Ezekiel 3:1-27
3 Nááʼáłdóʼ áshíłní, Diné nílíinii, naaltsoos yisdisgo nidááhgóó sitánígíí niyą́, áádóó Ízrel dineʼé bichʼįʼ dínáahgo bichʼįʼ hadíídzih.
2 Áko diichʼeeʼgo naaltsoos yisdisígíí shiyíísą́ą́ʼ.
3 Áadi áshíłní, Diné nílíinii, naaltsoos yisdisgo nizáátánígíí niyą́ągo bee hwiih nileeh. Áko yíyą́ąʼgo tsésʼná bitłʼizhgi átʼéego łikan.
4 Ánááshidiʼní, Diné nílíinii, Ízrel dineʼé bichʼįʼ dínáahgo ádíshnínígíí bee bichʼįʼ hadíídzih.
5 Ałʼąą dineʼé bizaad nidantłʼaii doo bichʼįʼ nidíłʼaʼ da, nidi tʼáá ni nidineʼé, Ízrel dineʼé bichʼįʼ nidíłʼaʼ.
6 Ałʼąą dineʼé bizaad doo bikʼizhdootą́ą́ʼ átʼéii nidantłʼaii doo bichʼįʼ nidíłʼaʼ da. Tʼáá aaníí, ákódaatʼéii bichʼįʼ anííłʼaʼgo tʼéí dandidootsʼı̨́ı̨́ł.
7 Nidi Ízrel dineʼé doo dashíistsʼą́ʼígíí bąą doo daníistsʼą́ąʼ da doo; Ízrel dineʼé tʼáá ałtso shichʼįʼ nidaalteeh áádóó shichʼįʼ bijéí dantłʼiz.
8 Shoo, ádahodineestłʼisii bikʼijįʼ tʼah biláhígo áhodíníltłʼisgo áádóó doo łaʼ nijóleʼ átʼéégóó ániishłaa.
9 Nítááʼ tsé nitłʼizii bilááh átʼéego nitłʼizgo áshłaa; tʼáadoo bééníldzidí áádóó ádanoolninii tʼáadoo bikʼee nił yéʼí, háálá nidaalteehii danilı̨́.
10 Áádóó áshíłní, Diné nílíinii, bee nichʼįʼ hahideesdzihígíí éí tʼáá ałtso didíítsʼı̨́įłgo nijéí biyiʼdi hashtʼeʼninihidíínił.
11 Bił yisnááh danilíinii bichʼįʼ dínááh, áko daníistsʼą́ąʼgo, éí doodaléiʼ doo daníistsʼą́ą́ʼgóó ábidiní, Bóhólníihii Diyin God kóní, diníi doo.
12 Ákohgo níłchʼi de dashidiiłtı̨́ı̨́ nítʼééʼ, shikéédę́ę́ʼ iinééʼ ayóó átʼéego diistsʼą́ąʼgo ání, Bóhólníihii bił hazʼą́ą́dóó bitsʼádiʼnílíidii éí baa haʼniih leʼ.
13 Hodiistsʼą́ʼígíí éí dahináanii bitʼaʼ ahidadiiʼáago deítʼáhígíí éí íitsʼaʼ lá áádóó bąąs bíighah dah dadiitʼaʼígíí éí ayóó átʼéego dadiitsʼaʼ lá.
14 Áko níłchʼi éí dashidiiłtı̨́įgo yóóʼashííłtı̨́; Bóhólníihii tʼáá íiyisí shikʼi déesniiʼgo shitah nahwiiłnáago índa shináháshchʼíiʼgo shił nahonchiihgo dah diiyá.
15 Áko Kííbar tooh nílínígíí bibąąhgi Tel-éíbib hoolyéhídi* yisnááh kéédahatʼı̨́įdi níyá; ákwii naháaztánígi nédá tʼáadoo ánáánáoshneʼégóó bitahgi tsostsʼid shiiską́.
Ízrel dineʼé éí haʼasíidii bá niiltı̨́ (Ezek. 33:1-9)
16 Tsostsʼid yiskánígíí éí bíighah azlı̨́įʼgo Bóhólníihii shichʼįʼ haadzíiʼgo ání,
17 Diné nílíinii, Ízrel dineʼé bá haʼasíidii dííleeł biniyé nininíłtı̨́; bee nił hashneʼígíí dinitsʼaʼgo yíiyá łáaniʼ hodishnínígíí ałdóʼ bee bił dahólneʼ.
18 Diné tʼáá íiyisí doo yáʼáshóonii, Tʼáá aaníí dadíítsaał, bidííniidgo tʼáadoo bee biʼííníłniiʼgóó diné tʼáá íiyisí doo yáʼáshóonii bidoo yáʼáshǫʼ bitsʼą́ą́dóó yisdádoogááł biniyé tʼáadoo bee bił hwíínílneʼgóó tʼáá éí diné doo yáʼájíshǫ́ǫ́góó ádił niʼdziisíiʼii éí tʼáá bił dazdootsaał, áko ni bidił bee nihodiitʼiʼ doo.
19 Nidi diné tʼáá íiyisí doo yáʼáshóonii díí bee bił hwíínílneʼgo bidoo yáʼáshǫʼ tʼáadoo yóóʼiidííʼą́ą́góogo doo ákwii áátʼįįdii tʼáá yił dadootsaał, nidi ni éí doo bee nihodiitʼiʼ da doo.
20 Nááʼákóneʼ, Diné tʼáá ákogi átʼéii éí tʼáá ákogi átʼéego hináanii yitsʼą́ąjįʼ kódzaago áádóó doo ákwii áánííłgóó deeyáago áádóó bidínóołtłʼahii bidáahgi hólǫ́ǫgo áshłaago éí diné bibąąhági átʼéii tʼáá yił dadootsaał; tʼáadoo bee bił hwíínílneʼígíí biniinaa dadootsaał índa tʼáá ákogi ááníiłii hináá nítʼééʼ yę́ę éí doo bééhániih da doo, áko ni bidił bee nihodiitʼiʼ doo.
21 Ákondi diné tʼáá ákogi ááníiłii tʼáadoo ádił niʼiyísíhí bidííníniidgo, áko doo ádił niʼiisííhgóó hináago, éí diné tʼáá aaníí hináa doo, háálá bee bił hwíínílneʼígíí yiʼiilaa, áádóó ni éí doo bee nihodiitʼiʼ da doo.
Iizííkiyel doo yáłtiʼgóó ábidiʼdoolnííł
22 Ákwii Bóhólníihii shideelchidgo áshidííniid, Nídiidáahgo halgaigóó dínááh; áadi nił hodeeshnih.
23 Áko dah diiyáago halgaigóó níyá; nítʼééʼ Kííbar tooh bibąąhgóó Bóhólníihii bee bitsʼádiʼnílíidii yiiłtsáanii ákwii sizı̨́įgo náánéiłtsą́, jóʼakon, áko tséʼyaa níshjool.
24 Áko nítʼééʼ Níłchʼi Diyinii shiih hóóleʼgo shiisįʼ, áko shichʼįʼ haadzíiʼgo áshidííniid, Nílááh, nighan góneʼ ádá diʼníłkaał.
25 Nidi ni, diné nílíinii, shoo, tłʼóół niniyé nideidooniłgo éí yee nidaʼdootłʼóołgo doo bitaa nináa da doo.
26 Áádóó nitsooʼ nizahatʼáagi bídoołjahgo ádeeshłííł, áko doo yáníłtiʼgóó doo dahodíteh da doo, háálá nidaalteehii danilı̨́.
27 Nichʼįʼ yáshtiʼgo handiyeesdzihgo kóbididííniił, Bóhólníihii Diyin God kóní, diníi doo. Tʼáá háiida shíistsʼą́ąʼii hániʼdii shíistsʼą́ą́ʼ índa tʼáá háiida doo tʼáá kʼad shidiiztsʼą́ąʼii éí hániʼdii ákójítʼé, háálá nidaalteehii danilı̨́.
Footnotes
^ Bábilan kéyahgi Nípor kin haalʼá bíighahgi hazʼą́.