Ezekiel 29:1-21
29 Neeznáá náhááh góneʼ, neeznáá yiziłígíí binih, naakitsʼáadah yoołkáałgo Bóhólníihii shichʼįʼ haadzíiʼgo kóní,
2 Diné nílíinii, Ííjip dineʼé aláahgo binanitʼaʼí Féro bikʼijįʼ nílı̨́įgo, Kónítʼée dooleeł, bidiníigo áádóó Ííjip kéyah tʼáá náhwiistʼą́ą́ nítʼééʼ, Kótʼée dooleeł, diníigo bichʼįʼ handziih.
3 Bóhólníihii Diyin God kóní, diníigo handziih, Ííjip dineʼé binanitʼaʼí nílíinii, Féro nikʼijįʼ nishłı̨́, jóʼakon; naʼashǫ́ʼii łibáhítsoh táyiʼ sínítíinii, Náil tooh nílínígíí éí tʼáá shí ádá áshłaa, diní.
4 Łóóʼ bee hahadleehí béésh nídaazhahígíí niyaatsʼiin bee deeshahgo nitooh nílı̨́įgo biiʼ łóóʼ hólónígíí nikágí dichʼízhígíí bídaashjééʼ ádeeshłíiłgo, éí tʼáá átʼé tʼáá bił handeeshłoh.
5 Áádóó ni lá índa nitooh biih daazlínígíí biyiʼdóó łóʼígíí tʼáá átʼé tʼáá bił honoojíígóó tʼáá áhoodzaajįʼ anihidiʼyoolkał; doo nánihidiʼyoodlahgo yóóʼádanihiʼdidoolníił da; naaldlooshii danihidooldił áádóó tsídii danihidoolghałgo baa nihidiníʼą́.
6 Ákohgo Ííjip kéyahdi kéédahojitʼínígíí tsʼídá tʼáá ádzíłtso Ízrel dineʼé bilókʼaaʼ gish dajílı̨́ı̨́ nítʼéʼígíí bąą Bóhólníihii nishłı̨́įgo hoł béédahodoozįįł.
7 Danisiłgo nihíníltǫʼ áádóó tʼáá biwosjįʼ baa adashínízhoozh; nikʼijįʼ híniijééʼ silı̨́įʼgo nihíníltǫʼgo tʼáá ałtso nidaʼntʼiʼgo íinilaa.
8 Éí bąą Bóhólníihii Diyin God kóní, Diltłish nihiniyé deeshtı̨́įłgo diné áádóó naaldlooshii nihitsʼą́ą́dóó nideestsił, jóʼakon.
9 Ííjip kéyahgi doo naagháhí da doo; tʼáánííʼ tʼéí hadaasgai doo, áadi índa Bóhólníihii nishłı̨́įgo bił béédahodoozįįł.
Náil tooh nílínígíí áshłaa, áádóó éí shí, dííníniidígíí bąą
10 nikʼijįʼ nishłı̨́, jóʼakon, áádóó nitooh danílínígíí bikʼijįʼ nishłı̨́, áádóó tʼáá níléí Mígdal hoolyéédóó Saiyíínii hoolyéejįʼ, tʼáá éí Iithiyópiya kéyah bibąąhjįʼ Ííjip kéyahgi tʼáadoo biniyéhígóó hazʼą́ągo tʼáadoo bikááʼ siláhígóó áhodeeshłííł.
11 Éí kéyah biiʼgóó diné doo łaʼ chʼídoogáał da, índa naaldlooshii doo łaʼ ákǫ́ǫ́ chʼídooldlosh da, índa ákwii diné doo łaʼ kééhatʼı̨́ı̨́góó dízdiin nídoohah.
12 Kédaayah tʼáadoo bikááʼ siláhígóó nahazʼánígíí bitahgi Ííjip kéyah tʼáadoo bikááʼ siláhígóó áhodeeshłííł; kin hadaasʼáago ahiih nídahaasdáazgo áhoolyaa yę́ę bitahgi hakin hadaasʼá yę́ęgóó doo siláhígóó dízdiin nídoohah; Ííjip dineʼé éí ałʼąą dineʼé bitahgóó tahwiidínéeshkał áádóó kédaayahgóó tahwiidínéeshkał.
13 Nidi Bóhólníihii Diyin God kóní, Dízdiin nááhaidóó bikʼijįʼ Ííjip dineʼé, dadineʼé dabitahgóó tabidiʼnooskaadii áádę́ę́ʼ áłah ánáhodeeshdlííł,
14 áádóó Ííjip dineʼé daasnáanii nináhideeshʼishgo kéyah biiʼ kééhojitʼı̨́ı̨́ nítʼééʼ yę́ęjįʼ Páthras kéyah áajįʼ anídahizhdooʼnééł, áko ákwii bee óhólnííh doo bidziilgóó kééhojitʼı̨́į doo.
15 Bee óhólnííh ádabóodziilígíí tsʼídá biʼohgo hadziil doo, áádóó ałʼąą dineʼé bitisdi tsʼídá doo hadziil náázhdoodleeł da, áko tsʼídá tʼáá íiyisí doo dadzísihgóó áhodeeshłíiłgo ałʼąą dineʼé tsʼídá doo binináázhnítʼáa da doo.
16 Áádóó Ízrel dineʼé éí Ííjip dineʼé nihíká oohjeeh nídabizhdiʼniihgo doo ákwii ádajoonííł nítʼééʼ yę́ę bénínádajilnihgo tsʼídá doo banáádaʼíízhdóodliił da; áadi índa shí Bóhólníihii Diyin God nishłı̨́įgo hoł béédahodoozįįł.
17 Naadiin tsostsʼid yihah góneʼ, áłtsé nídízííd binih, łaʼa jı̨́ı̨́ góneʼ Bóhólníihii shichʼįʼ haadzíiʼgo kóní,
18 Diné nílíinii, Bábilan dineʼé aláahgo binanitʼaʼí Nébukadnézzar bisiláo dah yinéłígíí éí Táir kin haalʼá yikʼijįʼ tʼáá íiyisí nayiishnishgo* tʼáá ałtso bitsiitsʼiin dadiwolgo ádaalyaa áádóó dabiwos éí bídáátʼóodgo ádaalyaa; azhą́ ákótʼéego Táir hoolyéegi siláo há nidaashnish lá nidi, bikʼé nidajishnishígíí tʼáadoo łaʼ shódajoostʼeʼ da.
19 Éí bąą Bóhólníihii Diyin God kóní, Bábilan dineʼé aláahgo binanitʼaʼí Nébukadnézzar éí Ííjip kéyah baa dideeshʼáałgo ákwii tʼóó ahayóí hanaalyeʼé áádóó bąąh daʼoogą́ąʼii índa tʼáadoo leʼé atídeileʼgo nishódayoostʼeʼii dah yididooyééł; éí dah yidiiyínígíí bisiláo yikʼéndaashnishii átʼée doo.
20 Naashnishígíí bąą Ííjip kéyah baa dideeshʼááł, háálá shá nidajishnish, ní Bóhólníihii Diyin God.
21 Áko éí bijı̨́ Ízrel dineʼé bitahgi adeeʼ łaʼ habidínéeséełgo* éí dineʼé bitahgóó yáníłtiʼgo ándeeshłííł, áko índa Bóhólníihii nishłı̨́įgo hoł béédahodoozįįł.
Footnotes
^ Nébukadnézzar éí Táir yikʼijįʼ anaaʼ yiłʼı̨́įgo táátsʼáadah nááhai.
^ Ízrel dineʼé bidziilgo ádeeshłííł, níigo ááhyiłní.
