááʼ daʼiiʼnííł nítʼééʼ.
17 Júdah dineʼé áádóó Ízrel dineʼé bikéyahdę́ę́ʼ nił ahaa nidaʼiilniih nítʼééʼ; Mínith kin haalʼáádę́ę́ʼ tłʼoh naadą́ą́ʼ áádóó łikání halniihii pánag wolyéii áádóó tsésʼná bitłʼizh áádóó akʼah índa tłah łikání dahalchinii éí ninaalyéhé yił ałghááʼ daʼiiʼnííł nítʼééʼ.
18 Naalyéhé tsʼídá tʼáá ałʼąą ádaatʼéego ayóó ánéelą́ąʼgo dah yíléłígíí bąą, ninaalyéhé ayóó ánéelą́ʼígíí Damáskas dineʼé nił ahaa naʼiilniih nítʼééʼ, Hélban kéyahdę́ę́ʼ wáin áádóó aghaałgaii éí ninaalyéhé yił ałghááʼ daʼiiʼnííł nítʼééʼ.
19 Víídan dineʼé áádóó Jéívan dineʼé ninaalyéhé biniyé nił ałghááʼ daʼiiʼnííł nítʼééʼ; béésh nitłʼizii áádóó káshiya chʼiyáán bił álʼínígíí índa akaz łikání kálamas wolyéii éí ninaalyéhé biniyé nił ałghááʼ daʼiiʼnííł nítʼééʼ.
20 Díídan dineʼé éí akʼi dahiʼniłí ninaalyéhé biniyé nił ałghááʼ daʼiiʼnííł nítʼééʼ.
21 Aréíbiya dineʼé áádóó Kíídar dineʼé binanitʼaʼí danilíinii tʼáá ałtso nił ahaa nidaʼiilniihgo ayóó átʼéego nił yáʼátʼééh nítʼééʼ; dibé yázhí áádóó deenástsʼaaʼ índa tłʼízí éí ninaalyéhé biniyé nił ałghááʼ daʼiiʼnííł nítʼééʼ.
22 Shííba dineʼé áádóó Réíyamah dineʼé naʼiiłniihí danilíinii nił ahaa nidaʼiilniih nítʼééʼ; chʼiyáán bił álʼíní spáis wolyéii tʼáá ałʼąą ádaatʼéii tsʼídá tʼáá ałtso índa tsé daʼílíinii ałʼąą ádaatʼéii áádóó óola éí ninaalyéhé biniyé nił ałghááʼ daʼiiʼnííł nítʼééʼ.
23 Héíran áádóó Kánii áádóó Ííden áádóó Ásher índa Kílmad dahoolyéédę́ę́ʼ* dineʼé éí ninaalyéhé biniyé nił ahaa nidaʼiilniih nítʼééʼ.
24 Díí kódahoolyéédę́ę́ʼ lą́ą ééʼ daʼílíinii áádóó ééʼ tsídídééh nahalingo łichíʼígíí áádóó naʼatʼą́hí bibąąhgóó nidaashchʼąąʼgo ádaalyaii áádóó ééʼ biih náʼniłí dilkʼis bee ályaii índa tłʼóół tsʼósí bee daastłʼóonii éí ninaalyéhé biniyé nił ałghááʼ daʼaʼnil nítʼééʼ.
25 Társhishdóó tsinaaʼeełgi ádaatʼéii éí biiʼ naalyéhé ná háádadilbı̨́įhgo tsinaaʼeeł hééł biiʼ ayóó áníłdáasgo ná dah daʼíyeeh łeh nítʼééʼ, áko éí tsinaaʼeeł ná nídadiʼoł nítʼééʼ.
26 Diné éí tsin yee nidaʼałʼeełii tónteel dahiníyı̨́ biiʼgóó nił daʼíłʼeeł; haʼaʼaahdę́ę́ʼ deeyolgo tónteel ałníiʼgi níyol éí tsinaaʼeeł niyiiztiʼ.
27 Nitʼíinii áádóó ninaalyéhé áádóó ląʼígo naalyéhé yíyéełii áádóó diné nidaʼałʼeełii áádóó bikʼehgo nidaʼaʼeełii áádóó tsinaaʼeeł tó biih daazlı̨́ı̨́dę́ę́ʼ yidánídaʼdiʼaʼii áádóó diné naalyéhé baa dahéenííhdóó deiyéełníihii áádóó diné nidaabaahii índa siláo dah naazhjaaʼgo dah deínéehii tʼáá bóóltąʼgo ałtso atíniʼdiilyaa bijı̨́ı̨́ góneʼ éí tʼáá átʼé taah doołdas.
28 Diné ná nidaʼałʼeełii hadadeeshghaazhgo ninaagóó kéyah ditłid doo.
29 Tsin bee naʼalʼeełí yee nidaʼałʼeełii tʼáá ałtso áádóó bikʼehgo nidaʼaʼeełii ałdóʼ tʼáá ałtso tsinaaʼeeł yiiʼdę́ę́ʼ haakaigo tábąąhgóó naazı̨́;
30 ayóó íitsʼaʼgo daachxa doo áádóó atínídadindleeh áádóó łeezh dibahí bitsiitsʼiin yikʼídayiighaas doo índa łeeshchʼiih tahgóó nidaamaas dooleeł;
31 niniinaa bitsiiʼ ałtso deidooshih áádóó tłʼoh azis binííʼ gónaa nídeidoołtʼih, tʼáá íiyisí nąąh dabíniʼgo naa atínídadindleeh doo.
32 Niniinaa ákʼidadiitʼaahgo naa yínííł danilı̨́įgo naa daachxago ádaaníi doo, Tónteel ałníiʼdi Táir ábiʼdisdįįdígi átʼéegoshąʼ háí déesxéél?
33 Tónteel wónanídę́ę́ʼ ninaalyéhé bił haʼnaa niʼiiʼeeł yę́ędą́ą́ʼ diné tʼóó ahayóí bił tʼáá daʼáko nítʼééʼ; niyódí áádóó ninaalyéhé tʼóó ahayóígíí bee nihokááʼgóó aláahgo naatʼáanii danilíinii yee daʼastʼįįd.
34 Kʼad éí tónteel bee nihíníltǫʼgo táłtłʼááh góyaa ííníltsʼid; ninaalyéhé áádóó diné niiʼ yílʼáá nítʼééʼ yę́ę tʼáá ałtso nił taah yíłdááz.
35 Tónteel bibąąhgóó diné eelʼáii éí tʼáá ałtso nikʼee tʼóó bił adahayóí; aláahgo naatʼáanii hondantʼáii éí tʼáá ałtso nídaaldzid áádóó biniiʼjįʼ yee doo ákódanoolnin da.
36 Diné bitahgóó diné baa nidaʼiiniihii éí ałjeeh nídanilniih; tʼóó hóyéʼígi átʼéego nihoníníłʼąąd; hoolʼáágóó doo nááhonídlǫ́ǫ da doo.
Footnotes
^ Dził Hérman hoolyéii éí Áman dineʼé bizaad kʼehjí Sííner hoolyé.
^ Gálilii kéyah haʼaʼaahjigo kéyah Béíshan hoolyé.
^ Tónteel biyiʼdi kéyah hááʼáhígíí.
^ Sáídan éí tónteel bibąąhdi Táir náhookǫsjigo kin haalʼá.
^ Árvad éí táyiʼdi kéyah hááʼáhígi kin haalʼá.
^ Bíblas ałdóʼ hoolyéii Sáídan náhookǫsjigo kin haalʼá.
^ Bikéyah nítʼéʼígíí éí díí jı̨́ kéyah Térkii hoolyé.
^ Asíriya kéyahgi kin hadaasʼá.
