Ezekiel 28:1-26
28 Bóhólníihii shichʼįʼ haadzíiʼgo kóní,
2 Diné nílíinii, Táir dineʼé binanitʼaʼí nilíinii ábidiní, Bóhólníihii Diyin God kóní, Tʼóó báhádzidígi átʼéego ádaa hóʼniihígíí biniinaa, Diyin nishłı̨́įgo tónteel ałníiʼdi diyin danilíinii dah naháaztánídi atah dah sédá, dííníniid nidi, azhą́ diyin nahalingo honisą́ nínízin nidi, diné yeeʼ tʼéiyá nílı̨́; doo diyin nílı̨́į da.
3 Jó, Daniel biláahgo honíyą́; nidanilʼinii tʼáá ałtso nił bééhózin.
4 Honíyánígíí áádóó átʼé ninizı̨́ʼígíí bee daatʼíinii nishóhwiisíníłtʼeʼ; yitʼíinii siyı̨́įjįʼ óola índa béésh łigaii áłah íinilaa.
5 Tʼáá íiyisí baa honíyą́ągo naalyéhé diné bił ałghááʼ daʼiyíʼníłígíí bee nitʼíinii bíhiniideeʼ, áko nitʼíinii tʼóó báhádzidígi átʼéego bee ádaa hóʼniih sínílı̨́ı̨́ʼ;
6 éí bąą Bóhólníihii Diyin God kóní, Diyin hóyánígíí nahalingo ádaa nitsíníkeesígíí biniinaa,
7 ałʼąą dineʼé bitahdę́ę́ʼ déʼéyóní danilíinii tsʼídá agháago tʼóó báádahadzidii nikʼijįʼ biʼdeeshnihgo nibee hódząʼ ayóó ánoolninii atídeidoolííł biniyé bidiltłish hadeidiyoodzı̨́ı̨́s, jóʼakon, áádóó ayóó áhonóolninii deidoołchxǫǫł.
8 Aʼáán góyaa adanihidiyoołtłʼił; tónteel ałníiʼdi diné nidaaztseedígi átʼéego dadínóohnééł.
9 Áko daatsʼí diné tʼéiyá nílı̨́įgo doo diyin nílı̨́ı̨́góó diné niʼniiłhínígíí binááł, Diyin nishłı̨́, tʼahdiísh diníi doo?
10 Déʼéyóní nidanihiłtseedgo diné doo bąąh nídahineeshgizhii daninéhígi átʼéego dadínóohnééł. Shí díí bee haasdzííʼ, ní Bóhólníihii Diyin God.
Táir dineʼé aláahgo binanitʼaʼí baa yínííł hasin
11 Nááʼáłdóʼ Bóhólníihii shichʼįʼ hanáánáádzíiʼgo kóní,
12 Diné nílíinii, Táir dineʼé aláahgo binanitʼaʼí baa yínííł nanináago baa nichago ábidiní, Bóhólníihii Diyin God kóní, Tʼáá ałtsojįʼ ayóó áníínílningo bee hódzáanii niiʼ hadeezbingo nee ééhózin nítʼééʼ.
13 Diyin God bidáʼákʼehgi Ííden hoolyéegi sárdiyas áádóó tópaz índa dáíman, tsé béril áádóó ániks índa jásper, áádóó sáfair áádóó émerald índa kárbankal tsé daʼílíinii nikʼéstiʼ nítʼééʼ; óola binaʼazhnishgo áádóó tsé daʼílíinii binídahaʼnííł áádóó óola bikʼi nijishkʼaazhgo ániʼdiilyaa nítʼééʼ; ániʼdiilyaa bijı̨́ yę́ędą́ą́ʼ éí hashtʼedaalyaa.
14 Diyingo naalʼaʼí chérab atsʼániníłtı̨́įgo aa áhályáanii nílı̨́į doogo nininíłtı̨́; tsékǫʼ bitahgóó háádiidáahgo Diyin God bidził diyinii bikáaʼgi honílǫ́ǫ́ nítʼééʼ.
15 Ániʼdiilyaa yoołkááłdóó doo ákwii éʼétʼéii niyiʼ yiiltsą́ yoołkáałjįʼ tʼáadoo bee nikʼíhótʼahígóó yíníyá.
16 Tʼáá íiyisí tʼóó bee neʼádíláahgo ninaalyéhé tʼóó ahayóígíí dadineʼé bił ałghááʼ daʼayíʼníiłgo asínísiih; éí bąą Diyin God bidził bitsʼą́ąjįʼ doo nildingóó nahjįʼ haninííłchą́ą́ʼ áádóó diyingo naalʼaʼí chérab aa áhályáanii nílíinii tsékǫʼ dadéekʼą́ąhii bitsʼą́ą́dóó nahjįʼ haninííyood.
17 Ayóó áníínílninígíí bąą tʼáá íiyisí ádaa hóʼniih nítʼééʼ; naa haʼniihígíí biniinaa bee honíyáanii ałtso yíníłchxǫʼ. Aláahgo naatʼáanii danilíinii daniníłʼı̨́į doo biniyé niʼ bikáaʼjįʼ hadaniyííłhan.
18 Daashíínéelą́ą́ʼgóó doo ákwii íínítʼįįdígíí bee diné binaʼíloʼgo naalyéhé bił ałghááʼ daʼiyíʼníiłgo nisodizin biniyé nahazʼą́ą́góó doo ílı̨́ı̨́góó íinilaa; éí bąą nihitahdóó kǫʼ hadíínóodgo ałtso andííłkʼą́ą́ʼ áádóó diné binááł nihokáaʼgi łeeshchʼiih tʼéiyá nísínídlı̨́įʼgo ániishłaa.
19 Dadineʼé dabitahdę́ę́ʼ néédahósinii nikʼee tʼóó bił adahayói doo; bikʼeʼíyéʼígi átʼéego tʼáá kódíjįʼ honílǫ́ǫgo nihodoolzhish; kʼad éí hoolʼáágóó doo nááhonídlǫ́ǫ da doo.
Sáídan dineʼé bichʼįʼ náasdi áhodoonííł baa haneʼ
20 Áádóó Bóhólníihii shichʼįʼ hanáánáádzíiʼgo kóní,
21 Diné nílíinii, Sáídan bichʼįʼgo dah díníitʼaahgo, Kónihidiʼdoolnííł, bidiníigo bichʼįʼ handziihgo
22 ábidiní, Bóhólníihii Diyin God kóní, Sáídan nílíinii, nikʼijįʼ nishłı̨́, jóʼakon; nihitahgi bee ayóó áníshtʼéii yitʼíní ádeeshłííł, áko haa nísístʼįįdgo áádóó dinishyinígíí hachʼįʼ yitʼíní áshłaago Bóhólníihii nishłı̨́įgo hoł béédahodoozįįł.
23 Áko naałniih hakʼijįʼ bideeshnihgo tʼáá ałtsodę́ę́ʼ diltłish bee atíhoʼdilʼı̨́įgo diné naatseedígíí éí hatahgóó naaʼahindéeh doo áádóó bidił éí kintaa daʼaztiingóó danílı̨́į doo; áadi índa Bóhólníihii nishłı̨́įgo hoł béédahodoozįįł.
24 Ízrel dineʼé binaagóó diné kéédahatʼı̨́įgo hakʼee dadiniihii éí bitahdę́ę́ʼ hosh doo łaʼ haa anáádadoojił da, índa doo łaʼ hanáábidooshah da; áadi índa Bóhólníihii Diyin God nishłı̨́įgo hoł béédahodoozįįł.
25 Bóhólníihii Diyin God kóní, Ízrel dineʼé éí ałʼąą dineʼé dabitahgóó tabidiʼnooskaadii bitahdę́ę́ʼ áłah ánáshdlaago éí binahjįʼ dinishyinígíí ałʼąą dineʼé binááł yitʼíní ádeeshłííł, áko shá naalʼaʼí Jéíkab kéyah baa diníʼáanii áadi índa éí biiʼ kéédahojitʼı̨́į doo.
26 Diné hanaagóó kéédahatʼı̨́įgo hakʼee dadiniihii éí tʼáá ałtso há beiníshtʼı̨́įgo ákwii tʼáadoo hainítʼínígóó kéédahojitʼı̨́į doo; ákwii kin nidazhdoonił, áádóó chʼil naʼatłʼoʼii deílʼáago ádazhdoolííł; ákwii tʼáadoo hainítʼínígóó kéédahojitʼı̨́į doo, áko índa haDiyin God Bóhólníihii nishłı̨́įgo bił béédahodoozįįł.
